Qax sakinlərinə yeni ildən müasir tipli Mərkəzi Xəstəxanada xidmət göstəriləcək

Bölgə müxbiri kimi çalışdığım rayonlardakı sosial-iqtisadi inkişafı, tikinti-quruculuq işlərini, insanların rifah halının daha da yaxşılaşdırılmasını qələmə almaq mənim üçün həmişə xoş olub. Belə faktların çoxluğundan məmnunluq hissi keçirmişəm. Ancaq nədənsə yeni tikilmiş və ya əsaslı təmir edilmiş səhiyyə müəssisəsi barədə yazı qələmə alanda qələm daha “ürəkdən işləyir”. Desəm ki, bunun səbəbini özüm də bilmirəm, səmimiyyətimə inanın. Hansı rayonda, şəhərdə və ya hansı yaşayış məntəqəsində olursa olsun, müasir səhiyyə ocağının tikilməsi və ya mövcud olan belə ocaqların təmir və bərpası son nəticədə insana, ölkə vətəndaşına xidmət edir.

Mənim yeni səhiyyə ocağı görəndə sevinməyimin təməlində bəlkə də SSRİ dövründən qalan müəyyən psixoloji məqamlar dayanır. Çünki o dövrdə istənilən rayonda hansısa xəstənin vəziyyəti bir az ağırlaşırdısa, dərhal deyirdilər Bakıya aparın. Bakıdan isə xəstələrin Moskvaya və ya başqa şəhərlərə aparılması tendensiyası hökm sürürdü. İndi isə... Mingəçevirdə, Zaqatalada, Qəbələdə, Şəkidə çox yüksək səviyyədə təchiz edilmiş səhiyyə ocaqları var (Balakəndə isə çox keçməyəcək ki, yeni xəstəxana binası istifadəyə veriləcək). Bu xəstəxana və diaqnostika mərkəzləri nəinki yerləşdiyi şəhərin və rayonun əhalisinə, eləcə də ətraf bölgələrin camaatına da müasir səhiyyə xidməti göstərirlər. Həmin müəssisələrdəki maddi-texniki təchizatı və yüksək səviyyəli kadr potensialını görəndə ürəyimdən keçən ilk fikir belə olurdu ki, kaş bütün rayonlarımızda belə xəstəxanalar olsun. İndi, bu yazını qələmə alarkən həmin arzumun çin olduğu barədə söyləməyi də unutmayacağam. Çünki yeni ildən Qaxda əsaslı təmirdən sonra ən yüksək səviyyədə təchiz edilmiş mərkəzi rayon xəstəxanası işə düşəcək. Odur ki, çox gözləməyəcəyik. Yeni ilə nə qalıb ki?

....Respublikanın əməkdar həkimi Fərman Əhmədzadəni çoxdan tanıyıram. Qaxlılar onu yaxşı həkim, rayonun tibb ictimaiyyəti yaxşı səhiyyə təşkilatçısı, ədalətli kollektiv rəhbəri, gözəl insan kimi tanıyırlar. Mənim isə Fərman müəllim həm də yaxşı həmsöhbət kimi xüsusi rəğbətim var. Elə bu yazıda qələmə aldığımız fikirləri də rayon mərkəzi xəstəxanasının baş həkimi kimi deyil, maraqlı bir həmsöhbət kimi danışdı:

