Dünyanın tanınmış tibb tədqiqatçıları Azərbaycana gələcəklər

 

Bakıda 3-cü Avrasiya klinik mikrobiologiya, immunologiya və infeksion xəstəliklər konqresi keçiriləcəkdir

 

Ümummilli liderimiz Heydər Əliyevin əsasını qoyduğu daxili və xarici siyasəti uğurla davam etdirən Prezident cənab İlham Əliyevin iqtisadi kapitalı insan kapitalına yönəltmək çağırışları və bu istiqamətdə yeritdiyi siyasət, imzaladığı dövlət proqramları Azərbaycanı nəinki regionda lider dövlətə, eləcə də elm, təhsil, səhiyyə, mədəniyyət və idman mərkəzinə çevirmişdir. Heydər Əliyev Fondunun prezidenti, millət vəkili Mehriban xanım Əliyevanın təşəbbüsləri və həyata keçirdiyi çoxsaylı proqramlar ölkəmizin elm və mədəniyyət mərkəzi kimi tanınmasında xüsusilə rol oynamışdır. Təsadüfi deyildir ki Bakı şəhəri 2009-cu ildə İslam mədəniyyətinin paytaxtı elan olunmuşdur. Azərbaycanın müxtəlif elm sahələrinə aid beynəlxalq konqres və simpoziumlara, idman yarışlarına, musiqi müsabiqələrinə və digər mədəni tədbirlərə ev sahibliyi etməsi son illərdə artıq ənənə halını almışdır.

Ölkədə hökm sürən siyasi sabitlik və sürətli iqtisadi inkişaf sayəsində elmimiz dünya elminə inteqrasiya etməkdədir. Möhtərəm Prezidentimizin imzaladığı “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramın”dan yararlanan istedadlı gənclərimiz dünyanın qabaqcıl elm və təhsil mərkəzlərində yüksək ixtisaslı mütəxəssis kimi yetişməklə yanaşı, gələcəkdə ölkəmizin təhsil müəssisələrinin həmin mərkəzlərlə işbirliyi qurmasında mühüm rol oynayacaqlar.

Bütün sahələrdə olduğu kimi, ölkəmizin səhiyyə sistemində də həyata keçirilən uğurlu islahatlar inkişafın ən mühüm göstəricilərindən olan tibbi xidmətin keyfiyyətini dəfələrlə yüksəltmişdir. Regionların sosial-iqtisadi inkişafı Dövlət Proqramı çərçivəsində Azərbaycanın bütün bölgələrində ən müasir tələblərə cavab verən yeni tibb müəssisələrinin açılması möhtərəm Prezidentimiz İlham Əliyevin bu sahəyə yanaşdığı həssaslığın və göstərdiyi qayğının ən bariz nümunəsidir. Dövlət başçısının səhiyyə islahatlarına dair imzaladığı sərəncam və proqramlar və bunların həyata keçirilməsi istiqamətində səhiyyə naziri cənab Oqtay Şirəliyevin uğurlu fəaliyyəti sayəsində respublikamız keçmiş SSRİ məkanında ən müasir tibb mərkəzlərinə malikdir. Artıq bu gün ölkəmizin ucqar regionlarında belə ən müasir cərrahi əməliyyatları və tibbi manipulyasiyaları həyata keçirmək üçün lazım olan hər şərait vardır.

Səhiyyə sisteminin inkişafında ən mühüm məsələlərdən biri kadr hazırlığıdır. Müasir maddi-texniki bazaya malik səhiyyə sistemi ilə ayaqlaşa bilən müasir elm və təcrübəyə yiyələnmiş tibb mütəxəssislərinin hazırlanması çox vacibdir. Bu baxımdan Azərbaycanın yeganə ali tibb təhsili müəssisəsi olan Azərbaycan Dövlət Tibb Universitetində (ATU) son illər bir sıra islahatlar həyata keçirilir. ATU-da təhsilin səviyyəsinə mənfi təsir göstərən ən mühüm məsələlərdən biri universitet klinikasının olmaması idi. Möhtərəm Prezidentimizin bu sahəyə göstərdiyi qayğı da çox gecikmədi. Cənab İlham Əliyevin ATU-nun kollektivi ilə birlikdə təməlini qoyduğu Tədris-Terapevtik Klinika bu yaxınlarda açılacaq. Cərrahi Klinikada da sürətli inşaat işləri aparılır. Bunlara qədər isə ATU-nun rektoru akademik Əhliman Əmiraslanovun Azərbaycan Prezidentinin tibbi təhsilə qayğısından bəhrələnən fəaliyyəti sayəsində universitetin stomatoloji və onkoloji klinikaları açılmış, ölkə əhalisinə yüksək ixtisaslı tibbi xidmət göstərir. İnanırıq ki, yaxın gələcəkdə ATU-nun klinikaları dünyanın ən inkişaf etmiş tibb mərkəzinə çevriləcəkdir.

