Bir elin həyat güzgüsü

Tale elə gətirmişdir ki, qəzetimiz özünün 75 illik fəxri ildönümünü qaçqın ömrü ilə qarşılayır. Bu nə qədər ağrılı, nə qədər çətin olsa da həyatın reallığı ilə barışmalı oluruq. Qaçqın qəzet həyatın bütün keşməkeşlərinə tab gətirmiş, xeyirxah adamların köməyi ilə özündə yaşamağa güc tapmış, ayda iki nömrə ilə oxucuların görüşünə gələ bilmişdir.

Kəlbəcərsiz haray çəkən “Kəlbəcər harayı” öz sələflərini yaşada-yaşada qaçqın ömrünün salnaməsini yaradır, gələcək nəsillərimizə bu həqiqəti yadigarlaşdırır, monumental bir tarixə çevirir.

1934-cü ildə həyata vəsiqə alanda kimsənin ağlına gəlməzdi ki, “Qızıl maldar” 75 yaşını doğma yurdundan uzaqlarda, ürək ağrısı, göz yaşıyla qeyd edəcəkdir, heç kim düşünə bilməzdi və qəzet öz qeyri-adi ömrünü yaşayaraq qarşısında qoyulan vəzifələri yerinə yetirirdi. O illər ağır illər idi və jurnalistlər daxili düşmənlərdən, repressiyalardan qorunmaq üçün adlarını gizlədir, “Komsomol”, “Əkinçi”, “Kətan”, “Çoban” və s. gizli imzalarla çıxış edirdilər. Həm də qəzet nöqsanlara qarşı barışmaz mövqe tuturdu. Belə-belə 1953-cü ilə qədər “Qızıl maldar” adı ilə işıq üzü görən qəzet 1953-cü ildən 1961-ci ilə qədər “Yeni həyat uğrunda” başlığı ilə çap olunmuşdur. 1961-ci ildə rayon qəzetləri birləşdirilmiş, Bərdə rayonunda “Kommunizm yolu” adı ilə ömrünü davam etdirmişdir.

1965-ci ildə qəzet yenidən bərpa olunmuş, 1993-cü ilin aprel ayına qədər “Yenilik” adını daşımışdır. Qəzet bu illər ərzində təsərrüfat, mədəni quruculuq, ədəbi yaradıcılıq və s. sahələrdə mühüm rol oynamışdır.

Belə ki, özünün mövcud olduğu bu illər ərzində böyük bir elin həyat güzgüsü, söz tribunası olan bu qəzet həmişə ictimai-siyasi həyatımızın ön sırasında getməyə çalışmış və əksərən buna nail olmuşdur. Tarixin müxtəlif dövrlərində qarşısına qoyulan vəzifələri yerinə yetirmək üçün imkanlarından maksimum istifadə etməyə səy göstərmişdir. Rayon əhalisinin güvənc yerinə çevrilmiş və xalq onu özünün müdafiəçisi kimi görməyə başlamışdı. Ən vacib məsələlərdə, bəzən adi şeylərdə də qanunçuluğun qorunmasında camaatın ümid yerinə çevrilmişdi. Qəzet doğruluq və xalqa xidmət yolunu tutmuşdu. Müxtəlif sahələrdə tez-tez reydlər keçirilmiş, kəskin felyetonlar və tənqidi yazılar dərc edilmiş və onların nəticələri, görülmüş tədbirlər qəzetin səhifələrində xalqa çatdırılmışdı. Bundan başqa qabaqcıl, işgüzar əmək adamlarının fədakarlığı, mübarizliyi, əmək qələbələri həmişə burada öz əksini tapmışdı. Bir sözlə, qəzet rayona bir projektor işığı salmışdı.

Beş il davam edən müharibə şəraitində bədxah qonşularımız tərəfindən blokadaya alınan Kəlbəcəri respublikanın mərkəzi rayonları ilə birləşdirən maşın yolu kimi, rayona gələn elektrik işığı da kəsilmişdi. Bu isə mətbəənin dayanması demək idi. Lakin əldə olunmuş bir gəmi mühərriki ilə mətbəə işləmiş, qəzet öz fəaliyyətini davam etdirmiş, rayonda, respublikada baş verən hadisələri isti-isti işıqlandırmış, əhalini məlumatlandırmışdır.

Bunlarla yanaşı təməli Ağdabanlı Qurban tərəfindən qoyulan, sarayı Dədə Şəmşirin qüdrəti ilə möhtəşəmlənən, mayası, beşiyi-bələyi saz-söz olan kəlbəcərli söz xiridarlarının söz inciləri də bu qəzetin səhifələrində pərəstişkarlarına çatdırılmışdır. Bu mənada qəzetin oxucu auditoriyası təkcə Kəlbəcər yox, bütün Azərbaycan olmuşdur.

