Laçın: problemlərin sürətli həlli adamlarda sabaha böyük inam yaratmışdır

Laçın Rayon İcra Hakimiyyətindəki ümumrayon toplantısında Prezident İlham Əliyevin rəhbərliyi ilə keçirilmiş Nazirlər Kabinetinin bu ilin birinci yarısının sosial-iqtisadi yekunlarına həsr olunmuş geniş iclasının tələblərindən irəli gələn vəzifələr və son 6 ayda əldə olunmuş uğurlar ətraflı müzakirə olundu, qarşıdakı dövrün əsas inkişaf istiqamətləri müəyyənləşdirildi. Məruzə və çıxışlarda göstərildi ki, regionların sosial-iqtisadi inkişafı, qaçqın və köçkünlərin problemlərinin həlli ilə bağlı ölkə rəhbərliyinin həyata keçirdiyi ardıcıl, məqsədyönlü proqramlar respublikanın digər bölgələri kimi Laçın rayonunda da ciddi nailiyyətlər qazanılmasına gətirib çıxarmışdır.

Laçın Rayon İcra Hakimiyyətinin başçısı Ramiz Cəbrayılov son illərdə Azərbaycanda və rayonda əldə edilmiş sürətli inkişafın əsas göstəricilərini qeyd etdikdən sonra ilin birinci yarısının sosial-iqtisadi uğurlarını geniş şərh etdi:

— Nazirlər Kabinetinin 2009-cu ilin birinci yarısının sosial-iqtisadi inkişafının yekunlarına həsr olunmuş iclasında Azərbaycan Respublikasının Prezidenti İlham Əliyevin proqram nitqindən irəli gələn vəzifələr baxımından təhlil göstərir ki, ötən dövrdə ölkəmizin hər yerində olduğu kimi, rayonumuzda da xeyli işlər görülmüşdür. Məcburi köçkünlərin yaşayış şəraitinin yaxşılaşdırılması istiqamətində bir çox tədbirlər həyata keçirilmişdir. İlin birinci yarısında respublikanın 28 rayon və şəhərində 72 səyyar qəbul keçirirmiş, 875 nəfər məcburi köçkün dinlənilmişdir. Qaldırılmış problemlər dərindən təhlil edilərək müvafiq tədbirlər planı hazırlanmışdır. Artıq bu problemlərdən 623-ü və ya 71 faizi müsbət həll olunmuş, qalan müraciətlər isə nəzarətə götürülərək müvafiq tədbirlərin görülməsi nəzərdə tutulmuşdur.

Taxtakörpü qəsəbəsi və məcburi köçkünlərimizin sıx məskunlaşdıqları digər ərazilərdə tikinti-abadlıq işləri uğurla davam etdirilmişdir. Taxtakörpü qəsəbəsində 2 hektarda salınmış Heydər Parkında əlavə olaraq 3 min ağac və gül kolları əkilmişdir. Hazırda parkda abadlıq işləri davam etdirilir.

Əksər icra strukturlarının fəaliyyət göstərdiyi Taxtakörpü qəsəbəsində Dövlət Sosial Müdafiə Fondunun rayon şöbəsi, Əhalinin Sosial Müdafiəsi və Məşğulluq Mərkəzləri üçün yeni inzibati binaların tikintisində son tamamlama işləri görülməkdədir. Ərazidə sahibkarlığın inkişafı üçün yaradılmış şəraitin nəticəsi olaraq Taxtakörpü qəsəbəsində qənnadı, çörəkbişirmə, dülgər sexləri, ticarət və ictimai iaşə müəssisələri üçün binalar tikilir.

Qaçqınların və Məcburi Köçkünlərin İşləri üzrə Dövlət Komitəsi ilə aparılmış məqsədyönlü iş nəticəsində Taxtakörpüdə və respublikanın digər ərazilərində məskunlaşmış məcburi köçkünlərin elektrik enerjisi ilə bağlı problemlərinin həll olunması məqsədilə 3 transformator quraşdırılmışdır. 6 kilometr uzunluğunda elektrik xətti yenisi ilə əvəz olunmuşdur. Daxili imkanlar hesabına 26 müxtəlif transformatorda, 19 kilometr elektrik hava xəttində əsaslı və cari təmir işləri aparılmış, 28 dayaq yenisi ilə əvəz olunmuşdur. Görülmüş işlərlə yanaşı, elektrik enerjisi verilişində müəyyən fasilələr haqlı narazılıqlara səbəb olur. Transmformator, elektrik naqili təchizatı yalnız Dövlətqaçqınkom tərəfindən həyata keçirilir. Taxtakörpü ərazisinə xidmət göstərən İmişli Yüksək Gərginlikli Elektrik Şəbəkəsi də təchizat məsələlərinə diqqəti artırmalı, payız-qış mövsümündə əhalinin fasiləsiz elektrik enerjisi ilə təchiz edilməsi üçün konkret tədbirlər görməlidir.

