Bakıda MDB ölkələri vergi xidmətləri rəhbərlərinin əlaqələndirmə şurasının iclası keçirilmişdir

Noyabrın 21-də Bakıda MDB ölkələri vergi xidmətləri rəhbərlərinin Əlaqələndirmə Şurasının XV iclası keçirilmişdir.

İclas iştirakçıları əvvəlcə Fəxri Xiyabanda ümummilli lider Heydər Əliyevin xatirəsini anmış, məzarı önünə əklil qoymuşlar. Görkəmli oftalmoloq alim, akademik Zərifə xanım Əliyevanın məzarı üzərinə də güllər düzülmüşdür.

Sonra qonaqlar Şəhidlər Xiyabanında olmuş, Vətənin ərazi bütövlüyü uğrunda mübarizədə canlarından keçmiş Azərbaycan oğul və qızlarının xatirəsini yad etmişlər. İclasda Azərbaycan, Rusiya, Ukrayna, Belarus, Qazaxıstan, Qırğızıstan, Moldova, Tacikistanın, habelə MDB İcraiyyə Komitəsinin və Baltikyanı dövlətlərin vergi xidmətlərinin nümayəndələri iştirak etmişlər.

İclası açan Moldovanın Baş Dövlət Vergi Müfəttişliyinin rəisi Tatyana Logina qonaqpərvərliyə görə təşkilatçılara təşəkkürünü bildirmiş və rusiyalı həmkarlarını noyabrın 21-də qeyd olunan peşə bayramı münasibətilə təbrik etmişdir.

Azərbaycan vergi nazirinin müavini Natiq Qasımov təcrübə mübadiləsi aparılması, vergi sisteminin təkmilləşdirilməsi baxımından bu cür görüşlərin əhəmiyyətini vurğulamışdır.

“Azərbaycanın müasir vergi sistemi” sənədli filmi nümayiş etdirilmişdir.

İclasda əvvəlki görüşdə qəbul edilmiş qərarların yerinə yetirilməsinin gedişi, 2008-ci il üçün birgə fəaliyyət planı, MDB ölkələri vergi qanunvericiliyinə son dəyişikliklərin monitorinqi ilə bağlı məsələlər müzakirə olunmuş, vergi ödəyicilərinin qeydiyyata alınması, ikiqat verginin aradan qaldırılmasına dair fikir mübadiləsi aparılmışdır.

İclas iştirakçıları Vergilər Nazirliyi nəzdində Xüsusi Rejimli Vergi Xidməti Departamentində olmuş, hüquqi şəxslərin qeydiyyata alınmasının “bir pəncərə” metodu ilə tanış olmuşlar.

Xalq qəzeti.-2008.-22 noyabr.-S.5.