Məramımız ekoloji durumun daha da yaxşılaşdırılmasıdır

Ulu öndər Heydər Əliyevin anadan olmasının 86 illiyi ölkəmizin hər yerində böyük coşğu və təntənə ilə qeyd edilmişdir. Xalqımız bu tarixi şəxsiyyətin adını həmişə uca tutur və əziz xatirəsini ehtiramla yad edir. Heydər Əliyev Azərbaycan xalqına və müstəqil Azərbaycan dövlətçiliyinə çox böyük töhfələr vermiş, misilsiz xidmətlər göstərmişdir. Bütün bunları saymaqla sözsüz ki, qurtaran deyil. Bir sözlə, ulu öndər xalqımızın qəlbində və dövlətçiliyimizin tarixində əvəzsiz bir yerə sahib olmuşdur.

Azərbaycana rəhbərlik etdiyi bütün dövrlərdə – istər 1969-1982-ci illər olsun, istərsə də 1993-2003-cü illər – həyatın elə bir sahəsi olmadı ki, orada Heydər Əliyev nəfəsi, Heydər Əliyev diqqət və qayğısı, ən başlıcası isə, Heydər Əliyev təşəbbüskarlığı və əzmkarlığı olmasın. Müxtəlif sahələrdə uzun illər fəaliyyət göstərən insanlar bu fikirlə yüzdəyüz razılaşarlar. Mən həyatımı ekoloji sahəyə bağladığımdan, konkret olaraq, Heydər Əliyevin Azərbaycanda ekoloji mühitin sağlamlaşması və yaxşılaşması istiqamətində gördüyü işlərdən, həyata keçirdiyi nəhəng layihələrdən istənilən qədər bəhs edə bilərəm. Ancaq çox vaxt almadan təkcə bu faktı xatırlatmaq istəyirəm ki, ölkəmizin paytaxtı, hamımız üçün doğma bir məkan olan Bakı şəhərinin yaşıllaşdırılması məhz Heydər Əliyevin adı ilə bağlıdır. Abşeron yarımadasında, küləkli havanın “hökmranlıq” etdiyi bir ərazidə ağac əkib becərməyin nə qədər çətin olduğunu yaxşı bilən ulu öndər inadkarlıqla bu məsələnin həllinə səy göstərmiş, nəticədə də Bakı şəhərində bir-birindən gözəl və yaraşıqlı parklar, xiyabanlar salınmışdır. Qocaların, uşaqların, gənclərin, bir sözlə, hamının sevimli istirahət məkanına çevrilən bu yaşıllıqlar arada yaranmış hakimiyyət boşluğu zamanı amansızcasına talan edildi, həyat üçün vacib olan ağaclar kəsilərək yerində kimlərinsə qazanc mənbəyinə çevrilən müxtəlif səpkili ticarət obyektləri tikildi.

Təsadüfi deyil ki, ikinci dəfə hakimiyyətə qayıdan ümummilli lider bu acınacaqlı vəziyyətdən üzüldüyünü belə ifadə etmişdi: “Bir ağac kəsiləndə elə bilirəm ki, qolumun biri kəsilir”.

Əlbəttə, bunu yalnız Heydər Əliyev deyə bilərdi. Bu üzüntünü yalnız Heydər Əliyev yaşaya bilərdi. Çünki o, yaşıllıqların salınmasına, mübaliğəsiz demək olar ki, ömrünü, həyatını sərf etmişdi. Ancaq min şükürlər olsun ki, onun hakimiyyətə qayıdışı ilə bütün bu narahatçılıqlara son qoyuldu, ölkədə həyat öz axarına düşdü. Xalqımız və dövlətimiz üçün həyati əhəmiyyət kəsb edən məsələlərin çoxluğuna baxmayaraq, bu sahədə də bir sıra addımlar atıldı.

Heydər Əliyev Fondunun Prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyevanın təşəbbüsü ilə son illər uğurla həyata keçirilən və böyük dəstək görən “Hərəmiz bir ağac əkək” kampaniyasını xüsusi qeyd etmək istəyirəm. Çünki bu təşəbbüs yalnız kampaniya xarakteri daşımır. Buna uyğun olaraq ölkəmizin hər yerində yüz minlərlə ağac və gül kolları əkilir və bu proses hazırda da davam edir.

Aprel ayında Nazirlər Kabinetinin 2009-cu ilin birinci rübünün yekunlarına həsr olunmuş iclasında ölkəmizin başçısı möhtərəm İlham Əiyevin çıxışı şübhəsiz ki, hamının yadındadır.

Çıxışında vacib məsələlərə münasibət bildirən dövlət başçısı ekoloji vəziyyətlə bağlı narahatçılığını da dilə gətirdi, ağacların və yaşıllıqların məhv edilməsinə qarşı ciddi mübarizənin vacibliyini xüsusi vurğuladı. Prezident ağacların kəsilməsini qətiyyətlə pislədi və bunu qadağan etdi. Bu məsələyə həssaslıqla yanaşan ölkə rəhbəri bildirdi ki, ağaclar yalnız dövlət əhəmiyyətli bir məsələ il bağlı kəsilə bilər, hər kəsilmiş ağacın əvəzinə on ağac əkilməsi şərtilə. Dövlət başçısı üç milyon ağacın əkilməsi ilə bağlı da müvafiq orqanlara ciddi tapşırıq verdi. Onun bu tapşırığı hamının, ilk növbədə isə Vətənini, ölkəsini sevən, onu yaşıllıqlar diyarı kimi görmək arzusunda olan insanların ürəyindən oldu və hədsiz sevindirdi. Hamımız dərindən nəfəs aldıq, bir daha əmin olduq ki, Heydər Əliyev siyasəti bu sahədə də uğurla davam etdirilir.

Biz də dövlət başçısının bu fikirlərinə həvəslə qoşulduq. “Pirqulu” Dövlət Təbiət Qoruğunun təşəbbüsü ilə qoruğun ərazisinin həmsərhəd olduğu bələdiyyələrin – Çuxuryurd, Nağaraxana, Qəleybuğurd və Avaxıl bələdiyyələrinin iştirakı ilə Bakı – Pirqulu yolunun kənarında min ədəd ağac əkdik. Əlbəttə, bu istiqamətdə işimizi davam etdirəcəyik. Həm də çalışırıq ki, təkcə sayla kifayətlənməyək, eyni zamanda, keyfiyyətə də diqqət yetirək. Yəni əsas məqsədimiz əkdiyimiz ağaclara lazımi qaydada qulluq etmək və onları bitirməkdir. Necə deyərlər, ağacı əkdinsə gərək bitirməyi də bacarasan.

Mayın 23-də ekoloqların peşə bayramıdır. Ekologiya və təbii sərvətlər naziri Hüseynqulu Bağırovun ekoloji durumun yaxşılaşması sahəsində göstərdiyi fəaliyyət hamıya məlumdur. Sözsüz ki, bu işə qol qoyanların hamısının məramı eynidir: normal nəfəs ala biləcəyimiz ekoloji şəraitin yaradılmasına nail olmaq. Çünki bunsuz həyat məhvə məhkumdur.

Tağı HƏSƏNOV,

“Pirqulu” Dövlət Təbiət

Qoruğunun direktoru

Xalq qəzeti.-2009.- 20 may.- S.5.