Əmanətçilərə fərdi birdəfəlik ödəmələrin verilməsi haqqında qərar dövlətin humanist siyasətinin növbəti təzahürüdür

“Yeni Azərbaycan” qəzetində keçirilən növbəti “dəyirmi masa”da Prezident İlham Əliyevin müvafiq Fərmanının əhəmiyyəti və onun icrası ilə bağlı görülən işlər haqqında geniş müzakirələr aparılıb

Məlum olduğu kimi, mart ayının 14-də Azərbaycan Prezidenti İlham Əliyev “Keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödəmələrin verilməsi haqqında” Fərman imzalayıb. Ötən dövr ərzində dövlət başçısının bu Fərmanının icrası ilə bağlı bir sıra mühüm işlər görülüb və sənədə uyğun olaraq, iyun ayından etibarən ödəmələrə başlanacaq. Təbii ki, Azərbaycan xalqının böyük razılıqla qarşıladığı və insanlara sevinc bəxş edən bu addım mütəxəssislər tərəfindən də yüksək qiymətləndirilir. “Yeni Azərbaycan” qəzetində keçirilən növbəti “dəyirmi masa”da da qonaqlarımızla həm bu Fərmanın əhəmiyyəti, həm də onun icrası ilə bağlı görülən işlər haqqında danışdıq. Bu “dəyirmi masa”mızın qonaqları isə Milli Məclisin Sosial siyasət komitəsinin üzvü, Yeni Azərbaycan Partiyası (YAP) Nizami rayon təşkilatının sədri Sədaqət Vəliyeva, Milli Məclisin Regional məsələlər komitəsinin üzvü Azər Badamov, YAP Siyasi Şurasının üzvü, partiyanın Qaradağ rayon təşkilatının sədri Aydın Hüseynov və Milli Qeyri-Hökumət Təşkilatları Forumunun prezidenti Rauf Zeynidir.

- İstərdik, ilk olaraq, Azərbaycan Prezidenti İlham Əliyevin “Keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödəmələrin verilməsi haqqında” 14 mart tarixli Fərmanının əhəmiyyəti haqqında danışaq. Azər müəllim, ölkəmizdə həyata keçirilən sosial-iqtisadi siyasətin tərkib hissəsi olan bu Fərmanı, ümumiyyətlə, əmanətlərin geri qaytarılması ilə bağlı dövlətin ortaya qoyduğu iradəni necə qiymətləndirirsiniz?

Azər Badamov: Heç şübhəsiz ki, ölkəmizin maddi gücünün, valyuta ehtiyatlarının artması keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödəmələrin verilməsini şərtləndirib. Bu, ölkəmizdə son 19 ildə aparılan düzgün istiqamətlənmiş sosial-iqtisadi siyasətin nəticəsi olaraq meydana çıxıb. Ümumiyyətlə, bu siyasi kursun uğurlarını biz təkcə bu məsələdə görmürük. Bu gün ölkəmizdə mütəmadi olaraq təqaüdlər, maaşlar artırılır, insanların sosial vəziyyətinin yüksəldilməsi istiqamətində davamlı tədbirlər görülür. Bu, vətəndaşların rifah halının yüksəldilməsi məsələsinin hər zaman dövlətimizin diqqət mərkəzində olmasından xəbər verir. Əmanətlərlə bağlı suallar hər zaman seçicilər tərəfindən bizlərə ünvanlanırdı. Möhtərəm Prezidentimizin müvafiq Fərmanı isə sözügedən məsələnin öz həllini tapmasına şərait yaratdı. Dövlət başçısının Fərmanı vətəndaşlarımız, seçicilərimiz tərəfindən böyük sevinclə qarşılandı. Bu addım bir daha dövlətimizin apardığı siyasətin əsasında vətəndaş, insan faktorunun dayanmasından və işıqlı gələcəkdən xəbər verir.

- Sədaqət xanım, bu Fərmanı ölkəmizdə aparılan sosial siyasət nöqteyi-nəzərindən necə dəyərləndirirsiniz?