ATU-da klinik bölmələrlə yanaşı, təbabətin əsasını təşkil edən nəzəri tibb sahələrinin inkişafına da xüsusi diqqət yetirilir. Nəzəri kafedraların maddi-texniki bazası gündən-günə güclənməkdədir. Dünyanın ən qabaqcıl tibbi təhsil mərkəzlərində nəzəri və klinik bölmələr işbirliyi əsasında fəaliyyət göstərir. Son illər ATU-da da bu amilə diqqət yetirilmiş, universitet tarixində ilk dəfə olaraq mikrobiologiya və immunologiya, biokimya və histologiya kafedralarının nəzdində klinik laboratoriyalar fəaliyyətə başlamışdır. Universitet klinikaları açıldıqdan sonra nəzəri və klinik mütəxəssislər arasında əməkdaşlıq da təbii olaraq güclənəcək, bu isə tibbi təhsilin keyfiyyətində əsaslı dönüş yaradacaqdır. İnanırıq ki, yetişdirdiyi məzunları Türkiyədə TUS (tibbdə uzmanlıq imtahanı) kimi çox çətin imtahanda on altı min nəfər arasında 1-ci və 2-ci yerləri tutan ATU, ölkə başçısının diqqət və qayğısı sayəsində tamamilə yeni keyfiyyət və müasir sima ilə dünyanın tibbi təhsil müəsisələri arasında da seçiləcəkdir.

ATU-da son illər beynəlxalq əlaqələr çox sürətlə inkişaf etmişdir. Artıq 4 ildir ki, universitetin 3,4 və 5-ci kurslarının əlaçı tələbələri istehsalat təcrübəsini Türkiyənin və digər ölkələrin universitet klinikalarında keçirlər. Universitetin əməkdaşları mütəmadi olaraq xarici ölkələrdə təkmilləşmə kursları keçir, təcrübə mübadiləsi aparırlar. Bir sıra kafedralar xarici universitetlərin müvafiq bölmələri ilə birlikdə ortaq elmi-tədqiqatlar üzərində çalışır. Son illər ATU tarixində başqa bir yenilik-ingilis dilli təhsil sektorunun açılması universitetin beynəlxalq əlaqələrini daha da gücləndirmişdir. 1998-ci ildə ümummilli liderimiz Heydər Əliyevin açdığı ATU-nun 550 nəfərlik möhtəşəm konqres zalı son illər bir sıra beynəlxalq konqreslərə ev sahibliyi etmişdir. Yeri gəlmişkən, mən özümü xoşbəxt sayıram ki, hələ tələbə ikən bu zalın açılış mərasimində aparıcı kimi iştirak etmişəm. Burada keçirilən beynəlxalq konqreslər Azərbaycan həkimlərinə öz təcrübə və elmi-tədqiqatlarını xarici həmkarları ilə bölüşməyə, onların təcrübələrindən yararlanmağa, ATU-nu tanıtmağa və elmi əlaqələr qurmağa imkan vermişdir. Bu il oktyabrın 1-dən 4-dək ATU daha bir beynəlxalq konqresin – 3-cü Avrasiya klinik mikrobiologiya, immunologiya və infeksion xəstəliklər konqresinin (EACİD) açılışına ev sahibliyi edəcəkdir.

