Bakı Şəhəri üzrə Təhsil İdarəsinin uğurları ildən-ilə artır

Nailə RZAQULİYEVA: Kollektivimizin istənilən nailiyyəti dövlətin təhsilə qayğısının nəticəsində əldə edilir

Son zamanlar müəllimlər və valideynlər arasında belə bir fikir formalaşmışdır: “Məktəbin 9 aylıq dərs ilindəki fəaliyyətinin hansı səviyyədə qurulması ali və orta ixtisas məktəblərinə qəbul imtahanlarının başa çatmasından sonra məlum olur”. Bəlkə də bu, subyektiv fikirdir. Çünki beynəlxalq aləmdə qəbul edilmiş müasir təhsil prinsiplərinə görə orta məktəbin əsas vəzifəsi ali məktəblər üçün tələbə hazırlamaq yox, cəmiyyət üçün normal vətəndaş yetişdirməkdir. Həm fiziki, həm də mənəvi cəhətdən normal yetişmiş gənc nəsil ölkə həyatının müxtəlif sahələrində öz vətəndaşlıq borcunu layiqincə yerinə yetirə biləcəkdir. Əgər qəbul imtahanlarının nəticəsi barədə formalaşmış həmin fikir həqiqəti özündə əks etdirirsə, onda Bakı Şəhəri üzrə Təhsil İdarəsinin nəzdində fəaliyyət göstərən orta məktəblərdə sonuncu dərs ilində yüksək səviyyədə iş aparılıb, fəaliyyət düzgün qurulubdur. Çünki bu il Bakı məktəblərinin məzunları arasında ali məktəb tələbəsi adını qazananlar təxminən 3 faiz artaraq 42,17 faizə çatmışdır. İdarənin yarandığı son üç ildə isə bu göstərici 8 faiz təşkil edir.

Ancaq BŞTİ-nin fəaliyyəti müasir təhsil prinsiplərinə uyğun olaraq çoxşaxəlidir və idarə kollektivi həmin sahələrin hər birində özünəməxsus göstəricilər əldə etmişdir. Təhsilin idarə edilməsi, kadrların seçilib yerləşdirilməsi, ibtidai təhsilin dünya standartları səviyyəsinə çatdırılması üçün həyata keçirilən tədbirlər, məktəbəqədər təhsil müəssisələrinin fəaliyyətinin yenidən qurulması, məktəbdənkənar təhsil müəssisələrinin fəaliyyətinin təkmilləşdirilməsi, ümumiyyətlə, paytaxtın təhsil və tərbiyə müəssisələrinin maddi-texniki bazasının möhkəmləndirilməsi, müəllimlərinin sosial problemlərinin həlli, nümunəvi pedaqoqların fəaliyyətinin lazımınca qiymətləndirilməsi, məktəb tikintisi, informasiya–kommunikasiya texnologiyalarının daha geniş tətbiqi və başqa məsələlər cəmi üç yaşı olan bu idarədə əhatəli şəkildə öz həllini tapır. Elə idarənin müdiri, əməkdar müəllim Nailə Rzaquliyeva ilə söhbətimiz də məhz bütün bu məsələlər ətrafında davam etdi:

– Nailə xanım, ilin elə bir vaxtıdır ki, cəmi bir neçə gündən sonra biz sizi yeni dərs ilinin başlanması münasibətilə təbrik edəcəyik. Ancaq hələlik köhnə dərs ilinin uğurla başa çatması münasibətilə təbrik edirik. “Uğurlu” ifadəsini il ərzində qəzetimizdə və digər mətbuat vasitələrində sizin fəaliyyətiniz barədə verilmiş çoxsaylı məlumatlar əsasında söyləyirik.

