Nərimanov rayonunda cari ilin doqquz ayının yekunları müzakirə olunmuşdur

Azərbaycanın sosial-iqtisadi inkişaf sahəsində son illər əldə olunmuş uğurlar, qazanılan nailiyyətlər 2009-cu ilin ötən doqquz ayında da davam etmiş, ölkəmizdə ümumi daxili məhsul 6,1 faiz, sənaye istehsalı isə 5 faiz artmışdır. Bütün bunlar barədə Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin cari ilin doqquz ayının sosial-iqtisadi inkişafının yekunlarına həsr olunmuş iclasında ətraflı danışılmış, qazanılmış uğurlar yüksək qiymətləndirilmişdir. İclasda bütün bunlarla yanaşı, qarşıda duran vəzifələrə də toxunulmuş, onların həlli yolları müəyyənləşdirilmişdir.

Hazırda ölkəmizin bütün şəhər və rayonlarında 2009-cu ilin yanvar-sentyabr aylarının sosial-iqtisadi mənzərəsi geniş təhlil olunur, Nazirlər Kabinetinin məlum iclasında dövlət başçısının proqram xarakterli nitqindən irəli gələn məsələlərin icrası istiqamətində konkret vəzifələr müəyyənləşdirilir.

Dünən paytaxtın Nərimanov rayonunda Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş iclasında irəli sürülmüş vəzifələrlə bağlı rayonun sosial-iqtisadi inkişafının cari ilin yanvar-sentyabr aylarının yekunları və qarşıda duran vəzifələrə həsr edilmiş yığıncaq keçirildi.

Tədbir iştirakçıları öncə ümummilli lider Heydər Əliyevin rayon icra hakimiyyəti binasının foyesindəki büstü önünə əklil və gül dəstələri qoydular, ulu öndərin əziz xatirəsini ehtiramla yad etdilər. Rayonun idarə, müəssisə və təşkilatlarının, hüquq-mühafizə orqanlarının, eləcə də ictimaiyyət nümayəndələrinin iştirakı ilə keçirilən yığıncağı giriş sözü ilə Nərimanov Rayon İcra Hakimiyyətinin başçısı Abdin Fərzəliyev açaraq 2009-cu ilin doqquz ayında ölkəmizin sosial-iqtisadi inkişafı sahəsində əldə olunmuş uğurlardan bəhs etdi. Oktyabrın 16-da Nazirlər Kabinetinin cari ilin doqquz ayının sosial-iqtisadi inkişafının yekunlarına həsr olunmuş iclasında dövlət başçısı İlham Əliyevin proqram xarakterli nitqinin bəzi məqamlarına toxundu. Qeyd olundu ki, cari ilin yanvar-sentyabr ayları ərzində ölkə üzrə yüksək nailiyyətlərin əldə olunmasında paytaxtın Nərimanov rayonu da yaxından iştirak etmişdir.

Bütövlükdə isə 2009-cu ilin doqquz ayında rayonun sosial-iqtisadi inkişafı sahəsində əldə olunmuş uğurlar və qarşıda duran vəzifələr Nərimanov Rayon İcra Hakimiyyəti başçısının birinci müavini Şahmar İbadovun məruzəsində öz geniş əksini tapmışdı. Cari ilin yanvar-sentyabr aylarında rayonun sosial-iqtisadi inkişafı istiqamətində görülən işlərdən bəhs edən Ş. İbadov bildirdi ki, hesabat dövründə rayon iqtisadiyyatının əsasını təşkil edən sənayenin dinamik inkişafı davam etdirilmiş, xidmətlər də daxil olmaqla 104,5 milyon manatlıq məhsul istehsal olunmuş və əvvəlki ilin müvafiq dövrünə nisbətən artım sürəti 80,8 faiz təşkil etmişdir. Bu dövrdə sənaye məhsulunun ümumi həcmində qeyri-dövlət bölməsinin xüsusi çəkisi 85,8 faiz təşkil etmiş, sənaye sahəsində çalışanların orta aylıq əmək haqları 275 manatdan artıq olmuşdur. Qeyd olundu ki, ilin əvvəlindən rayonda yeni iş yerlərinin yaradılması ilə bağlı tədbirlər davam etdirilmiş, ötən müddətdə 1973 daimi iş yeri açılmışdır.

