Yeni Azərbaycan Partiyasının yaradılmasının 16 illiyi qeyd edilmişdir

YAP Binəqədi rayon təşkilatının qərargahında partiyanın yaranmasının 16-cı ildönümünə və 15 oktyabr 2008-ci il tarixində keçirilən prezident seçkilərinin rayon üzrə nəticələrinə həsr edilmiş toplantı keçirildi. Yeni Azərbaycan Partiyasının banisi, ümummilli liderimiz Heydər Əliyevin xatirəsi bir dəqiqəlik sükutla yad edildi.

YAP Binəqədi rayon təşkilatının sədri Nəbi Xəlilov Yeni Azərbaycan Partiyasının yaranmasının 16-cı ildönümünün tarix baxımından qısa görünsə də, nəticə etibarilə böyük bir dövrü əhatə etməsindən söz açdı və o dövrdə mövcud olan mürəkkəb siyasi şəraiti, ölkə rəhbərlərinin qətiyyətsizliyi və səriştəsizliyi nəticəsində respublikamızın idarəolunmaz həddə çataraq separatçı qüvvələr tərəfindən parçalanma vəziyyətinə çatdırılmasını xatırlatdı. O, qeyd etdi ki, belə bir vaxtda Azərbaycanın gələcək taleyini düşünən ziyalı və nüfuzlu şəxslər vəziyyətdən çıxış yolunu ulu öndərimizin ətrafında birləşməkdə görərək ona tarixi bir müraciət ünvanladılar.

Ulu öndərimiz xalqın müraciətini qəbul etsə də respublikamızın o dövrdəki rəhbərliyi tərəfindən onun Bakıya gəlməsinə imkan verilmədi. Buna baxmayaraq, 1992-ci il, noyabrın 21-də Naxçıvanda ulu öndərimiz Heydər Əliyevin sədrliyi ilə 550 nəfərdən ibarət təşəbbüs qrupunun təsis konfransı keçirildi və Azərbaycanın siyasi həyatında mühüm hadisəyə çevrilən Yeni Azərbaycan Partiyası yarandı və bundan 6 ay sonra ümumxalq tələbi ilə Azərbaycanda siyasi hakimiyyətə gəldi. Qısa bir zamanda qardaş qırğını, vətəndaş qarşıdurması və respublikamızın parçalanması sona çatdı. Ölkəmizdə sabitlik yaranaraq Azərbaycanın müstəqil dövlət quruculuğunun əsası qoyuldu, respublikamızın iqtisadi və siyasi həyatında böyük dönüş yaranmağa başladı.

Tarixi zərurətdən yaranmış Yeni Azərbaycan Partiyası bu gün Heydər Əliyev dövlətçilik və idarəçilik məktəbinin layiqli yetirməsi, möhtərəm prezidentimiz İlham Əliyevin sədrliyi ilə müasir dövrün tələblərinə uyğun şəkildə inkişaf edir və ulu öndərin parlaq ideyalarının daşıyıcısı kimi dövlətin daxili və xarici siyasətinin uğurla davam etdirilməsində böyük rol oynayır.

15 oktyabrda keçirilən prezident seçkiləri kampaniyasının yüksək səviyyədə təşkil edilməsində YAP Binəqədi rayon təşkilatında çox mühüm işlər görüldü. Partiyanın fəalları tərəfindən seçici siyahıları üzrə elektorat öyrənildi. YAP mərkəzi aparatının təlimatına və rayon partiya təşkilatının tədbirlər planına əsasən rayon üzrə 13 seçki qərargahı yaradıldı. Yerli qərargahların ərazilərində yerləşən hər bir seçki məntəqəsi üzrə 1000, 100 və 10 nəfər seçiciyə məsul şəxslər təyin olundu.
Binəqədi, Biləcəri, Xocasən, Sulutəpə, 28 May qəsəbələrinin, həmçinin 6-cı, 7-ci, 8-ci və 9-cu mikrorayonların ərazilərində seçicilərlə partiyanın prezidentliyə namizədi cənab İlham Əliyevin vəkilləri Eldar İbrahimovun, Aydın Mirzəzadənin, Vasif Məmmədəliyevin, Çingiz Abdullayevin və Firəngiz Əlizadənin, həmçinin təbliğat qrupunun üzvləri, rayonumuzun millət vəkilləri Madər Musayevin və Rəfael Cəbrayılovun iştirakı ilə çoxsaylı görüşlər təşkil edildi. Görüşlər zamanı seçicilər tərəfindən qaldırılan bir sıra problemlər millət vəkillərinin köməkliyi ilə öz həllini tapdı.

