Şəki: təhsil ocaqlarında ölkənin ümumi inkişafına layiq uğurlar əldə edilir

İndi dəqiq tarixini bilməsəm də, bir neçə ay əvvəl Şəkidən hazırladığım qəzet materialında öz gələcək yazılarımdan biri barədə “anons” vermişdim: “Şəki ölkəmizin ən böyük kənd təsərrüfatı rayonlarındandır”, “Şəki respublikanın sənaye şəhərlərindən birinə çevrilir”, “Şəki Azərbaycanın ən geniş imkanlara malik turizm mərkəzlərindən biridir”. Bu gün isə bunların sırasına “Şəki Azərbaycanın təhsil mərkəzlərindən birinə çevrilir” ifadəsi də qoşulur. İnşallah, gələn yazılarımızda bütün bunlar barədə əhatəli söz açacağıq. Söz vermişdim və sözümə əməl etmək üçün Şəkiyə bu səfərimdə neçə-neçə təhsil ocağında oldum, təşkil edilən təntənəli tədbirlərdə iştirak etdim.

Əvvəla ondan başlayaq ki, yeni dərs ilinin ilk günü bu qədim diyarın üç qədim yaşayış məskənində – Kiçik Dəhnə, Dərəcənnətli və Baş Köynük kəndlərində yeni məktəb binaları tikilib istifadəyə verilib. Bu tədbirlərə gedəndə şəhər icra hakimiyyəti başçısının müavini, doğma Şəkisi ilə həmişə fəxr edən, onun haqqında səmimi, isti sözlər söyləyən Zərinə xanım Cavadova dövlətin və rayon rəhbərliyinin təhsil sisteminin inkişafına göstərdiyi qayğıdan, həyata keçirilən tədbirlərdən çoxsaylı faktlar əsasında geniş söz açdı: – Diqqət yetirin, – dedi. – Kiçik Dəhnə kəndində 2 nömrəli orta məktəb üçün inşa edilmiş 640 şagird yerlik yeni məktəb binasının tikintisinə cəmi bir il üç ay əvvəl – 2008-ci ilin may ayında başlanmışdı. Yəni, 15 aya bu boyda təhsil müəssisəsi tikilib istifadəyə verilirsə, burada işin düzgün təşkil edilməsindən, operativlikdən, inşaatçıların məsuliyyətindən danışmağa söz qalmır. Bundan başqa Dərəcənnətli kəndindəki 220 yerlik məktəbin təməli də ötən ilin may ayında qoyulmuşdu. Baş Köynükdəki orta məktəb binası 1929-cu ildə tikilmişdi. Demək olar ki, bina tamamilə qəzalı vəziyyətdə idi. İndi burada yeni tikilmiş binada 40 sinif otağı, fənn kabinələri, laboratoriyalar, idman və akt zalları, kitabxana, bufet və digər otaqlar var. Şagirdlərin ixtiyarına 20 kompyuter dəsti verilib.

Həmsöhbətim əlavə etdi ki, yeni tikilən məktəblərin hər üçıündə müasir istilik sistemi quraşdırılıb. Məktəb binalarının açılış mərasimlərində Şəki Şəhər İcra Hakimiyyətinin başçısı Nazim İbrahimov və şəhər təhsil şöbəsinin müdiri Firədun İbrahimov Şəkinin təhsil sistemini əhatə edən daha çox fakt və rəqəmlərdən söz açdılar. Ancaq mən sentyabrın 15-də Şəki Şəhər Təhsil Şöbəsinin uğurları, əldə edilmiş nailiyyətlər barədə yazı hazırlamadım. Çünki həmsöhbətim maraqlı bir fikir söylədi: “Ayın sonlarında Azərbaycan Respublikasının Prezidenti cənab İlham Əliyev təhsil işçilərinin bir qrupunun fəxri adlara layiq görülməsi və medallarla təltif edilməsi üçün sərəncam imzalayacaq. Yəqin ki, onların arasında bizim Şəkidən də bir neçə təhsil işçisinin adına rast gələcəyik. Ona görə də bu yazını oktyabrda hazırlamağınız daha münasib olardı”. Razılaşdıq.