— Bu gün ölkəmiz öz tarixi ərzində ən yüksək inkişaf mərhələsini yaşayır. Bu sözləri deyəndə təkcə dövlətin büdcəsinin artmasını, ordunun heç zaman olmayan bir səviyyədə qüdrətlənməsini, böyük tikinti-quruculuq işlərini nəzərdə tutmuram. Əlbəttə, onlar da cəmiyyət həyatında xüsusi önəm kəsb edən məsələlərdir. Mən “ölkənin ən yüksək inkişaf mərhələsi” dedikdə insana göstərilən qayğını və diqqəti nəzərdə tuturam. Təməli ulu öndər Heydər Əliyev tərəfindən qoyulan bu siyasət cənab Prezident İlham Əliyev tərəfindən böyük uğurla davam etdirilir. İnsana göstərilən qayğı və diqqəti nə üçün qabartmağa çalışıram? Son iki yüz il ərzində, elə ondan əvvəlki dövrlərdə də müxtəlif imperiyaların tərkibində olan Azərbaycan insanı layiq olduğu diqqəti və qayğını heç zaman görməyib. İndi isə Allaha şükür hər şey hamının gözü qabağındadır. Bəlkə də mən ixtisasca və daxilən həkim olduğuma görə belə düşünürəm. Mənim fikrimcə insana göstərilən qayğı və diqqətin önündə əvvəlcə onun lazımi səhiyyə xidməti ala bilməsi, sonra isə təhsillə əhatələndirilməsi getməlidir. Uşaq 6-7 yaşına kimi sağlam böyüyə bilməsə, onun normal təhsil ala bilməsi də problemə çevriləcək. Dövlət öz vətəndaşına bu iki xidməti yüksək səviyyədə göstərirsə, deməli milli tariximiz qarşısında böyük xidmətlər göstərmiş olur.

Diqqət yetirin, bu gün Azərbaycanın elə bir bölgəsi yoxdur ki, orada müasir dünya standartları səviyyəsində Müalicə Diaqnostika Mərkəzi və ya yüksək standartlara cavab verən xəstəxanalar, səhiyyə ocaqları tikilməsin. 2003-cü ilin oktyabrından sonra ölkədə tikilən yeni məktəblərin sayı artıq yüzlərlə deyil, minlərlə hesablanmaq ərəfəsindədir. Mənim fikrimcə ölkə insanının sabahını düşünərək atılan bu addımlar ən uğurlu dövlət siyasətinin nəticəsidir. Cənab İlham Əliyevin imzaladığı “Azərbaycan Respublikası regionlarının sosial-iqtisadi inkişafı Dövlət Proqramları” sözün həqiqi mənasında regionların böyük inkişafına zəmin yaradıb. Elə Qax Rayon Mərkəzi Xəstəxanasının indi gördüyünüz şəkildə, tamamilə yenidən qurulması da məhz həmin dövlət proqramları çərçivəsində mümkün olub.

Dövlət Proqramlarının icrasına uyğun olaraq artıq iki ilə yaxındır ki, Mərkəzi xəstəxanada əsaslı təmir işləri aparılır. Binanın dam örtüyü tamamilə təzələnib, arakəsmələr sökülüb, otaqlar müasir tələblərə uyğun yenidən bölüşdürülərək Avropa standartları səviyyəsində yeni qapı və pəncərələr qoyulubdur. Su, elektrik, istilik və kanalizasiya xətləri təzələnibdir. İnfeksion və cərrahiyə şöbələri artıq xeyli müddətdir ki, tam hazır vəziyyətə gətirilib. Bu işlər üçün 2007-ci ildə 300 min, 2008-ci ildə isə 700 min manatlıq iş görülüb. Cari ildə isə işlər hələ davam edir. Təmir işləri ilin sonunadək başa çatdırılacaq. Artıq xəstəxananın həyətində abadlıq işlərinə başlanılıb. Camaşırxana və qazanxana yenidən qurulub. Qazanxanaya çəkilən qaz xətti isə daxili imkanlar hesabına başa gəlib. Xəstəxanaya yeni rentgen və ultrasəsli müayinə aparatı, eləcə də exo-kardioqram aparatları verilib. Laboratoriyalar isə tamamilə müasir avadanlıqla təchiz olunacaqdır. Bir sözlə, yeni ildən qaxlılar müasir standartlara cavab verən mərkəzi xəstəxananın xidmətindən istifadə edə biləcəklər.

