Dövlət Proqramı təhsilin strukturunda və məzmununda yeniləşməni daha da sürətləndirəcək

Azərbaycanda təhsilin inkişafı həmişə dövlətin diqqət mərkəzində olub. Ölkəmiz dövlət müstəqilliyi qazandıqdan sonra bu vacib sahədə daha ciddi islahatlar aparıldı. Təhsil müəssisələrinin geniş şəbəkəsi, güclü maddi-texniki bazası elmi-pedaqoji kadr korpusu yaradıldı. Ümummilli lider Heydər Əliyev hakimiyyətdə olduğu dövrlərdə Azərbaycan xalqının maariflənməsinə, savadlanmasına, hərtərəfli biliyə malik müəllimlərin hazırlanmasına xüsusi diqqət yetirərdi. Ulu öndər deyirdi: “Savadlı və dərin elmli xalqların qurduğu dövlət uzunömürlü, ədalətli və bütün sahələr üzrə inkişaf etmiş olur”. Müdrik şəxsiyyət Heydər Əliyevin təhsil sahəsində həyata keçirdiyi tədbirlər onun böyük maarifçi olduğunu bir daha təsdiqləyir. Müstəqil Azərbaycanın təhsil sisteminin dünya təhsil sisteminə inteqrasiyası istiqamətində aparılmış məqsədyönlü işlər öz bəhrəsini verir.

Ulu öndərin hakimiyyətdə olduğu illərdə müəllim hazırlığına, ali təhsilli müəllimlərin sayının artırılmasına və kənd məktəblərinin ixtisaslı müəllim kadrları ilə təmin olunmasına xüsusi diqqət göstərilirdi. Azərbaycan xalqının tərəqqisində təhsilin rolu xüsusi qiymətləndirilirdi. Çoxillik tarixə malik olan məktəblərin yubileylərinin keçirilməsi artıq ənənə halını alırdı. Bu, Azərbaycanda təhsilin inkişafını daha da gücləndirirdi.

Azərbaycan Prezidenti cənab İlham Əliyev Heydər Əliyev siyasi kursunun ən layiqli yetirməsi və davamçısı kimi prezidentlik fəaliyyəti dövründə bütün sahələrdə olduğu kimi, təhsilin də inkişafını dövlətin prioritet vəzifəsi hesab etdi. Müəllimlərin əmək haqlarının artırılması, onların iş şəraitinin yaxşılaşdırılması, həyat səviyyəsinin yüksəldilməsi, “Ən yaxşı müəllim”, “Ən yaxşı məktəb” nominasiyalarının təsis edilməsi ilə əlaqədar sərəncamlar imzaladı. Möhtərəm Prezidentimizin 11 fevral 2004-cü il tarixli fərmanı ilə təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramı”nda (2004-2008-ci illər) təhsilin inkişafı, regionlarda ən müasir ləvazimatlarla təchiz olunmuş yeni məktəb binalarının tikilməsi mühüm vəzifə kimi qarşıya qoyulmuşdu. Bununla yanaşı, Dövlət Proqramında ümumtəhsil məktəblərinin 10 illik kompyuter texnologiyası ilə təchizi proqramının hazırlanıb həyata keçirilməsi, orta məktəb şagirdlərinə dərsliklərin pulsuz verilməsi, sağlamlıq imkanları məhdud uşaqlar üçün bölgələr üzrə məktəb, internat-məktəb, texniki peşə məktəblərinin yaradılması, bu müəssisələrin ixtisaslı pedaqoji kadrlarla təminatı üçün məqsədli yenidən hazırlanma kurslarının təşkili və digər vacib məsələlər öz əksini tapmışdır. Onu da qeyd edim ki, orta məktəb şagirdlərinə dərsliklərin pulsuz verilməsi valideynlər tərəfindən böyük rəğbətlə qarşılanmışdır. Bu, heç də o demək deyildir ki, valideynlərin uşaqlarına dərslik almaq imkanı yoxdur. Son illər ölkəmizin sürətli iqtisadi inkişaf yoluna qədəm qoyması və bir çox iri infrastruktur layihələrin reallaşması, həmçinin regionların iqtisadi inkiaşfı Dövlət Proqramının (2004-2008-ci illər) qarşıya qoyduğu vəzifələrin müvəffəqiyyətlə həyata keçirilməsi sayəsində ölkəyə kapital axını güclənmiş, çoxlu sayda yeni iş yerləri yaradılmış, dövlət büdcəsi 10 dəfədən çox artmış, əhalinin güzəranı, həyat səviyyəsi xeyli yaxşılaşmışdır. Son illər əmək haqları, sosial müavinətlər, pensiyalar, təqaüdlər artırılır, imkansız ailələrə ünvanlı sosial yardım verilir. Bütün bunlar valideynlərə uşaqlarına dərslik almaq problemini aradan qaldırıb. Lakin buna baxmayaraq, dövlət dərsliklərin pulsuz verilməsini öz üzərinə götürüb. Bu da başda möhtərəm Prezidentimiz cənab İlham Əliyev olmaqla dövlətin yetişən gənc nəslə, onların savadlı böyümələrinə göstərdiyi diqqət və qayğının bariz nümunəsidir. Bir faktı diqqətə çatdırmaq istərdim. Respublikanın ümumtəhsil məktəblərinin I-III,XI sinif şagirdlərinin 2008-ci ildə dərsliklərlə pulsuz təmin edilməsi məqsədi ilə 102 adda 4284400 nüsxə dərsliyin və müəllimlər üçün vəsaitin nəşri planlaşdırılmışdır. Dərsliklər müəyyən edilmiş vaxtda çap olunmuş, təhsil müəssisələrinə vaxtında çatdırılması təşkil olunmuş və 2008-2009-cu tədris ilinin başlanmasına qədər məktəblərə təhvil verilmişdir. Ümumiyyətlə, Dövlət Proqramının qarışya qoyduğu vəzifələr təhsilin keyfiyyətcə inkişafında yeni dönüş mərhələsi yaratdı.