“İrəli” İctimai Birliyinin dəstəyi ilə, Qara dəniz Klinik Mikrobiologiya və İnfeksion Xəstəliklər Dərnəyi (Türkiyə) və Azərbaycan Tibbi Mikrobioloqlar və İmmunoloqlar İctimai Birliyinin birgə təşkil edəcəyi 3-cü EACİD konqresinin ölkəmizdə keçirilməsi məmnunluq və qürur hissi yaradır. Bu elmi konqres yerli tədqiqatçılarla digər ölkələrdən beynəlxalq iştirakçıları bir araya gətirmək məqsədini daşıyır. Konqres tibb sahəsində yeni olmasına baxmayaraq böyük əks-səda doğurmuşdur. Belə ki, üç il əvvəl 1-ci Beynəlxalq Orta Asiya infeksion xəstəliklər konqresi adı ilə Bişkek şəhərində, keçən il Almatıda təşkil edilmişdir. Bu konqreslərin işində ATU-nun mikrobiologiya və İmmunologiya kafedrasının əməkdaşları da yaxından iştirak etmişlər. Almaatadakı ikinci konqresdə bizim 3-cü konqresin Bakıda keçirilməsi barədə təkliflərimiz alqışlarla qarşılandı və belə bir qərar qəbul edildi.

Konqresin təşkilat komitəsi Prezident İlham Əliyevin Azərbaycan səhiyyəsinin və tibb elminin beynəlxalq inteqrasiyası istiqamətində yürütdüyü siyasətin həyata keçirilməsindəki yorulmaz və uğurlu fəaliyyətlərini nəzərə alaraq səhiyyə naziri Oqtay Şirəliyevi və ATU-nun rektoru cənab Əhliman Əmiraslanovu 3-cü EACİD konqresinin fəxri prezidentləri elan etmişdir. Konqresin prezidentləri isə Azərbaycan Tibbi Mikrobioloqlar və İmmunoloqlar İctimai Birliyinin sədri, ATU-nun mikrobiologiya və immunologiya kafedrasının müdiri, professor Zakir Qarayev və Qara dəniz Klinik Mikrobiologiya və İnfeksion Xəstəliklər Dərnəyinin (Türkiyə) sədri, Ondokuz Mayıs Universitetinin Klinik Mikrobiologiya və İnfeksion xəstəliklər kafedrasının müdiri, professor Hakan Ləbləbicioğludur. Yeri gəlmişkən, göstərdiyi təşkilati dəstəyə görə “İrəli” İctimai Birliyinin sədri Ceyhun Osmanlıya təşəkkürümüzü bildiririk. Konqres çərçivəsində Avropa Klinik Mikrobiologiya və İnfeksion Xəstəliklər Dərnəyi Antibiotik Siyasəti İşçi Qrupu ilə birlikdə kurs da planlaşdırılır. Kursun əsas mövzusu “Improving Antimicrobial prescribing of Surgical Prophylaxis/Antibiotic use in the ICU” olacaqdır. İnteraktiv kursda avropalı mütəxəssislərin təcrübələri dinləniləcəkdir. Bundan başqa, “İrəli” İctimai Birliyinin köməyi ilə AİDS/HİV, hepatitlər, donuz qripi kimi aktual infeksion xəstəliklər mövzularında türkiyəli və yerli mütəxəssislərin seminarlarıı da planlaşdırılır. Konqres Azərbaycan qonaqpərvərliyini görmək və nəzəri-klinik araşdırmalarda son inkişafı izləmək imkanı yaradır. Klinik mikrobiologiya, immunologiya və infeksion xəstəliklər sahəsindəki tədqiqatçıların qarşısında eyni, ümumi hədəf dayanır: infeksion xəstəliklərin yayılıma təhlükəsini anlamaq və mübarizə aparmaq. Belə konqreslərin, məlumat mübadilələrinin və iş birliklərinin ölkəmizdə infeksion xəstəliklərlə mübarizədə müvəffəqiyyət gətirəcəyinə ümid edirik.

Konqresin işinə daxil ediləcək başlıca mövzular – klinik-mikrobioloji diaqnostikada yeniliklər, inkişaf etməkdə olan ölkələrdə antibiotiklərin istifadəsi və antimikrobial rezistentlik, metisillinə davamlı stafilokoklar (MRSA), çoxsaylı dərmanlara davamlı patogenlərin aşkar olunmasında müşahidə, xəstəxana infeksiyaları, nozokomial infeksiyaların kontrol proqramları, bakterial və parazitar infeksiyalar, cərrahi infeksiyalar, vərəm, viral hepatitlər, sterilizasiya, dezinfeksiya, molekulyar diaqnoz üsulları və infeksion xəstəliklərindən qorunma və s. aktual məsələlərdir.

 

 

Ramin BAYRAMOV

 

Xalq qəzeti.- 2009.- 2 sentyabr.- S. 5.