Onun uca boyu Azərbaycan
tarixinin bütün yüksəkliklərindən görünəcək.
Heydər Əliyev bu
millətin və dövlətin tarixində çoxlu silinməz
izlər qoyub. O, böyük qurucu idi.
O, böyük Vətənçi
və Dövlətçi idi.
Yurdun dörd
bucağında tikib-ucaltdıqları həmişə Azərbaycan
insanında minnətdarlıq duyğusu oyadacaq, daim göz
önündəki bu yaşayan əməlləri onun
özünü də yaşadacaq.
Onun ömrü
özünün ən müxtəlif əsərlərində,
eləcə də ekranlarda zaman-zaman nümayiş etdirilən
və hər yeni vaxta uyğun gələn müdrikliklə
dolu nitqlərində, doyulmaz söhbətlərində,
çeşidli görüntülərində davam edəcək.
Azərbaycanlıların
bütün yeni nəsilləri onu canlı müasiri kimi
qavrayacaq, müdam əbədi öndərinə salamlar
göndərəcək.
Heydər Əliyev
canından artıq sevdiyi millətinə çox yadigarlar
qoyub gedib.
Lakin bu yadigarların
zirvəsi onun fırtınalı əyyamlar içində
hifz edib dikəltdiyi müstəqillik, memarı olduğu
çağdaş Azərbaycan dövlətidir.
XX yüzildə biz istiqlalı
iki dəfə əldə etdik.
1918-ci ilin 28 mayında
yüksəlmiş müstəqillik bayrağımız, nə
acı ki, heç 2 ilə çatmamış endirildi.
O ilk müstəqil
dövlətin qurucularının hər biri yüksək
bilikli, fədakar vətənpərvər, millət
üçün yanan qiymətli şəxsiyyətlər idi.
Lakin onların hamısı birlikdə istiqlalımızı
cəmi 23 ay qoruya bildi.
1993-cü ildə tarixin
və taleyin kədərli kinayəsi ilə Azərbaycan
1991-ci ildə həmin əsr içində ikinci dəfə
qazandığı müstəqilliyi yenə 2 yaşa
çatmamış itirə bilərdi.
Millətin və
dövlətin xoşbəxtliyi idi ki, müqəddəratımızın
həll edildiyi, Vətənin parçalanma təhlükəsi
qarşısında dayandığı bu uçurumlu anlarda
tarix səhnəsində böyük Heydər Əliyev
göründü.
O, müqtədir əlləriylə
istiqlal bayrağımızdan yapışdı, XX yüzilin
bitəcəyinin bir-birindən çətin illərinin
daşlı-kəsəkli yollarından xalqını da,
dövlətini də salamat çıxardı, ildən-ilə
güclənən, zənginləşən, müasir
dünyanın qəbul etdiyi və hörmət bəslədiyi
Azərbaycanı üçüncü minilliyə
çatdırdı.
İstiqlalımızın
yaşının üstünə gələn hər yeni il
bu ali sərvətimizi, ulu öndərin arzuladığı
kimi, daha dönməz, daha sarsılmaz, daha
qayıdışsız edirdi.
Və Heydər Əliyev
xoşbəxt bir insandır.
Xoşbəxtdir, ona
görə ki, başladığı yol yarımçıq
qalmadı, xoşbəxtdir, ona görə ki, möhkəm təməlini
yaratdığı müasir Azərbaycan dövləti
etibarlı əllərə qismət oldu, xoşbəxtdir, ona
görə ki, vaxt okeanında möhtəşəm Azərbaycan
gəmisinin sükançısı olmaq şərəfi onun
özü qədər inandığı, qəlbinin bir
parçası İlham Əliyevə qismət oldu.
Bütün Azərbaycan
boyu ulu öndərin heykəlləri ucalır.
O, sanki canlı kimi, hər
an tərəqqi edən, daha artıq rifaha qovuşan Vətəni
seyr edir, qürrələnir.
Müasir Azərbaycan
dövləti Heydər Əliyevin əsəridir.
Rifah içində
yüksələn, qüdrətlənən, durmadan müasirləşən
ən yeni firavan Azərbaycan isə Prezident İlham Əliyevin
əsəridir.
Heydər Əliyev
haqqında çoxlu şeirlər, nəğmələr,
filmlər, ən müxtəlif bədii əsərlər
yaranıb, bundan sonra da yaranacaq.
Bəlkə də onun
haqqında ən yaxşı əsərlərin
doğulacağı günlər hələ
qarşıdadır. Çünki Heydər Əliyev kimi
müstəsna şəxsiyyətlərin əsl
böyüklüyü zaman ötdükcə daha artıq
duyulur.
Böyük AZƏRBAYCANLI Heydər Əliyevin haqqında
yaranan ilk ən böyük musiqi əsərini xalq artisti Oqtay
Rəcəbov bəstələyib. Sözlərini
yazdığım həmin oratoriyanı ulu öndərin
növbəti ad gününü bayram etdiyimiz bu günlərdə
və sabahlarda dəfələrlə eşidəcəksiniz.
Oratoriya Azərbaycan
musiqisində az işlənmiş, amma vaxtaşırı
müraciət edilməsi gərək olan janrlardandır.
Bu əsərdə
ölməz rəhbərin millət və dövlət
quruculuğuna həsr edilmiş şərəfli
ömrünün hər zaman öyrəniləsi və ibrət
götürüləsi nurlu səhifələrinin əks-sədası
var.
Azərbaycan Milli
Televiziyasının simfonik orkestri və xoru bu əsəri məharətlə
ifa edərək lentə yazdırıb. Olsun ki, bu dəyərli
musiqi əsərinə daxil olan ayrı-ayrı parçalar
ayrı-ayrı müğənnilərimizin ifasında da
bundan sonra dönə-dönə səslənəcək.
Həqiqətsə budur
ki, “Heydər oratoriyası” unudulmaz Heydər Əliyevin parlaq
yolunu vəsf edən yeni əsərlərdən sadəcə
növbətisidir.
İllər
ötdükcə bir simfoniyaya bənzəyən bu mübariz
həyatın misilsiz səhifələri, əlbəttə
ki, başqa yeni əsərlərdə də əksini tapacaq.
Bu gün “Xalq qəzeti”nin
oxucuları “Heydər oratoriyası”nı ilk dəfə
oxuyacaqlar.
Amma ölməz Heydər
Əliyevin əbədi nəğmə olan, millətimizin
varlığı qədər davam edəcək bitəcəksiz
ömrünü tərənnüm edən, ilk dəfə
oxuyacağımız, ilk dəfə dinləyəcəyimiz,
ilk dəfə seyr edəcəyimiz çox-çox sənət
inciləri hələ qarşıdadır!
Rafael HÜSEYNOV,
Milli Məclisin deputatı
Xalq qəzeti.- 2009.- 8 may.- S. 4.