Təhsil işçiləri ölkənin ümumi
inkişafına özünəməxsus töhfələr
verirlər
Balakən məktəblərinin bu istiqamətdəki
uğurları ürəkaçandır
Müstəqil Azərbaycan dövlətinin son illər
əldə etdiyi çoxsaylı nailiyyətlər, xüsusən,
sosial-iqtisadi inkişafın artım tempinə görə beynəlxalq
aləmdə tutduğumuz mövqe ölkə rəhbərliyinin
yeritdiyi siyasətin uğurundan xəbər verir. 1994-cü
ilin sentyabrında ulu öndər Heydər Əliyevin rəhbərliyi
ilə imzalanmış “Əsrin müqaviləsi”nin 15-ci
ildbönümünə həsr edilmiş təntənəli
mərasimdə çıxış edən Prezident İlham Əliyev
ölkəmizin uğurlarını bu şəkildə qiymətləndirmişdir:
“Bu gün Azərbaycanın valyuta ehtiyatları 18 milyard
dollardan çoxdur. Son 5 il ərzində Azərbaycanın
dövlət büdcəsi 10 dəfədən çox
artıbdır.
2003–2008-ci illərdə
Azərbaycanda iqtisadiyyat, ümumi daxili məhsul 2,6 dəfə
artıbdır. Bu,
dünyada misli görünməmiş bir nəticədir. Son
beş ildə Azərbaycanda 800 minə qədər yeni iş
yeri açılmışdır ki, onların tam əksəriyyəti
qeyri-neft sektorundadır. Yoxsulluq şəraitində yaşayanların
sayı son beş ildə 49 faizdən 13 faizə
düşmüşdür. Bu da onu göstərir ki, Azərbaycanda
neftdən əldə edilən gəlirlər ədalətli
şəkildə bölünür”.
Bir dağ rayonunun təhsil
işçilərinin əldə etdiyi uğurlar barədə
söz açmaq istədiyimiz yazıda cənab dövlət
başçısının məlum nitqindən sitat gətirməyimiz
təsadüfi olmadığı kimi, həmin sitatı “neftdən
əldə edilən gəlirlər ədalətli şəkildə
bölünür” – ifadəsiylə tamamlamağımız da
təsadüfi olmadı. Burada iki məqsədimiz var idi.
Birinci, bu gün Balakən rayonunun hərtərəfli
inkişafında dövlətimiz və rayon rəhbərliyi
ilə yanaşı, Dövlət Neft Şirkətinin də
çox böyük xidmətləri vardır. Bu şirkətin
Balakəndə həyata keçirdiyi layihələr bizim
rayona nəinki respublikamızda, eləcə də
bütövlükdə regionda möhtəşəm nüfuz
qazandırıb. İkinci, “Biz neft sektorundan əldə edilən
kapitalın insan kapitalına çevrilməsinə nail
olacağıq” – deyən Prezident İlham Əliyevin bu tezisi əslində
ölkədə “neftdən əldə edilən gəlirlərin
ədalətli şəkildə
bölüşdürüldüyünün” sübutudur.
“Təhsil Azərbaycanın davamlı
inkişaf strategiyasının ən öncül istiqamətlərindən
biridir” – deyən Prezident İlham Əliyev ölkəyə rəhbərlik
etdiyi dövrdə bu sistemin inkişafını təmin edəcək
16 Dövlət Proqramı imzalamışdır. 2003-cü
ilin oktyabrından etibarən respublikada start götürən
məktəb tikintisi və mövcud məktəblərin əsaslı
şəkildə yenidən qurulması ölkə təhsilinin
inkişafına heç zaman görünməyən bir təkan
vermişdir. 2004-cü ildə – bilavasitə ulu öndərin
ad günü təsis edilmiş Heydər Əliyev Fondunun
“Yeniləşən Azərbaycana yeni məktəb” layihəsi
məktəb tikintisini daha da sürətləndirmişdir.
Fondun prezidenti, YUNESKO- nun və İSESKO-nun xoşməramlı
səfiri, millət vəkili Mehriban xanım Əliyevanın
xüsusi qayğıya ehtiyacı olan uşaqların
yaşadığı internat məktəblərinin tamamilə
yenidən qurulması üçün irəli
sürdüyü təşəbbüs böyük xeyriyyəçilik
tədbiri kimi təhsil işçiləri tərəfindən
rəğbətlə qarşılanmışdır.
Son illər ölkə təhsilinin
davamlı inkişafını təmin edəcək daha iki
möhtəşəm addım atılmışdır.
Prezizdent İlham Əliyev müəllimlərin fəaliyyətinin
stimullaşdırılması və təhsil
islahatlarının dərinləşdirilməsi məqsədiylə
ölkədə “Ən yaxşı müəllim” və “Ən
yaxşı ümumtəhsil məktəbi” müsabiqələrinin
keçirilməsi barədə müvafiq sənədlər
imzalamışdır. Həmin müsabiqələrin nəticələri
təhsil ictimaiyyəti tərəfindən böyük maraqla
qarşılanmış, gələcək fəaliyyətimiz
üçün mühüm zəmin yaratmışdır.
