“Regional cavab - 2009" təlimləri böyük təcrübə məktəbi oldu

– Təlimlərin gedişatını və nəticələrini incələyərkən Azərbaycan Silahlı Qüvvələrinin hərbi qulluqçularının sülhü dəstəkləmə əməliyyatları çərçivəsində öz vəzifələrini layiqincə yerinə yetirdiyinə görə çox böyük iftixar hissi keçirirəm, – deyən tabor komandiri zabit Fuad Məmmədov təlim barədə bizi məlumatlandırdı. O bildirdi ki, təlim planı üzrə ilkin ünsiyyət tədbirlərinin həyata keçirilməsi, təlimdə iştirak edən müxtəlif ölkə Silahlı Qüvvələri hərbi qulluqçularının qarşılıqlı hərbi anlayış və dostluq münasibətləri çərçivəsində hazırlıq dərslərinin keçirilməsi real məşqlər zamanı işləri asanlaşdırıb. Təlim müddətində bölmələrin təşkilati quruluşlarının sabitləşdirilməsi, tərəflərin silah sistemlərinin öyrənilməsi, tabeçilik prinsiplərinin müəyyənləşdirilməsi və s. mühüm fəaliyyətlər yerinə yetirilmişdir və yerinə yetirilməkdədir. Bütün təlim mövzuları nəzəri, nümayişanə və praktik məşğələlər ardıcıllığı ilə həyata keçirilmişdir.

Tabor komandiri olaraq demək istəyirəm ki, əsgərlərimiz arasında mövzuların mənimsənilməsində çətinlik müşahidə olunmamışdır. Bu da Silahlı Qüvvələrimizin müasir ordularla müqayisədə hərbi bilik və hazırlıq səviyyələrinin bərabərlik göstəricisidir.

Əməkdaşlıq edən Silahlı Qüvvələr nümayəndələrinin hərbi qulluqçularının xidmət müddətləri arasında fərqə baxmayaraq, Azərbaycan əsgərləri hər mövzuda nümunəvi nəticələr əldə etdilər. Təlim zamanı Azərbaycan hərbi qulluqçuları “günün əsgəri” adını bir neçə dəfə qazana biliblər. Buna nümunə olaraq radio-telefonçu əsgər Mikayıl Əliyevi misal çəkə bilərəm. O, yüksək səviyyədə rabitə əlaqələrini təmin etdiyinə görə bu ada layiq görülüb.

Sonra həmsöhbətimiz amerikalıların tabor komandiri mayor Deyvid Horlaker oldu. Qonaq zabit bildirdi ki, təlimin məqsədləri aydındır, təlimlər qaydasında davam edir, gözlənilən nəticələr əldə edilmişdir.

– Oxşarlıq çoxdur. Biz yaxşı iş qurmağa çalışırdıq. Bir gün biz, bir gün də sizin qərargah zabitləri brifinq keçirirdi. Burada hər şey ürəkaçandır, sizin hərbçilərlə tapşırığı yerinə yetirmək asandır və bütün səviyyələrdə onlar buna qadirdirlər. Burada öyrənilənlər və tətbiq edilən taktikalar gələcək illərdə təlimlərdə istifadə ediləcək və fayda verəcəkdir. Sizin maddi-texniki təsərrüfatınız, təlim üçün nəzərdə tutulmuş vasitələr çox gözəldir. Hər şey yüksək səviyyədədir və əladır. Yatacaq yerləri, məişət şəraiti, isitmə sistemləri, istirahət məkanları əla vəziyyətdədir. Bütün bunlar amerikalı əsgərlərə mənəvi dəstək olmuşdur ki, bunun nəticəsində mühüm tapşırıqlar yerinə yetirilmişdir. İki gün əvvəl “günün əsgəri” adını bizim əsgər qazanmışdır.

Əsgərlərimiz burada olmaqdan çox məmnundurlar. Bu təlimlərdə iştirak edən və xidmət müddəti başa çatmaqda olan iki hərbi qulluqçumuz yenidən orduda qalmaq qərarına gəlmişdir. Ölkənizə səfər onlara bu qənaətə gəlməkdə kömək etmişdir. Mən özüm isə bu təlim meydanında səhra dərsi zamanı güclü küləkdə yemək yeməyin zövqünü duydum. Biz yaxşı dostluq münasibətləri qurduq. Hər hansı vəziyyət olursa-olsun, Azərbaycan hərbçisi ilə çiyin-çiyinə dayanmaq şərəfdir, - deyə amerikalı zabit bildirdi.

Mayor Horlaker bir də onu qeyd etdi ki, burada özünə və tabeliyində olanlara qarşı daim qayğı, nəzakət hiss edib.