Sədaqət Vəliyeva: Qeyd etmək istərdim ki, bu məsələ müəyyən dövrlərdə müzakirə olunub, Milli Məclisdə də mütəmadi şəkildə səsləndirilib. Dövlət başçısının sözügedən Fərmanı birbaşa insanlarımızın sosial vəziyyətinin yüksəldilməsinə istiqamətlənib. Hazırda dünyada qlobal iqtisadi böhranın davam etdiyi bir vaxtda 20 illik müstəqillik tarixi olan bir dövlət üçün bu, böyük uğurdur. Azərbaycan dövlətinin, möhtərəm Prezidentimizin bu tarixi Fərmanı imzalaması sevindirici və qürurvericidir. İnsanlarımız tərəfindən bu məsələ olduqca böyük sevinclə qarşılanır.

- Aydın müəllim, qeyd olunduğu kimi, bu məsələ 20 il ərzində mütəmadi olaraq gündəmə gəldi. Amma məhz bu il məsələnin həllinə imkan yarandı. Ona görə də, bir iqtisadçı-ekspert kimi, istərdik bu sualla bağlı sizə müraciət edək. Bu gün hansı iqtisadi şərtlər formalaşdı ki, bu addımın atılması, əmanətlərin vətəndaşlara qaytarılması reallaşdı?

Aydın Hüseynov: Hörmətli millət vəkillərimizin də qeyd etdiyi kimi, bu, ölkə iqtisadiyyatının inkişaf tempinin yüksəlişi ilə əlaqədar olan bir məsələdir. Hazırda Avropanın bir sıra böyük dövlətlərinin hansı durumla üz-üzə qaldığı məlumdur. Belə bir zamanda Azərbaycanda SSRİ dövründə batmış əmanətlərin qaytarılması, ən əsası isə, bunun qısa bir zaman ərzində həyata keçirilməsinin nəzərdə tutulması olduqca mühüm hadisədir. İlk növbədə, qeyd edim ki, dövlət başçısının Fərmanında əmanətlərin qaytarılması ilə bağlı ortaya çıxa biləcək bütün suallar öz cavabını tapıb. Əmanətlərin qaytarılması mexanizmi çox asan şəkildə tətbiq olunacaq. Bildiyiniz kimi, 1992-ci ildə SSRİ rublundan manata keçid dövründə ekvivalent kimi birin ona nisbəti götürülmüşdü. 2006-cı ildə manatın denominasiyası həyata keçirilərkən bu, 1/5000 nisbəti əsasında aparıldı. Yəni, SSRİ əmanət bankında 2000 rublu olan insanın pulu avtomatik şəkildə 10 dəfə azaldılır və sonradan 5000-nə bölünür və qalır 2 manat. Həmin miqdar isə 75-ə vurulur. Niyə burada məsələ 2000 rublla götürülür? Çünki SSRİ əmanət bankında batan əmanətlərin böyük həcmi, təxminən, 70 faizi 2000 rubl miqdarında olub. Yəni, Fərmanın özündə də həmin 70 faizi təşkil edən insanlara böyük həssaslıqla yanaşılır. Miqdar artdıqca isə indeks azalır. Sirr deyil ki, bu gün əmanətlərin qaytarılması məsələsinə fərqli müstəvidə yanaşan, bir sıra hallarda bu məsələyə fərqli don geyindirməyə çalışanlar olur. Xüsusilə, Azərbaycanın radikal müxalifəti müəyyən zamanlarda SSRİ banklarında əmanəti batmış insanları narazı kütlə qismində qələmə verməyə çalışırdı. Bu üzdən də əmanətlər məsələsinin öz həllini tapması həmin düşərgədə böyük narahatlığa səbəb olub. Hətta bəzi məqamlarda radikal müxalifət təmsilçiləri, konkret, İsa Qəmbər Azərbaycandan köçüb gedən ermənilərin belə əmanətlərinin qayğısına qalmağa çalışır, onlara guya yol göstərir.

A.Badamov: Fərmanda da qeyd olunur ki, Azərbaycan vətəndaşı olan və Azərbaycan Respublikası vətəndaşının şəxsiyyət vəsiqəsi olan şəxslərin əmanətləri qaytarılır. Əgər söhbət Dağlıq Qarabağın erməni əhalisindən gedirsə, həmin insanlar buyursunlar, Azərbaycanın şəxsiyyət vəsiqəsini alsınlar və sonra müvafiq orqanlara müraciət etsinlər. Amma təəssüf ki, Ermənistan dövləti deportasiyaya uğramış azərbaycanlılar üçün heç bir kompensasiya nəzərdə tutmayıb və onların əmanətlərini qaytarmayıb. Onların qanun layihəsində bu nəzərdə tutulmayıb. Bizim Ermənistandan qovulan insanlarımızın isə bir yolu qalıb ki, öz hüquqlarını beynəlxalq məhkəmələr vasitəsilə bərpa etsinlər.

