YAP Gənclər Birliyinin cənub regionu üzrə zona müşavirəsi keçirilir

Müşavirə çərçivəsində Lənkəran Dövlət Universitetində və Lənkərandakı Heydər Əliyev İdarəçilik Mərkəzində görüşlər olub, müxtəlif mövzularda diskussiyalar keçirilib

Məlum olduğu kimi, gənclərə göstərilən diqqət və qayğı Yeni Azərbaycan Partiyasının (YAP) fəaliyyətində əsas yerlərdən birini tutur. Məhz YAP tərəfindən bir neçə ildir ki, böyük uğurla davam etdirilən və ölkəmizin bütün bölgələrindən olan gəncləri əhatə edən yay və qış məktəbləri layihələri, həmçinin, gənclər üçün keçirilən müşavirə və seminarlar da bu diqqət və qayğının bariz nümunəsidir. Müntəzəm olaraq keçirilən bu cür tədbirlər gənclərin intellektual inkişafının, onların səmərəli istirahətinin təşkili baxımından yüksək əhəmiyyətə malikdir. Bu tədbirlərin məqsədi gənclərin həm idarəçilik potensialının, fərdi bacarıqlarının üzə çıxarılması, həm asudə vaxtlarını yaxşı keçirmələri, bir-birilə təmas və münasibət qurmaları, həm də onlar üçün intellektual və əyləncəli, idman yarışlarının təşkilidir.

Məhz bu cür tədbirlər çərçivəsində YAP-ı təmsil edən deputatlar, ictimaiyyətin tanınmış ziyalıları gənclərlə görüşlər keçirirlər. Onlar müxtəlif mövzular ətrafında fikirlərini bölüşür, gəncləri maraqlandıran suallara cavab verirlər. Təbii ki, bütün bunlar gənclərdə böyük maraq doğurur və onlar üçün yaddaqalan xatirələrə çevrilir. Yeni Azərbaycan Partiyasının Gənclər Birliyinin Lənkəranda keçirilən cənub regionu üzrə zona müşavirəsi də bu istiqamətdə atılmış növbəti addımdır.

Qeyd edək ki, müşavirə çərçivəsində aprelin 13-də Lənkəran Dövlət Universitetinin tələbələri ilə görüş olub. Görüşü giriş sözü ilə Yeni Azərbaycan Partiyası Lənkəran şəhər təşkilatının sədri, Lənkəran şəhər İcra Hakimiyyəti başçısının birinci müavini İlqar Dadaşov açıb. O, belə bir tədbirin Lənkəranda keçirilməsini və müşavirə çərçivəsində ilk görüşün Lənkəran Dövlət Universitetinin tələbələri ilə olmasını əlamətdar hadisə kimi qiymətləndirib. Natiq qeyd edib ki, tələbələrlə görüşə YAP Gənclər Birliyinin sədri Seymur Orucov, sədr müavinləri Samirə Quliyeva və Aytac Əliyeva, həmçinin, YAP Lənkəran şəhər təşkilatının Gənclər Birliyinin sədri Yalçın Əliyev gəliblər.

Tədbirdə çıxış edən Yeni Azərbaycan Partiyası Gənclər Birliyinin sədri Seymur Orucov öncə ölkəmizdə həyata keçirilən gənclər siyasətindən danışıb. Seymur Orucov qeyd edib ki, Azərbaycanın müstəqillik dövrü tarixi baxımdan o qədər də böyük bir mərhələ olmasa da, bu zaman ərzində gənclər siyasəti sahəsində çox böyük işlər görülüb: “Bu da onu göstərir ki, gənclərə çox böyük qayğı var. Ümummilli liderimiz Heydər Əliyevin əsasını qoyduğu gənclər siyasəti bu gün möhtərəm Prezidentimiz İlham Əliyev tərəfindən uğurla davam etdirilir. Bu gün Azərbaycan gəncliyi təkcə ölkə daxilində deyil, həm də dünyada aparıcı beynəlxalq təşkilatlarda ölkəmizi layiqincə təmsil edir”.

