Sabahın xeyir, ulu Gəncə!

Son 6-7 il ərzində qədim Nizami yurdu tamamilə yeni görkəm almışdır

Söz vaxtına çəkər, deyiblər. 2002-ci ilin sentyabr ayının son günləri idi. Vaxtilə Azərbaycan KP MK-da çalışmış, hazırda isə bizimlə bir yerdə işləyən, hamımızın böyük hörmət bəslədiyi ağsaqqal həmkarımız Cahangir Əliyev məni redaksiyanın dəhlizində görən kimi ucadan “Gəncə nə miskindir, qardaş” deyib mənə yaxınlaşdı:

— Bir günlük Gəncəyə, hüzr yerinə getmişdim, çoxdan idi yolum düşmürdü, dedi, — peşiman oldum. Şəhər nə gündədir?

Ağsaqqala bir söz deməsəm də (əslində, cavab tapmadım — H.Q,) həmin anda yadıma bir neçə gün əvvəl Gəncə şəhər fəallarının yığıncağında ulu öndər Heydər Əliyevin dediyi sözlər düşdü: - “Bu nə şəhərdir saxlayırsınız?!” Şəhər icra hakimiyyətinin böyük iclas zalında ucadan və bir qədər də acıqlı deyilən bu sözdən sonra hamı başını aşağı dikmişdi.

“Gəncənin rəhbərliyi — həm şəhər rəhbərliyi, həm də Gəncədəki rayon rəhbərləri yerli imkanlardan daha səmərəli istifadə etməlidirlər. Yerli imkanlar az deyildir. Yenə də deyirəm, biz bazar iqtisadiyyatına keçmişik. Gəncədə də çox obyektlər özəlləşdirilib, özəl sektor inkişaf edir. Amma Gəncənin rəhbərliyi, həm şəhər, həm də rayonların rəhbərləri, yerli imkanlardan lazımi qədər istifadə etmirlər”. Ulu öndərin dediyi bu sözlərdən düz 7 il keçir. Əslində, az vaxt deyil. Bu dövrdə şəhər rəhbərliyi də dəyişib. Gələn ilin aprelində 7 il olacaq ki, Eldar Əzizov şəhər icra hakimiyyətinin başçısı işləyir. Yeri gəlmişkən qeyd edək ki, Gəncədə 7 il nəinki yüksək fəallıq və təşəbbüskarlıqla, həm də qüsursuz işləmək hər adama qismət olmayı

b.

İyirmi beş əsri adlayan şəhər

Qədim Gəncə bu günlər yenə bayram libası geyinib. Artıq dördüncü ildir ki, sentyabrın son günləri beləcə al-əlvanlığı, çal-çağırı, qonaq-qaralığı ilə seçilir şəhər. “Şəhər günü” qeyd olunur. Elə bu deyimin özü də ilk dəfə Gəncədə meydana çıxıb. Dəqiq desək, 2006-cı ildə şəhərin 2500 illiyi təntənə ilə qeyd olunanda qərara alındı ki, bu tədbir hər il keçirilsin. “Şəhər günü” təkcə qədim torpağın yaş tarixçəsi deyil, həm də onun hesabatıdır. İndi sevindirici haldır ki, respublikanın bir sıra şəhər və rayonlarında da belə günlərin keçirilməsinə başlanılıb və gəncəlilərin bu təşəbbüsünə qoşulanların sayı artır.

Bir məsələni unutmaq olmaz ki, şəhər icra hakimiyyəti ilk dəfə Gəncənin yubileyini qeyd etməzdən əvvəl çox gərgin, məhsuldar və səmərəli işləyib. Tarixçi alimlərlə, tədqiqatçılarla, ziyalılarla birlikdə şəhərin tarixinə dair müxtəlif elmi-praktik konfranslar, görüşlər, “dəyirmi masa”lar keçirilib, tarixi memarlıq abidələrinə əl gəzdirilib, kitablar, bukletlər hazırlanıb nəşr etdirilib və sair. Hətta şəhərin emblemi də təsdiq olunub. Məlumat üçün bildirək ki, bu emblem günəş, ay və səkkizgüşəli ulduzdan ibarətdir ki, bu da yadelli işğalçılara qarşı mərdliklə vuruşmuş və 1804-cü ildə qəhrəmancasına həlak olmuş Gəncə hökmdarı Cavad xanın bayrağının üstündə olan emblemin analoqudur.

