BMT Qəzzadakı vəziyyətlə bağlı qətnamə qəbul edib

BMT Təhlükəsizlik Şurası Qəzza sektorunda dekabrın 27-dən bəri davam edən müharibənin dayandırılması barədə qətnamə qəbul edib. Təhlükəsizlik Şurası eyni zamanda İsraildən qoşunlarını işğal etdiyi ərazilərdən çıxarmasını, sektorla sərhəddəki nəzarət-buraxılış məntəqələrini açmasını və daimi sülh müqaviləsi imzalamasını tələb edib. Bu barədə Rusiyanın RİA “Novosti” agentliyi xəbər verib.

Qətnamə 14 ölkənin səs verməsi və ABŞ-ın bitərəf qalması şəraitində qəbul edilib. Təhlükəsizlik Şurası ərazidə humanitar böhranın dərinləşməsindən, zorakılığın artmasından və dinc əhali arasında çoxsaylı insan itkisindən ciddi narahat olduğunu bildirib. Qətnamədə dinc əhaliyə qarşı zorakılıq və qəddarlığın bütün halları, eləcə də terrorizm aktlarının bütün formaları pislənilir.

Bununla belə, yanvarın 9-na keçən gecə, qətnamənin qəbulundan cəmi bir neçə saat sonra İsrail aviasiyası Qəzza ərazisinə yeni hücumlar edib. Hərbi təyyarələr havadan azı 30 zərbə endirib, nəticədə 6 fələstinli həlak olub.

BMT qətnaməsində HƏMAS-ın adı birbaşa çəkilmir, ancaq bu, İsrail və ABŞ-ın əsas tələbi olub. Rusiyanın BMT-dəki nümayəndəliyində isə hesab edirlər ki, qətnamə vaxtında qəbul edilib, vacib sənəddir və kifayət qədər balanslıdır. “Vacib cəhətlərdən biri budur ki, qətnamə regionda dramatik hadisələrin cərəyan etdiyi bir vaxtda qəbul edilib” - deyə Rusiya XİN başçısının müavini Aleksandr Yakovenko bildirib. ”Son saatlar ərzində hadisələrin inkişafı Təhlükəsizlik Şurası üzvlərinin təcili reaksiya verməsini tələb edirdi. Tərəfləri Təhlükəsizlik Şurasının rəyinə qulaq asmağa çağırırıq. Problemin müzakirəsi üç gün ərzində davam etdirildi. Bu, Təhlükəsizlik Şurası üçün qeyri-adi bir haldır. Prinsipial məqam ondan ibarətdir ki, hər iki tərəfdən təcili surətdə atəşin dayandırılması tələb olunur. Bu isə İsrail ordusunun Qəzza sektorundan çıxarılmasına gətirib çıxarmalıdır. Humanitar məsələlərə, onların çatdırılması üçün keçid yollarının açılmasına da böyük diqqət yetirildi” - deyə Rusiya diplomatı bildirib. Onun sözlərinə görə, sənəddə Yaxın Şərq üzrə Moskva görüşünün keçirilməsi məsələsinə də toxunulub. Ancaq Yakovenko hesab edir ki, atəşin təcili surətdə dayandırılmasına heç kim təminat verə bilməz.

Qətnamənin səsə qoyulması zamanı ABŞ nümayəndələri bitərəf qalsalar da, dövlət katibi Kondoliza Rays ümid etdiyini bildirib ki, sənəd regionda vəziyyətin nizamlanmasına gətirib çıxaracaq. BMT TŞ-nin iclasında çıxış edən Rays deyib ki, İsrail Qəzzada apardığı əməliyyat zamanı itkilərin minimuma endirilməsinə çalışmalıdır. Onun sözlərinə görə, ABŞ Fələstin mili administrasiyasının rəhbəri Mahmud Abbasın Fələstin dövlətini yaratmaq uğrundakı səylərini dəstəkləyir.

Bütün bunlarla yanaşı, İsrailin apardığı hərbi əməliyyatlar nəticəsində Qəzzada həlak olanların sayı durmadan artır. Dünən Fələstin Səhiyyə Nazirliyinin nümayəndəsi Müaviyyə Həsənenin verdiyi məlumata görə, artıq ölənlərin sayı 766-ya çatıb, 3 mindən artıq insan isə yaralanıb. İsrail tərəfdən ölənlərin sayı isə 11-dir, onların 8-i hərbçidir.

Dünən İsrail Fələstin ərazilərinin tam izolyasiyası rejimini tətbiq edib. Şənbə gününün sonuna qədər İordan çayının qərb sahilindəki bütün keçid məntəqələri və blokpostlar bağlı olacaq. Yalnız təcili humanitar yardımların keçməsinə icazə veriləcək. Artıq müvafiq sahələrdə polis və sərhədçilərin sayı artırılıb.

Qəzza sektorunda da vəziyyətin gərginləşəcəyindən ehtiyat edirlər. Ərazidə tez-tez İsrail hərbçiləri ilə Fələstin silahlıları arasında toqquşmalar baş verir.

Qeyd edək ki, dünən HƏMAS qruplaşmasının nümayəndələri bəyan ediblər ki, BMT-nin Fələstin xalqının maraqlarına cavab verməyən qətnaməsini rədd edirlər. Bunun ardınca İsrail hökuməti də qətnaməyə baxmayaraq, Qəzzada hərbi əməliyyatları davam etdirəcəyini bəyan edib.

Paşa ƏMİRCANOV

Xalq qəzeti.-2009.-10 yanvar.-S.6.