– Haqlısınız, idarəmizin, xüsusən, müəllimlərimizin uğurları, nailiyyətləri vardır. Amma əlavə edim ki, sizin qeyd etdiyiniz həmin uğurlar bütövlükdə respublikamızın təhsil sisteminin inkişafı fonunda əldə edilir. Təhsil sisteminin inkişafı isə ümumilikdə ölkəmizin sosial-iqtisadi inkişafının yaratdığı imkanlardan qaynaqlanır. Yəni, bütün uğurların təməlində ulu öndərimiz Heydər Əliyevin siyasi kursu dayanır. Heydər Əliyev sözün həqiqi mənasında Azərbaycan təhsilinin inkişafına misilsiz töhfələr vermiş liderdir. Onun rəhbərliyi ilə hazırlanmış və həyata keçirilən təhsil islahatı bu sistemdəki kifayət qədər problemin həllinə, təhsilimizin məzmunca yeniləşməsinə, milli koloriti saxlamaqla dünya təhsil sisteminə inteqrsiya olunmasına səbəb olmuşdur. Onun siyasətini uğurla davam etdirən cənab Prezident İlham Əliyevin təhsil sektoru ilə bağlı imzaladığı 16 Dövlət Proqramı təhsil sistemi hərtərəfli inkişafına səbəb olmuşdur. Dövlət büdcəsindən təhsil sahəsinə ayrılan vəsaitin 2008-ci ilə nisbətən 2009-cu ildə 238 milyon manat – yəni 21 faiz artması, təhsil işçilərinin orta aylıq əmək haqqının 220 manatdan 257 manata çatdırılması, 2008-ci ildə 161 məktəb binasının inşası, 120 məktəbin əsaslı təmir edilməsi, 350 məktəbin istilik sisteminin bərpası, 180 məktəbin müasir avadanlıqlarla təchiz edilməsi Azərbaycan dövlətinin, ilk növbədə ölkə Prezidenti cənab İlham Əliyevin təhsil sahəsinə daimi diqqət və qayğısı nəticəsində mümkün olmuşdur.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyevanın təşəbbüsü ilə 30 xarici ölkəni təmsil edən mütəxəssisin iştirak etdiyi “Dünyada savadlılığın dəstəklənməsi” adlı regional konfrans ölkəmizin təhsil sistemi barədə beynəlxalq aləmə daha əhatəli məlumat vermiş oldu. YUNESKO xətti ilə Bakıda keçirilən həmin konfrans sübut etdi ki, Azərbaycan təkcə qabaqcıl təhsil tendensiyalarını dəstəkləməklə deyil, həm də əhalisi bütövlükdə savadlı olan ölkə kimi özünəməxsus nüfuza malikdir. Azərbaycan müəllimlərinin XIII qurultayı isə təhsilin inkişaf istiqamətlərini, gələcək fəaliyyətimizin konturlarını müəyyən etdi. Həmin ali məclisdə bir daha sübut olundu ki, ölkədə təhsil islahatı geniş ictimai dəstək qazanmışdır. Mahiyyət etibarilə dünya təhsil sisteminə inteqrasiyanı dərinləşdirən kurikulum islahatının ardıcıl və məqsədyönlü şəkildə həyata keçirilməsi, mərkəzləşdirilmiş buraxılış imtahanlarının ölkə üzrə tətbiqi təhsildə sağlam mühitin yaradılmasına xidmət etmişdir. İndi bu nailiyyətləri inkişaf etdirmək, təhsilin keyfiyyətinə təsir edən vasitələrdən istfifadə etmək kimi böyük və məsuliyyətli mərhələyə qədəm qoymuşuq.

– Həmin böyük və məsuliyyətli mərhələnin qarşıya qoyduğu vəzifələri hansısa konkret bir müəssisədə icra etmək bəlkə də asan olardı. Ancaq Bakı Şəhəri üzrə Təhsil İdarəsi kimi böyük əhatəyə malik qurumda həmin vəzifələrin icrası xeyli vaxt, qüvvə və qətiyyət tələb edəcəkdir.

– Ən başlıcası isə prinsipiallıq tələb olunacaqdır. Bəli, sizin də qeyd etdiyiniz kimi idarəmizin əhatəsi, miqyası xeyli böyükdür. BŞTİ-nin tabeliyində 311 orta, 4 əsas, 5 yardımçı, 1 evdə təhsil, 5 cəzaçəkmə müəssisəsində axşam məktəbi, 302 məktəbəqədər və 48 məktəbdənkənar təhsil müəssisəsi vardır. Bu qədər kollektivin müasir tələblər səviyyəsində idarə edilməsi, təhsilin indiki dünya təcrübəsi səviyyəsində inkişafına nail olunması gərgin və sistemli iş tələb edir. Heç kəsə sirr deyil ki, Bakı təhsilinin inkişafı bütövlükdə Azərbaycan təhsilinin inkişafına ciddi təsir edir. Ona görə də “Bakı təhsil sistemində çalışanların üzərinə böyük məsuliyyət düşür” – deyənlər tamamilə haqlıdırlar. Məmnuniyyətlə deyə bilərəm ki, bizə yaradılan şərait, göstərilən qayğı bu məsul vəzifənin öhdəsindən layiqincə gəlməyimizi təmin edir.

