İFC
və ADA Şirkətlər
Qrupunun əməkdaşlığı
yeni inkişaf mərhələsinə qədəm
qoyur
ADA Qrupa Beynəlxalq
Maliyyə Korporasiyasından yeni direktor təyin olundu
Dünən ADA Şirkətlər
Qrupunun mərkəzi ofisində qrumun Direktorlar
Şurasının növbəti toplantısı
keçirildi. Toplantıda qrupun cari ilin ilk 4 ayı ərzindəki
fəaliyyətinin nəticələri, “Almalı” şəbəkəsinin
inkişaf perespektivləri, texnoloji yeniliklərin tətbiqi,
xüsusi istehsalın inkişafı kimi məsələlər
müzakirə olundu.
Sonra jurnalistlər üçün
mətbuat konfransı
keçirildi. Tədbiri giriş
sözü ilə açan İdarə Heyətinin sədri Rəfayil Hacıyev
KİV nümayəndələrini salamlayaraq mətbuat konfransının iştirakçılarını
təqdim etdi.
ADA Şirkətlər
Qrupu Direktorlar Şurasının sədri Sergey
İvaşkeviç şuranın toplantısında qrup
üçün önəmli olan bir sıra mühüm məsələlərin
müzakirə olunduğunu bildirdi. S. İvaşkeviç
qrupun gələcək planlarından bəhs edərək,
bunlardan ən önəmlilərinin almalımarketlərin
yalnız sayının deyil, həm də
coğrafiyasının daha da genişləndirilməsi,
xüsusi ticarət nişanlı məhsulların
istehsalının və çeşidinin
artırılması, həmçinin yeni texnologiyaların tətbiqinin
dərinləşdirilməsi olduğunu bildirdi. “Biz artıq 5
kateqoriya üzrə 20-dən çox adda məhsul istehsal
edirik. Bu yaxında quraşdırılacaq müasir sexlərin
köməyi ilə istehsal gücümüzü xeyli
artıracağıq. Bundan başqa, tətbiqinə
hazırlaşdığımız “AXAPTA-ONLİNE”
proqramı müştəri məmnuniyyətinin daha da
artmasına təkan verəcəkdir.”
ADA Şirkətlər
Qrupu Direktorlar Şurasının yeni seçilmiş
üzvü Yazqan Musannif layihənin əsas sərmayədarlarından
olan Beynəlxalq Maliyyə Korporasiyasının (İFC)
“Almalı”nın inkişafına hərtərəfli dəstək
verdiyini və bunun ölkə iqtisadiyyatı, xüsusilə də
qeyri-neft sektorunun inkişafı üçün mühüm əhəmiyyət
kəsb etdiyini vurğuladı.
Qeyd edək ki, Yazqan
Musannif beynəlxalq aləmdə pərakəndəçilik
sahəsi üzrə mütəxəssis kimi tanınır,
bir sıra elmi əsərlərin və
araşdırmaların müəllifidir. Şübhə
yoxdur ki, onun Direktorlar Şurasına üzv seçilməsi
ilə, ADA Qrupun müasir pərakəndəçilik
texnologiyalarına çıxışı daha da
asanlaşacaqdır.
ADA Şirkətlər
Qrupunun baş icraçı direktoru Mobil Şərifov Qrupun
inkişaf prioritetlərindən danışaraq, onun əsas məqsədinin
Azərbaycana müasir ticarət mədəniyyətinin gətirilməsi
olduğunu bildirdi. Elə bu səbəbdən ilkin olaraq,
almalımarketlərin təminatı üçün
Paylayıcı Mərkəzin hələ 2006-cı ilin
ortalarında istifadəyə verildiyini qeyd etdi. “Məhz
Paylayıcı Mərkəz almalımarketlərdə
alıcılarımıza təqdim etdiyimiz məhsulların
yüksək keyfiyyətinin əsas təminatçısıdır.
Burada müxtəlif məhsul kateqoriyaları üçün
lazımi temperatur rejimi və saxlama şəraiti mövcuddur”
Sonda İdarə Heyətinin
sədri Rəfayil Hacıyev ADA Şirkətlər Qrupunun Azərbaycanın
ərzaq pərakəndəçiliyindəki rolu və yeri,
son illərdə bu sahədə əldə olunmuş nailiyyətlərdən
bəhs etdi. “Almalı” bazara daxil olanda bu layihənin uğurlu
olacağı bəziləri tərəfindən şübhə
ilə qarşılanırdı. Lakin ötən dövr ərzində
əldə etdiyimiz uğurlar göstərdi ki, biz
yanılmamışıq.
Gündəlik tələbat
məhsullarının, xüsusən də ərzaq məhsullarının
pərakəndəçiliyindəki müsbət irəliləyişlərdə
“Almalı”nın da payı olması bizi sevindirir, biz bunu ən
böyük uğurumuz hesab edirik. Şübhəsiz ki,
ölkədə özəl sektor üçün
yaradılmış münbit şərait,başlıcası
isə Prezident İlham Əliyevin iş adamlarına göstərdiyi
qayğı təkcə ADA Qrupunun deyil, yüzlərlə
şirkətin uğurunun təminatçısdır.”
ADA Şirkətlər
Qrupu “Almalı” mağazalar şəbəkəsinin
operatorudur. Hazırda ölkənin 3 böyük şəhərində
40 almalımarket hər gün 40 000-dən çox
alıcıya xidmət göstərməkdədir. Almalımarketlər
öz xidmətlərini “Almalıdan 5 ulduz” adı ilə
alıclara təqdim edir. Bunlar – yüksək keyfiyyət, səmimi
xidmət, seçim imkanı, geri qaytarma imkanı və
münasib qiymətlərdir.
Tədbirin sonunda
Direktorlar Şurasının üzvləri KİV nümayəndələrinin
suallarına cavab verdilər.
Qabil YUSİFOĞLU
Xalq qəzeti.- 2009.- 23 may.-
S. 5.