Çıxışına davam edən S.Orucov bildirib ki, YAP Gənclər Birliyi çoxşaxəli fəaliyyətini gənclərimizin fəallığı üzərində qurub. Tələbələrin gənclik ordusunun fəal hissəsi olduğunu bildirən S.Orucovun sözlərinə görə, partiyamızın və YAP-ın Gənclər Birliyinin fəaliyyət istiqamətlərindən birini də tələbə-gənclərlə iş təşkil edir: “Partiyamız həm sosial bazasına, həm də fəaliyyətinə görə siyasi palitranın avanqard qüvvəsidir. Yeni Azərbaycan Partiyasının gənclər siyasətində bir sıra prioritet istiqamətlər mövcuddur. Bununla bağlı üç əsas istiqaməti qeyd etmək istəyirəm: təşkilatlanma, beynəlxalq qurumlarda özünütəsdiq və cəmiyyətdə mütəxəssis qismində təmsil olunma. Yeni Azərbaycan Partiyasının gənclərlə bağlı siyasətinin uğurla davam etdirilməsi gənclərin ictimai-siyasi fəallığını da ildən-ilə artırır. Seçki prosesində gənclərin iştirakı, parlament və bələdiyyələrdə təmsil olunmaları buna misaldır. Hazırda dövlət gənclər siyasətinin bəhrəsi olan, bilik və bacarıqları ilə özünə etimad qazanmış gənc millət vəkillərimiz var. 2009-cu ilin dekabr ayında keçirilən bələdiyyə seçkilərində də xeyli sayda gənc qələbə qazandı. Bu proses göstərir ki, özünə inananların sayı yetərincədir. Azərbaycan həqiqətləri ilə bağlı dünyada ədalətsiz məqamlara rast gələndə istər internet forumlardakı aksiyalarda, istər beynəlxalq tədbirlərə qatılmaq nöqteyi-nəzərdən bütün proseslərdə gənclər çoxluq təşkil edir. Bu da cəmiyyətdə gənclərin fəallığından irəli gəlir. Elə dövlət və qeyri-hökumət strukturu yoxdur ki, orada gənclər təmsil olunmasın. Bu gün 560 min nəfərlik partiyamızın üzvlərinin 40 faizi gənclərdən ibarətdir. Bu, kifayət qədər böyük bir qüvvədir. Hesab edirəm ki, Azərbaycan gənclərinin YAP-ın sıralarına qoşulmasının çox ciddi əsasları var. Bu, ilk növbədə, onların Heydər Əliyev ideyalarına sadiqliyi və Prezident İlham Əliyevin siyasətini dəstəkləmələri ilə əlaqədardır. Eyni zamanda, burada YAP-ın gənclər üçün böyük imkanlar yaratması da xüsusi rol oynayır. Yəni partiyamız gənclərə öz bilik və bacarıqlarını, potensiallarını nümayiş etdirmək üçün bütün imkanlar yaradıb. Məhz bunun nəticəsidir ki, partiyamızın sıralarında yüksək intellektli gənclər birləşib”.

Seymur Orucov onu da qeyd edib ki, YAP Gənclər Birliyi istər ölkə daxilində, istərsə də xaricdə təhsil alan azərbaycanlı tələbələrlə müntəzəm əlaqələr qurur, onların potensialından istifadə edilməsi üçün çeşidli tədbirlər reallaşdırır.

Gənclər qarşısında çıxış edən Lənkəran Dövlət Universitetinin rektoru Asəf İsgəndərov bu tarixin universitetin tələbələrinin yaddaşında dərin iz buraxacağını deyib. Hazırda hakim Yeni Azərbaycan Partiyasının regionun ən güclü partiyası olduğunu deyən rektor partiyanın Gənclər Birliyinin də öz fəallığı ilə seçildiyini bildirib. Daha sonra gənclərə müraciət edən Asəf İsgəndərov: “Sizlər bu gün öz inkişafına görə regionun lider dövləti olan Azərbaycanın daha da qüdrətlənməsi istiqamətində həyata keçirilən siyasətin yerlərdə uğurla reallaşdırılması üçün üzərinizə düşən vəzifələrin öhdəsindən layiqincə gəlməlisiniz”, - deyib.

Tədbirdə çıxış edən gənclər ölkəmizdə həyata keçirilən siyasəti dəstəklədiklərini deyiblər. Çıxışlarda gənclərin intellektual imkanlarından, yaradıcılıq qabiliyyətindən ölkə miqyasında olduğu kimi, Lənkəranda da istifadə olunduğunu bildirilib.

Müşavirə iştirakçıları daha sonra Lənkərandakı Heydər Əliyev İdarəçilik Mərkəzində olublar. Mərkəzdə gənclərə Azərbaycan xalqının Ümummilli lideri Heydər Əliyevin zəngin həyat və fəaliyyəti barədə ətraflı məlumat verilib. Bildirilib ki, müasir Azərbaycanın qurucusu Ulu öndər Heydər Əliyevin fəaliyyətində gənclər siyasəti hər zaman xüsusi yer tutub. Hələ 1969-82-ci illərdə Azərbaycan KP MK-nın birinci katibi vəzifəsində çalışarkən Ulu öndər Heydər Əliyev azərbaycanlı gənclərin intellektual inkişafı, elmi sahədə biliklərinin genişləndirilməsi və milli kadr potensialının formalaşması yönündə mühüm addımlar atıb. 1993-cü ildə xalqın təkidli tələbi ilə ikinci dəfə hakimiyyətə qayıdan Ulu öndər yenidən gənclərin ölkə həyatında fəal rol oynamasına şərait yaradıb. Vurğulanıb ki, bu gün əsası Ulu öndər Heydər Əliyev tərəfindən qoyulan siyasi kurs Prezident İlham Əliyev tərəfindən uğurla davam etdirilir.