– Təbii ki, bunun üçün ilk növbədə kadrlarla işin təkmilləşdirilməsi lazımdır. Daha doğrusu, kadrların düzgün seçilib yerləşdirilməsi istənilən ağır vəzifənin həllini asanlaşdırır.

– Əlbəttə, bütün sahələrdə bu, belədir. Ancaq təhsil sahəsində kadr məsələsi daha böyük əhəmiyyət kəsb edir. Təhsildə keyfiyyətli idarəetmə sisteminin qurulması bizim idarənin yarandığı gündən etibarən daim diqqət mərkəzində saxlanılır. İdarəmiz fəaliyyətə başladığı vaxt paytaxt məktəblərində şagird-müəllim nisbəti aşağı idi. Həmin nisbətin yüksəldilməsi və müəllim əməyinin səmərəliliyinin artırılması üçün həyata keçirdiyimiz tədbirlər nəticəsində (hətta, şagirdlərin sayının 25 min nəfər azalmasına baxmayaraq) şagird-müəllim nisbəti 10.3-dən 10.6-ya qaldırıldı. Bu, əsassız şəkildə işə qəbuletmə hallarına son qoyulması nəticəsində mümkün oldu. Diqqət yetirin, son üç ildə bizim işə qəbul etdiyimiz müəllimlərin sayı idarəmizin yaranmasından əvvəl bir ildə qəbul edilən müəllimlərin sayına bərabərdir. Üstəlik, son illərdə Bakı şəhərində 22 yeni məktəb istifadəyə verilmiş, 28 əlavə tədris korpusu tikilmişdir. Həmin məktəblərin fəaliyyət göstərməsi üçün 2000-dən çox müəllim işə qəbul edilməli idi. Biz cənab nazir Misir Mərdanovun razılığı ilə yeni məktəblərə müəllim qəbulunu əsasən müəllim sıxlığı böyük olan məktəblərdən kadrların köçürülməsi yolu ilə həyata keçirdik. Bununla da müəllim-şagird nisbətinin sabit saxlanılmasına nail olundu.

– Bütün bunlara baxmayaraq, müasir təhsil sisteminin təkmilləşdirilməsi üçün ən zəruri amil maddi-texniki bazanın möhkəmləndirilməsi, infrastrukturun yeniləşməsi, müasir texnologiyaların tətbiqidir.

– Söhbətimizin əvvəlində dövlətin təhsil sisteminə qayğısı barədə danışarkən qeyd etdim ki, bizim problemlərimizin həlli üçün dövlət heç nəyi əsirgəmir, lazım olan qədər vəsait ayrılır, məktəblərimiz zəruri olan bütün avadanlıqlarla yüksək səviyyədə təchiz edilir. Məlumdur ki, bu günki idarəetmədə geniş məlumat bazasının, dəqiq və sürətli infonrmasiyanın böyük rolu vardır. Ötən ilin sentyabrından etibarən Təhsil Nazirliyində həyata keçirilən “Məktəb–TİMS” proqramı bu baxımdan təhsilin keyfiyyətli idarə edilməsi üçün imkan yaradır. İl ərzində Bakı Şəhəri üzrə Təhsil İdarəsi həmin proqramın dörd bölməsi – məktəb, kadr, şagird və “ÜM-1” hesabatı üzrə məlumatların başa çatdırılmasını təmin etmişdir. Hazırda idarəmizin keyfiyyətli informasiya təminatı mövcuddur. Nəticədə buraxılış imtahanlarında iştirak edəcək şagirdlər, verilmiş atestat və şəhadətnamələrin seriya və nömrələri haqqında dəqiq məlumat təmin edilmişdir. İndi məktəb, idarə və nazirlik arasında çevik əlaqə sistemi var. Təbii ki, bu sistem gələcəkdə daha da təkmilləşdiriləcək və daha böyük səmərə verəcəkdir.

