Azərbaycanın pedaqoji
ictimaiyyətinə ağır itki üz vermişdir.
Tanınmış pedaqoq, respublikanın Əməkdar müəllimi
Şəfiqə Əlirza qızı Əliyeva 2008-ci il
noyabrın 24-də ömrünün 78-ci ilində vəfat
etmişdir.
Şəfiqə Əliyeva
1930-cu il dekabrın 1-də Naxçıvan şəhərində
anadan olmuşdur. 1951-ci ildə C.Məmmədquluzadə
adına Naxçıvan şəhər ikiillik Müəllimlər
İnstitutunun kimya-biologiya fakültəsini bitirdikdən sonra
təyinatla Naxçıvan şəhər 1 nömrəli məktəbdə
müəllimlik fəaliyyətinə başlamış, daha
sonra bir müddət Şəki, Cəlilabad və Lənkəran
rayonlarında işləmişdir. 1957-ci ildə
hazırkı Azərbaycan Dövlət Pedaqoji Universitetinin
kimya-biologiya fakültəsini bitirən Ş.Əliyeva
1973-cü ildən müəllimlik taleyini Bakı şəhərindəki
190 nömrəli məktəblə bağlamış,
ömrünün sonunadək bu təhsil ocağında şərəflə
çalışmışdır.
Müəllim işlədiyi
60 ilə yaxın bir müddətdə Ş.Əliyeva
respublikamızda kimya fənninin tədrisi sahəsində
yüksək elmi-nəzəri biliyə, müstəsna pedaqoji
ustalığa və metodiki kamilliyə malik müəllim zirvəsinə
ucalmış, yüzlərlə müəllimin
formalaşmasına böyük əmək sərf
etmişdir. Onun qələminin məhsulu olan elmi-metodik vəsaitlər,
tövsiyə və məqalələr həmişə maraqla
qarşılanmış, tədris prosesinin düzgün
qurulmasında, şagirdlərin kimya fənni üzrə bilik
və bacarıqlara yiyələnməsi istiqamətində
müəllimlərə daim yardımçı olmuşdur.
Ş.Əliyevanın dərs dediyi şagirdlərin xoş
sorağı bu gün nəinki ölkəmizin, eləcə də
xarici dövlətlərin təhsil müəssisələri
və təşkilatlarından gəlir.
Ş.Əliyeva
respublikamızın ictimai-siyasi həyatında da fəal
iştirak edirdi. O, Azərbaycan Ziyalılar Cəmiyyətinin
vitse-prezidenti, “Elm və mənəviyyat” jurnalının təsisçisi,
Azərbaycan Jurnalistlər Birliyinin, Beynəlxalq Qadınlar Cəmiyyətinin
üzvü idi. Ş.Əliyeva, eyni zamanda, “Qızıl qələm”,
“Vətən”, “İnam” media mükafatlarına layiq
görülmüşdür.
Unudulmaz pedaqoq, xeyirxah və
maarifpərvər insan Şəfiqə Əliyevanın əziz
xatirəsi onu tanıyanların xatirəsində daim
yaşayacaqdır.
Allah rəhmət eləsin!
Azərbaycan Respublikası Təhsil Nazirliyi
Xalq qəzeti.- 2008.-
25 noyabr.- S. 4.