Azərbaycan gəncliyi ictimai-siyasi proseslərdə aktiv fəaliyyəti ilə seçilir

YAP Gənclər Birliyinin cənub regionu üzrə zona müşavirəsi başa çatıb

Xəbər verdiyimiz kimi, 13-15 aprel tarixlərində Yeni Azərbaycan Partiyası (YAP) Gənclər Birliyinin cənub regionu üzrə zona müşavirəsi olub. Aprelin 14-də müşavirə çərçivəsində Lənkəran şəhərindəki Heydər Əliyev İdarəçilik Mərkəzində “Dövlət gənclər siyasətinin əsas aspektləri və gənclərin fəaliyyət istiqamətləri” mövzusunda diskussiya keçirilib. Diskussiyanı giriş sözü ilə açan YAP Gənclər Birliyinin sədri Seymur Orucov bildirib ki, Azərbaycan gəncliyinin inkişafı və ölkəmizdə gənclər siyasətinin formalaşması Ümummilli liderimiz Heydər Əliyevin adı ilə bağlıdır.

S.Orucov Azərbaycanda gənclərə diqqət və qayğı siyasətinin Prezident İlham Əliyev tərəfindən uğurla davam etdirildiyini vurğulayıb: “Bildiyiniz kimi, 2007-ci il Azərbaycanda Prezident İlham Əliyev tərəfindən “Gənclər ili” elan edildi. Azərbaycan gənclər siyasətində normativ hüquqi aktların hazırlanması, gənclərin cəmiyyətdə özünü təsdiq etməsi məsələlərində MDB məkanından xüsusilə fərqlənir, bu prosesdə öndə gedən ölkə kimi özünü sübut edib. Təbii ki, əhalisinin böyük əksəriyyəti gənclər olan, demoqrafik problemi olmayan bir ölkədə gənclərə belə yüksək münasibətin göstərilməsi bizlərin üzərinə böyük məsuliyyət qoyur”.

YAP Gənclər Birliyinin sədri deyib ki, Prezident İlham Əliyev tərəfindən həyata keçirilən gənclər siyasətinin məqsədi gənclərin bütün təbəqələrinin hərtərəfli inkişafını, ölkənin ictimai-siyasi həyatında onların yaxından iştirakını təmin etməkdir: “Məlum olduğu kimi ötən ilin iyul ayında Prezident İlham Əliyev “Azərbaycan gəncliyi 2011-2015-ci illərdə” Dövlət Proqramının təsdiq edilməsi haqqında Sərəncam imzalayıb. 144 bənddən, 88 fəsildən ibarət olan proqram gənclərin azərbaycançılıq, vətənpərvərlik ideyaları, milli və ümumbəşəri dəyərlərə hörmət ruhunda tərbiyə olunmasına, cəmiyyət həyatında aktiv şəxsiyyət kimi yetişməsinə xidmət edən gənclər siyasətinin daha da təkmilləşdirilməsi, habelə, gənclərin məşğulluğunun təmini və sosial-maddi vəziyyətinin yüksəldilməsi məqsədini daşıyır. Bu sənədin təsdiq olunması bir daha Azərbaycanda uğurlu gənclər siyasəti həyata keçirildiyini əyani şəkildə sübut edir. Fikrimcə, YAP-in keçirdiyi yay və qış məktəbləri, həmçinin, müşavirə və seminarlar bu siyasətin daha yüksək nəticələr verməsinə imkan yaradır. Bu elə tədbirlər gənclərin dövlətçilik, vətənpərvərlik ruhunda tərbiyə olunmasını təmin edir”.