Fərman Əhmədzadə deməsə də mən bir məsələni qeyd etmək istəyirəm. Rayon mərkəzi xəstəxanası əsaslı şəkildə təmir edilirsə və bu məqsədlə binanın əksər hissələri sökülübsə, üstəlik, xəstəxana öz fəaliyyətini dayandırmayıbsa, bu səhiyyə ocağında çalışanların gərgin fəaliyyətinin miqyasını təsəvvür etmək çətin deyil. Tibb işçiləri sözün həqiqi mənasında fədakarlıq nümayiş etdirərək öz vəzifələrinin öhdəsindən layiqincə gəliblər. Hətta, bu proses gedə-gedə qonşu rayonlardan da çoxlu sayda xəstə qəbul edilib. Bu dövrdə ən gərgin iş isə gündə iki-üç dəfə təmirin vəziyyəti ilə tanış olan həkimin fəaliyyəti olub. Üstəlik rayonun digər tibb müəssisələrinin fəaliyyətinin nizamlanması... Baş həkim həmin məsələlər barədə söz açaraq dedi:

— Rayonumuzda 55 min nəfər əhaliyə 370 çarpayılıq mərkəzi Rayon Xəstəxanası, 60 çarpayılıq uşaq xəstəxanası, ümumilikdə 205 çarpayı olmaqla 7 kənd xəstəxanası və 26 yerli tibb müəssisəsi səhiyyə xidməti göstərir. Bundan başqa 2 təcili tibbi yardım məntəqəsi, eləcə də qadın və uşaq məsləhətxanaları da rayon əhalisinin xidmətindədir. Mərkəzi rayon xəstəxanası 1975-ci ildə — ulu öndər Heydər Əliyevin ölkəyə birinci dəfə rəhbərlik etdiyi dövrdə, xüsusi layihə əsasında tikilib. İki mərtəbədən ibarət xəstəxanada 11 şöbə fəaliyyət göstərir. Biz məmnunuq ki, ulu öndərin tikdirdiyi xəstəxananı 34 ildən sonra onun siyasi varisinin imzaladığı Dövlət Proqramı çərçivəsində Avropa standartları səviyyəsində yenidən qurulur.

Ümumiyyətlə, rayonun tibb müəssisələrində həm maddi-texniki bazanın möhkəmləndirilməsi, həm də tibbi xidmətin yüksəldilməsi dövlətin bizim qarşımıza qoyduğu vəzifələr səviyyəsindədir. Kadrların yerləşdirilməsi, təkmilləşdirilməsi, əmək intizamının təmin edilməsi, yeni texniki vasitələrin alınması, dərmanların gətirilməsi, xüsusən imtiyazlı xəstələrə (şəkərli diabet, onkoloji, psixonevroloji, vərəmli, bronxial astmalı xəstələr, şəhid ailələri. I, II qrup əlillər) pulsuz dərmanların verilməsi daim diqqət mərkəzindədir. Təkcə 2009-cu ilin 9 ayında imtiyazlı xəstələrə 59 min manatlığa yaxın dərman verilib. Güzəştli tibbi xidmət alanların sırasında rayonda yaşayan qaçqın və məcburi köçkünlər də vardır. Həmin insanlar da pulsuz tibbi xidmətdən istifadə edirlər.

Beləliklə, bu dağlar diyarındakı səhiyyə ocaqlarının fəaliyyəti barədə bir neçə faktı söyləməklə qısa da olsa söz açdıq. Sonda Qaxda eşitdiyimiz özümüz üçün maraqlı olan iki ifadəni hörmətli oxuculara da təqdim edirik. Bir ağbirçək söylədi ki, xəstəni həkimin verdiyi dərman yox, həkimin danışığı müalicə edər. Maraqlı işarə idi. Qaxda görüşdüyümüz mingəçevirli dostumuzun ifadəsi isə daha maraqlı idi: “Qaxda xəstəxana nəyə gərəkdir? Bu rayonun təbiəti elə insanın bütün dərdlərini müalicə edir”. Təki belə olsun. Amma Avropa filosoflarından biri deyib ki, nə qədər ki, yer üzündə insan var, o vaxta qədər həkimə ehtiyac olacaq. Yadıma “Hippokratın məşhur sözü düşdü. “Xəstə sağalanadək həkimin ürəyi ilə yaşayır”. Görürsünüzmü nə qədər sərrast deyilib? Məncə əlavə şərhə ehtiyac yoxdur.

İlqar HƏSƏNOV

Xalq qəzeti.- 2009.- 22 noyabr.- S. 4.