Seçkilərə hazırlıq işlərinin həyata keçirilməsi məqsədilə rayonda seçki dairələrindən 2-si üçün yeni inzibati bina tikildi, 1-nin isə yerləşdiyi bina əsaslı təmir olundu, 6 seçki məntəqəsinə yeni inzibati bina tikildi, rayon ərazisində seçicilərin sayının artması ilə əlaqədar 7 yeni məntəqə seçki komissiyaları yaradıldı. Dairə və məntəqə seçki komissiyalarında seçkilərin gedişinə nəzarət etmək məqsədilə rayon partiya təşkilatı tərəfindən hər bir dairə və məntəqə seçki komissiyasına 1 məşvərətçi səs hüquqlu üzv, hər dairəyə 3, məntəqələrə isə 6 müşahidəçi, ümumilikdə rayon üzrə dairə və məntəqə seçki komissiyalarına 800 nəfərə yaxın məşvərətçi səs hüquqlu üzv və müşahidəçi təyin edilmişdi.

Görülən bütün bu işlərin nəticəsi olaraq rayonumuzda prezident seçkiləri ədalətli, demokratik, şəffaf və qanunauyğun şəkildə keçirildi.

N.Xəlilov sonda qeyd etdi ki, prezident seçkiləri ərəfəsində rayon partiya təşkilatında təşkilatlanma və partiya sıralarının artması sahəsində də xeyli işlər görülmüşdür. Belə ki, bu ilin 10 ayı ərzində 7 ərazi ilk partiya təşkilatı yaranmışdır ki, onlardan 2-si gənclər ərazi ilk partiya təşkilatlarıdır. Bu müddət ərzində 1167 nəfər partiya üzvlüyünə qəbul olunmuşdur ki, onların 80 faizini gənclər təşkil edir. Seçki ərəfəsində 50-yə yaxın ilk dəfə səs vermə hüququ qazanan 18 yaşlı gənc partiya sıralarına qəbul olunmuşdur. Beləliklə, ərazi ilk partiya təşkilatlarının sayı 197-yə, partiya üzvlərinin sayı isə 11 minə çatmışdır. Yeni Azərbaycan Partiyası üzvlərinin sayının seçkilər ərəfəsində yüksək templə artımı mühüm siyasi əhəmiyyət kəsb edərək möhtərəm prezidentimiz İlham Əliyevə ümumxalq etimadının olduğunu bir daha sübut etdi.

Sonra o, Yeni Azərbaycan Partiyasının yaranmasının 16-cı ildönümü münasibətilə, həmçinin prezident seçkiləri kampaniyasının uğurla başa çatması, seçkilərdə Yeni Azərbaycan Partiyasının qazandığı bu böyük qələbə münasibətilə toplantı iştirakçılarını təbrik etdi.

Binəqədi Rayon İcra Hakimiyyətinin başçısı Alı Qocayev çıxışında YAP-ın yaranma tarixinə ekskurs etdi. Bu gün əzəməti, gördüyü işlərin bənzərsizliyi, əhatə dairəsinin genişliyi ilə və üzvlərinin sayının gündən-günə artması baxımından analoqu olmayan bir partiya olduğunu bildirdi. Prezident seçkiləri zamanı rayonun ayrı-ayrı seçki dairələrində etibarlı sayılan səslərin 85–92 faizinin cənab İlham Əliyevə verilməsi faktına toxundu və qeyd etdi ki, YAP öz titanik fəaliyyəti ilə əbədi bir partiyadır, onun sıraları getdikcə daha çox möhkəmlənir və biz bundan qürur duyuruq. O, toplantı iştirakçılarını YAP-ın yaranmasının 16 illiyi və prezident seçkilərində qazanılan möhtəşəm qələbə münasibətilə təbrik etdi.

Millət vəkili Eldar İbrahimov, YAP Binəqədi rayon təşkilatı idarə heyətinin üzvü Həsən Mirzəyev, rayon ağsaqqallar şurasının sədri Məcid Cəlilov çıxış edərək YAP-ın ölkəmizin siyasi və mədəni həyatında oynadığı roldan və qazandığı nüfuzdan danışdılar.

Toplantının sonunda partiyaya yeni üzv olanlara vəsiqələr təqdim olundu, 50—60 illik yubileyləri qeyd edilən bir qrup partiya üzvü fəxri fərmanla təltif edildi və rayon məktəblərinin yuxarı sinif şagirdləri arasında təşkil edilən bilik yarışmasının qaliblərinə diplom və hədiyyələr verildi.

Zərifə BƏŞİRQIZI.

Xalq qəzeti .-2008.-22 noyabr.-S.6.