Əhməd Ələsgərov 75 illik yubileyini qeyd edib

Dunən Azərbaycanın ən tanınmış futbol mütəxəssislərindən olan Əhməd Ələsgərovun ad günü idi. Uzun illərdir Ukraynanın Odessa şəhərində yaşayan məşqçimiz 75 illik yubileyini qeyd edir. 1935-ci ildə Bakıda anadan olan Ələsgərovun futbolçu karyerası "Neftçi" komandası ilə bağlı olub.

1956-65-ci illərdə bu komandada oynayan, həmçinin, kapitan sarğısını daşımış yarımmüdafiəçi SSRİ çempionatında və kubokunda 210 oyunda 17 qol vurub. Futbolçu karyerasını erkən başa vurmalı olan Ələsgərov məşqçi kimi debütdə "Neftçi" ilə' böyük uğura imza atır.

Belə ki, "ağ-qaralar" SSRİ çempionatında yeganə mükafatımız olan bürünc medalı 1966-cı ildə məhz onun rəhbərliyi altında qazanıb. "Neftçi"də SSRİ vaxtında 1966-70, 1979-82-ci illərdə baş məşqçi olan Ələsgərov müstəqillik qazandığımızdan sonra bu komandanın ilk çalışdırıcısı olub. Flaqman 1992-ci ildə onun başçılığı altında ilk ölkə çempionu olub, 1998-2000-ci illərdə isə gümüş və bürünc medal qazanıb. Ələsgərov 425 matçla "Neftçi"nin tarixinə ən çox oyun keçirən baş məşqçi kimi düşüb. Futbolçuları psixoloji baxımdan güclü hazırlaşdırmağı ilə seçilən məşqçimiz vətəndən kənarda Tacikistanın "Pamir" (1972), Ukraynanın "Çernomorets" (1973-77), Moldovanın "Nistru" (1988-89) yə "Şerif (1997-98) klublarını çalışdırıb. SSRİ çempionatında ikinci bürünc medalını 1974-cü ildə "Çernomorets"lə qazanan Ələsgərov vətəndə Naxçıvanın "Araz" klubunun da baş məşqçisi olub. O, 2006-cı ildə "Bakı" ilk çempionluğunu qazanan zaman klubda vitse-prezident və müşavir vəzifələrində çalışıb. Milli komandamızın ilk baş məşqçisi kimi futbol tariximizə düşən Ələsgərov 1992-93-cü və 1998-2000-ci illərdə yığmada işləyib. O, 4 Ölkənin - Azərbaycan, Ukrayna, Moldova və Tacikistanın Əməkdar məşqçisidir.

Yeni Azərbaycan.- 2010.- 6 oktyabr.- S.8.