Təhsilə qayğı millətin gələcəyinə xidmət edir

Ölkəmizin həyatında əlamətdar hadisəyə – yeni dərs ilinin başlanmasına cəmi bir neçə gün qalır. Əksər evlərdə, ailələrdə ciddi hazırlıq görülən, səbirsizliklə gözlənilən 15 Sentyabr Bilik Cünü respublikamızda ümumxalq bayramı kimi qeyd olunacaq. Xalqımız hamılıqla yeni dərs ilində balalarımıza və onların müəllimlərinə uğurlar diləyəcək.

Builki dərs ili ərəfəsində Azərbaycan Respublikasının Prezidenti İlham Əliyevin fərmanı ilə “Təhsil haqqında” Qanunun təsdiq olunması, dövlət başçısının sərəncamı ilə keçirilən ölkənin ən yaxşı məkitəbləri və ən yaxşı müəllimləri müsabiqəsi qaliblərinin elan olunması pedaqoji kollektivlərə əsl bayram əhval-ruhiyyəsi gətirmişdir.

Bu günlərdə şəhər və rayonlarda keçirilən ənənəvi təhsil müşavirələrində ötən dərs ilinin nəticələri nəzərdən keçirilir, növbəti tədris ilinin başlıca vəzifələri müəyyənləşdirilir. Məktəblərdə sentyabrın 15-nə xüsusi hazırlıq işləri aparılır. Olduğumuz bölgələrdə, baş çəkdiyimiz məktəblərdə təmir-abadlıq tədbirlərindən sonra yaradılmış əlverişli şəraitin, ürəkaçan mənzərənin şahidi olduq. Bir sözlə, məktəblərimiz və müəllimlərimiz uzunmüddətli yay tətilindən sonra şagirdləri gözləyirlər.

Bərdə

Rəhilə İSMAYILOVA, Bərdə Rayon Təhsil Şöbəsinin müdiri:

— Respublikamızda son illər dövlətimizin, xüsusən, ölkə rəhbəri İlham Əliyevin ən çox diqqət yetirdiyi, qayğı göstərdiyi sahələrdən biri də təhsil sisteminin hərtərəfli inkişafıdır. Məktəblərin maddi-texniki bazasının yeniləşdirilməsi, gücləndirilməsi, tədris prosesinin modernləşdirilməsi ilə bağlı həyata keçirilən məqsədyönlü tədbirlər bəhrəsini verməkdədir. Orta məktəb məzunlarının ümumi bilik səviyyəsi, ali məktəbləri bitirənlərin ixtisas qabiliyyəti ildən-ilə yüksəlməkdədir. Heydər Əliyev Fondunun prezidenti, millət vəkili Mehriban xanım Əliyevanın rəhbərliyi ilə təhsil müəssisələrində aparılan genişmiqyaslı işlər də balalarımız üçün dünya standartları səviyyəsində tərbiyə və bilik ocaqları yaradılmasına ciddi töhfələr vermişdir. Builki dərs ilinə yeni təhsil qanununun prinsip və tələbləri ilə başlamağımız tarixi bir hadisədir. Pedaqoji kollektivlərin illərdən bəri gözlədiyi bu ciddi dövlət sənədi milli təhsilimizin qarşısında böyük inkişaf, yeniləşmə perspektivi açacaq.

Bu günlərdə ölkəmizin hər yerində olduğu kimi, Bərdədə də yeni dərs ilinə hazırlıq ümumrayon qayğısına çevrilmişdir. Rayon rəhbərliyinin bilavasitə köməyi ilə təhsil müəssisələrində aparılan təmir-tikinti və abadlıq işləri artıq başa çatdırılmışdır. Məktəblərin pedaqoji şuraları və rayon təhsil şöbəsi dərs ilinin əsas hədəflərini müəyyənləşdirmişdir. Başlıca məqsəd ölkəmizin gələcəyi üçün tərbiyəli, çevik, yüksək bilik və bacarıqlı nəsil yetişdirməkdir. Bütün imkan və vasitələr bu müqəddəs vəzifənin uğurla həyata keçirilməsinə səfərbər edilmişdir.

Rayonumuzda 75 ümumtəhsil məktəbi, o cümlədən 59 orta, 11 əsas, 5 ibtidai məktəb fəaliyyət göstərir. Dövlətimizin təhsilə qayğısının nəticəsi olaraq, son 3 ildə rayonumuzda da yeni məktəblər və əlavə sinif otaqları tikilmişdir. Məktəblərin maddi-texniki və tədris bazası xeyli yaxşılaşdırılmışdır. Bərdə şəhərində 880 yerlik, Gülgəzli kəndində 360 yerlik yeni məktəb binaları tikilmişdir. İnternat məktəbdə 260 yerlik 12 sinif otağı, Göyüşlü kəndində 160 yerlik 8 sinif otağı, Cümalar kəndində 160 yerlik 8 sinif otağı şagirdlərin istifadəsinə verilmişdir. Kətəlparaq kəndində 640 yerlik, Qaradırnaq kəndində isə 480 yerlik yeni tipli məktəb binasında son tamamlama işləri başa çatmaqdadır. Bu dərs ilində həmin məktəblər istifadəyə veriləcək.

