Gənc yazıçının ilk kitabının “imza günü” keçirilmişdir

Bakı, 14 yanvar (AzərTAc). Yanvarın 14-də Azərbaycan Yazıçılar Birliyinin (AYB) “Natəvan” klubunda gənc yazıçı Nərmin Hüseynzadənin ilk qələm təcrübəsi olan “Qırmızı” kitabın “imza günü” keçirilmişdir.

AzərTAc xəbər verir ki, Azərbaycan ədəbiyyatının tanınmış simalarının iştirak etdikləri tədbirdə ədəbi mühitə yenicə atılmış Nərmin Hüseynzadənin yaradıcılıq yoluna nəzər salınmışdır.

Tədbirdə əvvəlcə ulu öndər Heydər Əliyevin iştirak etdiyi mərasimlərdən birində Nərmin Hüseynzadənin çıxışını əks etdirən videogörüntü nümayiş olunmuşdur.

AYB-nin katibi, “525-ci qəzet”in baş redaktoru Rəşad Məcid ədəbi ictimaiyyətdə Nərmin Hüseynzadənin yaradıcılığına böyük ümidlər bəsləndiyini diqqətə çatdırmış, onun gələcəkdə yeni uğurlar qazanacağına əmin olduğunu bidirmişdir.

Görüşün aparıcısı, şair-tərcüməçi Səlim Babullaorlu Nərmin Hüseynzadənin ilk qələm təcrübəsi olan “Qırmızı” kitabı haqqında geniş məlumat vermişdir. Bildirmişdir ki, “imza günü” keçirilən kitaba müəllifin “Qırmızı ayaqqabımın xatirəsinə”, “Qisas”, “Uzaqlardan üç məktub”, “Əsa” və digər hekayələri, esseləri, şeirləri, publisistik yazıları daxil edilmişdir.

Mərasimdə çıxış edənlər gənc yazıçının ilk kitabını yüksək qiymətləndirmiş, ona ədəbi yaradıcılıqda yeni uğurlar arzulamışlar.

Əməkdar Artist Eldost Bayramın ifasında Nərmin Hüseynzadənin əsərlərindən nümunələr tədbir iştirakçıları tərəfindən rəğbətlə qarşılanmışdır.

Sonda Nərmin Hüseynzadə tədbirin təşkilatçılarına və iştirakçılarına təşəkkürünü bildirmiş, yeni şeirlərini oxumuşdur.

Yeni Azərbaycan.- 2011.- 15 yanvar.- S.11.