Təhsil nazirləri YUNESKO çərçivəsində
görüş keçirdilər
Təhsil Nazirliyinin mətbuat xidmətindən
bildirilmişdir ki, son illər YUNESKO-nun tədbirlərində
Azərbaycan mütəmadi olaraq iştirak edir. Bu günlərdə
YUNESKO Baş Konfransının 35-ci sessiyası çərçivəsində
təhsil nazirlərinin “dəyirmi masa”sı
keçirilmişdir. Təhsillə bağlı “dəyirmi
masa”da təhsil naziri Misir Mərdanov iştirak etmişdir.
O bildirmişdir ki, Azərbaycan
öz müstəqilliyini bərpa etdikdən sonra ölkədə
siyasi və sosial-iqtisadi sahələrdə olduğu kimi, təhsil
sistemində də köklü islahatlar keçirir, Avropa təhsil
məkanına müvəfəqqiyyətlə inteqrasiya edir. Azərbaycan
islahatların həyata keçirilməsində müxtəlif
beynəlxalq təşkilatlarla, o cümlədən YUNESKO ilə
sıx əməkdaşlıq edir. Bu qurum əsas tərəfdaşlarımızdan
biridir. Son iki ildə dünya təhsil sisteminin prioritet
inkişaf istiqamətlərinin, habelə inklüziv təhsil,
davamlı inkişaf naminə təhsil, ali təhsilin əsas
məqsədləri və “təhsil hamı üçün”
kimi məsələlərin müzakirə olunduğu
mühüm beynəlxalq forumlar keçirilmişdir. Azərbaycan
bu forumlarda daim iştirak etmişdir.
Azərbaycanda “Xüsusi
qayğıya ehtiyacı olan uşaqlar üçün təhsilin
inkişafı üzrə Dövlət Proqramı” həyata
keçirilir. Proqramın əsas məqsədi inteqrasiyalı
təlimə keçidin reallaşdırılması, məktəblərdə
uşaqlara təhsil üçün bərabər
imkanların yaradılması, eləcə də
sağlamlıq imkanları məhdud uşaqların təhsilə
cəlb edilməsidir. Bundan əlavə, YUNESKO-nun dəstəyi
ilə Azərbaycanda inklüziv təhsil sahəsində
irimiqyaslı layihə həyata keçirilir.
Ölkəmizdə təhsilin
inkişafına böyük diqqət göstərildiyini diqqətə
çatdırmış nazir Avropa Şurası, Avropa
Komissiyası və YUNESKO-nun dəstəyi ilə Bolonya
prosesinin tələblərini nəzərə almaqla, ali təhsil
sistemində islahatların davam etdirildiyini, tələbələrin
biliklərinin qiymətləndirilməsi üzrə kredit
sisteminin tətbiq olunduğunu, ali məktəblərin fəaliyyətinin
daxili və xarici qiymətləndirilməsi əsasında
onların akkreditasiyası üzrə yeni formanın tətbiq
edildiyini bildirmiş, ölkəmizdə beynəlxlaq
forumların təşkil olunduğunu, buna misal olaraq, 2008-ci
ilin mayında Bakıda təşkil olunmuş Dünyada
Savadlılığın Dəstəklənməsi üzrə
YUNESKO-nun regional konfransını xatırlatmışdır.
Günün ikinci yarısında
siyasi debatlardakı çıxışında Misir Mərdanov
2009-cu ilin Dövlət büdcəsində təhsil sektoruna
ayrılan vəsaitin ötən ilə nisbətən 21 faiz
artdığını, son iki ildə müasir avadanlıqla təchiz
olunmuş 500 yeni məktəbin tikilib istifadəyə
verildiyini, şagirdlərin pulsuz dərsliklərlə tamamilə
təmin olunduğunu, internetə qoşulmuş məktəblərin
sayının 20 dəfə artdığını qeyd
etmişdir.
Nazir YUNESKO-nun dəstəyi ilə
“Hamı üçün təhsil” proqramı çərçivəsində
ömürboyu təhsil, yaşlıların təhsili,
ixtisasartırma təhsil layihələrinin uğurla həyata
keçirildiyini qeyd etmiş, savadsızlığın ləğv
edilməsi ilə əlaqədar BMT-nin regional
konfranslarından birinin 2008-ci ildə Bakıda baş
tutduğunu bildirmişdir.
Mədəniyyət məsələlərinə
toxunmuş M.Mərdanov Azərbaycanın aşıq sənəti
və Novruz bayramının bu yaxınlarda YUNESKO-nun qeyri-maddi
mədəni irs siyahısına daxil edilməsindən
qürur hissi keçirdiyini vurğulamış, ölkəmizin
Afrika regionunda Benin Mədəni İrs Məktəbinin layihəsinə
maliyyə yardımı göstərdiyini
açıqlamışdır.
Nazir YUNESKO ilə Azərbaycan
arasında sıx əməkdaşlıqdan danışarkən
Heydər Əliyev Fondunun prezidenti, YUNESKO-nun və İSESKO-
nun xoşməramlı səfiri Mehriban xanım Əliyevanın
xidmətlərini xüsusi vurğulamış, fondun ölkə
daxilində və xaricdə təhsil, mədəniyyət,
elm, İKT, səhiyyə, idman və digər sahələrdə
həyata keçirdiyi layihələr nəticəsində
yeni məktəblər, uşaq evləri, idman kompleksləri,
tibb ocaqları inşa edildiyini, fondun dəstəyi ilə
2009-cu ildə Bakıda inşa edilmiş yeni Muğam Mərkəzində
YUNESKO- nun qeyri-maddi mədəni irs siyahısına
salınmış qədim muğama həsr olunmuş Birinci
Beynəlxalq Festivalı, Fransanın Versal qəsrində iki
abidənin və Strasburqdakı kilsənin bərpa işlərində
fondun yaxından iştirakını diqqətə
çatdırmışdır.
Misir Mərdanov Mehriban Əliyevanın
təşəbbüsü ilə Azərbaycanın zəngin
musiqi mədəniyyətini və tarixi şəxsiyyətlərini
tanıtmaq məqsədilə YUNESKO-nun mənzil-iqamətgahında
keçirilmiş çoxsaylı tədbirləri qeyd
etmişdir.
Ölkəmizin 20 il ərzində
Ermənistan-Azərbaycan, Dağlıq Qarabağ
münaqişəsi ilə üzləşməsindən bəhs
etmiş nazir bunun xalqımız üçün
ağrılı problem olmasından, ərazilərimizin 20
faizinin Ermənistan tərəfindən işğal edilməsindən,
20 mindən artıq azərbaycanlının həlak
olmasından və bir milyon soydaşımızın isə
qaçqın və məcburi köçkün düşməsindən,
ölkəmizə 60 milyard dollardan çox ziyan dəyməsindən
söhbət açmışdır.
Misir Mərdanov erməni
işğalçıları tərəfindən 900-dən
artıq kitabxananın, 700 təhsil ocağının, 600-dən
çox səhiyyə müəssisəsinin, 26 muzey və 9 məscidin
dağıdıldığını qeyd etmişdir.
Nazir sonda bildirmişdir ki,
YUNESKO-nun ideallarına sadiq olan Azərbaycan ümidvardır
ki, təşkilat yeni humanizm konsepsiyasını rəhbər
tutaraq, dünyada sülh və sabitlik, ümumbəşəri
dəyərlərin bərqərar edilməsinə öz
layiqli töhfəsini verəcəkdir.
M.MÜKƏRRƏMOĞLU
Xalq qəzeti.- 2009.- 14 oktyabr.- S. 7.