Suraxanı rayonunda Milli Qurtuluş Gününə həsr edilmiş elmi-praktik konfrans

Suraxanı rayonundakı Heydər Əliyev Mərkəzində Milli Qurtuluş Günü münasibəti ilə AMEA-nın Tarix İnstitutu ilə Suraxanı Rayon İcra Hakimiyyətinin birgə layihəsi əsasında elmi-praktik konfrans keçirilmişdir.

Tədbir iştirakçıları əvvəlcə Heydər Əliyev Mərkəzinin önündə ulu öndərin abidəsini ziyarət edərək Heydər Əliyev Mərkəzi ilə tanış olmuşlar.

Elmi-praktik konfransı giriş sözü ilə açan rayon icra hakimiyyətinin başçısı İlqar Abbasov diqqətə çatdırdı ki, zamanın nəbzini tutmağı, hadisələrə real qiymət verməyi, siyasi potensialını düzgün dəyərləndirməyi bacaran liderlər cəmiyyətdəki prosesləri məharətlə istiqamətləndirməyə nail olur, təmsil etdikləri xalqları zamanın ən güclü fırtınalarından, çətin sınaqlarından üzüağ çıxarır, milli xilaskara çevrilirlər. Müdrik və təcrübəli dövlət xadimləri ən ekstremal şəraitlərdə belə, mürəkkəb vəziyyətdən az itki ilə çıxış imkanına malik olmaqla optimal qərarlar qəbul edir, həyatlarını riskə atmaqdan belə çəkinmirlər. Bu nöqteyi-nəzərdən ulu öndər Heydər Əliyev də 40 illik siyasi fəaliyyəti dövründə üzləşdiyi bütün çətinlikləri, maneələri, problemləri, hətta uğursuzluqları mətinliklə dəf edən, məğlubiyyət sözünü yaxına buraxmayan, inamlı qərarları ilə milyonlarla insanın taleyində müstəsna rol oynayan millət fədaisi, sərkərdə və lider kimi xatırlanır.

Ümummilli lider şərəfli ömür yolu ilə xalqın çağdaş tarixinin fəxrlə anılan parlaq səhifələrini yazmışdır. Heydər Əliyevin tarixi xidmətləri, xilaskarlıq, quruculuq missiyası, həyata keçirdiyi siyasi, sosial-iqtisadi, mədəni və humanitar islahatlar haqqında indiyədək qələmə alınmış çoxcildli əsərlər, kitab və monoqrafiyalar, sanballı elmi məqalələr bu mənada həm də Azərbaycanın son 40 illik tarixinə elmi-politoloji baxışdır. Lakin bu da bir reallıqdır ki, tarixin axarını dəyişən böyük dühaların bəşəri ideya və prinsipləri, milli idarəçilik ənənələri, çoxqatlı siyasi gedişləri, adətən, zaman və məkanın fövqündə olur. Bu mənada, Heydər Əliyev tarixi epoxasını sözün qüdrəti ilə canlandırmaq, ulu öndərin milli maraq və mənafelərə söykənən genişmiqyaslı fəaliyyəti ilə bağlı dolğun təsəvvür formalaşdırmaq, şəxsiyyətinin miqyasını tam əhatə etmək çətindir.

Daha sonra AMEA-nın müxbir üzvü, millət vəkili Yaqub Mahmudov məruzə ilə çıxış etdi. O göstərdi ki, xalqın təhtəlşüurunda bütöv və milli şəxsiyyət kimi təcəssüm olunan Heydər Əliyev dühasının tarixi sınaq anında üzərinə düşən missiyanın öhdəsindən uğurla gəlməsi, sözün həqiqi mənasında, Milli Qurtuluşa nail olması da onun xalqla mənəvi birliyinin nəticəsi sayılmalıdır. Dövlətçiliyin taleyi baxımından ən ağrılı və çətin günlərdə xalq öz gələcəyini məhz inandığı, müdrikliyinə, idarəçilik səriştəsinə, siyasi fəhminə qəlbən güvəndiyi liderə - Heydər Əliyevə etibar etmiş, üzləşdiyi fəlakətdən onun rəhbərliyi altında xilas olacağına böyük ümid bəşləmişdir. Ulu öndər malik olduğu yüksək dövlətçilik və idarəçilik səriştəsi ilə çiyinlərini son dərəcə ağır bir yükün altına vermiş, məsuliyyətdən çəkinməmiş, əsl liderlərə xas bir şəkildə dövlətinin üzləşdiyi faciələrə biganə qalmamışdır.

Hakimiyyətə qayıdan ulu öndər özünün müdrik və uzaqgörən addımları, birləşdiricilik, ən müxtəlif maraqları bir nöqtəyə gətirmək bacarığı sayəsində hakimiyyət böhranını aradan qaldırmış, qanunsuz silahlı qüvvələri zərərsizləşdirmiş, xaos və anarxiya mühitinin, özbaşınalığın aradan qaldırılması, ictimai-siyasi sabitliyin, qanunçuluğun təmini istiqamətində prinsipial addımlar atmışdır. Heydər Əliyevin qısa müddətdə vətəndaş sülhü və həmrəyliyinə, milli barışa nail olması, paralel olaraq respublikada tənəzzül prosesini dayandıraraq iqtisadi dirçəliş yönümündə praktik addımlar atması da məhz xalqın öz rəhbərinə olan dəstəyindən irəli gəlmişdir. Ulu öndər Heydər Əliyev təcrübəli dövlət xadimi və hakimiyyət ustası olaraq Azərbaycan xalqının milli mentaliteti və dünyagörüşü ilə uzlaşan, reallığa adekvat olan milli inkişaf strategiyası seçmiş, iqtisadi modernləşməyə və siyasi liberallaşmaya xidmət edən çoxşaxəli islahatlar həyata keçirmişdir.

Xalq qəzeti.- 2009.- 14 iyun.- S. 9.