Bakı mədəniyyət, Qəbələ isə musiqi paytaxtına çevrilib

Bu gün Heydər Əliyev Fondunun dəstəyi ilə keçirilən Qəbələ II Beynəlxalq musiqi festivalının rəsmi açılışı olacaq

Bu gün Heydər Əliyev Fondunun dəstəyi ilə keçirilən Qəbələ II Beynəlxalq musiqi festivalının rəsmi açılışı olacaq. Artıq bir neçə gün öncə öz işinə başlayan festivalda müxtəlif ölkələrdən gəlmiş musiqiçilərin konsertləri də keçirilib. Təşkil olunmuş konsertlərdən formalaşmış təəssüratlar isə onu deməyə əsas verir ki, budəfəki musiqi festivalı da yüksək əhval-ruhiyyə içərisində keçəcək.

Bu cür musiqi festivallarının keçirilməsi Azərbaycanın dünyada nüfuzunun artmasına və ölkəmizlə bağlı həqiqətlərin əyani şəkildə müxtəlif ölkələrin mədəniyyət və incəsənət nümayəndələrinin diqqətinə çatdırılmasına xidmət edir.

Digər tərəfdən, Azərbaycan coğrafi əhəmiyyəti baxımından Avropa ilə Asiyanın arasında yerləşən dəhliz, eyni zamanda, böyük sivilizasiyaların, mədəniyyətlərin qovuşduğu unikal bir məkan kimi dünya xalqlarının diqqətini cəlb edir. Qərb və Şərq dünyasının ideyalarının qarışığından formalaşmış yeni fəlsəfi düşüncələr sistemi, təfəkkür və yaradıcılıq ruhunun dünyanı əyani sübutlarla heyran qoyması və postsovet məkanına daxil olan Azərbaycanın bəşəriyyətə “möcüzə” modeli təklif etməsi insanlarda bir daha həmin marağı doğurur. Artıq dünya ictimaiyyəti bu söylənilənləri öz gözlərilə görür və əsl həqiqətləri anlayır.

Eyni zamanda, bu tədbirlə Qəbələnin timsalında Azərbaycanın turizm potensialının dünya ictimaiyyətinin diqqətinə təqdim edilməsi faktını da qeyd etmək lazımdır. Çünki bu gün Qəbələdə yaradılmış turizm infrastrukturu bu bölgənin dünyanın öndə gedən istirahət məkanları ilə rəqabətə girməyə hazır olduğunu sübut edir. Dağlıq relyef, sıx meşə, beş ulduzlu otel əsil cənnət məkanını xatırladır...

Bununla yanaşı, bu cür musiqi festivalları yeni istedadların aşkara çıxarılmasına, gənclərin peşəkarlarla görüşünə və onlardan sənətin incəliklərini öyrənməyə imkan verir.

Xatırladaq ki, ötən il Heydər Əliyev Fondunun dəstəyi ilə Qəbələ şəhərində keçirilmiş Beynəlxalq musiqi festivalı və pianoçuların müsabiqəsinə göndərdiyi təbrik məktubunda Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva deyirdi ki, dünyanın tanınmış musiqi xadimlərinin iştirakı ilə keçirilən Qəbələ Beynəlxalq musiqi festivalı və pianoçuların beynəlxalq müsabiqəsi yeni istedadların aşkara çıxarılmasına, gənclərin peşəkarlarla görüşünə və onlardan sənətin incəliklərini öyrənməyə imkan verəcəkdir. Festival çərçivəsində məşhur pianoçuların təşkil edəcəyi ustad dərsləri gənc musiqiçilər üçün böyük töhfə olacaq.