Qeyd etmək istədiyimiz ikinci addım isə məhz dövlət
başçısının təşəbbüsü ilə
Milli Məclisin geniş müzakirələrdən sonra qəbul
etdiyi “Təhsil haqqında” Qanundur. Çərçivə
qanunu kimi qəbul edilmiş bu mühüm dövlət sənədi
əsasında milli təhsilimizin müxtəlif sahələrinə
aid xüsusi qanunlar qəbul ediləcəkdir.
Mən qətiyyətlə və
fəxrlə deyə bilərəm ki, Balakən rayonunun təhsil
işçişləri də öz fəaliyyətlərini
ölkə təhsilinin inkişaf tendensiyaları səviyyəsində
qurmuşlar. Təhsil Nazirliyinin və rayon rəhbərliyinin
daimi köməyi və qayğısı nəticəsində
bütün təhsil müəssisələrimizin maddi-texniki
bazası yaxşılaşdırılmış, müəllim
və digər pedaqoji kadrların mütəxəssis kimi səviyyəsi
qaldırılmış, məktəblərin
informasiya-kommunikasiya texnologiyaları ilə təminatı məsələsi
günün tələbləri səviyyəsində həll
edilmişdir.
Hazırda Balakən Rayon Təhsil
Şöbəsinin tabeliyində 49 ümumtəhsil məktəbi,
25 məktəbəqədər və 5 məktəbdənkənar
uşaq tərbiyə müəssisəsi vardır. Ümumtəhsil
məktəblərində 14 minə yaxın, məktəbəqədər
müəssisələrdə isə 1330 uşaq oxuyur. Bu qədər
təlim-tərbiyə müəssisələrində 1800-dən
çox müəllim və tərbiyəçi
çalışır. Təbii ki, tədris müəssisələrini
müasir tədris avadanlıqları ilə təmin etmədən,
yeni dərs ilinə lazımınca hazırlaşmadan məktəbdə
əlverişli təlim mühiti yaratmaq olmaz. Ona görə də
rayonda məktəb tikintisi və təmiri ilə
yanaşı məktəblərimizin müasir avadanlıq, tədris
vəsaitləri, istilik sistemləri ilə təchizatına
böyük diqqət yetirilir. Son bir ildə məktəblərimizə
xeyli kabinet avadanlığı və mebel, o cümlədən
182 ədəd parta, 128 ədəd müəllim stulu, 42 ədəd
stol, 29 ədəd kabinet şkafı, 55 ədəd lövhə
və digər avadanlıq verilmişdir. Yeni tikilmiş Qaravəli,
Gülüzanbinə, Mahamalar, Qaysa, Poştbinə, Roçəhməd
və başqa kənd məktəblərinin
mebel-avadanlığı tamamilə yenisi ilə əvəz
olunmuşdur. Son dərs ilində bu məqsədlə 35 min
manatdan çox vəsait xərclənmişdir.
Əlbəttə, yeni dərsliklərin
və dərs vəsaitlərinin alınması da daim diqqət
mərkəzində olmuşdur. 2009-2010-cu dərs ilinə
hazırlıq prosesində 38 min 391 nüsxə (75 adda) dərslik
və məktəb kitabxanaları üçün bədii ədəbiyyat
nümunələri, eləcə də məktəbəqədər
uşaq tərbiyə müəssisələri
üçün 70 adda 20 min 448 manatlıq bədii və metodiki
ədəbiyyat gətirilmişdir.
Dövlət proqramlarının
icrası çərçivəsində, dövlət
büdcəsi hesabına, Dövlət Neft Şirkətinin vəsaiti
ilə tikilib istifadəyə verilən məktəblər
müəllim və şagirdlərimizin böyük sevincinə
səbəb olmuşdur. Bu dərs ilində rayonda daha 3 məktəb
binasının tikintisinə başlanacaqdır. Ötən dərs
ilinin ən uğurlu nəticələrindən biri də təhsil
müəssisələrinin müasir informasiya və
kommunikasiya texnologiyaları ilə təminatı olmuşdur.
