Sərhəd-keçid məntəqəsi abadlaşdırılmışdır

Azərbaycan Dövlət Dəmir Yolunun mətbuat xidmətinin rəisi Nadir Əzməmmədovdan aldığımız məlumata görə, bu günlərdə “Yalama stansiyasının sərnişin və yük qatarları üzərində sərhəd-keçid məntəqəsi” obyekti istismara verilmişdir. Obyektin tikintisinə ötən ilin iyun ayında başlanmış və dekabrında başa çatdırılmışdır. Sərhəd-keçid məntəqəsində stansiyanın vağzal binası əsaslı təmir olunmuş, 1463 metr uzunluğunda stansiya sahəsi hasarlanmış və abadlıq işləri görülmüşdür.

Sərhəd işçiləri üçün tikilib istifadəyə verilmiş blok-postda rahat iş şəraiti yaradılmışdır. Sərhəd məntəqəsində quraşdırılan video-kameralar, sərhəd-keçid məntəqəsində və stansiyanın ərazisində işıqlandırma sisteminin yeniləşdirilməsi müşahidə proseslərinin aparılmasına hər cür imkan yaratmışdır.

Sərhəd xidmətinin əməkdaşları quraşdırılmış monitorlar vasitəsilə 1500 metrədək məsafədə Yalama stansiyasının parkını tam müşahidə edə biləcək, istənilən xoşagəlməz hadisənin qarşısını vaxtında alacaqlar. Bütövlükdə, sərhəd-keçid məntəqəsinin əməkdaşlarının iş şəraitinin yaxşılaşdırılması məqsədilə Xaçmaz stansiyasında 6, Yalama stansiyasında 10 otaq əsaslı təmir edilmiş, 5 otaqdan ibarət sərhədçi blok-postu tikilib istifadəyə verilmişdir.

Tikinti və yenidənqurma işlərini Azərbaycan Dövlət Dəmir Yolunun sifarişi ilə “Aqrartikinti” MMC-nin “6-cı mərtəbə” şirkəti yerinə yetirmişdir. Şimal istiqamətində bilet satışı həyata keçirilən stansiyalarda kompyuterləşmə işləri bu günlərdə start götürəcəkdir. Bilet satışının tam kompyuterləşdirilməsi nəticəsində sərhədçilərə qatarda gedən hər bir sərnişin haqqında qabaqcadan ətraflı məlumat veriləcəkdir. Bu da gələcəkdə sərhəd-keçid məntəqəsində sərhədçilər tərəfindən aparılan yoxlamaların müddətini minimuma endirəcəkdir.

“Yalama stansiyasının sərnişin və yük qatarları üzərində sərhəd-keçid məntəqəsi” obyekti istifadəyə verilməsi münasibətilə keçirilən tədbirdə “Daşıma proseslərini idarəetmə” Birliyinin rəisi İsfəndiyar Kərimov, SDİB-nin rəisi Elyar Muradov, Tikilməkdə olan Müəssisələr Müdiriyyətinin rəisi Sabir Məhərrəmov, müvafiq birliklərin və xidmətlərin nümayəndələri, Yalama qovşağında dislokasiya olunan idarə və müəssisələrin kollektivləri iştirak etmişlər.

Qabil YUSİFOĞLU

Xalq qəzeti.-2009.-11 yanvar.- S.7.