Yetmiş beş illik tarixi ərzində qəzetimiz bir çox istedadlı jurnalistlərin yetişməsində ilkin məktəb olmuşdur. Məhəmmədəli İsmayılov, Əziz Bayramov, Kərəm Əhmədov, Şamil Əsgərov, Zal Cabbarlı, Əli Mirzəyev, Sədnik Paşayev, Həbib Əhmədov, Aydın Xanməmmədov, Vaqif Məmmədov, Bəhmən Məmmədov, Əli Qurbanov müxtəlif illərdə qəzetin redaktorları olmuş, ömürlərinin zərrələrini, ziyasını qəzetin ömrünə paylamışlar.

Burada 20 ildən artıq bu qəzetin baş redaktoru olmuş, bütün şüurlu həyatını qəzetin yaşamasına, fəaliyyətinə, inkişafına həsr etmiş mərhum Zimistan Həsənovun misilsiz xidmətlərini ayrıca qeyd etmək yerinə düşərdi. Zimistan müəllim istər Kəlbəcərin mühasirə şəraitində olduğu vaxtlarda, istərsə də qaçqınlıq şəraitində bu qəzeti öz doğma övladından artıq sevmiş, onun yaşamasına nail olmuşdur. Amansız ölüm onu sıralarımızdan vaxtsız aparmışdı. Lakin bu mötəbər gündə onun nurlu əməlləri, əziz xatirəsi, ruhu bizimlədir. Böyük bir publisist ordusunun komandanı olan bu qüdrətli qələm sahibinin dastanlaşan əməyi həmişə bu qəzetdə yaşayacaqdır.

Məmməd Aslan, Hidayət Elvüsal, Sücaət, Rahimi Dünyamalıyev kimi tanınmış şair, publisist və yazıçılar məhz “Yenilik” qəzetində pöhrələnib qol-budaq atmış, püxtələşmişlər. Bu gün respublika mətbuatında dadlı-duzlu, şəhdi şəkər, dolğun, sanballı yazıları ilə oxucu qəlbinə yol tapan Amil Novruzov, Məhəmməd Nərimanoğlu, Qəhrəman Nağıyev, Malik Zeynalov, Kifayət Umudqızı və başqalarının qələmi məhz “Yenilik” qəzetində cilalanmışdır.

1987-1989-cu illərdə “Yenilik” qəzeti redaksiyasında SSRİ jurnalistlər İttifaqının 7 nəfər üzvü çalışmışdır. Hazırda redaksiyada 5 nəfər Azərbaycan Jurnalistlər Birliyinin, 7 nəfər respublika Mətbuat Şurasının üzvü çalışır.

Əvvəlcədən qeyd etdiyim kimi qaçqınlıq taleyimizin ilk illərindən başlayaraq qəzetimiz ayda 2 dəfə işıq üzü görürdü. 2007-ci ildə 33, 2008-ci ildə 44 nömrəsi çıxmışdır. 2009-cu ildən isə ayda 4 nömrəsi nəşr olunur.

Bu da respublikamızın bölgə qəzetləri arasında ön sıralardan biridir. Bu gün bu uğurun əldə olunması üçün bizə doğma münasibət, yüksək qayğı göstərən rayon icra hakimiyyətinə, onun başçısı cənab Vidadi Məhərrəmova hədsiz minnətdarıq. Təsərrüfat hesabı ilə işləyən qəzetimizin maliyyələşməsi, redaksiya əməkdaşlarının təzyiqsiz, sərbəst yazıb yaratması üçün normal şərait yaradılıb. Deyərdim ki, bəlkə də respublikada yeganə icra hakimiyyətidir ki, öz qəzetinə belə yüksək qayğı göstərir.

Hal-hazırda redaksiyamızda 21 nəfər həmyerlimiz çalışır ki, onların arasında işi gənclərə örnək olan, ömrünün 40 ilindən çoxunu bu qəzetə həsr etmiş Qənifə Səmədova da var.

Redaksiyanın özünəməxsus 2 dəst kompyuteri var ki, qəzetdə gedən yazılar burada yazılır, Gəncə şəhəri poliqrafiya mətbəəsində çap olunur. Xatırladım ki, qəzetimizin respublikamızın 1000-ə yaxın yaşayış məntəqəsinə səpələnmiş 3000 nəfər kəlbəcərli abunəçisi var. Əslən kəlbəcərli olan respublikada yüksək nüfuza malik olan Qənbər Şəmşiroğlu, Cavid Qurbanov, Xəqani Kazımov, Qurban Sadıqov, Musa Kazımov kimi ziyalılarımız da qəzetimizlə müntəzəm əlaqə saxlayır, bizə lazımi köməklərini göstərirlər, qəzetlə sıx əməkdaşlıq edirlər.

