...Vətən daşı olmayandan olmaz ölkə vətəndaşı

Son illər Abşeron rayonunda təhsilin inkişafına təkan verən xeyli əhəmiyyətli addımlar atılmış — yeni məktəblər tikilmiş, köhnə təhsil ocaqları müasir səviyyədə təmir edilərək məktəblilərin istifadəsinə verilmişdir. Bu da sözsüz ki, nizam-intizamın möhkəmləndirilməsinə, pedaqoji işin keyfiyyətinin yüksəlməsinə əsaslı şərait yaratmışdır. Rayon təhsil şöbəsinin müdiri, əməkdar müəllim Nadir Ağayevlə ötən tədris ilinin yekunları barədə danışırıq. O yekunlar ki, növbəti ilin necə keçməsini şərtləndirən əsas amil və baza rolunu oynayır.

— Nadir müəllim, yaxşı olar ki, 2008-2009-cu dərs ilinin yekunlarını bir az ətraflı təhlil edəsiniz.

— Hazırda Azərbaycan Respublikasında bir çox sahələrdə olduğu kimi, təhsil sahəsində də köklü islahatlar həyata keçirilir. Ümummilli liderimiz Heydər Əliyevin 1999-cu ildə “Azərbaycan Respublikasının təhsil sahəsində islahatlar proqramı”nı təsdiqləməsi təhsilin gələcək inkişaf konsepsiyasını və strategiyasını müəyyənləşdirdi. Qeyd etmək istəyirəm ki, təhsil sahəsində aparılan islahatların gedişində ölkə pedaqoji işçiləri ilə yanaşı, Abşeron rayonunun təhsil işçiləri də möhtərəm Prezidentimiz İlham Əliyevin təhsil işçiləri qarşısında qoyduğu tələblərin həyata keçirilməsi üçün səfərbər olmuş və islahatdan irəli gələn vəzifələri layiqincə yerinə yetirməyə səy göstərmişlər.

Yola saldığımız tədris ilində rayonun təlim-tərbiyə müəssisələrində bir sıra uğurlu nəticələr əldə edilmiş, məktəblərdə təlim-tərbiyənin keyfiyyəti yüksəlmiş, məktəb — ictimaiyyət — valideyn münasibətləri xeyli yaxşılaşmış, təlim-tərbiyə işlərində demokratikləşmə, humanistləşmə və fərdiləşmə prinsiplərinə geniş yer verilmişdir.

Dövlət başçısının müvafiq sərəncamına əsasən ötən dərs ilində keçirilmiş “Ən yaxşı ümumtəhsil məktəbi” və “Ən yaxşı müəllim” müsabiqəsinə rayonumuzun pedaqoji kollektivləri də qoşulmuşdur. Müsabiqənin yekunlarına görə Xırdalan şəhərindəki 2 saylı orta məktəb təlim-tərbiyə sahəsində yüksək nəticə əldə etdiyi üçün “İlin məktəbi” adına layiq görülmüş və şəhər 1 saylı orta məktəbin biologiya müəllimi S.Kazımova fənn üzrə yüksək nailiyyətlər və şagirdlərin vətənpərvərlik ruhunda tərbiyəsi işində yüksək nəticə əldə etdiyi üçün “İlin ən yaxşı müəllimi” müsabiqəsinin qalibi olmuşdur.

Təbii artım, yeni salınmış yaşayış massivləri və yeni məktəblərin açılması hesabına 2008-2009-cu dərs ilində əvvəlki illə müqayisədə 58 sinif komplektində 723 şagird artımı olmuşdur.

2009-2010-cu dərs ilində isə 1354 sinif komplektində 28241 şagirdin təhsil alacağı proqnozlaşdırılmışdır ki, bu da əvvəlki illə müqayisədə 57 sinif komplektində 1727 şagird artımı deməkdir.

Böyük minnətdarlıq hissi ilə qeyd etmək istəyirəm ki, rayon rəhbərliyinin, xüsusən icra hakimiyyətinin başçısı Zakir Fərəcovun yaxından köməkliyi ilə təlim-tərbiyə müəssisələrində genişmiqyaslı təmir-tikinti işləri aparılmış, tədris müəssisələrinin yeni dərs ilinə hazırlığı diqqət mərkəzində olmuşdur.

— Məktəblərin dərsliklərlə təminatı hansı vəziyyətdədir?

— Təhsil müəssisələrinin müasir avadanlıqlarla təchiz edilməsi işi tam başa çatdırılmış, 47 min manatlıq avadanlıq alınaraq məktəblərə paylanmışdır. Ümumtəhsil məktəb kitabxanaları ilbəil pulsuz dərsliklərlə zənginləşdirilir.