Son illərdə informasiya – kommunikasiya texnologiyaları ilə təminatın yaxşılaşdırılması məqsədiylə qəbul edilmiş Dövlət Proqramı məktəblərimizdə müvəffəqiyyətlə həyata keçirilir. Hər 29 şagirdə bir kompyuter nisbətinin həlli dərslərin təkmilləşdirilməsində, hətta, məktəbin elektronlaşdarılması işində sürətli sıçrayışa səbəb olmuşdur. Cəmi 10 il əvvəl arzu edilən texniki imkanlar indi günün reallıqlarıdır. 23 nömrəli məktəbdə uğurla sınaqdan çıxalıran “Elektron məktəb” layihəsi indi 20 – 220 nömrəli məktəb-liseylərdə və daha 8 məktəbdə tətbiq edilir. Həmin layihənin reallaşdırılması nəticəsində təkcə informatika dərsləri elektron vasitələrlə təmin edilməyəcək, həm də fənn dərslərində kompyuterlərdən geniş istifadə ediləcək, ölkəmizdə milli təhsil modelinin formalaşması sahəsində müsbət nəticələr əldə olunacaqdır.

– Sizin işinizin digər bir xüsusiyyəti də var. Belə ki, maddi-texniki baza, lazımi avadanlıq və texniki vasitələr nə qədər çox olsa da, onlar məhz metodiki işin səviyyəsinin yüksəldilməsi zamanı daha çox səmərə verə bilər.

– Əlbəttə, yaxşı maddi texniki baza, güclü kadr potensialı və milli maarifçilik ənənələrimiz Bakı təhsil sisteminin inkişafını təmin edən əsas amillərdəndir. Ancaq bu amillərlə yanaşı metodiki işin müasir tələblərə uyğun olaraq yenidən qurulması, qabaqcıl iş təcrübələrinin, yeni təlim texnologiyalarının tətbiqi fəaliyyətimizin inkişafına özünəməxsus töhfələr verir. Ona görə də idarəmizin yarandığı gündən etibarən Metodik Mərkəzin və onun bölmələrinin fəaliyyətini tənzimləmək, bu sahəni işlək və çevik orqana çevirmək əsas vəzifələrdən biri kimi qarşıya qoyulmuşdur. Məhz həmin prinsipiallığın nəticəsidir ki, ötən dərs ilində müvafiq əmrlə metodik bölmələrin fəaliyyətini tənzimləyən xüsusi plan təsdiq edildi və dayaq məntəqələrinin fəaliyyəti daha da təkmilləşdirildi. Şəhərin ən yaxşı müəllimlərinin ştatdankənar metodist kimi metodik bölmələrin işinə cəlb olunması işimizdə ciddi dönüş yaratdı. Diqqət yetirin, paytaxtın 5019 nəfər pedaqoji işçisi Azərbaycan Müəllimlər İnstitutu, Bakı Pedaqoji Kadrların İxtisasartırma və Yenidən Hazırlanma İnstitutu, Bakı Slavyan Universiteti və digər müəssisələrdə təkmilləşdirmə kurslarına cəlb olundu. 95 metodist İKT üzrə baş təlimçi kurslarında iştirak etdi. Ötən dərs ili ərzində 11 adda metodiki vəsait və fənlər üzrə dövlət proqramları əsasında çoxvariantlı işləmələr hazırlanaraq müəllimlərin istifadəsinə verildi. Bununla belə Metodik Mərkəzin fəaliyyətinin təkmilləşdirilməsi yönündə tədbirlər davam etdirilir. Həmin məqsədlə biz həm Metodik Mərkəzin tabeliyində olan bölmələrin fəaliyyətini tənzimləmək, həm də çevik idarə olunan bir struktur formalaşdırmaq qərarına gəlmişik. Artıq bütün şəhəri əhatə edəcək struktur hazırdır. Məqsəd ilk növbədə hər bir sahə və fənn üzrə metodistlərin işini əlaqələndirmək, həmçinin məktəblərə metodik köməyin səmərəsini artırmaqdır.

