Görkəmli filosof Heydər Hüseynovun xatirəsinə həsr olunmuş konfrans keçirilmişdir.

Noyabrın 19-da Azərbaycan Texniki Universitetində görkəmli filosof alim, akademik Heydər Hüseynovun anadan olmasının 100 illiyi münasibətilə elmi konfrans keçirilmişdir.

Universitetin rektoru, professor Havar Məmmədov ölkəmizdə görkəmli alim, akademik Heydər Hüseynovun xatirəsinə həsr olunmuş geniş tədbirlər keçirildiyini bildirmişdir. O, Azərbaycan Elmlər Akademiyasının ilk akademiklərindən biri kimi Heydər Hüseynovun ictimai və humanitar elmlərin, xüsusilə fəlsəfənin inkişafında müstəsna rolunu diqqətə çatdırmışdır.

Sonra universitetin fəlsəfə və politologiya kafedrasının müdiri, professor Fərrax Ramazanovun " Əqidəsinə sadiq böyük insan", dosent Əyyub Kərimovun " Heydər Hüseynov XIX əsr Azərbaycan ictimai-fəlsəfi fikir tarixinin görkəmli tədqiqatçısı kimi" mövzularında məruzələri dinlənilmişdir. Məruzəçilər H.Hüseynovun keçdiyi şərəfli həyat yolundan danışaraq bildirmişlər ki, o, 1939-cu ildə namizədlik, 1944-cü ildə doktorluq dissertasiyasını müdafıə etmiş, 1945-ci ildə isə akademiyanın həqiqi üzvü seçilmişdir. O, SSRİ Elmlər Akademiyası Azərbaycan filialının Rəyasət Heyəti sədrinin müavini, sonralar isə Azərbaycan Elmlər Akademiyasının vitse-prezidenti və Azərbaycan Kommunist Partiyası Mərkəzi Komitəsi yanında Partiya Tarixi İnstitutunun direktoru, Azərbaycan Dövlət Universitetinin (indiki Bakı Dövlət Universitetinin) fəlsəfə kafedrasının müdiri vəzifələrində çalışmışdır. Cəmi 42 il yaşamış alim 250-yə qədər kitab və elmi məqalənin müəllifıdir. Bildirilmişdir ki, akademik Heydər Hüseynov Azərbaycan Dövlət Universitetində fəlsəfə ixtisası üzrə şöbənin yaradılmasının əsas təşəbbüskarı, həmin kafedranın ilk müdiri və ən yaxşı müəllimlərindən biri olmuşdur. Vurğulanmışdır ki, milli mədəniyyətimizin böyük nümayəndələrinin fəlsəfə irsini sistemli araşdıran alim xalqımızın fəlsəfı fıkir tarixinin başlıca təkamül mərhələlərini müəyyənləşdirmişdir. O, özünün zəngin fəaliyyəti ilə ictimai-siyasi fikrin öyrənilməsinə istiqamət verərək bu sahədə yeni tədqiqatların vüsət almasına əlverişli zəmin hazırlamışdır. Azərbaycanın görkəmli filosof alimi, SSRİ Dövlət mükafatı laureatı, akademik Heydər Hüseynovun "XIX əsr Azərbaycan ictimai və fəlsəfi fikir tarixindən" kitabında müəllif Azərbaycan xalqını ictimai-siyasi və fəlsəfi fıkir tarixini dərindən tədqiq və təhlil etmiş, Abbasqulu ağa Bakıxanov, Mirzə Kazım bəy, Mirzə Şəfı Vazeh, Mirzə Fətəli Axundov, Həsən bəy Zərdabi kimi mütəfəkkirlərin timsalında milli maarifçiliyin problemlərinin öyrənilməsinin əsasını qoymuşdur.

Alimin qızı Leyla Hüseynova atasının xatirəsinə göstərilən diqqət və ehtirama görə tədbirin təşkilatçılarına və iştirakçılarına təşəkkürünü bildirmişdir.

Xalq qəzeti.- 2008.- 20 noyabr.- S.8.