Oktyabrda bu yazını qələmə almağımız Zərinə xanımın dediyi kimi sözün həqiqi mənasında daha münasib oldu. Çünki indiki həmsöhbətim Şəki Şəhər Təhsil Şöbəsinin müdiri, pedaqoji elmlər doktoru, əməkdar müəllim Firədun İbrahimovdur. Yəqin ki, təqdimatdakı dəyişiklik hörmətli oxucuların nəzərindən yayınmadı. Yazının əvvəlində Firədun müəllimi sadəcə təhsil şöbəsinin müdiri kimi təqdim etmişdik. İndiki abzasda isə onun adının qarşısına əməkdar müəllim adı əlavə olunub. Azərbaycan Respublikasının Prezidenti cənab İlham Əliyevin sentyabrın 30-da imzaladığı “Azərbaycan Respublikasında təhsilin inkişafında və təhsil müəssisələrinin maddi-texniki bazasının möhkəmləndirilməsində xüsusi xidmətləri olan şəxslərə fəxri adların verilməsi haqqında” sərəncama əsasən fərqlənən təhsil işçilərindən biri də Firədun İbrahimovdur. Amma, deyəsən burada yenə də bir anonsa ehtiyac var. Çünki Firədun müəllimin əməkdar müəllim fəxri adına layiq görülənədək keçdiyi həyat yolu sözün həqiqi mənasında ayrıca bir yazının mövzusudur. Bu təhsil fədaisi, pedaqoji işin kamil təşkilatçılarından olan insan dövlət başçısının sərəncamı ilə müəllim üçün ən ali mükafat olan fəxri ada layiq görüləndən sonra da özü barədə, öz fəaliyyəti haqqında demək olar ki, heç nə danışmaq istəmədi:

– Əgər mən bu məqamda özümün müəllimlik fəaliyyətim barədə söz açsam, onda belə çıxar ki, məhz bu fəxri ada çatmaq üçün çalışmışam və indi də arzuma çatmışam. Tanıyanlar və iş yoldaşlarım yaxşı bilirlər ki, mən sadəcə Azərbaycan müəlliminin üzərinə düşən vəzifələri yerinə yetirməyə çalışmışam, vəssalam. Şəki şəhərinin və rayonumuzun təhsil işçiləri isə sözün həqiqi mənasında daim böyük uğurlar əldə ediblər. Xüsusən, son beş ildə əldə etdiyimiz nailiyyətlər daha böyükdür. Çünki 2004-cü ildən bəri Azərbaycan təhsilinə dövlətimiz və dövlət başçımızla yanaşı Heydər Əliyev Fondu da böyük qayğı və diqqət göstərir. Belə ki, fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təhsilə göstərdiyi qayğıdan Şəki təhsil sisteminə də pay düşür. Biz o qayğını gündəlik həyatımızda hiss edirik.

Yeni başlanmış dərs ili barədə söhbət açarkən mütləq əvvəlki dərs ilinin yekunlarına baxmaq ənənəsi mövcuddur. Bu ənənəyə əməl edək. Ötən dərs ilində Təhsil Nazirliyinin rayon təhsil şöbələrinin qarşısında qoyduğu bütün vəzifələrin öhdəsindən layiqincə gəlmişik. Buraya yeni məktəb binalarının tikintisi, mövcud məktəblərin əsaslı və cari təmiri, təhsilin maddi-texniki bazasının möhkəmləndirilməsi, müəllimlərin müasir standartlara cavab verəcək şəkildə təkmilləşdirilməsi, kadrların seçilib yerləşdirilməsi, müəllim-şagird, məktəb-valideyn, məktəb-ictimaiyyət münasibətlərinin tələb olunan qaydalara əsasən yenidən qurulması, məktəbəqədər təhsil müəssisələrində informasiya-kommunikasiya texnologiyalarının daha geniş şəkildə tətbiq edilməsi, istedadlı uşaqlarla işin təşkili, hərbi vətənpərvərlik tərbiyəsinin yüksəldilməsi və bir çox başqa məsələlər daxildir. Qətiyyətlə deyə bilərəm ki, Şəki məktəblərində bu vəzifələrin öhdəsindən layiqincə gələn müəllimlər ordusu vardır. Biz bu işləri bir də ona görə yüksək səviyyədə icra edə bilirik ki, sadaladığım həmin vəzifələrin hər birinin icrası üçün ayrıca Dövlət Proqramı vardır. Cənab Prezident İlham Əliyev ölkənin təhsil sisteminin inkişafını təmin etmək məqsədiylə 16 Dövlət Proqramı imzalamışdır. Həmin proqramların icrası bizim öz işimizdə istənilən uğurlara imza atmağımızı təmin edir.