Leytenant Nurlan Quluyev gənc taqım komandiridir. “Regional cavab-2009”un səhra çalışmalarında Amerika bölüyündə Azərbaycanı təmsil edir. Fəaliyyət planına uyğun olaraq iki gün patrul xidmətini həyata keçirən həmin bölmənin tərkibində həm də cəld həmlə qrupunun üzvü kimi tapşırıqları yerinə yetirib. Belə ki, patrul xidməti aparan zaman pusquya düşən ”dost" qüvvələrin köməyinə anındaca çatmaq üçün təmrinlərin həyata keçirilməsində fəallıq göstərən zabit bildirdi ki, belə vaxtlarda, hadisə baş verən anda bizə koordinatlar verilir və xəritədən istifadə edərək dərhal həmin yerə gedib dəstək işini həyata keçiririk. O qeyd etdi ki, belə təlimlərdə ilk dəfə iştirak edir. Buna görə də müəyyən çətinlik hiss edib. Lakin öyrənmək üçün çox yaxşı fürsəti əldən verməyib. Atış zamanı da yaxşı nəticələr göstərib.

Tabeliyində olan əsgər Nicat İsmayılov, çavuş Ələkbər Cəbrayılov kimi hərbi qulluqçular yaxşı nəticələr göstərməkdə əllərindən gələni əsirgəməyərək bölmənin adını yüksəklərə qaldırıblar. Biz də inanırıq ki, təlimin sonunadək onlar bu estafeti əldən verməyəcəklər.

Təlim boyu tabor komandirlərinin və qərargahın bölmələrlə rabitə əlaqəsini təmin etmək baş leytenant Səbuhi Haşımovun öhdəsində idi. Avtomatik idarəetmə vasitələrinin köməyilə taktiki səviyyədə informasiya və danışıq mübadiləsini həyata keçirmək üçün təlimqabağı hər cür hazırlıq görülmüşdü. Gənc zabitin işinin axsamamasına səbəb də elə o çalışmalar olmuşdur. Bölmələr, manqalar da daxil olmaqla rabitə əlaqəsini təmin etmək ən vacib element kimi tabor qərargahının rabitə rəisinin, yəni onun üzərinə düşürdü. Zabit qeyd etdi ki, bunun öhdəsindən rabitə qrupunun köməyi sayəsində gələ bildi. Müasir avadanlıqların köməyilə həyata keçirdiyimiz rabitə əlaqələri zamanı yeni texnologiyanın praktik tətbiqinin iştirakçısı olduq və xeyli bilik qazandıq. Əldə etdiyimiz sistem məxfilik qorunmaqla telefon, radio, kompyuter şəbəkəsini birləşdirərək fasiləsiz rabitəni təmin etməyə imkan verir. Biz bu təlimdə standartlar arasında daha bir körpü qurmuş olduq, – deyə taborun qərargah zabiti bildirdi.

Bu xidmətin işi qarşı tərəfin mətbuat qrupu ilə əməkdaşlıq proseslərinin hazırlanması idi.

Təlimin mətbuat xidmətləri həm yeni təcrübə qazanmaq, həm də öz iş prinsiplərini bir-birilərinə anlatmaq üçün sıx əməkdaşlıq edirlər. Bir yerdə çəkilişlərə gedir, planlar qurur, müsahibələr aparır, materiallar hazırlayırlar. Amerikalı mətbuat qrupunun başçısı İş Hara hazırladığı slaytlarda hər iki tərəfin hərbçilərinin fəaliyyətindən bəhs edir. Mətbuat qrupunun üzvü zabit Murad Zeynalov həm də ölkəmiz tərəfindən təlimdə iştirak edən taborun informasiya və məlumatlandırma işinin təşkili ilə məşğul olurdu. Təlimin hazırlıq dövründə də, təlim müddətində də zabit Abbas Şirinov lazımi informasiyaların hazırlanmasında, hər iki tərəfdən jurnalistlərin qarşılıqlı şəkildə işləmələrinin təmin edilməsində, təlim rəhbərinin göstərişlərinin yerinə yetirilməsində bacardığını edirdi. Düzdür, qonaq jurnalistlər hazırladıqları materialları öz ölkələrində çap etdirməyi planlaşdırırdılar. İnformasiya işinin ərsəyə gəlməsində kadr arxasında qalanlar da var. Onlardan zabit Nağı Əmirov, fotomüxbir Bakir Sadıqov, tərcüməçi Hidayət Xəlilov, amerikalı fotoreportyor qızların zəhmətini qiymətləndirməmək olmaz. Onlar həmişə öndə idilər.

Zakir HÜSEYNOV

Xalq qəzeti.- 2009.- 7 iyun.- S. 2.