Qəti və ciddi mübarizə varsa...
Gəncədə cari ilin 9 ayında baş vermiş
cinayətlərin 96 faizi açılmışdır ki, bu da
şəhər polis idarəsi və onun tabeli
orqanlarının işindəki yüksək fəallıqla
bağlıdır.
Şəxsi heyətin
mübarizliyinin yüksəldilməsi, kadrların seçilib
yerləşdirilməsi, mənəvi-psixoloji mühitin
sağlamlaşdırılması, əməkdaşların mənəvi
və maddi həvəsləndirilməsinə diqqətin
artırılması, cinayətkarlığa qarşı
mübarizədə tabeli orqanların rolunun
artırılması, xidmət və icraçılıq
intizamının daha da möhkəmləndirilməsi və
digər amillər bu gün Gəncə şəhər
polisinin fəaliyyətində özünü
açıq-aşkar büruzə verir. Sadaladığımız
bu vacib tədbirlərin həyata keçirilməsinin nəticəsidir
ki, Gəncədə cinayətkarlığa qarşı ciddi,
amansız və ardıcıl mübarizə aparılır. Rəqəmlərə
fikir verək. Bu ilin 9 ayında şəhərdə 520 cinayət
hadisəsi qeydə alınmış və onların
üstünün açılması 96 faiz təşkil
etmişdir. Qeyd etmək lazımdır ki, bu, ötən ilin
müvafiq dövründəkindən 1,5 faiz çoxdur. Bu
müddətdə qeyri-aşkar şəraitdə baş
vermiş 102 cinayət hadisəsindən 86-nın və ya 84,3
faizinin açılması təmin olunmuşdur.
Əvvəlki illərdən
bağlı qalmış hadisələrin
açılması sahəsində şəhər polisinin bu
gün həyata keçirdiyi tədbirlər xüsusilə
maraq doğurur və bütövlükdə şəhərdə
polisə inam hər an yüksəlir. Əhali bilir ki, cinayətkarlar
gec-tez tutulub gətiriləcək və onlara qarşı daim
amansız mübarizə aparılacaq. Təsadüfi deyildir
ki, cari ildə aparılmış əməliyyat-axtarış
tədbirləri nəticəsində əvvəlki illərdən
bağlı qalan və geniş ictimai əks-səda doğuran
9 cinayətin, o cümlədən 3 qəsdən
adamöldürmənin, həmçinin uzun illər
açılmayan ölümlə nəticələnən
yol-nəqliyyat hadisəsinin üstünün
açılması ictimaiyyət tərəfindən
razılıqla qarşılanmışdır. Bundan əlavə
müvafiq orqanlarla birgə aparılmış tədbirlər
nəticəsində 15 il əvvəl Cəlilabad rayonunda və
bir neçə il əvvəl Bakı şəhərində
törədilmiş qətl hadisələrinin də
üstü açılmışdır.
Şəhər polis
idarəsi rəhbərliyinin axtarışda olub təqsirləndirilən
şəxslərin tutulması və itkin düşənlərin
axtarılması sahəsində mövcud vəziyyəti bir
neçə dəfə ciddi şəkildə müzakirə
etməsi və konkret tədbirlər görməsi də
öz müsbət səmərəsini vermişdir. Keçirilmiş
əməliyyat-axtarış tədbirləri nəticəsində
1994-cü ilin məlum oktyabr hadisələrinin fəal
iştirakçıları – həmin vaxtdan axtarışda
olan Əbdürrəhmanov qardaşlarının tutulması
da təmin edilmişdir. Ümumiyyətlə, şəhər polisi bu dövrdə
cinayət törətməklə qaçıb istintaqdan gizlənmiş
184 şəxsin axtarışı ilə məşğul
olmuş və görülən tədbirlər nəticəsində
onların 130 nəfəri, yəni axtarılanların 70,7
faizi tutulub istintaqa təhvil verilmişdir. Bu göstərici də
keçən ildəkindən yüksəkdir.
Şəhərdə sabitliyin
qorunması, mütəşəkkil və qrup halında olan dəstələrin
zərərsizləşdirilməsi, odlu silah və xüsusi
azğınlıqla törədilən və geniş ictimai rəy
doğura biləcək cinayətkarlığa qarşı
mübarizə şəhər polis idarəsi rəhbərliyini
daim düşündürür. Bu baxımdan “Cinayətkarlığa
qarşı mübarizəni daha da gücləndirmək tədbirləri
haqqında” Azərbaycan Respublikası Prezidentinin 9 avqust
1994-cü il tarixli Fərmanı daim əldə rəhbər
tutulur və qanunsuz silah-sursatın yığılması sahəsində
iş ciddi nəzarət altındadır. Sevindirici faktdır
ki, şəhər ərazisində ötən 9 ay ərzində
odlu silahla törədilmiş hadisə qeydə
alınmamışdır. Bu dövrdə şəxsi heyət
tərəfindən müəyyən miqdarda silah və sursat,
o cümlədən 7 avtomat, 15 tapança, 11 tüfəng, 6
qumbaraatan, 36 qumbara, 31 sandıqça, 8941 güllə, 17
qumbara alışqanı, 5 mərmi, 1 mina və 2 ədəd
süngü bıçağı
götürülmüşdür.
