Yeni dərs ili başlandı...

Qarşıda çox mühüm vəzifələr durur

Səhər saat 8-dir. Ulu öndər Heydər Əliyevin adını daşıyan liseyin qarşısına toplaşanlar yeni dərs ilinin başlandığını bildirən ilk zəngin çalınacağı anı səbirsizliklə gözləyirlər. Onlar arasında bu il birinci sinfə gələnlər də var, bu tədris ilində məktəblə vidalaşacaq şagirdlər də. Amma ən çox nigarançılıq çəkənlər birincilərin valideynləridir. Çünki bu körpə fidanların ilk dərs gününü necə qarşılayacaqları onları çox narahat edir. Əllərində gül dəstəsi tutmuş bu körpələr bir azdan sinif otaqlarına keçəcək və ilk dəfə orta məktəb müəllimləri ilə qarşı-qarşıya oturub şagird adı qazanacaqlar. Yeni dərs ilinin başlanması münasibətilə liseydə təşkil olunmuş tədbiri məktəbin iki şagirdi açır.

Əvvəlcə məktəbin rəqs qrupu çıxış edir. Sonra valideynlər, müəllimlər, 11-ci və 1-ci sinif şagirdləri çıxış edirlər. Budur, söz məktəbin direktoru, əməkdar müəllim Fikrət Xəlilova verilir.

Fikrət müəllim ilkin olaraq liseyin adını şərəflə daşıdığı ulu öndər Heydər Əliyevin təhsilə qayğısından danışır. “Azərbaycan təhsilinin bugünkü nailiyyətləri ulu öndər Heydər Əliyevin adı ilə bağlıdır” – deyir. Bu böyük tarixi şəxsiyyətin məktəbə, müəllim adına neçə böyük məhəbbət bəslədiyini vurğulayan direktor bildirir ki, ulu öndərin başladığı təhsil islahatı bu gün ölkəmizin Prezidenti, ümummilli liderin siyasi kursunun layiqli davamçısı cənab İlham Əliyev tərəfindən böyük uğurla davam etdirilir.

Son illər Azərbaycan təhsilində, həqiqətən, yeni bir dövr başlanmışdır. Təhsillə bağlı 16 Dövlət Proqramı məhz cənab İlham Əliyevin Prezidentliyi dövründə qəbul olunmuşdur. 1600-dən çox yeni məktəb və mövcud məktəblərə əlavə korpuslar tikilmişdir. Məktəblərimiz informasiya texnologiyaları ilə təmin olunmuşdur. Müəllim kadrlarının hazırlanmasında, istedadlı uşaqların üzə çıxarılmasında, təhsilin məzununun yeniləşməsində dövlət proqramıları əsaslı stimul yaratmışdır.

“Ən yaxşı ümumtəhsil məktəbi”, “Ən yaxşı müəllim” müsabiqələrinin keçirilməsi ilə bağlı sərəncamı da möhtərəm Prezidentimiz imzalamışdır. Bu gün fəxrlə deyə bilərəm ki, iki ildir keçirilən bu müsabiqələrdə ötən il məktəbimiz “Ən yaxşı ümumtəhsil məktəbi”, bu il isə 4 nəfər müəllimimiz “Ən yaxşı müəllim” nominasiyasında qalib olmuşdur. Müəllimlərimizdən Rafiq Süleymanlı, Akif Hüseynli, Ayna Sadıqova, Hökumə Əliyeva bu müsabiqədən qalib çıxmışlar. Bu müəllimlər məktəbimizin şərəfini ucaltmışlar. Mən onları səmimi qəlbdən təbrik edirəm.

Ötən il milli təhsilimiz üçün çox əlamətdar olmuşdur. Bizim məktəbin nailiyyətləri də çocxdur. Hazırda liseydə 59 sinifdə 1830 şagird təhsil alır, onların təlim-tərbiyəsi ilə 105 nəfər müəllim və pedaqoji işçi məşğul olur. Liseyin müəllimlərindən 7 nəfər elmlər namizədi, 5 nəfər respublikanın əməkdar müəllimidir.

Məktəbimizdə geniş və işıqlı sinif otaqları, ən müasir avadanlıqlarla təchiz edilmiş laboratoriyaları olan fizika, kimya və biologiya kabinetləri, kompyuter zalı, linqofon kabineti, kino qurğusu olan akt zalı, iki idman zalı vardır.

Liseyin həyətində futbol meydançası, voleybol və basketbol meydançaları inşa edilmişdir ki, bu da şagirdlərimizin yaxşı təhsil almaqla yanaşı sağlam böyümələri üçün də şərait yaradır.

Liseyə şagird və pedaqoji kadrların qəbulu test sorğusu əsasında müsabiqə qaydası ilə aparılmış, ən qabiliyyətli şagirdlər seçilmiş, onların təlim-tərbiyəsinə rayonumuzun və Bakı şəhərinin məktəblərindən elmi, metodiki və pedaqoji hazırlığı ilə fərqlənən müasir interaktiv təlim metodları ilə işləməyi bacaran fənn müəllimləri cəlb edilmişdir.