S.Orucov onu da bildirib ki, YAP bu gün nəinki Azərbaycanın, eləcə də, Cənubi Qafqaz regionunun ən böyük siyasi təşkilatıdır: “Bu isə özlüyündə həmin böyük qüvvənin gənclər qurumu olaraq bizim üzərimizə əlavə məsuliyyətlər qoyur. O mənada ki, YAP-ın ölkəmizin ictimai-siyasi həyatında roluna uyğun olaraq partiyanın Gənclər Birliyi də hər zaman fəallıq nümayiş etdirməli, qarşıya qoyulan vəzifələri yerinə yetirməlidir. Son illər partiyamızın Gənclər Birliyi fəaliyyətində yeniliklər həyata keçirir, yeni layihələrlə çıxış edir, gənclərlə fəal iş aparır. Eyni zamanda, beynəlxalq əlaqələrimizi də gücləndiririk. Yəni, istər ölkə sərhədlərindən kənarda, xarici ölkələrdə fəaliyyət göstərən siyasi partiyaların gənclər qurumları ilə əlaqələrin genişləndirilməsi, istərsə də daxildə bir sıra layihələrin uğurla həyata keçirilməsi bizim gördüyümüz işlərin keyfiyyətindən xəbər verir. Bilirsiniz ki, artıq yeni ofislə təmin olunmuşuq. Bu da iş şəraitimizi xeyli yaxşılaşdırıb. Təbii ki, yaxşı iş şəraiti məhsuldar işləməyi şərtləndirir. Bu mənada YAP Gənclər Birliyi olaraq üzərimizə düşən vəzifələri bundan sonra da layiqincə yerinə yetirməyə çalışacağıq”.

Tədbirdə çıxış edən YAP Lənkəran şəhər təşkilatı Gənclər Birliyinin sədri Yalçın Əliyev deyib ki, Ulu öndər Heydər Əliyevin müəyyənləşdirdiyi və Prezident İlham Əliyevin davam etdirdiyi siyasət nəticəsində bu gün gənclər cəmiyyətdə öz yerini tutur: “Azərbaycan Respublikasının Prezidenti İlham Əliyevin həyata keçirdiyi dövlət siyasəti və bu siyasət nəticəsində gənclərin təhsil, sosial müdafiə və işlə təminatı sahələrində atılan məqsədyönlü addımlar gənclərin hakim Yeni Azərbaycan Partiyasına axınını gücləndirir. Qeyd etmək istərdim ki, YAP Lənkəran şəhər təşkilatı Gənclər Birliyinin bugünkü gənclər hərəkatında xüsusi mövqeyi və rolu var. Təşkilatımız 3495 nəfər gənci öz ətrafında birləşdirir. Ümumiyyətlə, YAP Lənkəran şəhər təşkilatını əhatə edən 152 ərazi ilk partiya təşkilatının hər birində gənclər təşkilatları fəaliyyət göstərir. Ərazi ilk təşkilatları üzrə gənclər təşkilatlarının xətti ilə yeniyetmə və gənclərin problemləri, qayğıları, asudə vaxtlarının təşkili öyrənilir, onlarda vətənpərvərlik hislərinin artırılması, siyasi maariflənmələri istiqamətində görüşlər, disputlar keçirilir, ölkə Prezidentinin həyata keçirdiyi daxili və xarici siyasətin mahiyyəti, YAP-ın ölkənin siyasi həyatında yeri, fəaliyyətinin prioritet istiqamətləri barədə mütəmadi olaraq müzakirə aparılır”.

Çıxışında radikal müxalifətin ölkəmizdə sabitliyi pozmağa cəhd göstərdiyini də deyən Y.Əliyev həmin qüvvələrin, hər zaman olduğu kimi, bu dəfə də uğursuzluğa düçar olacaqlarını bildirib: “Bəzi xarici dairələrin quluna çevirilmiş radikal müxalifət siyasətdən uzaq, sadəlövh gəncləri dövlətə qarşı ittihamlarla, gənc təbəqənin diqqətini cəlb edəcək yalan məlumatlarla öz sıralarına qatmaq istəyir. Lakin Azərbaycanın saglam düşüncəli gəncləri çoxluq təşkil edir və həmin gənclər ölkənin bugünkü sosial-iqtisadi durumundan, artmaqda davam edən inkişaf səviyyəsindən, əldə edilən uğur və nailiyyətlərdən məmnundurlar. Azərbaycanın hər yerində olduğu kimi, Lənkəran gəncləri də Prezident İlham Əliyevin ölkəmizin tərəqqisi, beynəlxalq sferada nüfuzunun artırılması, respublikanın ərazi bütövlüyünün bərpa olunması naminə həyata keçirdiyi siyasəti dəstəkləyir və radikal müxalifətin əməllərini birmənalı şəkildə pisləyirlər”.