Natiq daha sonra bildirdi ki, Taxtakörpü ərazisində müvəqqəti məskunlaşmış məcburi köçkünlərin təsərrüfat suyuna olan tələbatının ödənilməsi məqsədilə 6 nasos, 21 hidrotexniki qurğu əsaslı və cari təmir edilmiş, 14 saylı nasos stansiyasında dizel mühərriki yenisi ilə əvəz olunmuşdur. 35,6 kilometr uzunluğunda kanal lildən təmizlənmişdir. Suvarma Sistemləri İdarəsinin inzibati binasının həyətində abadlıq işləri həyata keçirilmişdir. Ötən ildən aparılan meliorasiya işləri ilin birinci yarısında da davam etdirilmişdir.

Məcburi köçkünlərin içməli su təminatının yaxşılaşdırılması məqsədilə 650 metr xəttdə təmir işləri aparılmışdır. Taxtakörpü su xəttinin 460 metr hissəsi yenisi ilə əvəz olunmuşdur. Prezident İlham Əliyevin “Əhalinin ekoloji cəhətdən təmiz, su ilə təminatının yaxşılaşdırılması ilə əlaqədar əlavə tədbirlər haqqında” Sərəncamına uyğun olaraq, Mişni, Alxaslı, Qarıqışlaq və Qarakeçdi obalarında sutka ərzində 20 ton su hasil edən modul tipli sutəmizləyici qurğuların quraşdırılmasına başlanılacaq.

Hesabat dövründə 55 saylı Yol İstismar İdarəsi Taxtakörpü ərazisində 4 kilometr çınqıl örtüklü yol təmir etmiş, ərazidəki avtomobil yolunun 50 kilometr hissəsində cari təmir işləri həyata keçirmişdir. Taxtakörpü qəsəbəsində 2350 kvadratmetr sahəyə asfalt örtük salınmışdır.

Dövlət başçısı İlham Əliyevin kənd təsərrüfatının inkişafına göstərdiyi yüksək diqqət və qayğı nəticəsində rayonumuzun məcburi köçkünləri üçün də lazımi şərait yaradılmışdır. 2009-cu ilin məhsulu üçün taxıl səpilmiş 3026 hektar sahədən 9532,6 ton məhsul əldə olunmuşdur. Bu, ötən ilin müvafiq dövrünə nisbətən 405 ton çoxdur. Rayonun 1098 nəfər kənd təsərrüfatı istehsalçılarının istifadə etdikləri yanacaq və motor yağlarına görə yaxın günlərdə 5253 hektar əkin sahəsi üçün 210 min manat vəsait ödəniləcək. Taxtakörpü ərazisində əhali və fermer təsərrüfatlarına “Aqroservis” müəssisənin 12 kənd təsərrüfatı texnikası xidmət göstərir. “Aqroservis” müəssisəsi öz maddi-texniki bazasını yaxşılaşdırmaq üçün Aqrolizinq Açıq Səhmdar Cəmiyyəti ilə lazımi iş aparmalı və müəssisə üçün əlavə maşın və mexanizmlər almalıdır. Taxtakörpü ərazisində heyvandarlıq və əkinçiliyin inkişaf etdirilməsi və bu sahədə çalışanlara lazımi şərait yaradılması üçün də tədbirlər həyata keçirilir.

İlin birinci yarısında rayonun təhsil, səhiyyə və mədəniyyət müəssisələrinin fəaliyyətində müəyyən irəliləyişlərə nail olunmuşdur. 2008-2009-cu dərs ilində fəaliyyəti olmayan məktəblər barədə tədbirlər görülmüş, 118 sinif komplekti ləğv olunmuşdur. Rayonun orta ümumtəhsil məktəblərinin buraxılış imtahanlarında şagirdlərin 82 faizi orta təhsil haqqında attestat almışdır. Uzun illər fəaliyyəti hiss olunmayan 127 saylı Texniki Peşə Məktəbində irəliləyişə nail olunmuşdur. Ötən 6 ay ərzində məktəbdə əsaslı təmir, abadlıq işləri görülmüş, maddi-texniki bazanın möhkəmləndirilməsi, əmək intizamının gücləndirilməsi, təlimin keyfiyyətinin yüksəldilməsi üçün lazımi tədbirlər həyata keçirilmişdir.

Mədəniyyət və Turizm Şöbəsinin və onun tabeliyində olan müəssisələrin fəaliyyətinin yaxşılaşdırılması, bu sahədə nöqsanların aradan qaldırılması istiqamətində tədbirlər həyata keçirilir. Əhalinin asudə vaxtının təşkili, adamlarda mədəniyyətin müxtəlif sahələrinə maraq yaradılması diqqət mərkəzindədir.