Hesabat dövründə rayon üzrə əsas kapitala ümumi investisiya qoyuluşunun 69,9 milyon manat təşkil etdiyini bildirən məruzəçi bu sahədə 34,9 faiz artım əldə olunduğunu diqqətə çatdırdı. Rayonun tikinti sektorunda da yüksək nəticələr əldə edildiyini vurğulayan natiq qeyd etdi ki, cari ilin doqquz ayında tikinti təşkilatları öz gücləri ilə 273,7 milyon manatlıq iş görmüşlər.

Məruzəçi cari ilin ötən dövründə əhalinin həyat səviyyəsini xarakterizə edən əsas göstəricilərdən biri olan pullu xidmətlərin və pərakəndə əmtəə dövriyyəsinin həcminin də xeyli artdığını diqqətə çatdırdı.

Natiq qeyd etdi ki, hazırda ölkə Prezidentinin tapşırıq və göstərişləri əsasında Nərimanov rayonunda dövlət əhəmiyyətli iri layihələr həyata keçirilir. Rayon ərazisində ulu öndər Heydər Əliyevin adını daşıyan mərkəzin inşası ilə əlaqədar 244 ailənin köçürülməsi və onların daha rahat və geniş mənzillərlə təminatı öz müsbət həllini tapmışdır.

Rayonun abadlaşdırılması, mənzil-kommunal obyektlərinin istismarı sahəsində cari ilin doqquz ayı ərzində görülmüş işlərə toxunan Ş.İbadov daha sonra rayonun təsərrüfat həyatı ilə bağlı görülən işlərdən bəhs etdi, ayrı-ayrı təsərrüfat subyektləri tərəfindən həyata keçirilən işləri sadaladı. Bütün bu işlərin rayon əhalisinin kommunal sahədə üzləşdiyi problemlərin aradan qaldırılmasına səbəb olduğunu diqqətə çatdırdı. Bundan əlavə, rayon sakinlərinin işıq, qaz, içməli su təminatının daha da yaxşılaşdırılması sahəsində mühüm işlərin də həyata keçirilməsi diqqətə çatdırıldı.

2009-cu ilin yanvar-sentyabr aylarında rayonun təhsil və səhiyyə müəssisələrinin fəaliyyəti və bu sahədə həyata keçirilmiş mühüm işlərdən bəhs edən natiq həmçinin əhalinin sosial müdafiəsinin gücləndirilməsi sahəsində ardıcıl və təxirəsalınmaz tədbirlərin də görüldüyünü bildirdi.

Ölkəmizin bütün bölgələrində olduğu kimi, Nərimanov rayonunda da cari ilin dekabr ayının 23-də keçiriləcək bələdiyyə seçkilərində ciddi hazırlıq işlərinin görüldüyünü diqqətə çatdıran məruzəçi bildirdi ki, hazırda rayondakı üç seçki dairəsi üzrə 76 seçki məntəqəsi fəaliyyət göstərir. Seçki praktikasının təkmilləşdirilməsi, eləcə də səsvermə prosesinin şəffaf, demokratik və mütəşəkkilliyinin təmin edilməsi məqsədilə rayon icra hakimiyyəti tərəfindən dairə və məntəqə seçki komissiyaları üçün bütün texniki təminat və lazımi şərait yaradılmışdır.

Məruzə ətrafında çıxış edən digər natiqlər də cari ilin doqquz ayında ölkə üzrə əldə olunmuş uğurları, Prezident İlham Əliyevin Azərbaycanın sosial-iqtisadi inkişafının daha da sürətləndirilməsi məqsədilə həyata keçirdiyi tədbirləri yüksək qiymətləndirdilər.

Tədbirə yekun vuran Nərimanov Rayon İcra Hakimiyyətinin başçısı A.Fərzəliyev bütün uğurlarla yanaşı, rayon əhalisinin getdikcə artmaqda olan maddi, mənəvi və digər tələbatının tam və dolğun ödənilməsi istiqamətində qarşıda çox mühüm və ciddi vəzifələrin dayandığını diqqətə çatdırdı. Bildirdi ki, Prezident İlham Əliyev tərəfindən qarşıya qoyulmuş vəzifələrin yerinə yetirilməsi üçün bütün imkanlar səfərbər ediləcək, Nərimanov rayonunun sosial-iqtisadi inkişafının təmin olunması üçün bütün zəruri tədbirlər həyata keçiriləcək.

Mirbağır Yaqubzadə

Xalq qəzeti.- 2009.- 23 oktyabr.- S. 5.