Mərkəzdə, həmçinin, region gəncləri ilə görüş keçirilib. “Region gənclərinin ictimai-siyasi və İKT sahəsində fəaliyyəti” mövzusuna həsr olunmuş görüşü giriş sözü ilə açan YAP Gənclər Birliyinin Ofisinin əməkdaşı Elvin Hətəmov hazırda region gənclərinin ictimai-siyasi həyatdakı fəaliyyətindən bəhs edib və onların İKT sahəsində fəaliyyətinin xüsusi önəm kəsb etdiyini bildirib. O, ümumiyyətlə, bu iki məqamın bir-biri ilə sıx bağlı olduğunu deyib. Bu ilin martında Yeni Azərbaycan Partiyası Gənclər Birliyinin (YAP GB) rayon və şəhər təşkilatları sədrlərinin ümumrespublika müşavirəsinin keçirildiyini diqqətə çatdıran natiq əlavə edib ki, həmin müşavirə çərçivəsində gənclər rəqəmsal dünyanın yeni nailiyyətlərini daha dərindən mənimsəmək, sosial şəbəkələrdə fəaliyyəti səmərəli şəkildə qurmaq, elektron ünsiyyəti intensivləşdirmək və s. məsələlərlə bağlı üç müxtəlif geniş müzakirələr aparıblar.

E.Hətəmov deyib ki, bu gün hər bir Azərbaycan gənci ictimai-siyasi həyatda aktivlik nümayiş etdirməli, həmçinin, virtual aləmin, İKT-nin imkanlarından istifadə etməlidir.

Gənclər qarşısında çıxış edən Milli Məclisin Sosial siyasət komitəsinin sədri Hadi Rəcəbli ölkəmizdə həyata keçirilən və bütün sahələri əhatə edən inkişaf siyasəti barədə geniş məlumat verib. Millət vəkili deyib ki, Ulu öndər Heydər Əliyevin əsasını qoyduğu və Prezident İlham Əliyev tərəfindən uğurla davam etdirilən siyasət nəticəsində Azərbaycan regionun lider dövlətinə çevrilib. Onun sözlərinə görə, ölkəmizin bu inkişafı, əldə edilən uğurların və nailiyyətlərin müsbət təsirini gənclər də gündəlik həyatlarında hiss etməkdədirlər. Heç şübhəsiz gənclərimiz bu inkişafa adekvat olaraq öz üzərilərində işləməli, qüdrətli Azərbaycanın layiqli vətəndaşları olmaq üçün gecə-gündz çalışmalıdırlar.

O da xüsusi olaraq vurğulanıb ki, bu baxımdan, YAP Gənclər Birliyinin reallaşdırdığı tədbirlər xüsusi əhəmiyyətə malikdir. Çünki bu cür tədbirlər gənclərin nəzəri baxımından təhsil aldıqları müddətdə əldə etdikləri bilikləri paylaşmaqda onlara gözəl imkan yaradır. Bu zaman gənclər həm öz potensialını reallaşdırır, özünü sübut edir, malik olduğu natiqlik, fikir yürütmə qabiliyyətlərini üzə çıxarır, həm də fikir mübadiləsi aparmaq imkanı əldə edirlər: “Məlum olduğu kimi ölkəmizdə gənclər siyasəti çox uğurla aparılır. Prezident İlham Əliyevin rəhbərliyi ilə həyata keçirilən bu siyasətin yerlərdə uğurla icra edilməsi istiqamətində YAP-ın, həmçinin, hakim partiyanın Gənclər Birliyinin fəaliyyəti xüsusi olaraq vurğulanmalıdır. Təbii ki, YAP Gənclər Birliyinin bu tədbiri də deyilən istiqamətdə atılan mühüm addımlardan biridir. Çünki Azərbaycanın gələcəyi olan gəncləri biz məhz geniş diskussiyaların, polemikaların aparıldığı bu cür tədbirlərdə yetişdiririk. Ona görə də belə tədbirlərin regionlarda keçirilməsi xüsusi əhəmiyyət kəsb edir”.

Ölkə həyatının bir çox sahələrini əhatə edən məqsədyönlü dövlət proqramlarının, sosialyönümlü layihələrin həyata keçirilməsində gənclərin rolunun əvəzsiz olduğunu deyən millət vəkili eyni zamanda, gənclərin, xüsusilə də region gənclərinin öz fəallıqlarını artıracaqlarına inandığını bildirib: “İnanıram ki, hər bir gənc sosial-iqtisadi həyatda, ictimai-siyasi proseslərdə, elmi-mədəni sahələrdə özünə layiqli yer tutacaq. Sadəcə, sizlər öz fəaliyyətinizə daha da məsuliyyətlə yanaşmalı və dövlətimiz, partiyamız tərəfindən göstərilən etimadı layiqincə doğrultmalısınız”.