Hər bir şəhərin tarixindən, yaşından o zaman həvəslə, cəsarətlə danışmaq olar ki, əlində tutarlı faktların olsun, onun hər daşı, kəsəyi necə deyərlər, “dilə gəlsin”. Şəhər icra hakimiyyətinin başçısı Eldar Əzizov təsadüfi deyil ki, “Gəncə şəhərinin tarixi” kitabının giriş məqaləsində Gəncəni “tariximizə işıq tutan şəhər” adlandırır və yazır: “Gəncə müqəddəs “İmamzadə” kompleksidir, Şah Abbas meydanıdır, Narınqala və Sərdar bağıdır, Uğurlu bəy karvansarasıdır. Bağmanlardır, Cümə məscididir, 1063-cü ildə azərbaycanlı usta İbrahim ibn Osmanın hazırladığı və bir tayı güya, hərbi qənimət kimi Gürcüstanın Gelati monastrında saxlanılan Gəncə qalasının dəmir darvazasıdır...

Gəncə Kəpəzdir, göllər gözəli Göygöldür

Gəncə dahi Azərbaycan şairi Nizami Gəncəvidir, unudulmaz Mirzə Şəfi Vazehin nəğmələridir, Sovet İttifaqı Qəhrəmanı İsrafil Məmmədovdur"...

Maraqlı, həm də sevindirici haldır ki, E.Əzizovun adlarını çəkdiyi və çəkmədiyi bu tarixi abidələr, şəxsiyyətlər, tarixi yerlərlə bağlı şəhərdə son illər o qədər geniş miqyaslı işlər görülüb ki, sadalamaqla qurtaran deyil. “Comərdi Qəssab” türbəsi, “Cavadxan məqbərəsi”, “Gəncə Darvazaları”, Şah Abbas məscidi, Məmmədbağır məscidi, “Qədim Gəncə Qala divarları”, “Şərəfxanlı”, “Xəlfəli” məscidləri, Cavadxan dəftərxanası. “Ay-Ulduz”, “Şir-Günəş”, “Gəncə gerbi” və digər onlarla monumental abidələr çox yüksək zövqlə təmir-bərpa olunmuş və ya tikilmişdir.

Bu mədəni-tarixi abidələr daim diqqət mərkəzində saxlanılır və onlar şəhər sakinlərinin və qonaqların ziyarətgahına çevrilmişdir. Həmin tarixi yerlərə məktəblilərin və tələbələrin cəlb olunması, ekskursiyaların təşkili milli-mənəvi dəyərlərimizin, adət-ənənələrimizin təbliğ olunmasında mühüm rol oynamaqla yanaşı yeniyetmə və gənclərimizdə vətənpərvərlik hisslərinin yüksəldilməsinə, dünyagörüşlərinin formalaşmasına istiqamətlənmişdir.

Dəyişən, müasirləşən şəhər

Gəncədə son 6-7 ildə həyata keçirilən işlər barədə təkcə bir qəzet yazısında söhbət açmaq mümkün deyil. Bu bir faktdır ki, çox iş görülüb. Şəhər tamamilə dəyişib, gözəlləşib, inkişaf edib, başlıcası isə müasirləşib. Şəhərin rəhbərliyi yaxşı, müasir nə varsa Gəncədə tətbiq etməyə səy göstərib və eyni zamanda, bu qədim diyarda milli memarlıq ənənələrinin qorunub saxlanmasına, özünəməxsusluğuna nail ola bilib. Nəticədə ucaldılan, təmir olunan, yenidən qurulan hər bir obyekt özünün gözəlliyi ilə diqqəti cəlb edir. Çoxmərtəbəli yaşayış binalarını inşa edən iş adamları 5-6 il qabaq onları tələm-tələsik istifadəyə verməyə çalışırdılarsa, indi şəhərin müvafiq strukturlarının, memarlıq və şəhərsalma idarəsinin, xüsusi komissiyanın təkliflərini, tövsiyələrini, tapşırıqlarını nəzərə almağa məcburdur. Bax, elə bu tələbkarlığın, qədim şəhərə məhəbbətin nəticəsidir ki, milli-memarlıq ünsürlərindən istifadə olunan, hər cür infrastruktura malik, ətrafı abadlaşdırılan, yaşıllaşdırılan çoxmərtəbəli binaların sayı durmadan artır və onlar Gəncəyə xüsusi yaraşıq verir. Şəhərin baş memarı, respublikanın əməkdar memarı Məmməd İbrahimov deyir ki, Gəncənin ümumi görkəminə xələl gətirə biləcək bir obyektin belə inşasına yol verə bilmərik. Bu şəhərin öz ənənələri, öz dəyərləri, memarlıq ünsürləri var, onlar pozulmamalıdır.

