Fövqəladə hallara hər zaman hazır olan qurum

Öz çevik fəaliyyəti ilə həm ölkə daxilində, həm də xaricdə uğur qazanan Fövqəladə Hallar Nazirliyinin əməkdaşları dövlət tərəfindən onlara göstərilən diqqət və qayğının heç də hədər getmədiyini təsdiqləyirlər

Bu günlərdə Rusiya Federasiyasında baş verən meşə yanğınları bütün dünyanın diqqətini şimal qonşumuza yönəldib. Təbii fəlakətin fəsadlarının böyük olduğunu nəzərə alan bir sıra xarici ölkələr isə bu yanğınların söndürülməsində Rusiyaya öz köməkliklərini göstəriblər. Bu sırada Azərbaycan təmsilçilərinin də olması və onların öz fəaliyyətlərinə görə Rusiya rəsmiləri tərəfindən qiymətləndirilməsi isə təbii ki, qürur duyulası faktdır. Təmsilçilərimizin Rusiyadakı fəaliyyəti barədə bir qədər sonra geniş məlumat verəcəyik. Hələlik isə onu qeyd edək ki, ölkəmizdə uğurla həyata keçirilən islahatlar, müvəffəqiyyətlə yerinə yetirilən dövlət proqramları Azərbaycanı regionda lider dövlətə çevirib. Təbii ki, bu uğurların əldə olunmasında, Azərbaycan Respublikasının Prezidenti İlham Əliyevin tapşırıq və tövsiyələrinə çevik şəkildə əməl edilməsində dövlət qurumlarının, o cümlədən Fövqəladə Hallar Nazirliyinin (FHN) də özünəməxsus rolu var. Daha dəqiq desək, bu gün bütün dövlət strukturları kimi FHN də üzərinə düşən vəzifələrin öhdəsindən layiqincə gəlir. Məlumat üçün deyək ki, 2005-ci il dekabrın 16-da Prezident İlham Əliyev Azərbaycanda Fövqəladə Hallar Nazirliyinin yaradılması haqqında Sərəncam imzalayıb. Dövlətimizin başçısının bir il sonra hər il dekabrın 16-nın nazirlik işçilərinin peşə bayramı günü kimi qeyd olunması barədə imzaladığı Sərəncam isə bu sahəyə göstərilən diqqət və qayğının daha bir bariz nümunəsidir.

Ümumiyyətlə, Fövqəladə Hallar Nazirliyi mülki müdafiəni, əhalinin və ərazilərin təbii və texnogen xarakterli fövqəladə hallardan qorunmasını, fövqəladə halların qarşısının alınması və nəticələrinin aradan qaldırılmasını, həmçinin, bir sıra istirqamətlər üzrə təhlükəsizliyin təmin olunmasını, fövqəladə halların yaranma ehtimalı böyük olduqda, yaxud baş verdikdə çevik reaksiya verilməsini, təbii, texnogen və terror təhlükələrinə məruz qalan strateji əhəmiyyətli müəssisələrin, obyektlərin və qurğuların mühafizəsini təşkil edən mərkəzi icra hakimiyyəti orqanıdır. Yeri gəlmişkən, ötən illərdə olduğu kimi, 2010-cu ilin arxada qoyduğumuz aylarında da FHN-nin bütün strukturları üzərlərinə düşən vəzifələrin öhdəsindən layiqincə gəliblər.

Ölkəmizdəki təbii fəlakətə çevik reaksiya

Fövqəladə Hallar Nazirliyi Prezident İlham Əliyevin göstərdiyi diqqət və qayğıya layiq olduğunu ölkəmizin bir sıra bölgələrində baş verən təbii fəlakət zamanı sərgilədiyi çevik və operativ reaksiya ilə növbəti dəfə təsdiqlədi. Məlum olduğu kimi, bu il aprel ayının sonlarında dünyada baş verən kəskin iqlim dəyişiklikləri və bir çox ölkələrdə intensiv yağışların yağması infrastruktur obyektlərinə ciddi zərərlər vurdu, sel və daşqınlar nəticəsində evlər su altında qaldı. Daşqınlara məruz qalan ölkələrin əksəriyyətində əhalinin fəlakət zonasından çıxarılması sahəsində ortaya çıxan ciddi problemlər isə son nəticədə insanların ölüm hallarının artmasına yol açdı. Eyni zamanda, bu ölkələrdə əhalinin evakuasiya olunması, onların çadır düşərgələrinə köçürülməsi, məişət qayğılarının həll edilməsi ilə bağlı ciddi problemlərin mövcudluğu da ortaya çıxdı.

