Ömür bir pəncərədir...

Xeyirxah, işgüzar, yaxşı əməl sahibləri həyat durduqca yaşayırlar. Həyatda özündən sonra iz qoyan, millətinə, xalqına sədaqətlə xidmət edən, yüksək təşkilatçılıq qabiliyyətinə malik şəxslər insanların qəlbində hələ sağlığında ikən öz heykəllərini ucaldırlar. Belə şəxslərdən biri də uzun illər partiya-sovet orqanlarında işləmiş, qurub-yaratmış, yaddaşlara həkk olunmuş Vahid İsmayılovdur. Ömür vəfa etsəydi, bu günlərdə 78 yaşı tamam olacaqdı.

Vahid İsmayılovun işgüzarlığı, prinsipiallığı, insanlara böyük qayğı göstərməsi barədə çox eşitmişdim. Onun haqqında yazılmış kitabları, mətbuatda dərc olunmuş məqalələri oxuduqca yaxşı əməlləri ilə həyatda silinməz izlər buraxmasına bir daha əmin olursan. İşlədiyi rayonun, habelə respublikanın tərəqqisi üçün gecə-gündüz çalışan, el-obanın qayğısına qalan, insanların dərdini öz dərdi bilən, kimsəsizlərə arxa - dayaq olan Vahid İsmayılovun həyat yoluna diqqət yetirdikdə onun 33 yaşında böyük etimad qazandığının şahidi oluruq...

Sovet dövründə, o sərt vaxtlarda qüdrətli tarixi şəxsiyyət Heydər Əliyevin rəhbərliyi altında rayon rəhbəri olmaq böyük məsuliyyət tələb edirdi. Hər bir sahəni mükəmməl bilən, Vətənin çiçəklənməsini, şöhrətlənməsini, insanların həyat tərzinin yaxşılaşmasını daim diqqət mərkəzində saxlayan ulu öndər kadrların seçilib- yerləşdirilməsini də prioritet məsələlərdən hesab edirdi. SSRİ məkanında Azərbaycanın bütün sahələr üzrə inkişafı, geriliyin aradan qaldırılması və qabaqcıllar sırasına qoşulması ən vacib vəzifə kimi qarşıya qoyulmuşdu. Bundan ötrü yüksək təşkilatçılıq qabiliyyətinə malik, prinsipial, Vətənə və xalqa sədaqətlə qulluq edən, öz işgüzarlığı ilə başqalarına nümunə ola biləcək ziyalılara böyük ehtiyac var idi. Ulu öndər Heydər Əliyev belə şəxslərə böyük diqqət yetirir, onlara etimad göstərirdi. Vahid İsmayılov ulu öndərin etimad göstərdiyi kadrlardan idi. Belə olmasaydı, onu geridə qalmış rayonların birinə rəhbər təyin etməzdi. O vaxt respublikamızda ən böyük pambıqçılıq və heyvandarlıq rayonu kimi tanınan Ağcabədiyə belə bir gənc kadrın rəhbər təyin edilməsi dahi şəxsiyyətin uzaqgörənliyi, insanları yaxşı tanıması, gənclərə inam və etimadın nəticəsi idi. V. İsmayılov bu etimadı öz əməli işi ilə doğrultmuşdu. O, hələ Zəngilan Rayon Partiya Komitəsinin birinci katibi vəzifəsində çalışarkən işgüzarlığı ilə diqqəti cəlb etmişdi. İldən-ilə uğurlar qazanan, iqtisadi göstəricilərinə, əldə olunan müvəffəqiyyətlərinə, sosial-mədəni sahədəki nailiyyətlərinə görə Ağcabədi rayonu tezliklə respublikamızda öncül yerlərdən birinə yüksəldi. İnsanların əməyinə, zəhmətkeşlərə verilən yüksək qiymət, abadlaşdırılmaya, tikintiyə xüsusi diqqət yetirməsi yerli əhalinin ona inamını daha da artırırdı.

O dövrdə Ağcabədi rayonu ilə həmsərhəd olan Jdanov (indiki Beyləqan) da geridə qalan rayonlardan idi. Qüdrətli şəxsiyyət Heydər Əliyevin respublikada başladığı geniş miqyaslı işlər Jdanov rayonunda çox ləng həyata keçirilirdi. Rayonun iqtisadi qüdrətinin artırılması, qabaqcıllar cərgəsinə qoşulması üçün yüksək təşkilatçılıq qabiliyyətinə malik, işgüzar kadra böyük ehtiyac var idi. Ümummilli lider Heydər Əliyev belə bir vaxtda yenə də Vahid İsmayılova etimad göstərdi və onu Jdanov (Beyləqan) Rayon Partiya Komitəsinə birinci katib göndərildi.1978-ci ildən 1982-ci ilin sonunadək bu rayonda Vahid İsmayılovun rəhbərliyi altında yüksək nailiyyətlər əldə olundu.

