Suraxanı rayonu qəsəbələrinin uğurları

Bu il yanvarın 16-da Nazirlər Kabinetinin 2008-ci ildə sosial-iqtisadi inkişafın yekunlarına və qarşıda duran vəzifələrə həsr olunmuş iclasında ölkə Prezidenti İlham Əliyev Azərbaycanın son beş ildə qazandığı uğurları yüksək qiymətləndirmiş, dinamik inkişafın daha da sürətləndirilməsi üçün qarşıya konkret vəzifələr qoymuşdur. Bununla əlaqədar hazırda respublikanın hər yerində ötən il görülən işlərə nəzər salınır, dövlət başçısının adı çəkilən iclasda verdiyi tövsiyə və tapşırıqlar əsil fəaliyyət proqramı kimi qəbul edilir... Suraxanı rayonunun Yeni Suraxanı qəsəbəsində ötən ilin yekunlarına dair keçirilmiş hesabat yığıncağında da bu barədə geniş danışılmış, görülmüş işlərə qiymət verilmiş, qarşıda duran vəzifələr müzakirə edilmişdir. Tədbiri giriş sözü ilə açan rayon icra hakimiyyəti başçısının birinci müavini Hüseyn Həsənov bildirmişdir ki, 2008-ci ildə bütün ölkədə olduğu kimi, Suraxanı rayonunda da sosial-iqtisadi həyatın bütün sahələrində uğurlu göstəricilər əldə edilmiş, geniş miqyaslı tikinti-quruculuq, abadlıq işləri görülmüşdür. Yeni Suraxanı qəsəbə nümayəndəsi Vahid Daniyev demişdir ki, hesabat dövründə bu yaşayış sahəsində təmizlik və sanitariya işləri diqqət mərkəzində saxlanılmış, abadlıq işlərinə xüsusi fikir verilmişdir.

Natiq daha sonra vurğulamışdır ki, ötən il qəsəbədə 29 min 550 kvadratmetr əraziyə asfalt döşənmiş, su təchizatının yaxşılaşdırılması məqsədilə tədbirlər həyata keçirilmiş, 716 poqonometr yeni qaz xətti çəkilmiş, elektrik enerjisi ilə bağlı yaranan çətinliklər aradan qaldırılmışdır.

Qəsəbə icra nümayəndəsi dövlət başçısının məlum sərəncamı ilə təsdiq edilmiş “Bakı şəhərinin qəsəbələrinin sosial-iqtisadi inkişafının sürətlənməsinə dair Dövlət Proqramı”nda Suraxanı rayonu, eləcə də onun qəsəbələri üzrə nəzərdə tutulmuş tədbirlərin ötən il uğurla reallaşdırıldığını diqqətə çatdırdı. Bununla yanaşı natiq göstərdi ki, görülən işlərlə yanaşı, qəsəbədə həllini tapmayan bir sıra problemlər də mövcuddur. Həmin problemlər sırasına daxil olan V.Xəlilov küçəsində, Bakı— aeroport yolunun sol tərəf yaşayış massivində kanalizasiya xətlərinin çəkilməsi, mədən ərazisindəki transformatorların Dövlət Neft Şirkətinin balansından çıxarılaraq “Bakıelektrikşəbəkə”yə verilməsi, məişət tullantılarının daşınması üçün əlavə konteynerlərin alınması və s. işlər 2009-cu ildə həyata keçiriləcəkdir.

Bülbülə qəsəbəsində də ötən ilin sosial-iqtisadi yekunlarına dair hesabat yığıncağı keçirilmişdir. Qəsəbə icra nümayəndəsi Elçin Seyfullayev məruzə ilə çıxış etmişdir. O, göstərmişdir ki, ötən il qəsəbənin S.Əliyev küçəsi “A” yaşayış sahəsinə 500 metr məsafədə kanalizasiya xətti, “Böyükşor” qazpaylayıcı məntəqəsindən 5 kilometr məsafədə yeni qaz kəməri çəkilmiş, Bülbülə qəsəbəsi üçün müasir tipli yeni poliklinikanın, 844 yerlik orta məktəbin, 120 yerlik uşaq bağçasının, “A” yaşayış sahəsində və S.Bəhlulzadə küçəsində poçt şöbələrinin tikintisi tamamlanmışdır.

Qəsəbədə abadlıq-quruculuq işlərilə yanaşı, aztəminatlı və imtiyazlı ailələrin sosial müdafiəsinin gücləndirilməsinə, pensiya və müavinətlərin vaxtında çatdırılmasına, ünvanlı sosial yardımların təqdim edilməsinə, gənclərin idmana marağının daha da yaxşılaşdırılmasına, şəhid ailələri, Qarabağ, “20 Yanvar” əlilləri və veteranlarına sosial qayğının artırılmasına diqqət yetirilmişdir.

Qəsəbə nümayəndəsi həmçinin vurğulamışdır ki, nümayəndəlik bu il də daha intensiv işlər görmək əzmindədir. Tikinti-quruculuq tədbirlərinin genişləndirilməsinə, sakinlərin rifah halının yaxşılaşdırılmasına diqqət artırılacaqdır.

Yığıncaqda Suraxanı Rayon İcra Hakimiyyəti başçısının müavini Əhməd Talıbov iştirak etmişdir.

Vaqif BAYRAMOV

Xalq qəzeti.-2009.-27 yanvar.-S.6.