Bir məsələni də qeyd edim. Məlum olduğu kimi Respublika Nazirlər Kabinetinin təsdiq etdiyi “Ümumtəhsil sistemində qiymətləndirmə Konsepsiyası”na əsasən ölkənin bütün ümumtəhsil məktəblərinin XI siniflərində buraxılış imtahanları Təhsil Nazirliyi tərəfindən, mərkəzləşdirilmiş qaydada aparılır. Sonuncu imtahanda şəkili onbirincilərin 81,3 faizi müvəffəqiyyət əldə edib. Müqayisə üçün deyim ki, respublika üzrə bu göstərici 77,5 faizdir. Bu fərq bizim müəllimlərimizin il boyu çəkdiyi zəhmətin nəticəsidir. Dörd məktəbimizin – Şəhər 7 saylı, Sarıca, Aydınbulaq və Çeşməli kənd orta məktəblərinin buraxılış imtahanlarında 100 faizli nəticə göstərməsi isə xüsusilə təqdir olunmalıdır. Eləcə də orta məktəbi bu il bitirən məzunlarımızdan 366 nəfərin ali məktəb tələbəsi adını qazanması – üstəlik əvvəlki illərdəki məzunlarımızdan da 120 nəfəri (360+120) bu il ali məktəbə qəbul olunub, həmin abituriyentlərdən 22 nəfərin 600-dən, 73 nəfərin isə 500-dən çox bal toplaması təqdirəlayiq nəticədir.

Hər il olduğu kimi bu il də 3 nəfər Şəki məktəblisi ABŞ Təhsil Departamenti tərəfindən maliyyələşdirilən, orta məktəb şagirdləri üçün təşkil olunmuş FLEX (gənc liderlər mübadiləsi) proqramının qalibi olub. Şəhər 8 nömrəli orta məktəbin XI sinif şagirdləri Türkan Həsənova və Orxan Yaşarlı, eləcə də şəhər 18 nömrəli orta məktəbin XI sinif şagirdi Mehman İsmayıllı 2009-2010-cu dərs ilində 1 il müddətində ABŞ-da pulsuz təhsil almaq hüququ qazanıblar.

Bir sözlə, məktəblərimizin, müəllimlərimizin və şagirdlərimizin uğurları çoxdur. Bu uğurların əldə edilməsində ən böyük dayağımız Təhsil Nazirliyinin və Şəki Şəhər İcra Hakimiyyətinin rəhbərliyi olub. Ancaq bütün bunlarla yanaşı həyata keçirilməsi vacib olan bir sıra məsələlər də vardır. Məsələn, 13 məktəbdə yeni məktəb binasının, 12 məktəbdə əlavə sinif otaqlarının, 7 məktəbdə idman zalının tikintisi və 44 məktəbdə əsaslı təmir aparılması Şəki təhsilinin növbəti uğurlarına zəmin yaradar, inkişamıza stimul verərdi. Əminik ki, nazirliyin və şəhər rəhbərliyinin dəstəyi ilə həmin məsələləri də həll edəcəyik.

...Respublikanın əməkdar müəllimi Firədun İbrahimov Şəki təhsilinin bu günü və sabahı barədə çoxsaylı faktlardan və rəqəmlərdən söz açdı. Mən həmin faktların cəmi bir neçəsini qələmə aldım. Əvvəla, hamısını yazmaq yer baxımından mümkün deyildi, ikinci də yuxarıda bir vəd vermişik axı... Daha doğrusu, anonsumuz olub. Əməl edəcəyik. Yaxşısı budur gözləyək...

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2009.- 29 oktyabr.- S. 7.