Hazırda rayonda əsas tədbirlərin keçirildiyi 600 yerlik mədəniyyət sarayı məhz V. İsmayılovun səyi nəticəsində tikilib. Rayonun daxili imkanları hesabına tikilməyə başlayan bu böyük tikinti kompleksi sonradan plana da salındı. O dövrdə ulu öndər müntəzəm olaraq rayonlara gedir, görülən işlərlə yaxından tanış olurdu. Jdanov (Beyləqan) rayonunda olarkən görülən işlərdən razılığını bildirən və əlavə tapşırıqlar verən umummilli lider mədəniyyət sarayı kompleksində inşaat işləri ilə tanış olarkən bu tikintinin cari ilin planına salınması barədə yerindəcə göstəriş vermişdir. Ulu öndərin bu qayğısı rayon rəhbərliyinə sanki güc-qüvvət verdi. Gənc, perspektivli, işgüzar gənclərə şərait yaradıldı. Rayon iqtisadiyyatının əsasını təşkil edən pambıqçılıqla yanaşı üzümçülük, heyvandarlıq və digər sahələrin inkişafında da əsaslı dönüş yarandı. Nəhayət, Beyləqan rayonu respublikamızın inkişaf etmiş rayonları sırasına qoşuldu. Ümumiyyətlə, Vahid İsmayılova hansı sahə tapşırılırdısa, o sahədə ciddi irəliləyiş müşahidə olunurdu. Ümummilli lider Heydər Əliyev V. İsmayılovu qabaqcıl, tapşırılan işi layiqincə yerinə yetirən, yüksək təşkilatçılıq qabiliyyətinə malik kadr kimi xarici ölkələrdə keçirilən tədbirlərə də göndərirdi. O vaxtlar artıq ənənəyə çevrilmiş Azərbaycan-Özbəkistan pambıqçıları arasında qabaqcıl iş təcrübəsini öyrənmək üçün qarşılıqlı səfərlərdə V. İsmayılov yeganə birinci katib idi ki, həmişə respublikamızın nümayəndə heyətinin tərkibinə salınırdı. Bu da ulu öndərin etimadının, inamının nəticəsi idi. Onlarla xarici ölkələrdə də o, Azərbaycanı müvəffəqiyyətlə təmsil edib.

1969-cu ildən 1983-cü ilə qədər respublikanın bir sıra rayonlarında rəhbər vəzifələrdə çalışmış V. İsmayılovun əməyi o vaxtlar dövlətin ən yüksək mükafatlarına layiq görülmüşdür. Bu təltiflər sırasında iki Lenin ordeni, iki Oktyabr İnqilabı ordeni, Qırmızı Əmək Bayrağı ordeni və digərləri diqqəti cəlb edir. O, Azərbaycan KP MK-nın üzvü və Azərbaycan SSR Ali Sovetinin deputatı seçilmişdir. 1974-1976-cı illərdə Azərbaycan SSR Ali Soveti Rəyasət Heyətinin üzvü olmuşdur. Onu da qeyd edək ki, belə yüksək dövlət mükafatlarına layiq görülmək, səlahiyyətli vəzifələrə seçilmək o qədər də asan deyildi. Bütün bunlar bir daha təsdiqləyir ki, Vahid İsmayılov ulu öndərin inandığı və güvəndiyi şəxslərdən idi. Hətta, bir dəfə V. İsmayılovun səhhətində problem yarananda Bakıdan xüsusi həkim briqadası Jdanova (Beyləqana) göndərilmiş və yerindəcə ona yüksək tibbi yardım göstərilmişdi.

... Azərbaycan ikinci dəfə müstəqilliyini qazandıqdan sonra xalqın təkidli xahişi ilə yenidən hakimiyyətə gələn ümummilli lider Heydər Əliyev V. İsmayılovun ailəsi ilə maraqlanmışdır. Qədirbilən ulu öndər hələ Moskvada yüksək vəzifədə işləyərkən məşhur neftçi Fərman Salmanov Vahid İsmayılovun dünyasını dəyişməsi barədə ona məlumat vermişdi. Ümummilli lider bu acı xəbərdən çox mütəəssir olduğunu bildirmişdi. Müstəqil Azərbaycanın inkişafında, daha da şöhrətlənməsində belə təcrübəli, yüksək peşəkarlıq qabiliyyətinə malik şəxslərə böyük ehtiyac var idi.

Hazırda müstəqil dövlətimiz ulu öndər Heydər Əliyevin siyasi kursunu layiqincə davam etdirən möhtərəm Prezidentimiz İlham Əliyevin rəhbərliyi altında yüksək inkişaf yoluna qədəm qoymuş, beynəlxalq aləmdə böyük nüfuz qazanmışdır. Bu siyasi kurs müstəqil Azərbaycanı getdikcə şöhrətləndirəcək. Vahid İsmayılov bu günü görməyə haqqı çatan şəxslərdən idi. Çünki o da ümummilli lider Heydər Əliyev siyasi məktəbindən dərs almışdı, ulu öndərin rəhbərliyi altında uzun müddət rəhbər vəzifələrdə çalışmışdı, böyük təcrübə toplamışdı və sovetlər birliyində respublikamızın qabaqcıllar sırasına qoşulmasında böyük zəhmət payı olmuşdur.

Vaxtsız ölüm aman versəydi, bu günlərdə 78 yaşı tamam olacaqdı. Öz biliyini, bacarığını, yüksək təşkilatçılıq qabiliyyətini müstəqil dövlətimizin çiçəklənməsi yolunda yenə də əsirgəməyəcəkdi. Elə bu sədaqətinə, özündən sonra silinməz iz qoyduğuna, işlədiyi dövrdə insanlara qayğı göstərdiyinə görə bu gün də qəlblərdə yaşayır.

Ağakişi HACIYEV,

Azərbaycan Vəkillər Kollegiyasının üzvü

Xalq qəzeti.- 2009.- 22 noyabr.- S. 5.