Biləsuvarda bayram təntənələri

Nə vaxtsa oxuduğum bir şeirin iki misrası olduğu kimi yadımda qalıb:

Mayın 1-i ilə 10-u arası

Bayramlar yığışıb bayram elədi...

Həmin günlər Biləsuvarda şahidi olduğum tədbirlər də sanki bayramların bayram etdiyini göstərirdi. Ayın əvvəlindən Muğan şəhərində elə gün olmadı ki, gözəl, yaddaqalan bir tədbir, şənlik keçirilməsin.

Mayın 9-da isə Biləsuvarda bayramlar özünün “zirvə”sinə çatdı. Sübh tezdən bəzənib-düzənmiş sakinlər, rayon ictimaiyyətinin nümayəndələri ulu öndərin adını daşıyan parka toplaşdılar. Ümummilli liderin möhtəşəm abidəsi önünə əklillər, gül dəstələri qoyuldu. Bayram iştirakçıları Qələbə Günü ilə əlaqədar faşizmə qarşı mübarizədə və ərazi bütövlüyümüz uğrunda döyüşlərdə həlak olmuş soydaşlarımızın xatirəsini də yad etdilər.

Rayon icra hakimiyyətinin başçısı Adil Məmmədov ulu öndərin anadan olmasının 86-cı ildönümünə həsr edilmiş mərasimdə məruzə ilə çıxış etdi. Ədəbi-bədii kompozisiya təqdim olundu. Hər kəlmədən, hər duyğudan unudulmaz böyük şəxsiyyətin işıqlı obrazı canlanırdı, xalq qarşısında böyük xidmətləri xatırlanırdı.

Sonra müasir memarlıq üslubunda inşa edilmiş yeni Gənclər mərkəzinin açılışı oldu. Rəmzi qırmızı lent kəsildi. Burada düzənlənən ilk tədbir Qələbə Günü münasibətilə müharibə veteranları üçün çay süfrəsinin təşkili ilə əlamətdar oldu. RİH başçısı Adil Məmmədov, veteranlar şurasının sədri, gənclər və idman idarəsinin rəisi çıxış etdilər, ən xoş arzularını çatdırdılar. Maraqlı görüşün sonunda Böyük Vətən müharibəsinin iştirakçılarına hədiyyələr təqdim olundu.

Biləsuvarda bayram sevincləri bütün gün ərzində davam etdi. Təbəssümlü bahar günəşi də, çiçəyi çırtlayan əlvan bağlar və çəmənlər də, ilıq yaz mehi də sakinlərin bayram ovqatına yeni, təbii çalarlar qatdı.

Əli NƏCƏFXANLI

Xalq qəzeti.- 2009.- 14 may.- S. 9.