O da qeyd olunmalıdır ki, göstərilən müddətdə ölkəmizin bir sıra rayonlarında da təbii fəlakətlər nəticəsində subasma halları baş verdi, infrastruktur, yaşayış və inzibati binalara ziyan dəydi, kənd təsərrüfatı sahələrində müəyyən fəsadlar müşahidə olundu. Lakin Azərbaycan Prezidentinin məsələyə çevik reaksiyası nəticəsində fəlakətin baş verdiyi ilk gündən etibarən əhalinin təhlükəsizliyinin təmin olunması və onların sosial-məişət qayğılarının həll edilməsi, eləcə də, tibbi və iaşə xidmətləri ilə əhatə olunmaları üçün davamlı tədbirlər görüldü. Dövlət başçısının sədrliyi ilə keçirilən müşavirədə Kür çayında suyun səviyyəsinin qalxması ilə bağlı baş verən təbii fəlakətlərin nəticələrinin aradan qaldırılması və bu istiqamətdə işlərin sürətləndirilməsi üçün müvafiq orqanlara xüsusi tapşırıqlar verildi. Ölkəmizin ümummilli işinə çevrilən həmin tədbirlər hər gün daha da gücləndirildi və nəticədə sonrakı günlərdə gözlənilə bilən təhlükələrin qarşısı tamamilə alındı. Prezident İlham Əliyevin tapşırıq və göstərişlərinə uyğun olaraq hökumət strukturları təbii fəlakətin qarşısını almaq, dəyən zərərlərin nəticələrini aradan qaldırmaq üçün səfərbər olunaraq fasiləsiz iş rejimində çalışdılar. Bir sözlə, bütün aidiyyəti qurumların səmərəli fəaliyyəti sayəsində respublikamız təbiətin ən ağır zərərlərindən və böyük bəladan xilas oldu.

Onu da qeyd edək ki, digər ölkələr müvafiq tədbirlər planını icra etməkdə texniki və maliyyə problemləri ilə üzləşdiyi halda respublikamızda belə bir tendensiya müşahidə olunmadı. Azərbaycanın bu işi öz gücünə, heç bir ölkənin yardımına ehtiyac olmadan həll etmək iqtidarında olduğu bir daha təsdiqləndi. Məlum oldu ki, təbii fəlakətin vurduğu zərərlərin qarşısının alınması, bəndbərkitmə işlərinin gücləndirilməsi, infrastrukturun bərpası, insanların bütün sosial-məişət problemlərinin həll olunması və insanlara dəymiş ziyanın ödənilməsi, həmçinin, kompensasiyaların verilməsində hökumət həm güclü maliyyə imkanlarına, həm də texniki-fiziki işlərin həyata keçirilməsi üçün müasir texnika və avadanlıqlara malikdir. Bunun nəticəsidir ki, insanların təhlükəsizliyinin təmin olunması, iaşə-məişət qayğılarının həll edilməsi, onlara müvafiq maddi yardımların göstərilməsi sahəsində ölkəmizin öz resurslarından istifadə olunmaqdadır.

Onu da qeyd edək ki, subasma zamanı öz evlərindən çıxmaq məcburiyyətində qalan əhali üçün salınmış çadır şəhərciklərində, həmçinin, təbii fəlakətə məruz qalmış kəndlərdə təhlükəsizliyi təmin etmək məqsədilə 24 saat fasiləsiz işləyən operativ qərargahlar quruldu. Daxili İşlər Nazirliyinin 500 nəfər və Fövqəladə Hallar Nazirliyinin isə 600-dən çox əməkdaşı qəsəbələrin, kəndlərin mühafizəsi ilə məşğul oldu. Bununla yanaşı, Fövqəladə Hallar Nazirliyinin 2 min nəfər şəxsi heyəti və 700-ə qədər texnikası Sabirabad, Saatlı, Neftçala, Salyan, Kürdəmir, Zərdab zonalarında çalışdı. Çadır şəhərciyində 24 saat ərzində təhlükəsizliyi tam təmin etmək üçün Səhiyyə Nazirliyinin tibbi heyəti və Fövqəladə Hallar Nazirliyinin bir helikopteri növbə çəkdi.