Tədbirdə çıxış edən YAP Gənclər Birliyinin sədr müavini Samirə Quliyeva isə diqqəti daha bir vacib məqama yönəldib. Onun sözlərinə görə, bu gün real həyatda müşahidə olunmayan müxtəlif qərəzli məlumatlar çox asanlıqla virtual aləmdə öz əksini tapır. Sosial şəbəkələrin yaranma tarixi və mahiyyəti barədə danışan Samirə Quliyeva qeyd edib ki, hazırda bu şəbəkələrin kiçik informasiyanın geniş auditoriyaya çatdırılması, siyasi məqsədlər və müəyyən ideologiyanın yayılması, hətta qazanc əldə etmək, yarışların təşkili və xeyriyyə aksiyalarının keçirilməsi baxımından imkanları olduqca genişdir: “Bizim bölgə gəncləri ilə keçirilən görüşlərimizdə də əsas məqsəd onların ictimai-siyasi fəallığının artırılmasına yardım etmək, həmçinin, gənclərə sosial şəbəkələrdə baş verənlər, sosial şəbəkələrdə əldə olunanlar, məsuliyyətimiz, sosial şəbəkələrdə nə əldə edə bilərik və nə etməliyik mövzusu ətrafında maarifləndirici bilgilər verməkdir”.

Görüşdə çıxış edən YAP Gənclər Birliyinin sədr müavini Aytac Əliyeva bu cür tədbirlərin təşkil olunmasının region gənclərinin ictimai-siyasi fəallığının, həmçinin, onların İKT sahəsində təcrübələrinin artırılmasına, sosial şəbəkələrdə işləmək imkanlarının genişləndirilməsinə kömək etdiyini bildirib: “Bilirsiniz ki, müasir dövrümüz İKT əsridir və bu texnologiyaları mənimsəmədən inkişaf etmək mümkün deyil. Ona görə də, bu layihələr xüsusi əhəmiyyətə malikdir. Partiyamızın Gənclər Birliyi beynəlxalq əlaqələrini də genişləndirir. Belə bir şəraitdə internet resurslarından istifadə etməklə bu əlaqələri gücləndirmək, eləcə də, Azərbaycan dövlətinin uğurlarını təbliğ etmək zəruri məsələdir. Bu seminarlar da məhz ona xidmət edir ki, gənclər İKT sahəsində təcrübələrini artırmaqla müasir texnologiyaların, sosial şəbəkələrin imkanlarından istifadə edərək Prezident İlham Əliyevin rəhbərliyi ilə Azərbaycanda həyata keçirilən inkişaf siyasətini və onun uğurlarını geniş şəkildə təbliği işini daha da gücləndirsinlər. Bu layihələr Qarabağ həqiqətlərinin dünyaya çatdırılması, həmçinin ölkəmizin inkişafını istəməyən qüvvələrə layiqli cavab verilməsi baxımından da çox önəmlidir”.

Tədbirdə çıxış edən region gəncləri bu cür görüşlərin onlarda müsbət təəssürat yaratdığını bildiriblər. Eyni zamanda, gənclərin informasiya-kommunikasiya texnologiyalarından (İKT) səmərəli istifadəsi, sosial şəbəkələrdə fəal iştirakın zəruriliyi vurğulanıb.

Bir sözlə, görünən odur ki, Yeni Azərbaycan Partiyası, həmçinin, hakim partiyanın Gənclər Birliyi Azərbaycan gəncliyinə özünü sübut etmək, daxili istedadını üzə çıxarmaq üçün perspektivli fəaliyyət platforması yaradır. Eyni zamanda, Yeni Azərbaycan Partiyasının bu tədbirləri gənclərə Ümummilli lider Heydər Əliyevin zəngin irsinin öyrənilməsi, milli dövlətçiliyimizin tarixi, onun möhkəmləndirilməsi, həmçinin, ölkədə reallaşdırılan siyasi-iqtisadi kurs haqqında biliklərin əldə olunması istiqamətində əlverişli şərait yaradır.

Qeyd edək ki, müşavirə çərçivəsində iştirakçıların asudə vaxtlarının səmərəli keçirilməsi və maraqlı istirahəti üçün bilik yarışları təşkil edilib.

P.S Aprelin 14-də keçirilən tədbirlərlə bağlı geniş reportajı qəzetimizin növbəti sayında oxuya bilərsiniz.

Nadir AZƏRİ

Yeni Azərbaycan.- 2012.- 14 aprel.- S.8.