A.Hüseynov: Başqa bir maraqlı məqamı da diqqətinizə çatdırmaq istəyirəm. Əgər İsa Qəmbər bu məsələdən belə “narahat” idisə, nə üçün parlamentin sədri olduğu zaman bu məsələni büdcə layihəsinə salmadı, heç bir qərar layihəsi hazırlanmadı? Və ya o zamanlar dövlət katibi vəzifəsini tutmuş Əli Kərimli deyir ki, SSRİ dövründən qalmış 4 milyard 800 milyon rubl haradadır? Əslində, bunu Əli Kərimlinin özündən soruşmaq lazımdır. Banklarda qalıq vəsait yox idi. O zamanlar yaradılmış ləl-cəvahirat fondunun vəsaiti hara getdi, onlar bu vəsaitləri hara xərclədilər? 1993-cü ildə Ulu öndər Heydər Əliyev hakimiyyətə gəldiyi zaman dövlət büdcəsi sıfır vəziyyətində idi. Azərbaycan 1993-cü ildə boş bir büdcəsi olan, bu gün isə 55 milyard dollar strateji valyuta ehtiyatlarına malik və 22 milyardlıq illik dövlət büdcəsi olan ölkəyə çevrilib. Azərbaycan Respublikasının Prezidenti siyasətində həmişə reallığa söykənir. Bugünkü reallıq isə ondan ibarətdir ki, Latviya istisna olmaqla keçmiş SSRİ məkanında ən yüksək indekslə əmanətləri məhz Azərbaycan dövləti qaytarıb. Qazaxıstanda hər 1000 rubla 60 dollar, Rusiyada hər 1000 rubla 30 dollar qaytarılıb. Azərbaycanda isə hər 1000 rubla 185 dollar nəzərdə tutulub. Müqayisə göz önündədir. Ukrayna, hətta mərhələli şəkildə bu prosesi aparmaq istəsə belə, başa çatdıra bilmədi. Azərbaycanın radikal müxalifəti iddia edir ki, Ermənistan 2 milyard dollar əmanət qaytarıb. Bu, gülünc bir məsələdir, axı Ermənistanın dövlət büdcəsi 2,5 milyard həcmindədir. Görəsən, ermənilər bu pulu haradan alıb qaytarıb? Demək ki, bütün deyilənlərin hamısı yalandır. Sadəcə, bütün bu dezinformasiyalar əmanətçilərdə çaşqınlıq yaratmağa xidmət göstərir. Amma onlar dərk etmirlər ki, bu gün Azərbaycan vətəndaşı reallığı gözü ilə görür və onu aldatmaq mümkün deyil.

- Aydın müəllim, Prezidentin Fərmanında göstərilir ki, iyun ayından birdəfəlik ödəmələrə başlanacaq. Bu Fərmanın icrası ilə bağlı hansı işlər görülür?

- Qeyd edim ki, möhtərəm Prezidentimizin Fərmanına əsasən işlər kifayət qədər sürətli həyata keçirilməkdədir. Artıq Maliyyə Nazirliyində müvafiq işlə məşğul olan komissiya yaradılıb. Bu komissiya müvafiq icra orqanlarının təmsilçilərinin iştirakı ilə operativ fəaliyyət göstərir. Məsələ ilə bağlı internet resursu xidmət göstərir ki, vətəndaşlarımız bu saytın köməyi ilə lazımi məlumatları əldə edə bilirlər. Bundan başqa, “Qaynar xətt” yaradılıb və gün ərzində həmin “Qaynar xətt”ə minlərlə əmanətçi zəng vurur, lazımi məsləhətlər alırlar. Maliyyə Nazirliyində əmanətçilərin sualları cavablandırılır.

Bundan başqa, Nazirlər Kabinetinin qərarına görə, Keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödəmələrin verilməsi və bu işin təşkil edilməsi, o cümlədən, bu işin icrası üçün “Kapital Bank” Açıq Səhmdar Cəmiyyəti tərəfindən müddətli əmək müqavilələri əsasında əlavə işçi qüvvəsinin cəlb edilməsi, onların yerləşdirilməsi xərclərinin ödənilməsi, maddi-texniki və proqram təminatı məsələlərinin həll edilməsi məqsədi ilə 2012-ci ilin dövlət büdcəsində nəzərdə tutulmuş Ehtiyat Fondundan Azərbaycan Respublikasının Maliyyə Nazirliyinə ilkin olaraq 300 000 000 (üç yüz milyon) manat məbləğində vəsait ayrılacaq.