İndiyədək 79 adda yetmiş, doqquz min iki yüz yetmiş yeddi ədəd dərslik və dərs vəsaitləri məktəblərə paylanılmışdır. İlk dəfə II siniflər üçün 32 adda 24744 ədəd dərslik alınmışdır. Bu vacib iş indi də davam etdirilir.

Dərsliklərlə yanaşı, məktəb kitabxanaları klassik və müasir bədii ədəbiyyatlarla da təmin edilir. Prezident fərmanı əsasında çap olunmuş bədii kitablar məktəb kitabxanalarına paylanılmışdır. Hazırda məktəb kitabxanalarında 401 addan artıq 48609 ədəd latın qrafikalı bədii ədəbiyyat şagirdlərin istifadəsindədir.

— Buraxılış imtahanları necə keçdi?

— 2008-2009-cu dərs ilində IX siniflər üzrə buraxılış imtahanları rayon təhsil şöbəsinin tam nəzarəti altında keçirilmiş, imtahanlar haqqında “Qaydalar” və Təhsil Nazirliyinin müvafiq əmrləri pozulmamışdır. Keçən dərs ilinin sonunda IX sinif şagirdlərinin sayı 2758 nəfər olmuş, 30 nəfər payız imtahanlarına saxlanılmış, 9 nəfər yay tapşırığı almış, 63 nəfər isə təkrar sinifdə saxlanılmışdır. Nəticədə 2656 şagird IX sinfi müvəffəqiyyətlə bitirərək əsas təhsil haqqında şəhadətnamə almışdır. IX sinfi bitirənləndən 4 nəfəri fərqlənmə şəhadətnaməsi almış, sağlamlıq vəziyyətinə görə ev şəraitində təhsil alan şagirdlərdən isə 7 nəfəri əsas təhsil haqqında şəhadətnamə alaraq təhsillərini başa çatdırmışlar.

2008-2009-cu dərs ilində respublikanın ümumtəhsil məktəblərində əsas və orta təhsil kursu üzrə buraxılış imtahanlarının səmərəli təşkili məqsədilə təhsil naziri Misir Mərdanovun 11 fevral 2009-cu il tarixli əmri ilə bütün ümumtəhsil məktəblərinin və peşə liseylərinin şagirdləri, o cümlədən ötən dərs illərində buraxılış imtahanlarında qeyri-kafi qiymətlər alan, müəyyən səbəblərdən orta təhsil kursunu bitirməyən və eksternat qaydasında imtahan vermək üçün müraciət etmiş şəxslər də əhatə olunmaqla, orta təhsil kursu üzrə buraxılış imtahanlarının mərkəzləşdirilmiş qaydada keçirilməsi rəsmiləşdirilmişdir.

İmtahanların keçirilməsi üçün rayon mərkəzində 4 məktəb mərkəz seçilmiş və XI sinif şagirdləri haqqında elektron məlumatlar nazirliyə təqdim olunmuşdur.

Mərkəzləşmiş qaydada və cavab kartı tətbiq edilməklə dərs ili ərzində 1 sınaq imtahanı keçirilmişdir.

Qeyd etmək lazımdır ki, buraxılış imtahanlarına hazırlıq məqsədilə keçirilmiş sınaq imtahanları müsbət nəticə vermişdir.

2008-2009-cu dərs ilinin sonunda ümumtəhsil məktəblərinin XI siniflərində 1626 məzun olmuşdur. Tədris fənləri üzrə illik müsbət qiymətlər alan 1550 nəfər imtahanlara buraxılmış, onlardan 18-i iştirak etməmişdir. Ötən dərs ilinin məzunlarından 1343-ü orta məktəbi müsbət yekun qiymətlərlə başa vuraraq orta təhsil haqqında attestat almışdır.

Məktəblərimizin əksəriyyəti Təhsil Nazirliyi tərəfindən aparılmış imtahanlarda müsbət nəticələr göstərmişdir. Xırdalan şəhər 6,8 N-li, Masazır 2 N-li, Saray 3 N-li, Ceyranbatan 2 N-li və Perekeşkül orta məktəblərinin yüksək nailiyyətlərini xüsusi qeyd etmək lazımdır. Bu məktəblərin imtahan müvəffəqiyyəti 100 faizdir.

Orta təhsil kursu üzrə buraxılış imtahanlarında rayonun orta müvəffəqiyyət göstəricisi 87,52 faizlə respublika göstəricisindən yuxarı olmuşdur. Bu da pedaqoji kollektivimizin 11 il ərzində şagirdlərə çəkdiyi zəhmətin uğurlu nəticəsidir.