Memarın sözünə qüvvət, indi Gəncədə bir-birindən yaraşıqlı elə göydələnlər var ki, baxmaqla doymaq olmur. “Xan bağı”nın, “Karvansara”nın, tarix və diyarşünaslıq muzeyinin yanında və digər yerlərdə inşa olunan çoxmərtəbəli binalar hamının diqqətini cəlb edir.

Azərbaycan Respublikasının Prezidenti İlham Əliyev Gəncəyə hər səfəri zamanı yeni sosial obyektlərin tikintisində onların müasirliyinə, memarlıq üslubunda yerli və milli ənənələrin qorunmasına, şəhərsalma qaydalarına uyğun olmasına üstünlük verir. Ölkə başçısının bu tövsiyələri yeni tikilən binaların, ofislərin və digər obyektlərin istər memarlığında, istərsə də müasir konstruksiyalarla inşasında böyük rol oynayır.

İndi cəsarətlə demək olar ki, memarlıq və şəhərsalma baxımından Gəncə artıq özünün yeni inkişaf mərhələsinə keçmişdir. Qanunvericilikdə müəyyən olunmuş tələblərin yerinə yetirilməsi əsas meyar olmuşdur. Küçələrin vahid bir memarlıq layihəsi əsasında qurulmasına, obyektlərin tikintisində forma və üslub cəhətdən bir-birini tamamlamasına xüsusi fikir verilir. Şəhər icra hakimiyyəti başçısının sərəncamı ilə prospekt və küçələrdə yerləşən binaların fasadları, ticarət və xidmət obyektlərinin, ofislərin xarici görünüşünün müasirləşdirilməsi məqsədilə yenidənqurma işləri bir gün belə ara vermir. Qeyd etmək lazımdır ki, bu, şəhərin abadlaşdırılması və qədimliyi saxlanılmaqla müasirləşdirilməsi sahəsində aparılan ən böyük layihələrdən biridir. Özü də həmin işlərin görülməsində müasir materiallardan istifadə olunur. Heydər Əliyev, Atatürk prospektlərində, Nizami və digər küçələrdə sahibkarlar tərəfindən layihə üzrə ticarət obyektləri yenidən qurulur, reklam və dizayn tərtibat işləri aparılır.

Tikinti, abadlıq, yenidənqurma işləri şəhərdə elə geniş miqyas alıb ki, sakinlər bu işlərə artıq öyrəşiblər və hər hansı bir yerdə müəyyən səbəblər üzündən iş dayandıqda təəccüblənirlər. Şəhərin Baş meydanı sayılan Heydər Əliyev meydanı indi tamamilə başqa görkəm alıb. Burada ulu öndərin xatirə muzey kompleksi yüksək memarlıq üslubunda inşa edilmiş və meydanda respublikada ilk musiqili fəvvarə quraşdırılmışdır. Bundan sonra Bakıda və bir sıra digər şəhər və rayonlarda musiqili fəvvarələr tikilməsinə diqqət artmışdır. Keçən il meydanın yeni tərtibatda qranit materiallardan istifadə olunmaqla döşəməsi dəyişdirilmişdir. Meydanın ətrafına Sankt-Peterburq şəhərində istehsal olunmuş müasir işıqlandırıcı dirəklər, fanarlar qoyulmuşdur. İcra hakimiyyətinin əzəmətli inzibati binası təmir olunmuş, öz görkəmi ilə meydana xüsusi gözəllik gətirmişdir. Ümumiyyətlə, binaların fasadlarının yüksək zövqlə təmirinə, küçə və prospektlərin, meydanların, park və xiyabanların işıqlandırılmasına xüsusi fikir verilir. Yeni işıqlandırma sisteminin quraşdırılması Nizami küçəsində, Xətai, Atatürk prospektlərində Şeyx Bahəddin, İsrafil Məmmədov, Cavadxan və digər küçələrdə həyata keçirilmişdir. İndi gecələr qədim Nizami yurdunun bir çox əsas küçə və prospektləri süd kimi ağ işıq selinə qərq olur.