– Yeri gəlmişkən, bu günlərdə növbəti dəfə Bakı müəllimlərinin fəaliyyətinin yüksək qiymətləndirilməsinin şahidi olduq. “İlin ən yaxşı müəllimi” müsabiqəsində qalib gələn təhsil işçilərinin 40 faizdən çoxu Bakı məktəblərinin təmsilçiləridir.

– Bəli, siz cənab Prezident İlham Əliyevin sentyabrın 1-də imzaladığı iki sərəncamla “Ən yaxşı müəllim” və “Ən yaxşı ümumtəhsil məktəbi” müsabiqələrinə yekun vurulmasını qeyd edirsiniz.

Mən bir məsələni xüsusilə qeyd etmək istəyirəm ki, fəaliyyət sahəsindən asılı olmayaraq istənilən peşə sahibinin xidmətlərinin layiqincə qiymətləndirilməsi məsələsi bizə ümummilli liderimiz Heydər Əliyevin bəxş etdiyi çox dəyərli bir ənənədir. Cənab İlham Əliyevin həmin ənənəni davam etdirməsi isə bizim üçün ikiqat məmnunluq, ikiqat sevincdir. Çünki həm ulu öndərimizin yaratdığı tendensiya davam etdirilir, həm də fəaliyyətimiz yüksək qiymətləndirilir. Adı çəkilən müsabiqədə mükafatlandırılan müəllimlərin 41 faizinin (100 müəllimdən 41-nin), “Ən yaxşı ümumtəhsil məktəbi” adına layiq görülmüş məktəblərin isə 49 faizinin (50 məktəbdən 24-ü) Bakı Şəhəri üzrə Təhsil İdarəsini təmsil etməsi bizim üçün böyük məmnunluq mənbəyidir. Müsabiqənin şərtləri elan ediləndən sonra Bakı məktəbləri və paytaxt müəllimləri arasında apardığımız işlər öz müsbət nəticələrini vermişdir. Təbii ki, bu qiymətləndirmə pedaqoji kollektivlərimizin növbəti dərs ilindəki fəaliyyətinə böyük stimul olacaqdır.

– Siz bir dəfə mətbuata verdiyiniz müsahibədə demişdiniz ki, paytaxtın təhsil sisteminin idarə olunmasında məhz bu idarənin bir qurumu olan Təhsil Şurasının da böyük rolu vardır.

– İndi də deyirəm. Bakı Şəhəri üzrə Təhsil İdarəsinin Təhsil Şurası özünün səmərəli qərarları ilə ümumi işə kifayət qədər kömək edir. Ötən dərs ilində şuranın 8 iclası keçirilib və yuxarıda qeyd etdiyiniz nailiyyətlərin əldə edilməsində şuranın qəbul etdiyi qərarların əhəmiyyəti danılmazdır. Xüsusən, təhsil müəssisələrində əmək qanunvericiliyinə əməl edilməsi, pedaqoji işçilərin işə qəbulu zamanı normativ-hüquqi sənədlərin tələblərinə istinad olunması, müəllimlərin əməyinin səmərəliliyinin artırılması sahəsində əldə edilmiş müsbət nəticələr, irəliləyişlər şuranın qərarlarının icrası zamanı ərsəyə gəlmişdir. Təhsillə, məktəblə, müəllimlə bağlı istənilən məsələnin Təhsil Şurasında geniş müzakirə edilməsi kifayət qədər səmərə verir.

– Nailə xanım, biz bayaqdan orta ümumtəhsil məktəbləri, onları əhatə edən məsələlər, problemlər və uğurlar barədə danışırıq. Ancaq sizin idarənin fəaliyyətinin mühüm hissələrindən biri də məktəbəqədər təhsil müəssisələri ilə bağlıdır.