İndi qəzet “Kəlbəcər harayı” adı ilə yurdumuzun igidlərini haraylayır, onları dağı-dərəsi, zümrüd meşəsi, şiş qayası, uca zirvəsi, çiçəyi-gülü, çəməni-çölü, alagözlü Alagölü, axarlı-baxarlı yaylaqları, diş göynədən bulaqları, loğman İstisuyu, qijıltılı Tər-tər çayı, qızıl yataqları, belə-belə min bir möcüzəsi saymaqla qurtarmayan, əfsanəvi aləm cənnətin timsalı Kəlbəcərimizin düşmən tapdağından azad edilməsi uğrunda müqəddəs mübarizəyə səsləyir. Bu gün qəzetin bir nömrəli mövzusu vətənə məhəbbət, vətənpərvərlik mövzusudur. Bununla yanaşı bu gün qəzetimiz ağır köçkünlük şəraitində yaşayan soydaşlarımızın üzləşdikləri problemləri, onlara göstərilən dövlət və hökumət qayğılarını, həmçinin əli işdən, ürəyi həvəsdən düşməyən kəlbəcərlilərin əməyini, zəhmətini, ölkəmizin həyatındakı ictimai-siyasi hadisələrə münasibətini, öz dədə-babalarının müqəddəs amallarını yaşadan kəlbəcərli gənclərin təhsil, idman, incəsənət sahələrində əldə etdikləri uğurları, yaşı yüzü keçmiş qocalarımızı, qanlı-qadalı Böyük Vətən müharibəsi illərində şücaət göstərən müharibə iştirakçılarını, onların ailələrinə, həmçinin Qarabağ müharibəsi şəhidlərinin ailələrinə, Qarabağ müharibəsi əlillərinə göstərilən qayğıları, onlarla təşkil olunan görüşləri işıqlandırır. Yenə də kəlbəcərli el şairlərinin şeirləri, vətən həsrətli, qələbə ruhlu, cəngi, zəfər çağırışlı inciləri qəzetimizin səhifələrindədir.

Əlbəttə, arzu edərdik ki, doğma qəzetimizin ad gününü doğma yurd-yuvamızda, od-ocağımızda qeyd edək. Daha təntənəli, daha ürək açıqlığı ilə. Lakin nə etməli, taleyin gərdişlərinə, qismətin acı ruzigarlarına dözmək lazım gəlir. Fəqət, qəzet yaşayırsa deməli həyat davam edir və həyat davam etməlidir ki, düşmən mübarizəmizi, intiqamımızı görsün. Bu gün ölkəmizdə uğurlu siyasət yürüdülür. Bizim haqq işimiz dünyaya bəyandır. Əminik ki, doğma yurd-yuvamıza qayıdacağımız gün lap yaxındadır.

Bizə yubiley keçirmək çətin olsa da, biz özümüzdə güc tapmışıq. Bu gün bizə yüksək dövlət qayğıları var. Ulu öndərimiz Heydər Əliyev tərəfindən qaynaqlanan bu qayğılar möhtərəm Prezidentimiz İlham Əliyev tərəfindən dönmədən həyata keçirilir. Bu tarixi yubiley gününü yüksək səviyyədə, şərafətli keçirəcəyimiz bunun bariz nümunəsidir. Bu nəinki bizim kollektivin, deyərdim ki, 60 min nəfərdən çox Kəlbəcər əhalisinin sevincinə, hədsiz razılığına səbəb olub. Bu bizim yaşamaq eşqimizi, həyata bağlılığımızı artırır. Ona görə də möhtərəm Prezidentimizə və yubileyin digər təşkilatçılarına dərin təşəkkürümüzü bildiririk.

75 yaşın ahıllıq, müdriklik çağın mübarək, qərib “Kəlbəcər harayı”. Qoy ömrünün 76-cı ildönümündə o dağlarda səsin müharibə harayına yox, toy-düyün harayına qovuşsun. Gün o gün olsun ki, Kəlbəcər həsrətindən yox, yaşayıb-yaratmaq əzmi həmişə yüksək olan yurddaşlarının doğma yurd-yuvada qurub-yaratmaq əzmindən, qələbə müjdəsindən yazasan.

Zahid MUXTAR,

“Kəlbəcər harayı” qəzetinin baş redaktoru,

Azərbaycan Jurnalistlər Birliyinin üzvü

Xalq qəzeti.- 2009.- 20 iyun.- S. 4.