Gəncə çayının sağ sahilini də tanımaq olmur. Cəmi bir neçə il qabaq “Qatır Məmməd yarmarkası” adlanan sahildə göy rəngli eybəcər çadırların yerində əsrarəngiz park, istirahət zonası salınmışdır. Sahilboyunca böyük ərazidə qazonlar salınmış, müasir fəvvarə tikilmiş, 750 kvadratmetr sahədə dekorativ daşlardan ibarət üzlük plitələr quraşdırılmışdır. Bundan başqa, Nizami küçəsindən Sahil bağına girişdə klassik memarlıq üslubunda bulaq kompleksi və 8 metr hündürlükdə sütun üzərində saat quraşdırılaraq ətrafında abadlaşdırma işləri aparılmışdır.

Ümumiyyətlə, Gəncədə səliqə-sahman, zövqlülük, müasirlik ön plana keçmişdir. Bütün bu işlərin artıq bir ənənə şəklini almasında şəhər icra hakimiyyətinin başçısı Eldar Əzizovun zəhmətini qeyd etməmək ən azı insafsızlıqdır. O, kabinet adamı deyil, daim şəhərin müxtəlif küçə və məhəllələrindədir, adamların arasındadır, problemləri öyrənir, onların aradan qaldırılmasına çalışır, şikayətləri, təklifləri diqqətlə öyrənir, maraqlı təşəbbüsləri daim müdafiə edir. Vaxt var idi şəhərin mərkəzindəki məşhur bazarın yanından tıxac ucbatından keçmək mümkün deyildi. Başçının təşəbbüsü və təkidi ilə orada genişləndirmə işləri aparıldı, yol asfaltlandı, bazarın ərazisi səliqə ilə hasara alındı. Yeri gəlmişkən qeyd edək ki, bu sətirlərin müəllifi də “Gəncə bazarlarının adı qalıb” sərdövhəli tənqidi yazı ilə çıxış etmişdi və E.Əzizov həmin yazını şura iclasında geniş müzakirə etmiş, ciddi tədbirlər görmüşdü.

Bir məqama ayrıca toxunmaq istərdim. Şəhər icra hakimiyyəti aparatı, xüsusilə onun rəhbəri Gəncədə aparılan geniş miqyaslı abadlıq, yenidənqurma işlərini həyata keçirərkən bəzi hallarda olduqca haqsız tənqidlərə, gileylərə məruz qalıblar. Elə adlarını çəkdiyimiz bazarın, “Qatır Məmməd yarmarkası”nın, bir sıra digər obyektlərin, eybəcər köşklərin köçürülməsi zamanı bu söz-söhbətlər ortaya çıxıb. Amma, sonralar həyata keçirilən bu işlərlə əlaqədar şəhər rəhbərliyinə, yuxarı orqanlara saysız-hesabsız minnətdarlıq məktubları daxil olub, sakinlər öz razılıqlarını bildiribdər. Bir də ki, görülən iş göz qabağındadır. Gəncə dəmir yolu vağzalının binası nə halda idi, indi necədir. “Comərd Qəssab” türbəsi itib batmışdı, indi ziyarətgahdır. Cavad xanın adına uyğun məqbərəsi ucaldılıb. Açılışında ölkə başçısının iştirak etdiyi Gəncə Beynəlxalq hava limanı göz oxşayır. Gəncə Darvaza kompleksi, təzə məktəb binaları, diaqnostika mərkəzi, üzgüçülük hovuzu, şəhid ailələri və Qarabağ müharibəsi əlilləri üçün yaşayış binaları, parklar, muzeylər, məhəllələr, daha nələr, nələr... Yuxarıda qeyd etdiyim kimi, bunların hamısı haqqında bir yazıda danışmaq heç mümkün də deyil.

Məhəllə görüşləri, vədlər, idman meydançaları...