Bir sözlə, Kür və Araz çaylarının daşması nəticəsində baş vermiş təbii fəlakətlə əlaqədar Prezident İlham Əliyevin 2010-cu il 19 may tarixli Sərəncamı ilə yaradılmış Hökumət Komissiyasının tərkibinə daxil olan bütün dövlət qurumları, xüsusilə də Fövqəladə Hallar Nazirliyi təbii fəlakətin daha böyük fəsadlar törətməsinin qarşısını almaq və subasmaların vurduğu ziyanı aradan qaldırmaq üçün bütün işləri vaxtında və operativ şəkildə həyata keçirdilər. Dövlət başçısının diqqət və qayğısı nəticəsində yüksək texnika ilə təchiz olunan Fövqəladə Hallar Nazirliyi, eləcə də, digər təşkilatlar qarşıya qoyulan bütün tapşırıqların öhdəsindən layiqincə gələ bildi. Sözügedən təbii fəlakət zamanı o da məlum oldu ki, FHN təmsilçiləri tərəfindən bu qurumun əsas fəaliyyət istiqamətlərinə müvafiq olaraq mülki müdafiə, əhalinin və ərazilərin fövqəladə hallardan qorunması, yanğın təhlükəsizliyinin, su hövzələrində insanların təhlükəsizliyinin təmin edilməsi, fövqəladə hallarda çevik reaksiya verilməsi və humanitar yardımların idarə olunması işi uğurla təşkil edildi və həyata keçirildi.

Yayda da, qışda da iş başında

Təbii ki, FHN-nin əməkdaşlarının işləri heç də sözügedən fəaliyyətlə məhdudlaşmır. Nazirliyə daxil olan bütün strukturlar ilin bütün fəsillərində təmsil etdikləri, daha dəqiq desək, cavabdehlik daşıdıqları sahələrdə hər hansı problemlərin yaranmaması, həmçinin, mövcud olan problemlərin də dərhal aradan qaldırılması istiqamətində öz fəaliyyətlərini davam etdirirlər. Məsələn, ötən ilin dekabrında paytaxta yağan güclü qarın insanların və avtomobillərin gediş-gəlişinə mane olmasının qarşısını almaq üçün fəaliyyətə keçən ilkin qurumlardan biri məhz FHN oldu. Həmin vaxt paytaxt küçələrinə 20 texnika çıxaran FHN işçiləri ilə yanaşı, Mülki Müdafiə Alayının və Yanğından Mühafizə Xidmətinin 1000 nəfərə yaxın əməkdaşı da küçələrin qar və buz örtüyündən təmizlənməsi prosesinə qoşulmuşdu.

Yaxud da başqa bir fakt. Bu günlərdə havaların isti keçməsi ilə əlaqədar baş verə biləcək yanğınların qarşısını almaq üçün FHN-nin Dövlət Yanğın Nəzarəti Xidmətinin əməkdaşları Bakı və Sumqayıt şəhərlərinin, Abşeron rayonunun bağ massivlərində yanğın təhlükəsizliyi tədbirlərini davam etdirir, yay mövsümü ilə əlaqədar əhalinin böyük bir hissəsinin bağ evlərində istirahət etdiyini nəzərə alaraq əhali arasında yanğına qarşı təbliğat xarakterli söhbətlər aparılır.

Bağ massivlərində keçirilən növbəti yanğın təhlükəsizliyi tədbirində xüsusi avtonəqliyyat vasitələrinin, xüsusən də yanğın avtomobillərinin evlərə sərbəst yaxınlaşmasına sakinlər tərəfindən yaradılmış maneələr müəyyən edilib. Eyni zamanda, müvafiq icazələr olmadan dirəklərin, şlaqbaumların quraşdırılmasının, keçidlərin bağlanmasının yanğın hadisələri zamanı yanğın avtomobillərinin hərəkətinə, çevik manevr etməsinə maneçilik törətməsini nəzərə alaraq həmin maneələrin ləğv edilməsi üçün əməli tədbirlər görülüb.

Təbii ki, bu sıraya FHN-nin digər strukturlarının fəaliyyətini də əlavə etmək olar. Lakin sadəcə olaraq onu qeyd etmək yerinə düşər ki, FHN ilin bütün fəsillərində iş başındadır.