– Daha doğrusu, fəaliyyətimizin əsası oradan başlanır. Çünki təhsilin ilkin pilləsi və bünövrəsi məhz məktəbəqədər təhsil mərhələsidir. Biz bu sahənin inkişafına xüsusi diqqət ayırırıq. Cənab Prezident İlham Əliyevin sərəncamıyla imzalanan “Məktəbəqədər təhsilin yeniləşdirilməsi Proqramı” (2007–2010-cu illəri əhatə edir) milli təhsilimizin bu mərhələsinin dünya standartları səviyyəsinə çatdırılmasını təmin edəcəkdir. Proqrama uyğun olaraq Bakı şəhərində məktəbəqədər təhsil müəssisələrinin yenidən qurulması, təmir edilməsi və şəbəkənin səmərəliliyinin artırılması istiqamətində kifayət qədər işlər görülmüşdür. “Bakıətrafı kənd və qəsəbələrin sosial iqtisadi inkişafı Dövlət Proqramı”na müvafiq olaraq tikilmiş 11 məktəbəqədər təhsil müəssisəsindən 9-u artıq fəaliyyət göstərir. Bu dərs ilində daha iki belə müəssisə fəaliyyətə başlayacaqdır. Ümumiyyətlə, idarəmizin nəzdindəki 302 məktəbəqədər təhsil müəssisəsində 30.510 uşaq təhsil alır. Əgər paytaxtdakı uşaq bağçalarının hamısı tam gücü ilə işləyərsə, onda biz otuz min deyil, 52 min uşağı məktəbəqədər təhsilə cəlb edə bilərik.

– Yeri gəlmişkən, bir çox Avropa ölkələrində uşaqların məktəbdən əvvəl məktəbəqədər təhsil müəssisəsində təlim və tərbiyə alması məcburidir.

– Həmin variantı məqbul hesab etsək də, biz bunu hələlik tətbiq edə bilmərik. Amma Avropa ölkələrindəki özəl uşaq bağçaları və ya bələdiyyələrin nəzdində yaradılan məktəbəhazırlıq qruplarının fəaliyyətini yəqin biz də təmin edə bilərik. Fikrimizcə daha səmərəli variant özəl uşaq bağçalarının şəbəkəsinin genişləndirilməsi yoludur. Onu da əlavə edim ki, Avropa Birliyinin üzvü olan ölkələrdə uşaqlarını məktəbəqədər təhsil müəssisəsinə göndərən valideynlər həmin müəssisədə bir uşağın qidalanması, tərbiyəsi və saxlanması üçün lazımi vəsaiti tam ödəyirlər.

– Sizin məktəbəqədər təhsil müəssisələri ilə yanaşı məktəbdənkənar təhsil müəssisələriniz də var. Həmin sahədə vəziyyət necədir?

– Təhsil sistemində həmin sahənin də özünəməxsus yeri vardır. Bu amili nəzərə alan Təhsil İdarəsi həmin sahənin inkişafına xüsusi diqqət yetirir. Fəaliyyətimiz dövründə, xüsusən, son bir ildə məktəbdənkənar təhsil müəssisələrinin maddi-texniki bazasının möhkəmləndirilməsi üçün mühüm addımlar atılmışdır. Zamanın tələblərinə cavab verməyən klub, dərnək və studiyalar ləğv edilmiş, müasir tələblərə uyğun məşğələ qrupları yaradılmışdır. Hazırda idarəmizin tabeliyində 48 məktəbdənkənar təhsil müəssisəsi, o cümlədən 19 idman məktəbi, 14 uşaq yaradıcılıq mərkəzi, 8 texniki yaradıcılıq mərkəzi, 3 məktəbdənkənar tərbiyə işi mərkəzi və digər mərkəzlər fəaliyyət göstərir. Bu sahədə də bizim kifayət qədər təcrübəli pedaqoji işçilərimiz çalışırlar.

– Nailə xanım, biz bayaq sizin məzunların ali məktəblərə qəbulda qazandığı uğurlardan danışdıq. Ancaq orta məktəblərin buraxılış imtahanlarının nəticələri barədə sual verməyi unutdum.