Şəhər icra hakimiyyətinin başçısı, digər strukturların rəhbərləri, hüquq-mühafizə orqanları daim aşkarlığa, adamlarla sıx ünsiyyətdə olmağa, onların arzu və təkliflərini öyrənməyə üstünlük veriblər. Artıq neçə illərdir şəhərin müxtəlif yaşayış məhəllələrində “açıq mikrofon” günləri keçirilir, şəhərin rəhbər işçilərinin iştirak etdikləri görüşlərə yüzlərlə, bəzən minlərlə sakin toplaşır. Kimin ürəyindən nə keçir, mikrofona yaxınlaşır, dərdini danışır, təklif irəli sürür, hansısa bir məmurun laqeydliyindən gileylənir və sair. “Məhəllə günü” mütləq hansısa bir obyektin açılışı ilə tamamlanır. Ya idman meydançası istifadəyə verilir, ya yeni artezianın açılışı olur, yaxud da park salınır, ağac, gül kolları əkilir. İndi Gəncənin az qala hər bir məhəlləsində idman meydançaları və qurğuları istifadəyə verilib. Gülüstan yaşayış sahəsində, üçüncü və beşinci mikrorayonlarda, Heydər Əliyev prospektində və digər məhəllədaxili ərazilərdə 50-dən çox idman meydançası inşa olunub, gənclərin və yeniyetmələrin istismarına buraxılıb.

Bir fakt maraq doğurur ki, şəhər icra hakimiyyətinə daxil olan ərizə və şikayətlərin sayı kəskin şəkildə azalmışdır. Bu, ilk növbədə qeyd etdiyimiz aşkarlığın və yerlərdə görüşlərin keçirilməsinə daha çox üstünlük verilməsi ilə ilə əlaqədardır. Təkcə bu ilin ötən ayları ərzində 25-dən çox səyyar qəbullar keçirilmişdir.

“İqtisadiyyatı güclü olan şəhərə zaval yoxdur”

Şəhər icra hakimiyyəti başçısının sosial-iqtisadi məsələlər üzrə müavini Sahib Quliyevin sözlərini yarımsərlövhəyə təsadüfən çıxarmamışam. Əvvəla, Gəncə Azərbaycanın ikinci iqtisadi və mədəni mərkəzidir. Şəhər bir növ sənaye şəhəridir və təbii ki, bu sahənin inkişafı olmadan istənilən işi həyata keçirmək də mümkün deyil. Sahib müəllim deyir ki, Gəncə iqtisadiyyatının inkişaf etdirilməsi daim ölkə başçısı İlham Əliyevin diqqət mərkəzində olub və şəhər rəhbərliyi son illərdə həmin sahənin tərəqqi etməsi üçün əlindən gələni edib.

Rəqəmlərə diqqət yetirək. 2003-2009-cu illərdə 2023 kiçik və orta müəssisə yaradılıb və 15 min 240 yeni iş yeri açılıb ki, onun da 13 mindən çoxu daimidir. Bir sıra sənaye müəssisələri istehsalı qaydaya salıb. Məsələn, Gəncə avtomobil zavodunda 2004-cü ildə “OKA” markalı, 2005-ci ildə 14 modeldə “UAZ” markalı avtomobillərin yığımına başlanılmış, 2006-cı ildə Çin Xalq Respublikasının iş adamları, müəssisələri ilə müqavilələr bağlanılmışdır. Zavodda 7 modeldə orta tonnajlı yük avtomobillərinin, 1 modeldə minik avtomobilinin və 4 modeldə mikroavtobusların yığımına başlanılmışdır. Çin Xalq Respublikasının “Çanqan” Avtomobil şirkəti ilə 2006-cı ilin oktyabr ayında “Gəncə” markalı yük maşınlarının ilk buraxılışı olmuşdur. İki il qabaq müxtəlif növ Belarus traktorlarının da yığımına başlanılmışdır.

“Gəncə-Şərab-2” ASC-də şərab məmulatlarının istehsalında xammala olan tələbatı ödəmək üçün 2004-cü ildə üzümçülük təsərrüfatı yaradılmış və indiyədək 350 hektara yaxın üzüm bağı salınmışdır. Bu təsərrüfatın yaradılması ilə 200-dən çox yeni iş yeri açılmışdır. Araq istehsalında istifadə olunan spirt rektifikatı istehsalı sexi tikilib istifadəyə verilməklə daha 60 yeni iş yeri açılmışdır.

“Gəncə - Tekstil” ASC-də Çindən alınmış 3 milyon ABŞ dolları məbləğində yeni avadanllıq quraşdırılıb istifadəyə verilmişdir. Asfalt, kərpic, beton məhlulu, kərə yağı, qənnadı məmulatları və digər məhsullar istehsal edən ayrı-ayrı müəssisələr işə düşmüşdür. Ötən beş ildə şəhərdə ümumi daxili məhsulun həcmi 3,4 dəfə artmışdır. Bu artım sənayedə 2,4, kənd təsərrüfatında 6,4, tikintidə 12,4 dəfə olmuşdur. Maraqlıdır ki, 2003-cü ilə nisbətən 2008-ci ildə ümumdaxili məhsul istehsalı ABŞ-da 13,3 faiz, Avropa İttifaqı ölkələrində 13,7 faiz, MDB dövlətlərində 45,4 faiz olduğu haldı Azərbaycanda 2,6 dəfə, Gəncə şəhərində isə 3,4 dəfə artmışdır. Hər halda olduqca ürək açan rəqəmlərdir.