Həmçinin, “Kapital bank”da da xüsusi əlaqələndirmə mərkəzi yaradılıb. Hər hansı mübahisəli məsələlər və ya bank tərəfindən qaldırılan məsələlər komissiyaya ünvanlanır. Məsələn, hər hansı əmanətçinin əlində əmanət kitabçası yoxdursa, lakin o şəxs hesabı haqda məlumat və ya şəxsi hesabının nömrəsini bilirsə, onlar bu komissiyaya müraciət edə bilərlər. Lakin həmin müraciətlər xüsusi komissiya tərəfindən araşdırılacaq. Araşdırma nəticəsində həmin əmanətçiyə cavab veriləcək. Bütün bunlar isə, nəticə etibarilə, prosesin daha şəffaf və uğurla həyata keçirilməsinə yönəlib.

- Rauf bəy, siz Milli QHT forumunun prezidenti kimi, vətəndaş cəmiyyətinin bu proseslərə münasibətini necə xarakterizə edərdiniz? Cənab Prezidentin müvafiq Fərmanını vətəndaş cəmiyyətinin üzvləri necə qiymətləndirir?

- Rauf Zeyni: Qeyd etmək lazımdır ki, ötən illər ərzində Azərbaycan vətəndaşını narahat edən, ictimai şüurda narahatlıq yaradan iki məsələdən biri məhz əmanətlərin qaytarılması ilə bağlı məsələ idi. Ölkə Prezidentinin müvafiq Fərmanı isə böyük bir inama yol açdı. Çünki əhali müəyyən mənada bu əmanətlərin qaytarılmasına inamını itirmişdi. Düzdür, ölkəmizin iqtisadi qüdrəti ildən-ilə möhkəmlənir, gəlirlərimiz artır. Amma bununla yanaşı, nəzərə almaq lazımdır ki, biz müharibə şəraitində olan bir dövlətik və bu gün işğal altında olan torpaqlarımızın qaytarılması istiqamətində mühüm tədbirlər görülür, Azərbaycanın hərbi potensialı artır. Bu gün, həqiqətən, ölkəmiz güclənir, Azərbaycanda “Eurovision” kimi mötəbər bir yarışma keçirilir, bir sıra beynəlxalq tədbirlər reallaşır. Bütün bunlar hamısı Azərbaycanın iqtisadi-siyasi çəkisinin göstəricisidir.

O ki qaldı əmanətlər məsələsinə, bir məqamı xüsusi olaraq xatırlatmaq istəyirəm: Azərbaycanın SSRİ bankında 7 milyard dollar vəsaiti qalmışdı. Bu vəsaitin içində pensiyalar da vardı, başqa vəsaitlər də vardı. O zamanlar Azərbaycanın ehtiyatları SSRİ bankında saxlanılırdı. Sovet dövrünün qanunları belə tələb edirdi və Azərbaycan özü müstəqil valyuta saxlamaq hüququna malik deyildi. Azərbaycan vətəndaşlarının həmin 7 milyard vəsaiti isə SSRİ-nin varisi kimi Rusiya tərəfindən bizə qaytarılmadı. Bu üzdən də 1994-95 - ci illərdə təqaüdlərin verilməsi ilə bağlı məsələlər olduqca çətinlik yaradırdı. Amma bu gün əmanətlərin qaytarılması da məhz dövlətimizin qüdrətindən irəli gəlir. Məhz bu qüdrət bizə imkan verir ki, yüksək indekslə bu pulu qaytaraq. Əks halda, biz də bir sıra postsovet dövlətləri kimi kiçik, simvolik bir pul qaytarılması ilə kifayətlənərdik.

Bu məsələ ilə bağlı bizim iqtisadi, sosial, hüquqiyönümlü QHT-lərimiz dəfələrlə tədbirlər keçiriblər, ictimai rəylə bağlı hesabatlar hazırlayıblar və əmanətlərin qaytarılması istiqamətində fəallıq nümayiş etdiriblər. Bir daha qeyd etmək istəyirəm ki, verilən Fərmana xalqımızın münasibəti çox müsbətdir. Bu, öz növbəsində, xalqımızın işğal olunmuş torpaqlarımızın azad ediləcəyinə inamını da artırır.

