Gənclər mətbuatı—90

Mətbuat Şurası diqqəti uşaq və gənclər mətbuatının inkişafına yönəldir

Azərbaycan Mətbuat Şurasında keçirilən “Azərbaycan KİV sistemində uşaq və gənclər mətbuatının rolu: dünən, bu gün, sabah” mövzusunda ”dəyirmi masa”da mətbuatın bu sahəsinin tarixi təcrübəsinə, çağdaş problemlərinə və perspektivlərinə geniş nəzər salındı.

Tədbiri giriş sözü ilə açan MŞ sədri Əflatun Amaşov bugünkü toplantının 70 ildən artıq bir müddətdə milli gəncliyin sevimli qəzeti, dövrünün populyar nəşri olmuş “Azərbaycan gəncləri” qəzetinin 90 illik yubileyinə həsr olunduğunu bildirdi. Natiq bu qəzetin milli jurnalistika tariximizdəki unudulmaz rolunu qədirbiləniklə xatırlatdı. MŞ sədri bugünkü uşaq və gənclər mətbuatının vəziyyətinə toxunaraq qeyd etdi ki, sayı o qədər də az olmayan bu nəşrlər ölkə KİV-lərinin ümumi durumundan müsbət mənada fərqlənmir.

Mediamızdakı çətinliklərin uşaq və gənclər mətbuatına daha çox təsir göstərdiyini bildirən Ə.Amaşov “dəyirmi masa” iştirakçılarını fəal diskussiyaya dəvət edərək dedi: “KİV-ə Dövlət Dəstəyi Konsepsiyasında uşaq və gənclər mətbuatına xüsusi önəm verilib. Konsepsiyanın KİV-lərin inkişafına dövlət dəstəyinin sahələri bölümündə uşaq və gənclərin fiziki və mənəvi inkişafı prioritet mövzu kimi göstərilib. Bu amil həmin sahə üzrə ixtisaslaşmış media orqanları üzərinə böyük məsuliyyət qoyur. Təbii ki, mövcud durum uşaq və gənclər mətbuatına dövlətin və cəmiyyətin xüsusi diqqət yetirməsini önə çəkir, problemlərinin həllinə qayğı göstərilməsini aktuallaşdırır”.

15 il “Azərbaycan gəncləri” qəzetinin redaktoru olmuş tanınmış jurnalist və publisist Yusif Kərimov çıxışında uzun müddət rəhbərlik etdiyi mətbu orqanın tarixindən söhbət açdı. Nəşrin Azərbaycan Xalq Cümhuriyyəti dövründə yarandığını bildirən jurnalist 25 il “Gənc işçi” adı ilə fəaliyyət göstərən qəzetin Böyük Vətən müharibəsindən sonra “Azərbaycan gəncləri” adı ilə nəşr olunlduğunu yada saldı.

Y.Kərimov bildirdi ki, “Azərbaycan gəncləri” qəzeti Azərbaycan Gənclər İttifaqı Mərkəzi Komitəsinin orqanı kimi fəaliyyət göstərsə də dövrün ideoloji yasaqları bu nəşrin yaradıcılıq xüsusiyyətlərini, milli dəyərlərə bağlılığını məhdudlaşdıra bilməyib. Qəzetin “şinelindən çıxan” tanınmış yazarların sayı yüzlərlədir. Onlar indinin özündə də media aləmində fəal iştirakları ilə seçilirlər. Bu isə nəşrin ölkənin KİV sistemində vaxtilə oynadığı səmərəli roldan xəbər verir.

“Dəyirmi masa”da çıxış edənlərdən “Savalan” qəzetinin baş redaktoru Eldar Əliyev, “Paralel” qəzetinin baş redaktoru Tapdıq Abbas, “Tumurcuq” qəzetinin redaktoru İrfan Məmmədli, ”Şəfəq” qəzetinin baş redaktoru Qardaş İsmayılov, “Xalq qəzeti”nin əməkdaşı Əlipənah Bayramov və digər natiqlər də ”Azərbaycan gəncləri” qəzetinin onilliklər boyu uşaq və gənclər mətbuatı sistemində lider olduğunu, respublikanın mərkəzi mətbuatı üçün baza rolu oynadığını məmnunluqla xatırladılar.

Toplantıda müstəqillik dövründə uşaq və gənclər mətbuatının KİV sistemində rolunu artırmaq, onların dövriliyini və tirajını sabitləşdirmək, çətinliklərini aradan qaldırmaqla bağlı dəyərli mülahizələr səsləndi. Bildirildi ki, belə gərəkli diskussiyaları davam etdirməklə, Azərbaycan milli mətbuatının 135 illik yubileyinə qədər uşaq və gənclər mətbuatının tarixi, çağdaş vəziyyəti, problemləri və inkişaf perspektivləri sistemləşdirilməli, əməli tədbirlərin həyata keçirilməsi təmin olunmalıdır.

R.TAHİR

Xalq qəzeti.- 2009.- 3 noyabr.- S. 7.