İsrail müharibənin üçüncü mərhələsinə başlayır

İsrail tərəfi Qəzza sektorunda aparılan hərbi əməliyyatlara ehtiyatdakı hərbçilərin cəlb edildiyini bəyan edib. Bu barədə ölkə hökumətindən məlumat verilib.

BMT Təhlükəsizlik Şurasının qətnaməsinə və bir çox ölkələrin ciddi səylərinə baxmayaraq Qəzzada zorakılıq davam etməkdədir. Fələstin həkimlərinin bildirdiyinə görə, hərbi əməliyyatların davam etdiyi 17 gün ərzində 900-dan çox insan həlak olub. İsrail tərəfi isə 13 əsgərin öldüyünü bildirir.

Təkcə bazar günü sektorda qanlı toqquşmalar nəticəsində 40 nəfər həlak olub. Onların 17 nəfəri Qəzza şəhərinin sakinləridir.

İsrail ordusunun rəsmi nümayəndəsi Avi Benenyahunun sözlərinə görə, hərbi kontingentin gücləndirilməsi üçün ehtiyatdakı hərbçilər də müharibəyə cəlb edilib, Qəzzada əməliyyatın yeni mərhələsində bir neçə minlik ehtiyat qüvvədən istifadə olunacaq.

İsrail hökumətinin nümayəndəsi Mark Reçev isə Qəzzada aparılan hərbi əməliyyatlarda ehtiyatdakı hərbçilərin artıq bir neçə gündür ki, iştirak etdiyini söyləyib. “Biz HƏMAS-a hərbi təzyiq göstərməkdə davam edirik və hesab edirik ki, bu, öz nəticələrini göstərir” – deyə Reçev bildirib. İsrail hərbçiləri Qəzza sektoruna havadan xəbərdarlıq vərəqələri yayaraq bəyan ediblər ki, tezliklə hərbi əməliyyatların üçüncü mərhələsinə başlanılır, fələstinlilər HƏMAS-ın istifadəsində olan obyektlərdən uzaq olsunlar. Müharibənin üçüncü mərhələsinin nə demək olduğu hələ tam aydın deyil. Bəzi müşahidəçilərin fikrincə, üçüncü mərhələdə İsrail ordusu Qəzza şəhərlərinin içərilərinə və qaçqın düşərgələrinə daxil olacaq. Bu isə istər Qəzza sakinləri, istərsə də yəhudi əsgərləri üçün yeni itkilər deməkdir.

Baş nazir Ehud Olmert hökumətin iclasında deyib ki, ölkəsi qarşısına qoyduğu məqsədlərə çatmaqdadır, ancaq bütün vəzifələri tam yerinə yetirmək üçün əhali təmkinli olmalıdır.

Qəzzada isə humanitar vəziyyət kritik həddə çatıb. Ərazidə çalışan Norveç həkimləri Maqe Qiblert və Erik Fosse deyiblər ki, Qəzza şəhərinin əsas xəstəxanası yaralılarla doludur, pasiyentlər mütəxəssislərin və elementar tibbi avadanlıqların çatışmaması səbəbindən ölürlər. Onların sözlərinə görə, pasiyentlərin tam yarısı dinc sakinlərdir. Yaralıların arasında qəlpə yarası ilə gətirilmiş uşaqlara da tez-tez rast gəlmək mümkündür.

Fələstinli həkimlər isə bildiriblər ki, yaralıların çoxunda yanıq və qazla zəhərlənmə halları müşahidə edilir. Bu simptonlar ağ fosfordan zəhərlənmə əlamətlərinə oxşayır. Fosforlu güllələrdən dinc əhaliyə qarşı istifadə isə beynəlxalq hüquq normalarına ziddir.

Humanitar təşkilatlar yarım milyon Qəzza sakininin ərzaq və tibbi köməyə ehtiyac duyduğunu bildiriblər.

Beynəlxalq ictimaiyyət isə Qəzza sektorunda zorakılığa son qoymaq üçün diplomatik səylərini davam etdirir. Böyük Britaniyanın sabiq baş naziri, Yaxın Şərq məsələsi üzrə səfir Toni Bleyerin Qahirədə Misir Prezidenti Hüsnü Mübarəklə görüşəcəyi gözlənilir. Bazar günü isə Misirin kəşfiyyat xidmətinin başçısı Ömər Süleyman HƏMAS nümayəndələri ilə görüşüb. HƏMAS təmsilçiləri tezliklə regionda qan tökülməsinə son qoyulmasının vacibliyini bildirib, təcili sürətdə müharibənin dayandırılmasını, İsrail qoşunlarının Qəzzadan çıxarılmasını, anklavin blokadasına son qoyulmasını və sərhəd-keçid məntəqələrinin açılmasını tələb ediblər.

Paşa ƏMİRCANOV,

Xalq qəzeti.-2009.-13 yanvar.-S.6.