Azərbaycan Beynəlxalq Bankı Fars körfəzi bazarına daxil oldu

Azərbaycan Beynəlxalq Bankının Fars körfəzi regionunda ilk ofisi fəaliyyətə başlamışdır. Bu münasibətlə Dubay şəhərində ABB-nin Birləşmiş Ərəb Əmirliyi üzrə nümayəndəliyinin açılış mərasimi keçirilmişdir.

Tədbirdə BƏƏ höküməti, səfirliklər, beynəlxalq təşkilatlar və maliyyə qurumlarının nümayəndələri, ABB-nin İdarə Heyətinin sədri C.Hacıyevin başçılığı ilə bankın rəhbər heyəti iştirak etmişdir.

ABB digər xarici banklardan fərqli olaraq, öz nümayəndəliyini Dubayın müstəqil iqtisadi zonasında deyil, ümumi bazarında açmışdır. Bu üstünlük nümayəndəliyə şəraitdən maksimum yararlanmağa və çoxsahəli layihələrin maliyyələşdirilməsində təşkilatçı kimi çıxış etməyə imkan yaradacaqdır. Gələcəkdə ABB Dubay nümayəndəliyini banka çevirməyi planlaşdırır.

Xatırladaq ki, 2002-ci ildə Londonda, 2005-ci ildə Frankfurt-Maynda, 2008-ci ilin əvvəlində Lüksemburqda ABB-nin nümayəndəlikləri fəaliyyətə başlamışdır. Cari ilin iyul ayında ABB Azərbaycan banklarının arasında ilk olaraq Nyu-York ofisinin açılışı üçün ABŞ Federal Ehtiyatlar Sisteminin Direktorlar Şurasından razılıq əldə etmişdir.

Hazırda Azərbaycan Beynəlxalq Bankı Qatar dövlətinin beynəlxalq maliyyə zonasında törəmə bankının açılışı ilə əlaqədar hazırlıq işləri aparır. Fəaliyyət üçün lisenziya 2009-cu ildə əldə ediləcəkdir. Qatardakı törəmə bankı ABB Maliyyə Qrupunun xaricdə sayca üçüncü bankı olacaqdır. İlk törəmə bank – “ABB-Moskva” 2002-ci ildə fəaliyyətə başlamışdır. İndi bu bank artıq 12 ofis, Moskva, Sankt-Peterburq və Yekaterinburq şəhərlərində filial və şöbələrə malik olan əsaslı maliyyə institutudur və “Profil” jurnalının 1 sentyabr 2008-ci il tarixinə olan reytinqinə əsasən Rusiyanın 1200-dən çox bankı arasında aktivlərinin həcminə görə 193-cü yeri tutur.

2006-cı ilin noyabr ayında ABB 12 mln. lari (7 mln. dollara yaxın) nizamnamə kapitalına malik olan “ABB–Gürcüstan” törəmə bankını təsis etmişdir.

Xalq qəzeti.-2008.-22 noyabr.-S.6.