Azərbaycanlı olimpiya çempionu
Fərid Mansurov ikinci dəfə dünyanı fəth etdi
Azərbaycanın güləş ustaları
Danimarkanın Herninq şəhərində yenicə başa
çatmış dünya çempionatından əla əhval-ruhiyyə
ilə qayıdırlar. Yarışların sonuncu günü
yunan-Roma üsulu ilə güləşən Afina
Olimpiadasının çempionu Fərid Mansurovun (66 kq-dək)bütün
rəqiblərinə qalib gələrək iki il əvvəl
Bakıda, Heydər Əliyev adına İdman-Konsert Kompleksində
keçirilmiş dünya çempionatında olduğu kimi,
yenə də öz çəkisində planetin 1 nömrəli
güləşçisi olması və ikinci dəfə
dünya çempionu adını qazanması bütün Azərbaycan
xalqına hədsiz sevinc bəxş etdi.
Dünya güləşində
xüsusi yeri olan və hər yerdə adı böyük
hörmətlə çəkilən çox istedadlı
güləşçimizin böyük qələbəsi əsl
qəhrəmanlığa bərabərdir. Zarafat deyil, Fərid
bir gündə altı görüşün hamısından
qalib ayrılmışdır. İspaniya və Yaponiya güləşçiləri,
səkkizdəbir finalda erməni Sasun Qambaryan, sonra İran və
Kuba idmançıları, həlledici final
görüşündə isə gürcüstanlı
Manuçar Tsxadaya üzərində qələbələr
Mansurovu fəxri kürsünün zirvəsinə yüksəltdi
və Herninq şəhərinin idman sarayında bir daha onun
sevimli vətəni Azərbaycanın dövlət himni səsləndirildi.
Layiqli qələbədir!
İndi biz hamımız, Fərid Mansurov istedadının pərəstişkarları
fəxr edə bilərik ki, dünya şöhrətli həmvətənimiz
idmanın ən geniş yayılmış növlərindən
biri olan “klassik” güləşdə Azərbaycan tarixinə
olimpiya çempionu kimi düşməsi ilə yanaşı
həm də ikiqat dünya çempionu adı
daşıyır.
Məhz Fəridin
qızıl medalı, eləcə də Pekin Olimpiya
Oyunlarının gümüş mükafatçıları
Rövşən Bayramovla (55 kq-dək) Vitali Rəhimovun (60
kq-dək) uğurları güləşin bu növündə
Azərbaycan kollektivini qeyri-rəsmi komanda hesabında 38 xalla
üçüncü yerə çıxarmışdır. Yığmamız
yalnız Türkiyə (44 xal) və İran (39) komandalarından
geri qalmışdır.
Ümumiyyətlə isə,
Danimarkaya dünya çempionatına 19 güləşçi
ilə yola düşən nümayəndə heyətimiz Azərbaycanın
idman xəzinəsini 10 medalla zənginləşdirmişdir. Bu,
ölkəmizdə idmanın, o cümlədən güləşin
inkişafına göstərilən daimi qayğının bəhrəsi
olan nailiyyət, qibtəediləcək nəticədir. Bir daha
xatırladaq ki, Fərid Mansurovla yanaşı qadın güləşçilər
Mariya Stadnik (48 kq-dək) və Yuliya Radkeviç (59 kq-dək)
qızıl medallara sahib olmuşlar, Sona Əhmədli (55 kq-dək),
sərbəst üsulla güləşənlər Zəlimxan
Hüseynov (60 kq-dək), Çamsulvara Çamsulvarayev (74 kq-dək)
və Xetaq Qazyumov (96 kq-dək) gümüş medal
qazanmışlar, “sərbəstlərin” yarışında
digər idmançımız Şərif Şərifov (84
kq-dək), “klassiklərin” turnirində Rövşən
Bayramov (55 kq-dək) və Vitali Rəhimov (60 kq-dək)
bürünc mükafatçı olmuşlar.
Oqtay BAYRAMOV
Xalq qəzeti.- 2009.- 29 sentyabr.- S. 8.