Pantomim Teatrında

Pantomim Teatrı “Adsız”ı təqdim etdi

“Adsız” tamaşasına baxan hər kəs bir ad fikirləşəcək. Bu sözləri martın 14-də Dövlət Pantomim Teatrında “Adsız” tamaşasının premyerasından öncə teatrın baş rejissoru, əməkdar incəsənət xadimi Bəxtiyar Xanızadə söyləyib.

B.Xanızadə bildirib ki, əvvəlcə tamaşaya “Kişi və qadın” adı verilməli idi, lakin “Adsız” daha məqsədəuyğun hesab edilib: “Biz bununla tamaşaçını düşünməyə, fikirləşməyə, axtarmağa, özü ilə baş-başa qalmağa sövq etmək qərarına gəldik.”

Tamaşanın quruluşçu rejissoru, əməkdar artist Nargilə Qəribovadır. N.Qəribova “Adsız”da qadın obrazını da oynayır. Onun tərəf-müqabili isə teatrın gənc aktyoru Elnur İsmayılovdur.

Baş rejissor deyir: “Tamaşanın əsas mövzusu, insanların günahı kənarda deyil, öz içində axtarması ideyasına xidmət edir. Günahları kənarda axtardıqca, baş vermiş hadisələrdə başqalarını təqsirləndirdikcə münaqişə daha da dərinləşir. Tamaşada qəribə bir məqam var, insan bu günahı, heç olmasa, bir dəfə özünə qarşı yönəltsə, çıxış yolu tapmaq asan olar. Tamaşanın ideyası budur”.

“Adsız”da cərəyan edən hadisələr bir ailə daxilində baş verir. Bu ailə görünən və görünməyən tərəfləri ilə cəmiyyətdə, dünyada baş verənlərə biganə qalmadığı kimi, həm də öz problemləri, qayğıları ilə normal “kiçik” dövlətlərin görüntüsünü yaratmaq gücünə, qüvvəsinə malikdir.

Xatırladaq ki, tamaşa martın 15-də teatrda yenidən göstərildi.

M. MÜKƏRRƏMOĞLU

Xalq qəzeti.-2009.-17 mart.-S.6.