İl ərzində şagirdlərimiz ayrı-ayrı fənlər üzrə nəzarətli yoxlamalar yazmış, test sorğusundan keçirilmişlər.

2008-2009-cu dərs ilində məktəblilərin fənn olimpiadasında şagirdlərimiz fəal iştirak etmişlər. Fənn olimpiadalarının məktəb turunda lisey üzrə 246 nəfər şagird iştirak etmiş, bunlardan 46 nəfər müxtəlif fənlər üzrə olimpiadanın rayon turunun I mərhələsində iştirak etmək hüququ qazanmışlar. Həmin şagirdlərin 8 nəfəri olimpiadanın rayon turunun II mərhələsində (şəhər mərhələsi) iştirak etmiş, onlardan 2 nəfəri isə fərqlənərək respublika turunda iştirak etmək hüququ qazanmışlar.

Ötən il ARDNŞ, Fövqəladə Hallar Nazirliyi və Çağ Öyrətim İşlətmələri Şirkəti ilə birlikdə 04-07 aprel 2009-cu il tarixdə Bakı şəhərində Heydər Əliyev adına Əl Oyunları Sarayında İNEPO EUROASİYA Beynəlxalq Ətraf Mühitin Mühafizəsi Layihə Olimpiadası təşkil olunmuşdur.

Məktəbimiz həmin olimpiadada böyük uğur qazandı. Bunun əsas səbəbi şagirdlərimizin zəngin maddi-texniki bazaya malik olan və müasir avadanlıqlarla təchiz olunmuş müasir tipli məktəbdə təhsil almaları ilə yanaşı, həm də ixtisas müəllimlərinin yüksək elmi-pedaqoji hazırlığa malik olmalarıdır.

2008-2009-cu dərs ilində müəllimlərin interaktiv üsulla keçirilən dərslərlə daha dərindən tanışlıqları üçün kurslar təşkil edilmişdir. Həmin kursları liseyin ibtidai sinif müəllimi respublikanın əməkdar müəllimi bu sahədə Təhsil Nazirliyinin xüsusi sertifikatını almış Əliyeva Hökumə Nizami qızı aparmışdır.

2009-cu il tələbə qəbulunun nəticələri liseyin uğurlu fəaliyyətinin daha bir əyani sübutudur. Belə ki, liseyimizi bitirən 115 nəfər məzundan 13 nəfəri fərqlənmə attestatı almışdır. 115 nəfərin hamısı ali məktəblərə daxil olmaq üçün sənəd vermiş, bunlardan qəbulun I mərhələsində 88 nəfəri respublikamızın müxtəlif ali və orta ixtisas məktəblərinə qəbul olmuşlar. Məzunlardan 35 nəfəri 500-650 bal arası , 5 nəfəri 650-dən yuxarı bal toplamışlar.

Tələbə Qəbulu üzrə Dövlət Komissiyasının elmi-statistik təhlilinə görə Təhsil Nazirliyinə tabe olan və özəl liseylər arasında respublika üzrə ən yaxşı nəticə göstərən təhsil müəssisələri arasında Heydər Əliyev adına lisey də vardır. Liseylər üzrə abituriyentlərin qəbul imtahanlarında topladıqları orta bal 339,342-yə bərabərdir. Bu respublika üzrə orta göstəricidən 50,4 faiz yuxarıdır. Heydər Əliyev adına lisey üzrə abituriyentlərin qəbul imtahanlarında topladıqları orta bal 446,521-dir. Bu, liseylər üzrə orta baldan 107,179 bal yüksəkdir.

Bu nailiyyətlər bizi arxayınlaşdırmır. Yeni dərs ilində qarşımızda çox mühüm vəzifələr durur. Biz möhtərəm Prezidentimizin təhsilə belə yüksək qayğısına əməli işimizlə cavab vermək üçün bütün səylərimizi birləşdirməliyik.

Fikrət müəllim bir daha yeni dərs ili başlanması münasibətilə şagirdləri, müəllimləri və valideynləri təbrik etdi.

Sonra 11-cilərin başları üzərinə qaldırdıqları 1-ci sinif şagirdləri ilk zəngi çaldılar. Hər bir on birinci sinif şagirdi bir birinci sinif şagirdini özü ilə içəri apardı. Beləliklə, yeni dərs ili başlandı.

Məlumat üçün bildirmək istəyirik ki, 2009-2010-cu tədris ilində ölkəmizin 4569 orta ümumtəhsil məktəbində 427910 şagird təhsil alacaq.

Yeni dərs ilində I sinif şagirdlərinin sayının 125114 nəfər olacağı proqnozlaşdırılır. Müqayisə üçün qeyd edək ki, 2008-2009-cu tədris ilində təhsil ocaqlarının I sinfinə 119600 şagird qəbul olunub.

M.MÜKƏRRƏMOĞLU

Xalq qəzeti.- 2009.- 16 sentyabr.- S. 7.