Ötən 3 ildə rayonun 16 orta məktəbi əsaslı təmir olunmuşdur. Bərdə şəhər 1, 3, 5 saylı, Lənbəran, Mustafaağalı, Xəsili, Qarağacı, Mehdili, Kürdborakı kənd orta, Piyadalar kənd əsas və s. məktəblərdə tədris prosesi üçün əlverişli şərait yaradılmışdır. Mehdixanlı, Şirvanlı, Əliyanlı, Çələbilər, Dəymədağlı kənd orta, Böyük Qəcər, Qullar kənd əsas məktəbləri də dövlət vəsaiti hesabına cari təmir edilmişdir. Ümumiyyətlə, bu il rayonun bütün ümumtəhsil məktəblərində daxili imkanlar hesabına cari təmir işləri aparılmışdır.

Son 3 ildə rayonun məktəblərinə 3000-dən çox şagird stol-stulu, yazı taxtası, şkaf, texniki təlim vasitələri və əyani vəsaitlər verilmişdir. Azərbaycan Respublikasının Prezidentinin İKT-nin tətbiqi ilə əlaqədar sərəncamına uyğun olaraq, bütün məktəblər kompyuter texnikası ilə təchiz olunmuşdur.

Ölkə Prezidenti İlham Əliyevin sərəncamı ilə keçirilən “İlin ən yaxşı ümumtəhsil məktəbi” müsabiqəsində keçən il rayonun akademik Zərifə Əliyeva adına orta məktəbi, bu tədris ilində isə Bərdə şəhər 2 saylı orta məktəb qalib olmuşdur. Cari dərs ilində “İlin ən yaxşı müəllimi” müsabiqəsində akademik Zərifə Əliyeva adına orta məktəbin müəllimləri Rəna Həsənova və Könül Kazımova, Bərdə şəhər 5 saylı orta məktəbin müəllimi Minayə Nəbbaqi qalib olmuşlar. Son dövrdə rayonun 2 təhsil işçisinə respublikanın əməkdar müəllimi fəxri adı verilmiş, 2 müəllim “Tərəqqi” medalı ilə təltif olunmuşdur.

Təhsilin humanitarlaşdırılması, demokratikləşdirilməsi və yeni təhsil konsepsiyasının maddələrinə uyğun olaraq, məktəblərimizdə keçən dərs ilində də ardıcıl işlər görülmüşdür. Yeni təlim texnologiyaları tətbiq edilməklə, akademik Zərifə Əliyeva adına və Bərdə şəhər 2, 3, 4, 5, 8 saylı, Kələntərli, Şirvanlı, Yeni Daşkənd kənd orta məktəblərində müəllimlərin açıq dərsləri dinlənilmiş, dəyirmi masalar keçirilmişdir. Müasir təlim üsullarının tətbiq olunması ilə uğurlu nəticələr qazanılmışdır. “İlin ən yaxşı müəllimi” müsabiqəsində hər il müəllimlərimiz uğurla iştirak edərək layiqli nəticələr əldə edirlər. Olimpiadaların respublika turunda rayon məktəblilərinin iştirakı təmin edilir, şagirdlərimiz qaliblər sırasında olurlar.

Məzunların ali məktəblərə qəbulunda da sevindirici nəticələr əldə olunmuşdur. 2007-ci ildə ali məktəblərə 235 məzunumuz, 2008-ci ildə 271 yetirməmiz, bu il isə 246 nəfər daxil olmuşdur. Ali məktəblərə qəbul imtahanlarında 500-dən çox bal toplayanların sayı da ilbəil artmışdır. İnanırıq ki, növbəti dərs ili də pedaqoji kollektivlərimiz və şagirdlərimiz üçün uğurlu olacaq. Qarşıdan gələn bilik günü münasibətilə müəllimlərimizi, məktəbliləri və onların valideynlərini təbrik edir, xalqımıza xoh müjdəli günlər arzulayıram.

Beyləqan

Tofiq SADIQOV, Beyləqan Rayon Təhsil Şöbəsinin müdiri:

— Son illərdə Azərbaycanda bütün sahələrdə olduğu kimi, təhsil sistemində də məqsədyönlü islahatlar aparılır. Əsası ümummilli liderimiz Heydər Əliyev tərəfindən qoyulan bu islahatları Prezident İlham Əliyev uğurla davam etdirir. Ölkədə təhsilin ən prioritet sahə olduğunu vurğulayan dövlət başçısının diqqət və qayğısı sayəsində problemlər ardıcıl həllini tapır, genişmiqyaslı layihələr həyata keçirilir. Məhz bu qayğının nəticəsidir ki, son illərdə təhsilin inkişafına ayrılan büdcə və investisiya xərcləri bir neçə dəfə artmışdır.