Təmizlik, yaşıllıq göz oxşayır

Elə ki, səhərin gözü açıldı, şəhərdə məişət tullantıları dolu bir dənə olsun qab görməzsən. Şəhərin təmizliyi ciddi nəzarət altındadır. Bu işdə bütün imkanlardan, o cümlədən təbliğat vasitələrindən istifadə olunur. Hətta kiçik zibil qutularının üzərinə yazılmış, “Gəncəni sevirsənsə, onu təmiz saxla” - sözləri də bu işə necə böyük əhəmiyyət verildiyindən xəbər verir. Ölkə başçısı İlham Əliyevin tapşırığına əsasən şəhərin təmizlik idarəsinin maddi-texniki bazasının möhkəmləndirilməsi üçün xüsusi nəqliyyat vasitələri verilmişdir, küçə və məhəllələrdə məişət tullantılarının yığılması və daşınması üçün 1000-dən çox yeni konteyner qoyulmuşdur.

Artıq şəhərdə istehsal gücü ayda 150 min ton olacaq məişət tullantıları emalı zavodunun tikintisi üçün şəhər icra hakimiyyəti ilə “NET İnternational” şirkəti arasında niyyət protokolu imzalanmışdır. İşlərin görülməsi 100 faiz xarici sərmayə hesabına aparılacaqdır və kontraktın ilkin dəyəri 64,6 milyon avro həcmindədir. Şəhərin yaşıllaşdırılması genişləndirilərək müasir şəhərsalma tələblərinə uyğun 1,4 hektar sahədə yeni qazonlar salınmış, 150 min ədəddən çox ting, kol və çiçəklər əkilmişdir. Bütövlükdə son 5 ildə şəhərdə yaşıllıq zonası - qazonların ümumi sahəsi 10 dəfədən çox artmışdır. Hazırda şəhərdə görülən ən böyük layihələrdən biri də “Xan bağı”nın yenidən qurulması işlərinə başlanmasıdır. Onun yaşıllıq örtüyü yenidən bərpa olunur, fauna və florasının zənginləşdirilməsi üçün tədbirlər görülür. Fikrət Əmirov parkı da yenidən qurulur.

Doqquz tarixi səfər

Şəhər icra hakimiyyətinin başçısı Eldar Əzizov Gəncədə əldə olunan nailiyyətləri ölkə Prezidenti İlham Əliyevin bu qədim şəhərə birbaşa diqqət və qayğısı, köməyi ilə əlaqələndirir:

— Cənab Prezidentimiz bu illərdə 9 dəfə Gəncədə olub. Heç bilirsiniz, hər bir gəncəli bundan necə böyük iftixar, qürur hissi duyur?! Qədim Nizami yurduna bundan böyük diqqət, etimad nə ola bilər?! Şəhərdə tikilən, yenidən qurulan obyektlərin demək olar ki, əksəriyyətinin təməlinin qoyulmasında, açılışında cənab Prezidentimiz iştirak elib. Qədirbilən gəncəlilər bu diqqəti və qayğını daim yüksək qiymətləndirirlər. Hər il “Şəhər günləri” ərəfəsində, digər tarixi günlərldə, yubileylərdə dövlət səviyyəsində təltif olunanlar arasında Gəncənin də tanınmış adamlarının adları çəkilir, onlara fəxri adlar, mükafatlar verilir. İndiyədək neçə-neçə alim, həkim, memar, incəsənət xadimi, müəllim müxtəlif adlara layiq görülüb. Biz gərək bütün fəaliyyətimizlə bunları doğruldaq. Hələlik gördüklərimiz Prezidentin həyata keçirdiyi işlərin müqabilində dəryada damlaya bənzəyir. Bunu bir an belə unutmuruq.

Şəhər rəhbərinin sözlərinə əlavə şərh verməyə ehtiyac qalmır.

Hamlet QASIMOV,

“Xalq qəzeti”nin bölgə müxbiri

Xalq qəzeti.- 2009.- 26 sentyabr.- S. 7.