YAP Gənclər Birliyinin təşkilati məsələlər üzrə koordinatoru Vüsalə Niftəliyeva bildirib ki, gənclərimiz müasir Azərbaycanın inkişafı prosesində fəal iştirak edir və dövlətimiz gənclərimizin vətənpərvər ruhda inkişafı üçün hər cür şəraiti yaradır: “Ulu öndər Heydər Əliyev hər bir gəncin Azərbaycanın müstəqilliyini təmin etmək üçün Vətənini, ölkəsini xalqını, millətini, dilini, dinini, milli ənənələrini sevməli olduğunu deyib. Bu gün, məhz, Ümummilli liderimizin əsasını qoyduğu, Azərbaycan Respublikasının Prezidenti, YAP Sədri İlham Əliyev tərəfindən uğurla davam etdirilən siyasət nəticəsində Azərbaycan gəncliyi cəmiyyətin inkişafında fəal sosial təbəqəyə çevrilib”.

Məruzə ətrafında çıxış edən region gəncləri də Azərbaycan dövlətinin həyata keçirdiyi gənclər siyasəti barədə danışıblar. YAP Cəlilabad rayon təşkilatı Gənclər Birliyinin sədri Anar Abdullayev ölkəmizdə gənclərin inkişafı üçün hərtərəfli şəraitin yaradıldığını, həmçinin, YAP Gənclər Birliyinin həyata keçirdiyi tədbirlərin xüsusi əhəmiyyət kəsb etdiyini bildirib: “Ölkəmizin aparıcı siyasi qüvvəsi olan YAP-ın fəaliyyətində də gənclər siyasəti xüsusi əhəmiyyətə malikdir. Partiyanın Gənclər Birliyi gənclərimizin aktiv ictimai fəaliyyətə cəlb olunması baxımından mühüm addımlar atır”.

Müşavirə çərçivəsində gənclər Lənkəran Tarix-Diyarşünaslıq Muzeyində də olublar.

Günün ikinci yarısında “Sağlam gənclik, sağlam gələcək deməkdir” mövzusunda diskussiya keçirilib. Tədbiri giriş sözü ilə açan Milli Məclisin Sosial siyasət komitəsinin sədri Hadi Rəcəbli ölkəmizdə həyata keçirilən gənclər siyasəti, gənclərə göstərilən diqqət və qayğı barədə ətraflı danışıb: “Ölkəmizdə yeni iş yerlərinin açılması, tələbə gənclərin təqaüdlərinin və gənclərin xarici ölkələrdə təhsil imkanlarının artırılması dövlətimizin gənclərlə bağlı siyasətinin əsas istiqamətləridir. Təsadüfi deyil ki, gənclər ölkənin ictimai-siyasi həyatında fəal iştirak edirlər”.

Daha sonra çıxış edən YAP Gənclər Birliyinin sədr müavini Samirə Quliyeva bildirib ki, Azərbaycanın ictimai-siyasi həyatında mühüm rola malik olan YAP hər zaman dövlətimizin inkişafı ilə bağlı məsələlərdə fəallığı ilə seçilib. Bu mənada YAP Gənclər Birliyinin üzvləri də hər zaman milli maraqlarımızın qorunması, inkişaf etdirilməsi işində fəallıq nümayiş etdirirlər: “Ölkəmizdə yüksək bilik və bacarığa, intellektə malik yeni gənc nəsil formalaşır. Sevindirici haldır ki, bu gənclərin əksəriyyəti partiyamızın sıralarında cəmləşir. Gənclərin fəaliyyəti üçün geniş imkanlar yaradan YAP onların potensialından səmərəli istifadə edir”.

