Yubiley tədbirləri davam edi
Məlum
olduğu kimi, Azərbaycan Respublikasının Prezidenti cənab
İlham Əliyev bu il iyun ayının 24-də zəmanəmizin
böyük bəstəkarı, SSRİ xalq artisti, Azərbaycan
Dövlət mükafatı laureatı Arif Cahangir oğlu Məlikovun
75 illik yubileyinin keçirilməsi haqqında sərəncam
imzalamışdır. Sərəncamda deyilir: “Arif Məlikov
yaradıcılığı müasir Azərbaycan musiqi mədəniyyətinin
parlaq səhifələrindəndir. Onun balet və
simfoniyaları, kinofilmlərə və dram tamaşalarına
musiqiləri, habelə müxtəlif janrlarda
yaratdığı digər əsərləri milli musiqi xəzinəmizin
ayrılmaz hissəsini təşkil edir”. Sərəncamda
yubileyin keçirilməsi Mədəniyyət və Turizm, Təhsil
nazirliklərinə, Azərbaycan Milli Elmlər Akademiyasına
həvalə edilmişdir.
Xəbər
verdiyimiz kimi, artıq noyabrın 19-dan yubiley tədbirlərinə
start verilmişdir. Həmin gün Azərbaycan Dövlət
Filarmoniyasında yubileyə həsr olunmuş Beynəlxalq festivalın
açılış mərasimi keçirilmiş və
burada I simfonik konsert təqdim edilmişdir. Konsertdə Ü.
Hacıbəyov adına Azərbaycan Dövlət Simfonik
Orkestri, Xor Kapellası çıxış etmişlər. Dirijor
Rauf Abdullayev olmuşdur. Konsertdə bəstəkarın ulu
öndərə həsr etdiyi “Əbədiyyət”
simfoniyasının təqdimatı olmuşdur.
Heydər Əliyev
Sarayında noyabrın 21-22-də Arif Məlikovun ölməz
“Məhəbbət əfsanəsi” baleti nümayiş etdiriləcək.
Noyabrın
23-də isə festival çərçivəsində
böyük sənətkar Corc Balançinin
xoreoqrafiyasından biraktlı baletlərin nümayişi nəzərdə
tutulmuşdur. Heydər Əliyev Sarayında keçiriləcək
bu tədbir də Arif Məlikovun 75 illik yubileyinə həsr
olunur.
Azərbaycan
Dövlət Filarmoniyasında noyabrın 24-də II simfonik
konsert olacaq. Burada Ü.Hacıbəyov adına Azərbaycan
Dövlət Simfonik Orkestri iştirak edəcək.
Fəxrəddin
Kərimovun dirijorluğu ilə noyabrın 26-da keçirilən
konsertdə Ü. Hacıbəyov adına Dövlət Simfonik
Orkestri III simfoniyanı ifa edəcək. Noyabrın 27-də isə
Bakı Musiqi Akademiyasında Arif Məlikovun əsərlərindən
ibarət kamera konserti olacaq.
Festivalın
maraqlı tədbirlərindən biri noyabrın 28-nə nəzərdə
tutulub. Həmin gün Azərbaycan Dövlət
Filarmoniyasında Arif Məlikovun estrada mahnılarından ibarət
konsert proqramı nümayiş etdiriləcək.
IV simfonik
konsert də filarmoniyada noyabrın 30-da olacaq. Arif Məlikovun
75 illiyinə həsr olunmuş elmi konfrans dünən Bakı
Musiqi Akademiyasında keçirilmişdir. Çıxış
edənlər Azərbaycanın böyük bəstəkarının
yaradıcılığından danışmış, onun
dünya bəstəkarlıq sənəti tarixindəki mövqeyindən
söhbət açmışlar.
Bir məsələni də qeyd edək ki, artıq noyabrın
19-dan filarmoniyada Arif Məlikovun həyat və
yaradıcılığını əks etdirən səyyar
sərgi açılmışdır. Sərgi noyabrın 30-dək
davam edəcək.
Bundan
başqa, yubiley tədbirləri ölkənin klub, kitabxana və
muzeylərində, uşaq musiqi və incəsənət məktəblərində
də qeyd olunacaqdır.
M. MÜKƏRRƏMOĞLU
Xalq qəzeti.-2008.-21 noyabr.-S.6.