Fəxrəddin Gülmirzə oğlu Cavadov

Azərbaycan səhiyyəsinə ağır itki üz vermişdir. Nəcib insan, yüksək təşkilatçı - mütəxəssis və alim Fəxrəddin Gülmirzə oğlu Cavadov 2009-cu il yanvar ayının 9-da 57 yaşında vəfat etmişdir.

F. Cavadov 21 iyun 1951-ci ildə Bakı şəhərində anadan olmuşdur. 1968-1974-cü illərdə N. Nərimanov adına Azərbaycan Dövlət Tibb İnstitutunun müalicə işi fakültəsində təhsil almış, institutu bitirdikdən sonra 1975-1977-ci illərdə Bakı Şəhəri Təxirəsalınmaz Tibbi Yardım Stansiyasında səyyar həkim, 1977-1979-cu illərdə 5 saylı Şəhər poliklinikasında həkim-cərrah vəzifələrində işləmişdir. 1978-1986-ci illərdə N. Nərimanov adına Azərbaycan Tibb İnstitutunun urologiya kafedrasında baş laborant, assistent və eyni zamanda institutun Tələbə Həmkarlar İttifaqı Komitəsinin sədri vəzifələrində çalışmışdır. 1985-ci ildə Moskva vilayətinin M. Vladimirskiy adına Elmi-Tədqiqat Kliniki İnstitutunda namizədlik dissertasiyası müdafiə etmişdir. 2008-ci ildə tibb elmləri doktoru ali dərəcəsi almışdır.

1986-cı ildən Azərbaycan Respublikası KP MK-nın elm və təhsil müəssisələri şöbəsinin, 1989-cu ildən isə ictimai-iqtisadiyyat şöbəsinin təlimatçısı vəzifələrində çalışmışdır. 1990-cı ildə Azərbaycan Respublikası səhiyyə nazirinin I müavini vəzifəsinə irəli çəkilmiş və 1996-cı ilədək bu vəzifədə çalışmışdır. 1998-ci ildə Ə. Əliyev adına Azərbaycan Dövlət Həkimləri Təkmilləşdirmə İnstitutunun tibb fakültəsi üzrə prorektoru, daha sonra isə I prorektoru vəzifələrində işləmişdir. F. Cavadov bu müddət ərzində Ə. Əliyev adına Azərbaycan Dövlət Həkimləri Təkmilləşdirmə İnstitutunun urologiya və operativ nevrologiya kafedrası üzrə dosent vəzifəsinə də seçilmişdir. 2000-ci ilin fevral ayından isə Azərbaycan Respublikası Dövlət Neft Şirkətinin Mərkəzi Neftçilər Xəstəxanasının baş həkimi vəzifəsinə təyin olunmuşdur.

Hansı vəzifədə çalışmasından asılı olmayaraq o, hər zaman yeniliyə, elmi axtarışa can atmışdır. Onun rəhbərliyi dövründə Mərkəzi Neftçilər Xəstəxanasında kardinal dəyişikliklər baş vermişdir. F. Cavadovun xidmətləri yüksək qiymətləndirilmişdir. Azərbaycan Respublikası Prezidentinin sərəncamı ilə o, 2004-cü ildə “Tərəqqi” medalı ilə təltif edilmiş, 2006-cı ildə isə “Azərbaycan Respublikasının əməkdar həkimi” adına layiq görülmüşdür.

F. Cavadov işlədiyi bütün sahələrdə öz əməksevərliyi, səmimiliyi və yüksək nizam-intizamı ilə seçilirdi. Amansız ölüm Fəxrəddin Cavadovu ömrünün məhsuldar dövründə aramızdan aparsa da əziz xatirəsi onu tanıyanların, eləcə də səhiyyə və neft sənayesi işçilərinin qəlbində daim yaşayacaqdır.

Allah rəhmət eləsin!

Azərbaycan Respublikası

Səhiyyə Nazirliyi və

Azərbaycan Respublikası

Dövlət Neft Şirkətinin

rəhbərliyi

Xalq qəzeti.-2009.-10 yanvar.-S.6.