Azərbaycan Respublikasının Prezidenti İlham Əliyevin
2004-cü ilin avqustunda imzaladığı “Azərbaycan
Respublikasında ümumtəhsil məktəblərinin
informasiya və kommunikasiya texnologiyaları ilə təminatı
Dövlət Proqramı”nın icrası ilə bağlı
rayonun 39 məktəbində 420-yə yaxın müasir tipli
kompyuter quraşdırılmışdır. Texniki və
humanitar təmayüllü liseydə, Nizami adına şəhər
orta və şəhər 3 saylı orta məktəblərində
kompyuterlər internet şəbəkəsinə
qoşulmuşdur. Bu istiqamətdə həyata keçirilən
tədbirlərdən biri də ölkəmizin təhsil
tarixində ilk dəfə olaraq tətbiq edilən elektron tədris
resurslarının hazırlalanaraq məktəblərə
verilməsi olmuşdur. Azərbaycan müəllimlərinin
XIII qurultayında deyildiyi kimi məktəblərin yeni texniki
avadanlıqlarla təmin edilməsi istiqamətində həyata
keçirilən tədbirlər hələlik böyük bir
işin başlanğıcıdır. Əsas məsələ
bütün müəllimlərin və təhsil
işçilərinin bu avadanlıqlardan bacarıqla istifadə
etməsinə nail olmaqdır. Həmin məqsədə
çatmaq üçün məktəb rəhbərlərinin
əlində mühüm dövlət sənədi vardır:
“Təhsil sisteminin informasiyalaşdırılması üzrə
Dövlət Proqramı”. 2008–2010-cu illəri əhatə edən
bu proqramın icrası milli təhsilimizin səviyyəsini
xeyli qaldıracaqdır. “İlin ən yaxşı müəllimi”
müsabiqəsinin 50 qalibindən biri olmuş Cavanşir
Alqayev kimi (Qaravəli kənd orta məktəbi) təcrübəli
müəllimlərimiz hesabına bu dövlət
proqramını da uğurla başa
çatdıracağıq.
Biz istəsək də, istəməsək
də, cəmiyyətdə belə bir fikir formalaşıb ki,
orta məktəblərdə görülmüş işlərin
səviyyəsi ali məktəblərə qəbul zamanı məlum
olur. Əgər bu fikir həqiqəti özündə əks
etdirirsə, onda biz orta məktəblərimizin illik fəaliyyətindən
məmnunluqla danışa bilərik. Çünki sonuncu dərs
ilində attestat almış balakənli məzunların ali məktəblərə
qəbul göstəricisi pis deyil. Məzunlarımızın
143 nəfəri ali məktəblərə qəbul
olunmuşdur. Qəbul imtahanlarında 6 məzunumuz 600-dən,
22 məzunumuz isə 500-dən çox bal
toplamışdır. 8 nəfər balakənli gəncin
yüksək balla Azərbaycan Dövlət Tibb Universitetinə,
onların 13 nəfər yaşıdının Bakı
Dövlət Universiteti və Dövlət Neft
Akademiyasının aparıcı ixtisaslarına qəbul
olması uğurlu göstəricidir. Texniki və humanitar təmayüllü
liseyin, Tülü 1 saylı, Şambul, Talalar 1 saylı, Qaravəli,
Nizami adına şəhər 1 saylı və akademik Zərifə
Əliyeva adına məktəblərin məzunları qəbul
imtahanlarında daha yüksək nəticələr əldə
etmişlər. Başqa bir neçə məktəbimiz də
ötən illə müqayisədə irəliləyişə
nail ola bilmişdir.
Əlbəttə, bütün bu
uğurları qazanmaq üçün təhsil sisteminin vahid
orqanizm kimi, kompleks şəkildə idarə edilməsi, təhsilin
bütün mərhələlərinin əlaqələndirilməsi,
sinifdənxaric və məktəbdənkənar tərbiyənin
bilavasitə ümumi təhsil prosesi ilə vəhdətinin
yaradılması, təhsil müəssisələrinin
maddi-texniki bazasının möhkəmləndirilməsi,
kadrların düzgün seçilib-yerləşdirilməsi və
bu kimi bir çox məsələlər öz gerçək
həllini tapmalıdır. Biz bu vəzifələrin
hamısının öhdəsindən layiqincə gələ
bilirik. Çünki fəaliyyətimizin düzgün istiqamətləndirilməsi
üçün çoxsaylı dövlət proqramları və
mükəmməl qanunvericilik bazası mövcuddur. Hörmətli
nazirimiz Misir Mərdanov başda olmaqla Təhsil Nazirliyi və
Balakən Rayon İcra Hakimiyyətinin rəhbərliyi rayon təhsil
işçilərinin istənilən probleminin həllinə
yaxından yardımçı olurlar. Elə bir tədbirimiz
olmur ki, rayon icra hakimiyyətinin başçısıt Asif Məmmədov
orada iştirak etməsin və ya gündəlikdəki məsələlərlə
şəxsən tanış olmasın. Bu isə təkcə
bizə inamın və etimadın təzahürü kimi qəbul
edilmir. Bu, eyni zamanda bizim məsuliyyətimizi artırır. Məsuliyyət
olan yerdə isə uğurlardan danışmaq
üçün həmişə şans yaranır.
Seyfulla KƏRİMOV,
Balakən Rayon Təhsil
Şöbəsinin müdiri
Xalq qəzeti.- 2009.- 24 sentyabr.- S. 5.