Azərbaycan bu günə qədər dünya musiqi aləminə onlarla dahilər bəxş edib. Amma müəyyən zamanlarda həmin dahilərin təbliği zəif aparıldığından dünya ictimaiyyəti onlar haqqında çox az informasiyaya malik idi. Amma Ulu öndər Heydər Əliyevin hakimiyyətə gəlməsindən sonra mədəniyyətə, incəsənətə olan diqqət və qayğı artırıldı. Bu sahədə çalışan insanlar dövlətin qayğısı ilə əhatələndi, korifeylər dünya miqyasında tanıdılmağa başlandı. Bu gün də həmin kurs Prezident İlham Əliyev tərəfindən davam etdirilir. Heydər Əliyev Fondu da dövlətin bu sferadakı fəaliyyətinə xüsusi töhfələr verir. Bu gün rəsmi açılışı olan Qəbələ II Beynəlxalq musiqi festivalı da həmin xidmətlər sırasındadır.

Bu festivalın nəticəsi olaraq, Azərbaycana dünyanın müxtəlif yerlərindən gəlmiş qonaqlar ölkəmizlə bağlı, adət-ənənəmiz, mədəniyyətimiz, milli-mənəvi dəyərlərimiz, eyni zamanda, Azərbaycanın musiqi tarixində dünya miqyasında xidmətləri olmuş dahilər haqqında geniş bilgiyə sahib olacaqlar...

Heydər Əliyev Fondunun dəstəyi ilə keçirilən musiqi festivalını tanınmış musiqiçilər də yüksək qiymətləndirirlər.

Qəbələdə keçirilən II Beynəlxalq musiqi festivalının bədii rəhbərlərindən biri olan Dmitri Yablonski bildirib ki, bu tədbir yüksək səviyyədə təşkil edilib. Musiqisevərlər 12 gün müddətində bir çox dünya şöhrətli musiqi kollektivlərinin, o cümlədən, London Kral Filarmoniya Orkestrinin, Xloe Hanslipin, Emilio Ponsın, Boris Berezovskinin, Yuri Başmetin, Fərhad Bədəlbəylinin, Murad Adıgözəlzadənin, Rauf Abdullayevin maraqlı konsert proqramından həzz almaq imkanı əldə edəcəklər. Birinci festivaldan fərqli olaraq builki konsertlər bir deyil, üç səhnədə təşkil ediləcək. Dmitri Yablonski əlavə edib ki, musiqi ictimaiyyəti arasında böyük rəğbətlə qarşılanan Qəbələ festivalına dünyanın müxtəlif ölkələrini təmsil edən gənc musiqiçilər də qatılıblar. Ötən il olduğu kimi, bu dəfə də onlar üçün ustad dərsləri keçiriləcək. Dmitri Yablonski deyib: “Mən deyərdim ki, son illər Azərbaycanda mədəniyyətin inkişafına, çiçəklənməsinə dövlət başçısı İlham Əliyev və Heydər Əliyev Fondunun prezidenti Mehriban xanım Əliyeva tərəfindən çox böyük dəstək verilir, ölkədə musiqi ilə bağlı beynəlxalq tədbirlər keçirilir. Artıq Bakı mədəniyyət paytaxtına, Qəbələ isə musiqi şəhərinə çevrilib. Mən bir ildir ki, Qəbələdə işləyir və yaşayıram. Füsunkar təbiətin, uca dağların və yaşıl meşələrin əhatəsində, təmiz havada belə gözəl musiqi bayramının keçirilməsi yerli və xarici qonaqlara unudulmaz anlar yaşadır”.

