Azərbaycanda 1 milyon 30 min nəfərin
pensiyasının ödənişi plastik kartlarla həyata
keçirilir
Azərbaycanda əmək
pensiyalarının plastik kartlarla ödənilməsi prosesi
müvəffəqiyyətlə tətbiq edilməkdədir. Bunun
nəticəsidir ki, ötən dövrdə pensiyaların plastik
kartlarla ödənişi sahəsində nəzərəçarpacaq
irəliləyişə nail olunub və hazırda əmək
pensiyası almaq hüququ olan vətəndaşların əksəriyyəti
öz pensiyalarını mütərəqqi üsullarla əldə
edirlər.
Artıq şəhərlərdə
yaşayan pensiyaçıların 100 faizi üzrə pensiyalar
plastik kartlarla ödənilir. 2008-ci ildə xüsusilə, kəndlərdə
pensiyaların plastik kartlarla ödənişinin təmin
olunması istiqamətində işlər davam etdirilib və
son məlumata əsasən, artıq kəndlərdə 84 faiz
üzrə pensiyalar plastik kartlarla ödənilir.
Dövlət Sosial
Müdafiə Fondunun ictimaiyyətlə əlaqələr
sektorundan aldığımız məlumata görə, ötən
ilin oktyabr ayının statistikasına əsasən, Azərbaycanda
ümumilikdə ödənişdə olan pensiyaların 87
faizi, yəni 960 min nəfərin pensiyasının ödənişi
plastik kartlarla aparılırdısa, hazırda ödənişdə
olan pensiyaların 93 faizi, yəni 1 milyon 30 min nəfərin
pensiyasının ödənişi plastik kartlarla həyata
keçirilir. Bu məqsədlə ümumilikdə 417, o
cümlədən kənd və qəsəbələrdə
51 əlavə bankomat qurulmuşdur. Bu göstərici üzrə
Azərbaycan bütün dünyada ən şəffaf
praktikaya malik ölkələrdən biri hesab olunur.
Xatırladaq ki, əmək
pensiyalarının mütərəqqi üsullarla ödənilməsi
sisteminin daha da genişləndirilməsi mühüm məqsədlərdəndir
və bu məsələ Prezident İlham Əliyevin 30 dekabr
2008-ci il tarxli sərəncamı ilə təsdiq edilən
“2009– 2015-ci illərdə Azərbaycan Respublikasında
sığorta- pensiya sisteminin inkişafına dair Dövlət
Proqramı”nda da yer alıb.
Proqrama əsasən,
növbəti illər ərzində pensiyaların plastik
kartlarla bankomatlar vasitəsilə ödənilməsi sisteminin
daim təkmilləşdirilməsi davam etdirilərək,
bankomat və pos-terminallarla təchizat gücləndiriləcək,
ödənişlərdə çoxfunksiyalı çip
kartlardan istifadə təmin olunacaq, ucqar kəndlərdə
ödənişin mütərəqqi üsullarla
aparılması üzrə müxtəlif ölkələrin
təcrübəsi öyrənilərək tətbiq ediləcək.
Qəzənfər QASIMOV
Xalq qəzeti.-2009.-27 yanvar.-S.4.