Dünya Bankı ilə Azərbaycan hökuməti arasında daha bir saziş imzalanmışdır

Noyabrın 28-də Azərbaycan Hökuməti ilə Dünya Bankı arasında növbəti saziş imzalanmışdır.

“Sosial müdafiə sahəsinin inkişafı” layihəsi sazişini Azərbaycan tərəfdən əmək və əhalinin sosial müdafiəsi naziri Füzuli Ələkbərov, Dünya Bankı (DB) adından isə qurumun Azərbaycan üzrə ölkə meneceri Qreqori Yedjeyçak imzalamışlar. Mərasimdə çıxış edən F.Ələkbərov son 5 ildə Azərbaycanda 740 min iş yerinin açıldığını, bunların 530 mininin daimi olduğunu demişdir.

Bu il mayın 27-də DB-nin Direktorlar Şurası tərəfindən təsdiq edilmiş layihənin təqdimatı ilə nazirliyin beynəlxalq əlaqələr şöbəsinin müdiri Elnur Sultanov çıxış etmişdir. Sözügedən layihənin ümumi dəyəri 54,6 milyon ABŞ dollarıdır. Bu vəsaitin 26,7 milyon dolları DB tərəfindən kredit şəklində, qalan 27,9 milyonu isə Azərbaycan Hökuməti tərəfindən maliyyələşdiriləcəkdir. Əsas icraçılar nazirlik və Dövlət Sosial Müdafiə Fondudur.

Layihənin icrası nəticəsində əmək bazarının modernləşdirilməsi, sosial müdafiə qurumlarının fəaliyyətinin gücləndirilməsi, xidmətlərin yaxşılaşdırılması, nazirliyin kadr potensialının təkmilləşdirilməsi, iş proseslərinin tam avtomatlaşdırılması, reabilitasiya xidmətlərinin çeşidinin və keyfiyyətinin artırılması və sair işlər həyata keçiriləcəkdir. Eyni zamanda, çətin şəraitdə olan uşaqlar, gənclər, qadınlar, əlillər və ahıllar üçün sosial iş, qayğı, əlilliyin qiymətləndirilməsi ilə bağlı xidmətlər də təkmilləşdiriləcəkdir.

Q.Yedjeyçak layihənin uğurla həyata keçiriləcəyinə şübhə etmədiyini vurğulamışdır.

Xalq qəzeti.-2008.-29 noyabr.-S. 5.