2009-cu ilin I yarısında rayon mərkəzi xəstəxanası 150 nəfər məcburi köçkünün respublikanın ixtisaslı xəstəxanalarında güzəştli şərtlərlə müayinə və müalicəsini təşkil etmişdir. Təcili yardım şöbəsi 848 xəstəyə tibbi xidmət göstərmişdir. Əksər tibb müəssisələrinin fəaliyyətini yaxşılaşdırmaq üçün mərkəzi xəstəxananın rəhbərliyi qəti tədbirlər görməlidir. Gigiyena və Epidemiologiya Mərkəzi Taxtakörpüdə və məcburi köçkünlərinin məskunlaşdıqları digər ərazilərdə yoluxucu xəstəliklərə qarşı profilaktiki tədbirlər aparmışdır. Ərazidə ciddi xəstəliklər qeydə alınmamışdır. Bruselyoz xəstəliyi isə problem olaraq qalmaqdadır.

Əhalinin rifahı və onlara göstərilən yardımlarla bağlı məruzəçi bildirdi ki, ilin əvvəlindən 3695 nəfərə əmək pensiyası, 1892 nəfərə sosial müavinət və təqaüd ödənilmişdir. 9 nəfərə işsizlik statusu verilmiş, 19 nəfərə işsizlik müavinəti təyin olunmuşdur. Hazırda orta aylıq məbləği 91 manat olmaqla, 1237 nəfəri əhatə edən 266 ailəyə ünvanlı sosial yardım ödənilir. Rayonun 64205 nəfər məcburi köçkün sakininə ərzaq müavinətinin vaxtında ödənilməsi təmin edilmişdir.

Yanvar ayından “Kapital Bank” Açıq Səhmdar Cəmiyyətinin Laçın rayon filialı fəaliyyətə başlamışdır. Filial 6 ay ərzində 530 əməkhaqqı, 2879 yemək xərci, 148 pensiya kartı hazırladaraq sahiblərinə çatdırmışdır.

Maddi cəhətdən imkansız ailələrə, xəstələrin müalicə olunmasına, vəfat edənlərin yas mərasimlərinin keçirilməsinə diqqət artırılmışdır. Ötən 6 ay ərzində maddi cəhətdən ən imkansız 615 nəfər məcburi köçkünə rayon icra hakimiyyəti maddi kömək göstərmişdir. Daxili imkanlar hesabına müharibə veteranlarının hər birinə 50 manat olmaqla, 3100 manat pul verilmişdir. Rayonun işğalı günü ilə əlaqədar 60 şahid və əlil ailəsinə ərzaq bağlamaları paylanmışdır.

“Dünyaya Baxış” Beynəlxalq Humanitar Təşkilatı Taxtakörpü ərazisində məskunlaşmış 1500 ailəyə uşaq geyimləri paylamışdır. “Qızıl Aypara” Cəmiyyətinin rayon komitəsi Bakı və Sumqayıt şəhərlərində məskunlaşmış 190 nəfər tənha, kimsəsiz qocaya ərzaq yardımı çatdırmışdır. Həmkarlar təşkilatları imkansız 172 ailəyə maddi kömək etmişdir.

Bu gün qarşıda duran əsas vəzifələrdən biri Taxtakörpü ərazisində qamış evlərdə məskunlaşmış 3400 məcburi köçkün ailəsi üçün istismar müddəti başa çatmış qəsəbənin yerində yeni daş evlərin tikilməsi, bütün infrastrukturu olan qəsəbələrin salınmasının sürətləndirilməsidir. Torpaqların şoranlaşmasının qarşısının alınaraq, yararlı hala gətirilməsi üçün meliorasiya tədbirlərinin davam etdirilməsi və işsizliyin aradan qaldırılması üçün yeni istehsal sexlərinin yaradılmasına nail olunması da qarşıda duran məsələlərdəndir. Suvarma Sistemləri, 55 saylı Yol İstismar, Sukanal idarələrinin maddi-texniki bazalarının möhkəmləndirilməsi üçün yeni maşın və mexanizmlərin alınmasına da diqqət artırılmalıdır.

Başçı məruzəsini bu sözlərlə bitirdi:

— Möhtərəm Prezidentimiz İlham Əliyevi bir daha əmin edirik ki, laçınlılar qarşıda duran mühüm vəzifələrin vaxtında və keyfiyyətlə yerinə yetirilməsinə nail olacaq və rayonun sosial-iqtisadi inkişafı üçün mümkün olan bütün tədbirləri həyata keçirəcəklər.

Toplantıda çıxış edən digər natiqlər ayrı-ayrı sahələrdə qazanılmış uğurlardan və həlli vacib məsələlərdən söz açdılar. Qərara alındı ki, bu ilin bol taxılından kənarda yaşayan laçınlılara da pay ayrılsın. Sonda təqaüdə çıxmış bir qrup dövlət qulluqçusu RİH-in fəxri fərmanları və qiymətli hədiyyələrlə təltif olundu, çoxillik səmərəli fəaliyyətlərinə görə rayon ictimaiyyəti adından onlara təşəkkür elan olundu.

Tahir AYDINOĞLU,

Ziyəddin SULTANOV

Xalq qəzeti.- 2009.- 29 iyul.- S. 4.