Heydər Əliyev Fondunun dəstəyi ilə keçirilən Qəbələ II Beynəlxalq musiqi festivalının bədii rəhbəri, Bakı Musiqi Akademiyasının rektoru, professor Fərhad Bədəlbəyli son vaxtlar Azərbaycanda bu cür yüksək səviyyəli tədbirlərin keçirilməsinin bir ənənəyə çevrildiyini deyib. Bu işdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın çox böyük qayğısını hiss etdiklərini bildirən Fərhad Bədəlbəyli musiqimizin xarici ölkələrdə də yüksək səviyyədə təbliğ olunduğunu diqqətə çatdırıb. Fərhad Bədəlbəyli deyib: “İyulun 15-də Londonda Qara Qarayev və Fikrət Əmirovun əsərlərini səsləndirdim. Konsertdən sonra ingilis, yapon və alman tamaşaçılar mənə yaxınlaşaraq dedilər ki, biz indiyədək bu musiqi əsərlərini eşitmədiyimizə görə çox təəssüflənirik. Bunlar dahiyanə musiqilərdir, şedevrdir. Biz indiyədək müsəlman ölkəsində belə yüksək səviyyəli simfonik musiqi əsərlərinin mövcudluğuna inana bilmirdik. Şübhəsiz, bunun təqsiri özümüzdə olmuşdur. Açığını deyim ki, təbliğat məsələsində passivliyimiz var idi. İndi isə ölkəmiz bu sahədə çox irəli getmişdir. Birinci növbədə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya kollektivimiz adından təşəkkür etmək istəyirəm. Səmimi şəkildə etiraf edirəm ki, Heydər Əliyev Fondunun köməyi olmasaydı, biz belə bir festivalı paytaxtdan kənarda yüksək səviyyədə keçirə bilməzdik”.

F.Bədəlbəyli qeyd edib ki, bu festival kommersiya xarakteri daşımır. Burada əsas məqsəd maarifçilik, musiqimizin təbliğidir. Ona görə də, builki festivalın proqramını daha da zənginləşdirərək oraya Azərbaycanla bağlı daha bir neçə konsertlər əlavə etmişik. Ötən il olduğu kimi, builki festival günlərində də Qəbələdən əlavə, Bakı, Gəncə, Oğuz, Ağdaş, İsmayıllı, Şəki, Mingəçevirdən müəllimlər, musiqiçilər, həkimlər, ziyalılar, gənclər konsertə gəlir və Azərbaycan bəstəkarlarının simfonik əsərlərini, dünya musiqi incilərini heyranlıqla dinləyirlər.

Qeyd edək ki, Heydər Əliyev Fondunun dəstəyi ilə Qəbələ şəhərində keçirilən II Beynəlxalq musiqi festivalı çərçivəsində ilk olaraq, Azərbaycan bəstəkarlarının əsərləri səsləndirilib. Konsertin dirijoru, Bakı Musiqi Akademiyasının professoru, Əməkdar İncəsənət xadimi Yalçın Adıgözəlov isə bildirib ki, ölkəmizi dünyada təbliğ etmək üçün onun siyasəti, idmanı və mədəniyyəti ön sıradadır: “Artıq ikinci ildir ki, təşkil edilən Qəbələ Beynəlxalq musiqi festivalı Azərbaycan mədəniyyətini dünyaya təqdim etmək üçün ən yaxşı fürsətdir. Ümid edirəm ki, Qəbələ festivalı xarici qonaqlara Azərbaycan bəstəkarlarının əsərlərini təqdim etməklə yanaşı, yerli musiqisevərlərə dünyanın klassik sənət inciləri ilə yaxından tanış olmağa imkan yaradacaqdır. Mən sevinirəm ki, təşkilatçılar festivalın proqramını daha da zənginləşdirərək beynəlxalq musiqi bayramına ABŞ, Kuba, Rusiya, İngiltərə, Fransa və İtaliyadan tanınmış musiqiçiləri dəvət etmiş, ən əsası isə burada Azərbaycan musiqisinin təbliği üçün daha geniş imkanlar yaratmışlar”.

Bir sözlə, Heydər Əliyev Fondunun dəstəyi ilə keçirilən Qəbələ II Beynəlxalq musiqi festivalı bu gün Azərbaycan üçün böyük əhəmiyyət kəsb edir.

Ramil VƏLİBƏYOV

Yeni Azərbaycan.- 2010.- 30 iyul.- S.4.