A.Badamov: Bayaq çox maraqlı bir məsələyə toxunduq. Azərbaycan SSRİ dövründə tək-tək respublikalardan idi ki, mərkəzdən dotasiya almırdı və özü-özünü saxlayırdı. Ona görə də, Azərbaycan vəsaitləri həmin dövrdə Moskvada cəmlənib saxlanılırdı. SSRİ dağılandan sonra SSRİ Əmanət Bankının Azərbaycan Əmanət Bankında saxlanılan əmanətlərin qaytarılması ilə bağlı müstəqil respublikamızın hüquqi məsuliyyəti yox idi. Amma Azərbaycan dövləti çox humanist bir qərar qəbul edərək bu addımı atdı. Bununla yanaşı, bizim dövlət siyasətimizin əsasında insan faktoru dayanır. İş yerlərinin açılması, xəstəxanaların, məktəblərin tikilməsi, yolların salınması və digər infrastrukturların yenilənməsi birbaşa insanlarımızın sosial rifahının yüksəldilməsinə xidmət edən layihələrdir. Təbiidir ki, ölkəmizin əldə etdiyi bu inkişaf beynəlxalq aləm tərəfindən də yüksək qiymətləndirilir. Cəmisi 20 illik müstəqillik tarixinə malik olmağımıza baxmayaraq, bizim inkişaf imkanlarımız çox yüksəkdir. Bu nailiyyətlərə isə Ulu öndər Heydər Əliyev tərəfindən əsası qoyulan və bu gün möhtərəm Prezidentimiz cənab İlham Əliyev tərəfindən uğurla davam və inkişaf etdirilən siyasi kurs nəticəsində nail olunub.

- Sədaqət xanım, bu Fərmanın iqtisadi və sosial tərəflərini müzakirə etdik. Amma təbii ki, bunun humanitar, insani tərəfi də mövcuddur. Bu da ondan ibarətdir ki, dövlətimizin başçısının bu qərarı vətəndaşın dövlətə inamının artmasına, insanların güzəranının daha da yaxşılaşmasına gətirib çıxaracaq...

S.Vəliyeva: Tamamilə doğru vurğulayırsınız. Bu addım həm də insanların sosial vəziyyətinin yaxşılaşdırılmasına yönəlik bir qərardır. Bu gün Azərbaycanın sərvətləri Azərbaycan xalqına məxsusdur. Əgər zaman-zaman bu sərvətlər fərqli xalqların deyil, Azərbaycan xalqının problemlərinin həllinə yönəldilsəydi, imperiyalar Azərbaycan xalqına məxsus sərvətləri oğurlayıb talan etməsəydi, bu gün dövlətimiz, bəlkə də, dünyanın ən inkişaf etmiş ölkələrindən biri olardı.

R.Zeyni: Bjezinski demişdi ki, əgər Azərbaycandan 100 il ərzində aparılan neftin əvəzi Azərbaycana qaytarılsa, onun ərazisini 3 santimetr qızılla örtmək mümkün olar.

S.Vəliyeva: Amma buna baxmayaraq, Azərbaycan artıq çətinlikləri, işğalları geridə qoyub, işıqlı gələcəyə doğru inamla irəliləyir. Ölkə Prezidentinin xalqına qayğısı, vətəndaşlarımızın problemlərinin həlli, insanlarımızın güzəranının ildən-ilə yaxşılaşdırılması yönündə atılan addımlar bunu deməyə əsas verir ki, Azərbaycan yaxın perspektivdə ən inkişaf etmiş, qabaqcıl dövlətlərdən birinə çevriləcək.

A.Badamov: Ən yüksək nailiyyətlərə çatmaq üçün mütləq zaman lazımdır. Burada qısa bir haşiyəyə çıxıb, bir məsələni vurğulamaq istəyirəm. Biz bu ilin yanvar ayında Türkiyədə səfərdə olduq və orada bələdiyyələrin fəaliyyəti ilə tanış olduq. Orada səsləndi ki, Türkiyə daxilində reallaşdırılan layihələrin əksəriyyətini bələdiyyələr həyata keçirir və onların fəaliyyəti olduqca fəaldır. Mən orada sual verdim ki, sizdə neçə ildir bələdiyyə sistemi formalaşıb? Cavab verdilər ki, 1905-ci ildən sonra bu sistem Türkiyədə qurulub və 100 ildən artıqdır ki, fəaliyyət göstərir. Amma səslənən uğurlara son zamanlarda nail olunub. Bizdə bu sistem 10 ildir qurulub, amma mühüm nailiyyətlər əldə olunub və yenə də təkmilləşdirmə aparılır. Yəni, hər bir uğur zamana ehtiyac duyur. Bu gün gənc Azərbaycanda mühüm addımlar atılır, yeni standartlara uyğun qanun layihələri hazırlanır, vətəndaşların sosial rifahının yüksəldilməsi istiqamətində davamlı tədbirlər görülür, bunların da nəticələrini hər bir vətəndaşımız öz həyatında hiss edir.

