Binəqədi rayonunda cari ilin doqquz ayına yekun vurulmuşdur

Binəqədi Rayon İcra Hakimiyyəti başçısı yanında rayonun 2009-cu ilin doqquz ayının sosial-iqtisadi inkişafının yekunlarına həsr olunmuş iclası keçirilmişdir.

Rayon icra hakimiyyətinin başçısı Alı Qocayev iclası açaraq oktyabrın 16-da Prezident İlham Əliyevin sədrliyi ilə keçirilən Nazirlər Kabinetinin 2009-cu ilin 9 ayının sosial-iqtisadi yekunlarına həsr olunmuş müşavirədə dövlət başçımızın proqram xarakterli nitqinin bəzi məqamlarına toxundu. Natiq göstərdi ki, ulu öndər Heydər Əliyev tərəfindən əsası qoyulmuş sosial-iqtisadi islahatların İlham Əliyev tərəfindən uğurla davam etdirilməsi nəticəsində bu ilin doqquz ayında müsbət göstəricilər əldə edilmişdir. A.Qocayev ümumi inkişafı xarakterizə edən göstəricilərin getdikcə yaxşılaşdığını və bunun Azərbaycanın regionun lider dövlətinə çevrilməsinə imkan yaratdığını bildirdi.

İclasda rayon icra hakimiyyəti başçısının müavini Vüsal İsmayılov bu ilin doqquz ayı ərzində rayonun sosial-iqtisadi inkişafının yekunlarına və qarşıda duran vəzifələrə həsr olunmuş geniş hesabat məruzəsi ilə çıxış etdi. O, göstərdi ki, yanvar-sentyabr aylarında rayonda bütün maliyyə mənbələri hesabına 16062,6 min manat əsas fondlar istifadəyə verilmişdir. Hesabat dövründə ümumi sahəsi 2355 kvadratmetr olan yeni yaşayış evləri salınmışdır.

Cari ilin birinci yarısında sosial və iqtisadi sahələrin inkişafı üçün bütün maliyyə mənbələrindən əsas kapitala 60 milyon 74 min 900 manat məbləğində investisiya yönəldilmişdir ki, bu da əvvəlki ilin müvafiq dövrünə nisbətən 48,7 faiz təşkil etmişdir. İstehsal təyinatlı obyektlərin inşasında 20 milyon 796 min 600 manatlıq (yəni əsas kapitalın 34,6 faizi), qeyri-istehsal obyektlərin tikintisində 39 milyon 278 min 300 manatlıq (yəni 65,4 faizi) investisiyadan istifadə olunmuşdur.

Natiq daha sonra dedi:

— Cənab Prezident İlham Əliyev 9 ayın sosial-iqtisadi yekunlarının müzakirəsində qeyd etmişdir ki, bu dövr ərzində Azərbaycanda ünvanlı sosial yardım alan insanların sayı 700 minə çatmışdır. Bu insanların təxminən 0,5 faizi, yəni 3200 nəfərdən çoxu Binəqədi rayonunun payına düşür. Bu da dünyanı bürümüş qlobal böhran vəziyyətində insanlarımızın vəziyyətinin yaxşılaşması ilə bağlı mühüm bir göstəricidir.

V.İsmayılov nitqində kommunal xidmətlərlə bağlı vəziyyətə də toxundu. Bildirdi ki, rayonda qaz xətlərində aparılan təmirlə yanaşı, əlavə olaraq müxtəlif ünvanlarda ümumi uzunluğu 2800 metr müxtəlif diametrli borularla yeni qaz xətti çəkilmiş, 27 ədəd müxtəlif diametrli siyirtmələr və 14 ədəd tənzimləyici şkaf quraşdırılmışdır. Bütün bunlarla yanaşı, rayon Qİİ-nin işində bu gün də müəyyən nöqsanlar mövcuddur. Əhali tərəfindən istifadə olunan təbii qazın dəyərinin yığılması sayğaclı abonentlər üzrə cəmi 38,2 faiz təşkil edir. Bu məsələni nəzarətə götürmək lazımdır...

Rayon Su Kəməri istismarı və İstehsalat Zonasının işi isə demək olar ki, qənaətbəxşdir, lakin burada da bəzi nöqsanlar mövcuddur. Bunlardan ən başlıcası su kəmərlərində baş vermiş qəzaların aradan qaldırılması zamanı müşahidə olunur. Doğrudur, qəzanın miqyasından asılı olaraq onun aradan qaldırılmasına müəyyən vaxt tələb olunur. Bəzi məsul işçilərin laqeyd münasibəti nəticəsində işlər xeyli yubadılır ki, bu da insanların haqlı narazılığına səbəb olur...

Rayon əhalisinin elektrik enerjisi ilə təminatı barədə isə natiq onu dedi ki, 9 ay ərzində elektrik transformatorları quraşdırılmış, köhnə xətlər təmir olunmuş, hava xətləri yeratlı kabellərlə əvəz olunmuş və Biləcəri qəsəbəsində 5150 yeni tipli elektron sayğacı abonentlər üçün quraşdırılmışdır...

V.İsmayılov daha sonra demişdir:

— Respublikanın Prezidenti cənab İlham Əliyevin 9 ayın yekunlarına dair keçirilən iclasda ekoloji mühitin sağlamlaşdırılması ilə bağlı verdiyi tövsiyə və tapşırıqlarla əlaqədar bir neçə məqamı nəzərinizə çatdırmaq istərdim. İlk növbədə qeyd edim ki, möhtərəm Prezident 2010-cu ilin Azərbaycanda “Ekologiya ili” elan edilməsini təklif etdi. Bu isə Azərbaycanda yaşayan əhalinin sağlamlığının qorunmasının əməli təzahürüdür. Eyni zamanda cənab Prezident bu məsələ ilə bağlı Tədbirlər Planının hazırlanması barədə göstəriş verdi. Sonra yaşıllaşdırma ilə əlaqədar qeyd etdi ki, Bakı və Abşeron yarımadasında ağac əkilməsi çox böyük sürətlə həyata keçirilməyə başlandı, lakin bir müddətdən sonra bu iş dayandırıldı. Doğrudur, bu iş mövsümi bir işdir, amma kampaniya xarakteri daşımamalıdır.... mütəmadi davam etdirilməlidir. Bu məsələ ilə əlaqədar rayonumuzda xeyli iş görülmüşdür və bu işlər davam etdirilir.

Cari ilin 9 ayı ərzində rayon MKTB-nin xətti ilə 41420 kvadratmetr yeni asfalt örtüyü salınmış, 10612 kvadratmetr dam örtüyü təmir olunmuş, yaşayış binalarının zirzəmilərində 2441 metr müxtəlif diametrli kommunikasiya xətləri təmir edilmişdir. Ərazidən 102600 kubmetr məişət tullantısı daşınmışdır. MKİS-lərin xidməti ərazilərində yaşayış binalarının həyətləri abadlaşdırılmış, 185 ədəd oturacaq, 15 ədəd yelləncək quraşdırılmışdır.

Məruzə ətrafında çıxış edən digər natiqlər rəhbərlik etdikləri sahələrin doqquz ay ərzindəki fəaliyyəti ilə bağlı hesabat verdilər, ölkənin sosial-iqtisadi inkişafı yolunda bundan sonra da səylə çalışacaqlarını bildirdilər.

Yığıncağın sonunda iclasın qərar layihəsi oxundu, Azərbaycan Prezidenti İlham Əliyevə rayon ictimaiyyəti adından müraciət qəbul olundu.

Vaqif BAYRAMOV

Xalq qəzeti.- 2009.- 22 oktyabr.- S. 5.