— Bəs ali məktəblərə qəbul imtahanlarının yekunlarını necə qiymətləndirmək olar?

— 2008-2009-cu dərs ili məzunlarının ali məktəblərə qəbulu keçən dərs ilinə nisbətən yüksək olmuşdur. Onların 31,99 faizi tələbə adına layiq görülmüşdür. Yeddi nəfər — Xırdalan şəhər 2N-li orta məktəbin məzunları Nərmin Nəsirova (665 bal), Murad Həmidov (632 bal) və Ramiz Kərimov (630 bal), Görədil kənd orta məktəbinin məzunu Səbuhi Məmmədov (670 bal), Xırdalan şəhər 9 N-li məktəbin məzunu İlahə İsalı (606 bal), Ceyranbatan 2 N-li orta məktəbin məzunu Pərvanə Həmidova (601 bal) və Mehdiabad 1 N-li orta məktəbin yetirməsi Nüranə Kərimova (600 bal) 600-dən çox bal toplamışlar. Eyni zamanda, qəbul imtahanlarında məzunlarımızdan 37-nin 500-dən artıq bal toplaması da bizi çox sevindirir.

2009-2010-cu ilin fəaliyyət planına uyğun olaraq bu il ali məktəblərə tələbə qəbulunun nəticələri hərtərəfli təhlil edilərək Rayon Təhsil Şurasında geniş müzakirə edilməsi nəzərdə tutulmuşdur.

Ümummilli liderimiz Heydər Əliyevin “Təhsil sahəsi hamınızın ən gərəkli, ən mühüm sahəsidir. Bu gərəkli sahə zaman keçdikcə dövrün tələblərinə uyğun yeniləşməlidir” fikrini əsas tutan təhsil şöbəsi bir sıra işlər görmüşdür. Müəllimlər müntəzəm olaraq ixtisasartırma kurslarına ezam edilmiş, məktəblərdə tədris fənləri üzrə dayaq məntəqələri yaradılmış, qabaqcıl müəllimlərdən “öyrədənlərin öyrədənləri” proqramı üzrə hazırlıq kursları təşkil edilmişdir.

Təqdirəlayiq haldir ki, yeni proqramlarla dərsliklərin və metodiki vəsaitlərin hazırlanmasında rayonumuzun qabaqcıl müəllimləri fəallıq göstərərək rəy və təkliflərlə çıxışlar edirlər. Şəhər 5 N-li orta məktəbin kimya müəllimi Şiranə Atayeva, şəhər 1 N-li orta məktəbin fizika müəllimi Flora Tağıyeva, şəhər 2 N-li orta məktəbin müəllimi Şahnəzər Dadaşov Təhsil Nazirliyi tərəfindən bu məsuliyyətli işə cəlb olunmuş, hətta Şiranə müəllimə VII sinif dərsliyinin hazırlanmasında yaxından iştirak etmişdir.

— İstedadlı məktəblilərin olimpiadalarda iştirakı hansı səviyyədədir?

— İstedadlı uşaqları həmişə diqqət mərkəzində saxlayırıq. Rayonumuzda “Olimpiadalara hazırlıq mərkəzi” yaranmışdır. Mərkəzə səriştəli və peşəkar müəllimlər cəlb edilmişdir. Məqsədyönlü tədbirlər nəticəsində olimpiada iştirakçılarının sayı ilbəil artmaqdadır.

2008-2009-cu dərs ilində fənn üzrə olimpiadalarda 631 nəfər iştirak etmişdir. Rayon turunun II mərhələsində iştirak üçün vəsiqə almış 70 şagirddən 10-u respublika turuna qatılmışdır.

Xırdalan 2 N-li orta məktəbin XI sinif şagirdi İlahə İsalı, 9 N-li orta məktəbin X sinif şagirdi Xədicə Dadaşova, 7 N-li orta məktəbin IX sinif şagirdi Bahadur Hüseynov və Masazır kənd 2 N-li orta məktəbin X sinif şagirdi Nurlan Balakişiyev olimpiadanın respublika turunda yüksək göstəricilər qazanmışlar.

Ulu öndər Heydər Əliyevin anadan olmasının 86 illiyinə həsr olunmuş respublika inşa müsabiqəsinin qalibi — Xırdalan şəhər 2N-li orta məktəbin şagirdi Günay Güləliyeva qiymətli hədiyyə və pul mükafatı ilə təltif edilmiş, habelə “Gənc nəsillərlə üz-üzə” inşa müsabiqəsinin diplomunu da almışdır. Yubilyara həsr olunmuş şeir müsabiqəsində fəal iştirak etmiş 15 şagirdə təhsil şöbəsinin fəxri fərmanı və qiymətli hədiyyələr verilmişdir.