Rayonumuzda da yeni məktəb binaları, əlavə tədris korpusları tikilir, mövcud məktəblər əsaslı təmir olunur, maddi-tədris bazası yaxşılaşdırılır. İnformasiya və kommunikasiya texnologiyaları və yeni dərsliklərlə təminat yüksək səviyyədədir. Bu dərs ilinə hazırlıq dövründə əksər məktəblərdə cari təmir işləri aparılıb. Beyləqan şəhər 4 saylı, Yuxarı Aran, Şahsevən kənd 2 saylı məktəbləri əsaslı təmir edilib.

Bu il rayon məktəblərini 1074 şagird qurtarıb. Onlardan 764 nəfər attestat alıb. Bu, buraxılış imtahanı verənlərin 71 faizi deməkdir. 420 məzunumuz ali və orta ixtisas məktəblərinə sənəd vermişdi. 128 nəfər beyləqanlı gənc ali məktəblərə, 46 nəfər isə texnikumlara qəbul olunub. Qəbul imtahanlarında 10 nəfər 500-dən yuxarı, 1 nəfər isə 619 bal toplayıb. Yeri gəlmişkən deyim ki, keçən il 500-dən yuxarı bal toplayan məzunumuz 5 nəfər idi. Bu il 3 nəfər yetirməmiz Ali Hərbi Akademiyaya qəbul olunub. Ümumi orta təhsil sahəsində aparılan məqsədyönlü islahatların nəticəsidir ki, bu il ali məktəblərə qəbul imtahanlarında məzunlarımızın göstəriciləri xeyli yüksəlmişdir.

Keçən dərs ilində rayonun bir növbədə işləyən 24 məktəbində beşgünlük iş həftəsinə, digər məktəblərin I-VI siniflərində isə yeni iş rejiminə keçirilmişdir. İki növbədə işləyən məktəblərin VII sinifləri də beşgünlük iş həftəsi ilə fəaliyyət göstərir. Ötən il I siniflərdə yeni kurrikulum uğurla tətbiq olundu. Rayon üzrə 29 şagirdə 1 kompyuter olmaqla, 322 kompyuterdən istifadə olunur.

Hazırda rayonda 54 ümumtəhsil məktəbi fəaliyyət göstərir. 16 minə yaxın şagirdin təlim-tərbiyəsi ilə 2 minədək müəllim məşğul olur. Şagirdlərin qabiliyyətlərinin inkişaf etdirilməsi, onların asudə vaxtlarının səmərəli təşkili üçün 3 məktəbdənkənar müəssisəyə – şahmat və idman məktəblərinə, yaradıcılıq mərkəzinə 5 minədək uşaq cəlb edilmişdir.

Təhsil şöbəsi icbari ümumi orta təhsilin həyata keçirilməsinin təmin edilməsi, bu prosesin respublika qanunvericiliyinin tələblərinə uyğun təşkil edilməsi üçün Təhsil Nazirliyinin tərtib etdiyi plana uyğun olaraq, geniş tədbirlər planı hazırlamış, hər bir məktəbin və məktəbəqədər tərbiyə müəssisəsinin vəzifələri müəyyənləşdirilmişdir. Ərazi nümayəndəlikləri üzrə məktəbyaşlıların siyahıları dəqiqləşdirilmiş, bütün uşaqlar təhsilə cəlb edilmişdir.

Təhsil müəssisələrinin kadr təminatı üzrə proqrama uyğun olaraq, gənc mütəxəssislər müəllim ehtiyacı olan ucqar kənd məktəblərinə göndərilmişdir. Onlara dövlət proqramı əsasında güzəştli əmək haqqı, həmçinin kommunal xərclər ödənilir. Rayonun bəzi kənd məktəblərində müəllim çatışmazlığı bu gün də hiss olunur. Fizika, riyaziyyat, tarix və fiziki tərbiyə müəllimlərinə ehtiyac var. Bir neçə məktəbdə isə xarici dil müəllimi yoxdur. Ucqar kənd məktəblərinin maddi-texniki bazasının möhkəmləndirilməsi və onların tədris avadanlıqları ilə təmin olunması diqqət mərkəzində saxlanılır.

Rayonun təhsil müəssisələrində uğurlarla yanaşı, problemlər də qalmaqdadır. Onların aradan qaldırılması üçün yeni dərs ilində təlim-tərbiyə müəssisələrində həllivacib vəzifələr və fəaliyyətin əsas istiqamətləri müəyyənləşdirilmişdir. Təhsil işçilərinin builki toplantısında irəli sürülən təklif və tənqidi qeydlər nəzərə alınmaqla, yol verilmiş nöqsanların aradan qaldırılması rayon təhsil şöbəsi işçilərinin, pedaqoji kollektivlərin bütün imkanları səfərbərliyə alınacaq. Rayonun təlim-tərbiyə müəssisələri tədrisin keyfiyyətinin yüksəldilməsi istiqamətində gələcəkdə də ardıcıl və məqsədyönlü iş aparacaq.

Ziyəddin SULTANOV

Xalq qəzeti.- 2009.- 9 sentyabr.- S. 4.