Vaxt var idi bu idman
ocağını hamı nümunə göstərirdi. Mərkəzin
yetirmələrinin sorağı dünyanın müxtəlif
ölkələrindən gəlirdi. Dünya və Avropa
birinciliklərinin qalibləri, müxtəlif beynəlxalq
turnirlərin iştirakçıları, idmanın
ayrı-ayrı növləri üzrə yığma
komandaların üzvləri arasında filialın ərsəyə
gətirdiyi yeniyetmə gənclər az deyildi. Xüsusilə
90-cı illərdə idman mərkəzinin şöhrəti
hər yerə yayılmışdı.
Amma, bir ara mərkəzin
fəaliyyətində durğunluq hiss olunmağa
başlandı. Müxtəlif idman qruplarının sayı
azaldı. Təbii ki, idman qurğularına münasibət də
dəyişdi. Baxımsızlıq, laqeydlik, naşı
adamların işə qəbul edilməsi, qeyri-peşəkarlıq
filialın fəaliyyətinə mənfi təsir göstərdi.
Təbii ki,
yaranmış vəziyyət əlaqədar təşkilatları
narahat etməyə bilməzdi. Buna görə də
müvafiq tədbirlər görüldü. İdman mərkəzinin
əvvəlki şan-şöhrətini bərpa etmək
üçün qüvvələr səfərbərliyə
alındı.
Bu ilin əvvəllərindən
başlayaraq filialın həyatında canlanma
açıq-aşkar hiss olunur. Doğrudur, çoxları
bunu 2002-ci ilə kimi burada rektor vəzifəsində işləyən,
sonradan, yəni 2008-ci ilin fevralında yenidən əvvəlki
işinə bərpa olunan Azərbaycan Respublikasının əməkdar
məşqçisi, Fəxri Bədən Tərbiyəsi
işçisi, Milli Olimpiya Komitəsinin keçmiş
vitse-prezidenti Çingiz Pirverdiyevin birbaşa zəhməti
kimi qiymətləndirir. Lakin Ç.Pirverdiyev özü tamamilə
başqa fikirdədir. O, söhbət zamanı dedi:
- Müvafiq təşkilatların,
şəhər icra hakimiyyətinin, Təhsil Nazirliyinin
yaxından köməyi olmasaydı,
dağıdılmış, yararsız hala salınmış
bir kompleksdə nə etmək olardı? Ayrı-ayrı
xeyirxah adamlar, idman fədailəri, idmanın gələcək
inkişafına dəstək verənlər olmasaydı vəziyyəti
dəyişmək mümkün deyildi. Milli Məclisin
üzvü Aydın Abbasovun işimizə yaxından köməklik
göstərməsini də qeyd etməliyik. Ümumiyyətlə,
layiqli idmançı kadrlar yetişdirmək üçün
üç-beş nəfər heç nə edə bilməz.
Bu işdə hamı öz köməyini əsirgəməməlidir.
Ailədən başlamış təhsil, əmək
kollektivinə kimi...
... Son vaxtlar Gəncədəki
“Təhsil” İdman Mərkəzinə yolu düşənlər
burada layiqli idmançılar yetişdiriləcəyinə
böyük ümidlə yanaşırlar. Çünki mərkəzdə
qısa müddət ərzində yaradılan şərait,
işə peşəkarcasına münasibət bunu deməyə
imkan verir.
Məktəbin
ayrı-ayrı binaları, müxtəlif qurğuları əsaslı,
özü də böyük zövqlə təmir olunub, yeni
bölmələr yaradılıb, məşqçilərin
sayı artırılıb, təhsil ocaqları, ailələrlə
əlaqələr gücləndirilib. Xüsusilə olimpiya
idman növlərinin çoxaldılmasına xüsusi diqqət
yetirilib.
İndi burada
idmançıların normal məşq etməsi
üçün yaradılan şərait ürəkaçandır.
Hamamı, saunası, üzgüçülük hovuzu olan
bazanın idman bölmələrində məşğul olmaq
istəyənlərin sayı aybaay artır. Başqa ölkələrdən,
şəhər və rayonlardan gələn
idmançıları qarşılamaq üçün
artıq heç bir problem yoxdur. Öz şəraitinə
görə şəhər mehmanxanasından heç də
geri qalmayan gözəl qonaq otaqları düzəldilib.
Keçən ayın əvvəllərində
İngiltərənin Liverpul şəhərindən gəlmiş
təcrübəli idman məşqçilərindən biri mərkəzdə
yaradılan şəraitdən məmnunluğunu gizlətməyərək:
– “Əminəm ki, 2012-ci ildə ölkəmizdə
keçiriləcək növbəti olimpiadada sizin mərkəzin
idmançılarını da görəcəyik” -demişdi.
Yeri gəlmişkən qeyd edək ki, Londonda keçiriləcək
XII Yay Olimpiya oyunlarına indidən ciddi hazırlıq işləri
görülür. Artıq Çingiz Pirverdiyevin
özünün məşqçisi olduğu
idmançılardan Sədi Əliyev 48 kiloqram çəkidə
Makedoniyada keçirilən Avropa çempionatında birinci
yeri, Şahlar Nağıyev Dünya kuboku uğrunda
yarışlarda üçüncü yeri tutublar. Məşqçi
Elçin Zeynalovun yetirməsi Toğrul Əsgərov sərbəst
güləş üzrə yeniyetmələr arasında Avropa
birinciliyinin qalibi olub. Cüdo idman növü üzrə Qaya
Xəlilovun yetirmələrindən Samir İsmayılov
Dünya kubokunun sahibi, Giləxanım Ələkbərova isə
həmin yarışda üçüncü yeri tutub. Gəncədə
bir o qədər də kütləvi olmayan basketbol idman
növü də inkişaf etməyə başlayıb. Mərkəz
basketbolçularının respublika birinciliyinin
yarımfinalına qədər çıxa bilməsi bunu bir
daha təsdiq edir. Zakir Ağayevin rəhbərlik etdiyi voleybol
komandası artıq diqqəti cəlb edir. Ağır atletlərdən Yunis Kazımov, Tural Həsənov, Osman Dadaşov respublika birinciliyinin qalibi olublar.
Gəncədəki “Təhsil” idman mərkəz kompleksi ulu öndər Heydər Əliyevin təşəbbüsü ilə
şəhərdə inşa
olunan saysız-hesabsız
obyektlərdən biridir. 1976-cı ildə
istifadəyə verilən
bu nəhəng idman qurğusu indi, necə deyərlər, “ikinci həyatı”nı yaşayır. Əminik ki, çox qısa vaxt ərzində bu mərkəzin sorağı
dünyanın hər
yerindən gələcək.
Çünki burada idmana məhəbbət, idmançıya diqqət,
qayğı var. Bu varsa,
demək, qələbə
də olacaq.
Hamlet QASIMOV.
Xalq qəzeti.-2008.-26
noyabr.- S.5.