Son illər rayonumuzda yeni müəssisələr yaradılmış, sənaye obyektləri və inzibati binalar tikilmişdir. Bu isə yeni iş yerlərinin açılmasına səbəb olmuş, nəticədə əhalinin sosial rifahı və maddi vəziyyəti yüksəlmişdir. Bu illər ərzində 12 məktəb binası, iki məktəbdə əlavə korpusların tikilməsi, təhsil müəssisələrində təmir işlərinin aparılması və müasir avadanlıqlarla təchizatı, maddi-texniki bazanın möhkəmləndirilməsi təhsil islahatlarının uğurla başa çatdırılması istiqamətində atılan zəruri addımlardır.

Əlbəttə, biz bütün bunları rayon icra hakimiyyətinin başçısı Zakir Fərəcovun təhsilə, məktəbə gündəlik qayğısının təzahürü kimi qiymətləndiririk. Rayonda 4 məktəbdənkənar tərbiyə müəssisəsi — Ekoloji tərbiyə mərkəzi, Gənc texniklər stansiyası, Uşaq-Gənclər İdman Məktəbi və Uşaq Yaradıcılıq Mərkəzi fəaliyyət göstərir. İdman və bədən tərbiyəsi sahəsində qazanılan uğurlar rayonun idman məktəbinin məşqçilərinin əməyi nəticəsində əldə edilmişdir. Rayon icra hakimiyyətinin başçısı Zakir Fərəcov beynəlxalq yarışlarda yüksək nəticələr göstərən idman məktəbinin güləşçisi Roman Bəkirova mənzil vermişdir. İdman məktəbinin direktoru Qiyas Məsimov isə Respublika Güləş Federasiyasının prezidenti tərəfindən mükafatlandırılmışdır.

Rayonda mövcud 22 uşaq bağçası — körpələr evində 78 qrupda 1553 nəfər uşağın təlim-tərbiyəsi ilə 203 nəfər pedaqoji işçi məşğul olur. Onlarla mütəmadi olaraq metodiki işlər aparılmış və əməli kömək edilmişdir. Yeni dərs ilinə hazırlıq məqsədilə uşaq bağçalarında əsaslı və cari təmir işləri aparılmışdır. Qobu kəndində bu il yeni 4 qruplu uşaq bağçasının tikilib istifadəyə verilməsi gözlənilir. Uşaq bağçaları üçün hər cür şərait yaradılır.

Bütün məktəbəqədər müəssisələrdə “Payız”, “Yeni il şənliyi”, “Novruz bayramı”, “Əlvida, bağça!” və s. tədbirlər keçirilmişdir.

Uşaqları Beynəlxalq Müdafiə Günü münasibətilə rayon mədəniyyət evində keçirilən geniş tədbirdə rayon rəhbərliyi iştirak etmiş və uşaqları təbrik etmişdir.

Məktəblərə göstərdiyi xüsusi diqqət və qayğıya görə YUNESKO-nun xoşməramlı səfiri, Milli Məclisin deputatı, Heydər Əliyev Fondunun prezidenti Mehriban Əliyevaya öz minnətdarlığımızı bildiririk.

Bu gün möhtərəm Prezidentimiz İlham Əliyev ulu öndər Heydər Əliyevin siyasətini uğurla həyata keçirir, ideyalarını gerçəkləşdirir, yolunu davam etdirir. Bütün rayon müəllimləri və ziyalıları adından hörmətli dövlət başçımıza gələcək fəaliyyətində uğurlar arzulayır, əmin etmək istəyirəm ki, onun yaratdığı ideal şəraitə cavab olaraq abşeronlu gənclər də Azərbaycan Respublikasının layiqli vətəndaşı olmaq üçün daha da səylə çalışacaq, Vətənə, xalqa xidməti müqəddəs vəzifə kimi həmişə uca tutacaqlar. Ölməz şairimiz Məmməd Arazın dediyi kimi, vətəndaş ola bilmək üçün “vətən daşı” da olmağı bacaracaqlar. Bütün bunlara aparan yol isə, sözsüz ki, elmdən, bilikdən, yaxşı təhsil almaqdan keçir.

Səməd HÜSEYNOĞLU,

“Xalq qəzeti”nin bölgə müxbiri

Xalq qəzeti.- 2009.- 4 oktyabr.- S. 5.