Daxili İşlər Nazirliyinin
“Xaş-xaş 2009” şərti adı altında keçirilmiş
kompleks əməliyyat-axtarış və profilaktiki tədbirlər
planına əsasən narkomaniya ilə mübarizə polis
idarəsi rəhbrliyinin diqqət mərkəzində
olmuş, müəyyən tədbirlər
görülmüşdür. Ötən dövrdə məsuliyyətə
cəlb olunan vətəndaşlardan 21,5 kiloqram marixuana, 14,1
qram heroin, 18,2 qram həşiş
götürülmüşdür. Gəncəçayın
sağ sahilində 120 kvadratmetr sahədə 683 kiloqram çəkisi
olan 1749 ədəd yabanı halda bitmiş ”kənaf"
kolları aşkar olunaraq məhv edilmişdir. Narkotik maddələrin
qəbul edilməsinə, onun əkilib-becərilməsinə
və satışına görə 83 cinayət faktı
müəyyən olunmuş və həmin şəxslər
barəsində istintaq aparılıb məhkəmələrə
göndərilmişdir.
Gəncədə polisin fəallığı
addımbaşı hiss olunur. Gecənin istənilən
vaxtı şəhərdə post-patrul xidməti
maşınlarını, polis işçilərini görmək
mümkündür. İctimai asayiş daim yüksək səviyyədə
qorunur. Şəhərdə həyata keçirilən
bütün tədbirlərdə, o cümlədən yenidənqurma
və abadlıq işlərində polis ön sıralarda
olmağa çalışır. Polis sahə
inspektorlarının işinin yeni formada təşkili üzrə
müəyyən işlər görülmüş, 2 inzibati
ərazidə müasir tələblərə uyğun polis
sahə məntəqəsi tikilib istifadəyə
verilmişdir.
Dövlət Yol Polisi şöbəsinin
də işində canlanma var. 2009-cu ilin 9 ayı ərzində
22 min 395 hərəkət qayda pozğunluğu müəyyən
olunmuşdur ki, bu da keçən ildəkindən 2,9 faiz
çoxdur. Ötən dövr ərzində
avtomaşını sərxoş vəziyyətdə idarə
edən 1473, sürət rejimini pozan 3397, ötmə
qaydasını pozan 692, texniki baxışdan keçməyən
1212, bal sisteminə düşən qayda pozan 4423, ümumiyyətlə,
kobud qayda pozan 16 min 647 sürücü aşkar edilmişdir.
Ötən dövrdə şəhərdə 102 yol-nəqliyyat
hadisəsi baş vermiş, nəticədə 13 nəfər
ölmüş, 122 nəfər yaralanmşdır.
Şəhər polis idarəsində
zəhmətkeşlərin ərizə və şikayətlərinə
daha diqqətlə yanaşılmasına xüsusi fikir verilir.
Məhz bunun nəticəsidir ki, ötən dövrdə
respublikanın rəhbər orqanlarına daxil olan müraciətlərin
sayı xeyli azalmışdır. Təbii ki, şəhər
polisinin işində müəyyən
çatışmazlıqlar hələ də mövcuddur. Hələ
də vəzifəsinə məsuliyyətsiz yanaşan neqativ
hərəkətlərə yol verən əməkdaşlara
rast gəlinir. Təsadüfi deyil ki, 9 ay ərzində 128 nəfər
əməkdaş intizam qaydasında cəzalandırılıb,
7 nəfər mənfi motivlərlə daxili işlər
orqanlarından xaric olunub.
Şəhər polis idarəsinin
rəisi, polis polkovniki Rasim MUSAYEV deyir:
- Daxili işlər naziri,
general-polkovnik Ramil Usubovun və şəhər icra hakimiyyətinin
başçısı Eldar Əzizovun polisin fəaliyyətinə
daim diqqət və qayğı yetirməsi məsuliyyətimizi
qat-qat artırır. Biz bilirik ki, hələ çox iş
görməliyik, cinayətkarlığa qarşı daha
amansız mübarizə aparmalıyıq. Azərbaycan
Respublikasının Prezidenti cənab İlham Əliyevin Gəncə
şəhər Polis idarəsinin yeni inzibati binasının
açılışında iştirak etməsi, söylədiyi
xoş sözlər və verdiyi tövsiyələr bizim hər
birimizin qarşısında yeni məsul vəzifələr
qoymuşdur. Bütün fəaliyyətimizlə etimadı
doğrultmağa çalışacağıq.
Hamlet QASIMOV,
“Xalq qəzeti”nin bölgə müxbiri
Xalq qəzeti.- 2009.- 22 noyabr.- S. 4.