– Orta məktəblərdə buraxılış imtahanlarının mərkəzləşdirilmiş şəkildə təşkil edilməsi ölkədə aparılan təhsil islahatlarının tərkib hissəsidir. İslahatlar dərinləşdikcə təhsilin inkişafındakı dinamiklik və yanaşmalar da dəyişilir. Beş il, on il, on beş il əvvəlki yanaşmaların tətbiqi müasir inkişaf tendensiyası ilə bir araya sığmır. Odur ki, mərkəzləşdmirilmiş buraxılış imtahanları zamanın tələbidir. Bu il Bakı məktəblərinin məzunlarının 9,74 faizinin attestat ala bilməməsinə gəlincə isə deməliyəm ki, bu göstərici təhsilin keyfiyyətinin aşağı düşməsini yox, qiymətləndirmə meyarlarının dəyişməsini, xüsusən, şagird nailiyyətlərinin qiymətləndirilməsindəki obyektivliyi əks etdirir. Əgər tutaq ki, 10 il əvvəl ali məktəbə qəbul zamanı keçid balı 100 bal idisə, indi 300 baldır. Yaxud, TQDK-nın statistik məlumatına görə son 7 ildə respublikanın ali məktəblərinə qəbul olunan tələbələrin orta balı 150-200 bal artmışdır. Bu, ilk növbədə təhsilin keyfiyyətinin göstəricisidir.

– Bir sualımız da var. Kütləvi informasiya vasitələrində verilən məlumata görə hər bir orta məktəbin özünəməxsus məktəbli forması seçməsinə son qoyulacaq. Bu doğrudurmu?

– 2007-ci ilin may ayında Təhsil Nazirliyi Bakı məktəblərində növbəti dərs ilindən etibarən vahid məktəbli geyiminə keçilməsi barədə qərar qəbul etmişdir. Cənab nazir Misir Mərdanovun həmin ilin avqustunda imzaladığı əmrlə hər bir məktəbə vahid məktəbli geyimi seçmək müstəqilliyi verilirdi. Bu xoş niyyətdən müxtəlif neqativ məqsədlər üçün istifadə edilməsi halları ortaya çıxdı. Ona görə də ötən dərs ilinin sonunda Bakı Şəhəri üzrə Təhsil İdarəsində belə bir qərar qəbul edildi ki, paytaxtın bütün orta ümumtəhsil məktəblərində vahid məktəbli forması tətbiq edilsin. Ancaq texniki səbəblərdən 2009–2010-cu dərs ilində vahid məktəbli formasına keçə bilmədik. Qərara almışıq ki, Bakı məktəblərində bütövlükdə dərs ilində vahid məktəbli formasına keçək. Ona görə də şagirdlər bu il əvvəlki paltarlarla dərsə gələcəklər.

– Bakı müəllimlərinin ənənəvi avqust konfransı hər il sentyabrın əvvəllərində keçirilir.

– Tədbirin avqustda və ya sentyabrda keçirilməsi o qədər də prinsipial əhəmiyyət kəsb eləmir. Əsası odur ki, konfransda görülmüş və görüləcək işlər əhatəli şəkildə müzakirə ediləcək. Xüsusən, problemlərin yada salınması və onların aradan qaldırılması üçün yolların axtarılması baxımından konfrans çox əhəmiyyətli olacaq. Nailiyyətlərin vurğulanması məsələsinə gəlincə isə qeyd edim ki, bizim fəaliyyətimizi sentyabrın ilk günündə cənab Prezident İlham Əliyev ən yüksək səviyyədə qiymətləndirdi. Bu, bizim üçün böyük fəxr və iftixar mənbəyidir.

– Ənənəvi olaraq, oxucularımıza sözünüz.

– Ənənəni pozaraq oxuculardan əvvəl sizi təbrik edirəm. Avqustda “Xalq qəzeti”nin 90 yaşı tamam oldu. Bu 90 ilin hamısını başdan-başa xalqa, dövlətə xidmətdə keçirən kollektivin fəaliyyəti ən ali təbriklərə layiqdir. Sözünüz daha 90 il kəsərli olsun. Oxucularımıza gəlincə isə, onları əmin edim ki, Bakı şəhəri üzrə Təhsil İdarəsi bundan sonra da milli təhsilimizin inkişafına öz töhfələrini verəcək, dövlətin və dövlət başçısının qarşıya qoyduğu vəzifələri layiqincə yerinə yetirəcəkdir.

– Maraqlı müsahibəyə görə təşəkkür edirik.

– Sağ olun!

İttifaq MİRZƏBƏYLİ

Xalq qəzeti .- 2009.- 8 sentyabr.- S. 6.