Azərbaycanda dövlət quruculuğu və idarəçilik prosesi yeni inkişaf mərhələsində

Yanvarın 29-da Azərbaycan Respublikasının Prezidenti yanında Dövlət İdarəçilik Akademiyasında 2008-ci ildə plan üzrə yerinə yetirilmiş elmi-tədqiqat işlərinin yekunlarına həsr olunmuş “Azərbaycanda dövlət quruculuğu və idarəçilik prosesi yeni inkişaf mərhələsində” mövzusunda elmi konfrans keçirilmişdir.

Konfransı Akademiyanın rektoru, əməkdar elm xadimi, professor Seyfəddin Qəndilov açaraq, tədbir barəsində geniş məlumat vermişdir. Qeyd edil mişdir ki , 2003-2005-ci illərdə 58 iş üzərində tədqiqat aparılıb. Natiq ümummilli lider Heydər Əliyevin zəngin dövlətçilik təcrübəsinin öyrənilməsinin zəruriliyini, əhəmiyyətini qeyd etmiş, bu istiqamətdə Heydər Əliyev irsinin layiqli davamçısı ölkə başçısı cənab Prezident İlham Əliyevin gördüyü işlər nəticəsində Azərbaycanın sürətlə inkişaf etdiyini bildirmişdir. S.Qəndilov dövlət quruculuğu prosesinin yeni inkişaf mərhələsinin tarixi-siyasi aspektləri, fəlsəfi, hüquqi və informasiya təminatı, sosial-iqtisadi əsasları və mexanizmləri haqqında ətraflı məlumat verdi. Qeyd etdi ki, möhtərəm Prezidentimizin düşünülmüş daxili və xarici siyasəti nəticəsində Azərbaycan hazırda təkcə regionda yox, dünyada lider dövlətlər sırasına qoşulub.

Sonra professor Məlikbaxış Babayev “Məntiqi düşüncənin idarəçilikdə rolu”, professor Çingiz Xəlifəzadə “Müstəqillik şəraitində Azərbaycanın təbii ehtiyatlarından istifadənin idarə olunmasının başlıca prinsipləri”, dosent Flora Ağayeva “Dövlət qulluğunun sosial xarakteri” haqqında məruzələr etmiş, mövzular ətrafında fikirlərini konfrans iştirakçıları ilə bölüşmüşlər.

Konfrans işini bölmə iclaslarında davam etdirmişdir. Bölmə iclaslarında Azərbaycanda idarəetmə mədəniyyətinin tarixi, praktiki-nəzəri məsələləri, Prezident İlham Əliyev və Azərbaycanda milli-mənəvi dəyərlərə qayğının yeni təzahürü, vətəndaş cəmiyyəti ilə hüquqi dövlətin qarşılıqlı əlaqəsində demokratik idarəetmənin rolu, regional inkişaf fondları və regional inkişafın tənzimlənməsi, Azərbaycan Respublikasının 2006-2010-cu illər üçün davamlı inkişaf proqramında yoxsulluğun aradan qaldırılması yolları və digər mövzularda maraqlı çıxışlar, geniş fikir mübadiləsi olmuşdur. Bölmə iclaslarında Azərbaycanda dövlət quruculuğunun və idarəçilik prosesinin yeni inkişaf mərhələsinə qədəm qoyması və bu sahədə kadrların yetişdirilməsində Dövlət İdarəçiliyi Akademiyasının rolu yüksək qiymətləndirilmişdir.

Yekun iclasında bölmə rəhbərlərinin məlumatları dinlənilmişdir. Konfransın işinə yekun vuran rektor S.Qəndilov gələcəkdə Akademiyada aparılacaq elmi işlər barədə irəli sürülmüş təklif və tövsiyələrin, ümumiyyətlə, Akademiyada aparılan elmi-tədqiqat işlərinin əhəmiyyətindən və qarşıdakı illərdə görüləcək işlərin başlıca istiqamətlərindən danışmış və bu sahədə kollektivə yeni-yeni uğurlar arzulamışdır.

Əliqismət BƏDƏLOV

Xalq qəzeti.-2009.-30 yanvar.-S.7.