Biz Dövlət Proqramının uğurla icra olunmasının müsbət nəticələrini fəaliyyət göstərdiyimiz Saatlı rayonunda da gördük. 2004-2008-ci illəri əhatə edən Dövlət Proqramında rayonumuz üzrə 192 şagirdlik Bəylər kənd əsas məktəb binasının tikintisi, 4 məktəbdə əsaslı təmir aparılması, 3 məktəbdə isə 500 şagird yerlik 25 əlavə sinif otaqlarının tikintisi qarşıya vəzifə kimi qoyulurdu. Həmin vəzifələr uğurla icra olundu. Bunlarla yanaşı, həyata keçirilən digər tədbirlər sayəsində rayonun təhsil sistemində əsaslı dönüş yaradıldı. Bəylər kənd əsas məktəbində 192 şagird yerlik yeni məktəb binası tikilmiş və istilik sistemi qurulmuşdur. Bundan başqa, Məmmədabad kənd opta məktəbində 300 şagird yerlik 15 əlavə sinif otağının və istilik sisteminin qurulması, Hacıqasımlı kənd orta məktəbinin dam örtüyü və 6 əlavə sinif otağının tikintisi, Qarayevkənd orta məktəbində 220 şagird yerlik əlavə sinif otaqlarının inşası, S. Vurğun adına şəhər 1 saylı orta məktəbinin və Şirin bəy kənd orta məktəbinin əsaslı təmiri, şəhər 4 saylı, Varxankənd, Nərimankənd, Qıraqlı, Azadkənd orta, şəhər 1 saylı əsas, Potubəyli kənd əsas, Qıraqlı kənd əsas məktəblərində isə təmir işləri aparılmışdır. Ümumiyyətlə, Dövlət Proqramının icrası dövründə və Heydər Əliyev Fondunun “Yeniləşən Azərbaycana yeni məktəb” layihəsi çərçivəsində, həmçinin rayonumuzun daxili imkanları və iş adamlarının vəsaiti hesabına 1192 şagird yerlik 6 yeni məktəb binası, 1020 şagird yerlik əlavə sinif otaqları tikilib istifadəyə verilmişdir. Məktəblərin əksəriyyəti müasir ləvazimat və avadanlıqlarla təchiz olunmuşdur. Fakt üçün qeyd edim ki, 2004-2008-ci illərdə rayonumuzun ümumtəhsil müəssisələrinə 339 ədəd kompyuter dəsti, 3993 dəst şagird partası, 256 ədəd yazı lövhəsi, o cümlədən çoxlu sayda stol və stul verilmişdir. Ötən müddət ərzində məktəbəqədər tərbiyə müəssisələrinə diqqət artırılmış, uşaq bağçaları və körpələr evi yumşaq və bərk inventarlarla, həmçinin məişət əşyaları ilə təchiz edilmişdir. Təhsil müəssisələrinin müasir tələblər səviyyəsində qurulması prosesi davam edir.