FHN təmsilçilərinin xaricdəki uğurları

Yeri gəlmişkən, hazırda dünyanın bir çox ölkələrinin müvafiq dövlət qurumları ilə əməkdaşlıq əlaqələri quran FHN, eyni zamanda, xarici ölkələrdəki fövqəladə vəziyyətlər zamanı öz yardımlarını da əsirgəmir. Yuxarıda da qeyd etdiyimiz kimi, buna misal olaraq, Rusiyada baş verən meşə yanğınlarının söndürülməsi prosesində Azərbaycan təmsilçilərinin göstərdikləri uğurlu fəaliyyəti qeyd etmək olar. Məlumat üçün deyək ki, Rusiya Federasiyasının ərazisini cənginə almış meşə yanğınlarının söndürülməsində köməklik göstərilməsi məqsədilə yola salınan Azərbaycan Respublikası Fövqəladə Hallar Nazirliyinin 2 ədəd helikopteri cari ilin avqust ayının 5-də Rusiyanın Ryazan şəhərinə çatıb. Azərbaycanlı yanğınsöndürən-xilasedicilər (4 qrupda 19 nəfərlik şəxsi heyətlə) dərhal “Mi-17-1V” və “Ka-32A” tipli helikopterlərlə Ryazan şəhəri ətrafında tüğyan edən meşə yanğınlarının söndürülməsinə başlayıblar. Rusiya Federasiyası Fövqəladə Hallar Nazirliyi ilə əlaqəli şəkildə həyata keçirilən əməliyyatlar ilk müsbət nəticələrini verib və bir neçə yanğın ocağı qısa müddətdə söndürülüb. Ümumiyyətlə, Azərbaycan aviatorları Türkiyənin iki “Ka-32” helikopterinin heyəti ilə birlikdə Ryazan vilayətində yanğın zonasına təxminən 560 uçuş həyata keçirib, alov mənbələrinə on tonlarla su töküblər. Aviatorlarımız ən güclü yanğınların qeydə alındığı bölgələrdə - Ryazan, Klepikov, Rıbnov rayonlarında işləyiblər.

Bu barədə yayılan məlumatda deyilir ki, Rusiyanın Baş naziri Vladimir Putin ölkəsində baş verən meşə yanğınlarının söndürülməsində iştirak etmiş yerli və xarici aviasiya dəstələrinin üzvlərinə göstərdikləri fədakarlığa görə təşəkkürünü bildirib, onlara xatirə hədiyyələri təqdim edib. AzərTAc İTAR-TASS agentliyinə istinadən xəbər verir ki, təntənəli mərasim “Ramenskoye” hava limanında keçirilib.

Rusiyanın Baş naziri 19 təyyarəçiyə xatirə saatları təqdim edib. Mükafatlar Rusiya təyyarəçiləri ilə yanaşı, Azərbaycan, Türkiyə, Belarus, Ukrayna və Fransa təmsilçilərinə də təqdim olunub. Vladimir Putin yanğının söndürülməsində Rusiyaya yardım etmiş ölkələrə təşəkkürünü bildirib.

Bir qədər əvvəl isə fövqəladə hallar naziri Sergey Şoyqu xarici ölkələrin yanğının söndürülməsində iştirak etmiş bütün təyyarəçilərini Rusiya Fövqəladə Hallar Nazirliyinin fəxri nişanları ilə təltif edib.

Öz növbəsində, Rusiyanın Ryazan vilayətinin qubernatoru Oleq Kovalyov meşə yanğınlarının söndürülməsində göstərdikləri mərdliyə və fədakarlığa görə Azərbaycan və Türkiyə aviatorlarına minnətdarlığını bildirib, onlara fəxri fərmanlar, təşəkkürnamələr və qiymətli hədiyyələr təqdim edib.

Yeri gəlmişkən avqustun 18-də təmsilçilərimiz Vətənə döndülər.

Uğurlu fəaliyyət davam edir

Bir sözlə, bu faktlar bir daha ölkəmizdə aparılan hərtərəfli islahatların, həyata keçirilən dövlət proqramlarının müsbət nəticələrə və uğurlara yol açdığını təsdiqləyir. Görünən odur ki, Prezident İlham Əliyevin Azərbaycan vətəndaşlarının sosial rifah halının yaxşılaşdırılması, həmçinin, nazirlik və komitələrin öz işlərini müasir dövrün tələblərinə uyğun şəkildə qurmaları üçün göstərdiyi diqqət və qayğı öz bəhrəsini verir. Bu gün Azərbaycanın nazirlik və komitələri nəinki ölkə daxilində həyata keçirilən işlərdə üzərlərinə düşən vəzifənin öhdəsindən layiqincə gəlir və uğurlar əldə edir, həmçinin, Fövqəladə Hallar Nazirliyinin timsalında ölkə xaricində də öz çevik və nümunəvi fəaliyyətləri ilə fərqlənirlər.

Nadir AZƏRİ

Yeni Azərbaycan.- 2010.- 20 avqust.- S. 3.