- Vaxtilə əmanətlər niyə qaytarılmır deyənlər bu gün əmanətlər niyə qaytarılır, bu, inflyasiyaya yol açacaq deyirlər. Bu fikirlər arasındakı kəskin dəyişmə, mövqesizlik nə ilə əlaqədardır?

R.Zeyni: Bütün ümummilli məsələlərdə bir ortaq davranış, ortaq mövqe olmalıdır. Biz bu gün ümummilli məsələmiz olan Qarabağdan danışırıqsa, hətta elə əmanətlərin qaytarılmasından danışırıqsa, regionda gedən prosesi və bizim inkişafımızı, qüdrətlənməyimizi istəməyən dövlətlərin olmasını nazərə alsaq, uğurları qeyd etməmək mümkün deyil. Müxalifətin fəaliyyəti hakimiyyət uğrunda mübarizə aparmaqdır, bu təbiidir. Amma bunu qanunlar çərçivəsində, normaları pozmadan etmək lazımdır. Axı müxalifətsənsə belə, Azərbaycan müxalifətisən və dövlətin hər bir uğuruna sevinməlisən. Bu uğurlara necə sevinməmək olar? İqtidara məhəbbətin və ya nifrətin gözü ilə baxmaq olmaz, iqtidara obyektivliyin gözü ilə baxmaq lazımdır. İnkişaf gedir, beynəlxalq təşkilatlar müsbət rəy verir, bütün bunlara obyektivlik naminə qiymət vermək lazımdır.

- A.Hüseynov: Bu gün YAP, Azərbaycan iqtidarı dövlətçilik maraqlarını hər şeydən üstün tutur, qəbul edilən bütün qərarlarda, atılan hər bir addımda ən ümdə maraq vətəndaşın, dövlətin marağı, arzusunun təmin olunmasıdır. Ancaq gəlin görək, radikal müxalifətdə milli və dövlətçilik maraqları məfhumu və məfkurəsi varmı? “Eurovision” bizim böyük nailiyyətimizdir və gələn ay Azərbaycana on minlərlə turist gələcək. Azərbaycan haqqında geniş məlumatlar əldə olunacaq, inkişafımızla tanış olacaqlar, Azərbaycan daha geniş arealda tanınacaq, təbliğ olunacaq. Bunun əvəzinə müxalifət öz xırda ambisiyasına uyaraq konkret cinayət törətmiş insanların azadlığını tələb edir. Axı bu absurddur, mədəni bir tədbirə siyasi don geyindirmək istəyidir.

A.Badamov: Azərbaycan çoxpartiyalı demokratik bir dövlətdir. Müxalifətin varlığı ölkədə demokratiyanın göstəricisidir. İndiki radikal müxalifət vaxtilə hakimiyyətdə təmsil olunurdu və onların potensialını xalq gördü. Həmin dövrdə Azərbaycan uçurumun bir addımına gəlib çatmışdı, olan qalan infrastruktur da dağıdıldı, xaos yarandı. Hazırkı iqtidar gəldikdən sonra isə ölkədə siyasi sabitlik yarandı, bu gün haqqında danışdığımız nailiyyətlər əldə olundu, Azərbaycanın iqtisadi qüdrəti artdı. Müxalifət də bu reallığı görməlidir. Müxalifətin gücü aprelin 8-də bəlli oldu. Real olaraq onların gücsüzlüyü ortadadır. Bu gün Azərbaycan xalqı öz iqtidarını, Prezident İlham Əliyevin yürütdüyü siyasəti birmənalı şəkildə dəstəkləyir. Bu dəstək, birlik isə bütün uğurların təməlini təşkil edir.

Aqşin ŞAHİNOĞLU,

Pərviz SADAYOĞLU

Yeni Azərbaycan.- 2012.- 13 aprel.- S.6.