Azərbaycan iqtisadiyyatının dünya təsərrüfat sisteminə səmərəli inteqrasiyasına, sosial, mədəni, elm, təhsil sahələrinin daha da inkişaf etdirilməsi və insanların həyat səviyyəsinin davamlı olaraq yüksəldilməsinə nail olmaq məqsədi ilə irəliyə doğru daha bir qətiyyətli addım atıldı. Möhtərəm Prezidentimiz 14 aprel 2009-cu il tarixli fərmanı ilə “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqarımı”nı təsdiq etməklə iqtisadiyyatın inkişafının növbəti beş il ərzində yeni mərhələyə qədəm qoymasını təmin etdi. Ölkənin iqtisadi cəhətdən sürətli inkişafı bütün sahələrin tərəqqisinə böyük zəmin yaradır. Tarix sübut edir ki, iqtisadi cəhətdən qüdrətli olan dövlət hər şeyə qadirdir. Bu baxımdan Dövlət Proqramı böyük əhəmiyyət kəsb edir. Yeni Dövlət Proqramı sosial yönümlü olması ilə diqqəti cəlb edir. Digər sahələr kimi, təhsilin də inkişafı əsas vəzifələrdən biri hesab olunub. Qarşıya qoyulan vəzifələrə diqqət yetirdikdə bir daha aydın olur ki, Dövlət Proqramı regionlarda təhsilin strukturunda və məzmununda yeniləşməni daha da sürətləndirəcək. Ölkədə yüksək səviyyədə təhsil xidmətlərinin göstərilməsi üçün maddi-texniki baza daha da möhkəmləndiriləcək. Bununla yanaşı, gənclərin ümumbəşəri dəyərlər əsasında layiqli ali təhsil almaları üçün əlverişli şəraitin yaradılması, dünyanın inkişaf etmiş ölkələrində təhsil almaq imkanlarının genişləndirilməsi, yeni məktəb binalarının tikintisinin davam etdirilməsi mühüm vəzifələrdən biri olacaq.

Möhtərəm Prezidentimizin uğurlu daxili və xarici siyasəti nəticəsində Azərbaycan Avropaya və dünya birliyinə uğurla inteqrasiya olunur. Ölkəmizin beynəlxalq aləmdəki mövqeləri daha da möhkəmlənir, nüfuzu artır. Son illər Azərbaycanda keçirilən çox vacib və əhəmiyyətli beynəlxalq tədbirlər bir daha təsdiqləyir ki, Azərbaycana olan maraq getdikcə artır. Belə bir zamanda yetişən gənc nəsil hərtərəfli biliyə, geniş dünyagörüşə malik olmalıdır. Məhz bu baxımdan da yeni Dövlət Proqramı təhsilin məzmununun müasirləşdirilməsi, onun keyfiyyətinin artırılması, təhsil müəssisələrinin informasiya-kommunikasiya üzrə maddi-texniki bazasının təkmilləşdirilməsi, kompyuter avadanlığı və digər müasir tipli avadanlıqlarla təmin olunması növbəti illərdə prioritet vəzifə kimi qarşıya qoyulub. Gələcəkdə də dərsliklərin şagirdlərə pulsuz verilməsi təmin olunacaq. Artıq şagirdlərin lazım olan zəruri məktəbli ləvazimatları ilə təmin olunması prosesinə də başlanılıb. Heydər Əliyev Fondunun təşəbbüsü ilə məktəbə ilk dəfə qədəm qoyan birinci sinif şagirdlərinə lazım olan bütün dərs vəsaitləri pulsuz paylanılıb. Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü və rəhbərliyi ilə həyata keçirilən bu xeyirxah tədbir həm məktəblilər, həm də valideynlər tərəfindən böyük sevinclə qarşılanıb.

Məktəbəqədər təhsil sahələri daim dövlətin diqqət və qayğı göstərdiyi sahələrdən olub. Son illər möhtərəm Prezidentimizin və Heydər Əliyev Fondunun prezidenti Mehriban xanım Əliyevanın yüksək qayğısı sayəsində uşaq bağçaları, körpələr evi, internat məktəbləri və digər müəssisələr əsaslı təmir olunmuş, müasir avadanlıqlarla təchiz edilmişdir. Uşaqların savadlı və sağlam böyümələri üçün bütün imkanlardan istifadə olunur. Yeni Dövlət Proqramında məktəbəqədər təhsil sistemində islahatların sürətləndirilməsi, belə təhsil müəssisələri şəbəkəsinin optimallaşdırılması, maddi-texniki bazasının möhkəmləndirilməsi, ehtiyac duyulan şəhər, kənd və qəsəbələrdə müasir səviyyədə yeni məktəbəqədər müəssisələrin yaradılması qərara alınıb.

Regionların 2009-2013-cü illərdə sosial-iqtisadi inkişafı Dövlət Proqramı bütün sahələrdə olduğu kimi, təhsildə də yeniləşməni sürətləndirəcək.

Şamil NURƏLİYEV,

Saatlı Rayon Təhsil Şöbəsinin müdiri,

YAP rayon təşkilatı siyasi şuranın üzvü

Xalq qəzeti.- 2009.- 19 may.- S. 5.