O, həmçinin, “Artıq Azərbaycanda elə bir gənc nəsil formalaşıb ki, ona həm Azərbaycan cəmiyyəti etibar edir, həm də dünyada hörmət olunur. Bu gün Azərbaycan gəncliyi intellektualdır, gənclərimiz fəaliyyət göstərdikləri hər bir sahədə yüksək peşəkarlıq nümayiş etdirirlər. Gənclərimizin fəallığı Azərbaycanın beynəlxalq nüfuzuna da öz müsbət təsirini göstərir”, - sözlərini də əlavə edib.

Müşavirənin ikinci günü eyni zamanda, “Azərbaycan 2020: gələcəyə baxış” İnkişaf Konsepsiyası ilə bağlı region gənclərinin fikir və təklifləri” mövzusunda diskussiya keçirilib. Lənkərandakı “Palıdlı sahil” istirahət mərkəzində keçirilən diskussiyanın aparıcı YAP Gənclər Birliyinin sədr müavini Aytac Əliyeva deyib ki, Azərbaycanın əldə etdiyi inkişaf davamlı xarakter daşıyır. Bu mənada Prezident İlham Əliyevin 2011-ci il noyabrın 29-da imzaladığı “Azərbaycan 2020: gələcəyə baxış” İnkişaf Konsepsiyasının hazırlanması barədə Sərəncam böyük əhəmiyyətə malikdir: “Sərəncamda da qeyd olunduğu kimi, yeni mərhələnin əsas hədəfi çoxşaxəli, səmərəli və innovasiyayönümlü iqtisadiyyatın formalaşdırılması, sosial sahədə önləyici inkişaf trendinin təmin olunması və əhalinin rifahının layiqli, qabaqcıl beynəlxalq standartlara uyğun səviyyəyə çatdırılması, habelə, elmin, mədəniyyətin inkişafında, ictimai həyatın bütün istiqamətlərində yeni nailiyyətlərin əldə olunmasıdır”.

A.Əliyeva əlavə edib ki, Azərbaycanın ictimai-siyasi həyatında hər zaman fəallığı ilə seçilən, dövlətimizin inkişafına töhfə verməyə çalışan YAP Gənclər Birliyi də, məhz bu Konsepsiya ilə bağlı istər Bakıda, istərsə də bölgələrdə geniş fikir mübadilələrinin aparılmasını məqsədəuyğun sayıb.

Mövzu ətrafında çıxış edən region gəncləri də son illərdə ölkəmizdə gedən inkişaf prosesi ilə bağlı danışıblar. YAP Lerik rayon təşkilatı Gənclər Birliyinin sədri Zamiq Əhədov deyib ki, bu cür tədbirlərdə aparılan müzakirələr gənclər tərəfindən bir sıra təkliflərin səsləndirilməsi baxımından vacib xarakter daşıyır: “Bu cür tədbirlərdə aparılan müzakirələr də YAP Gənclər Birliyində təmsil olunan gənclərin dövlətimizin gələcək illərdə də uğurlu inkişafı üçün səmərə verəcək, həmçinin, İnkişaf Konsepsiyasında qeyd oluna biləcək təkliflərinin səsləndirilməsi baxımından vacib xarakter daşıyır”.

Digər çıxışçılar da müzakirələri müsbət qiymətləndirib, həmçinin, öz təklif və rəylərini səsləndiriblər.

Günün sonunda isə gənclər arasında Ümummilli liderimiz Heydər Əliyevin həyat və fəaliyyəti ilə bağlı intellektual yarış keçirilib.

Beləliklə, YAP Gənclər Birliyinin gənclərimizin hərtərəfli inkişafını hədəfləyən daha bir tədbiri başa çatıb. Tədbir iştirakçılarının yekun qənaəti bundan ibarət olub ki, həm yay və qış məktəbləri layihəsi, həm də seminar və müşavirələr gənclərə bir daha canlı ünsiyyət qurmağa, fikir mübadiləsi aparmağa, vahid məqsəd ətrafında daha sıx birləşməyə, bəzi hallarda anti-Azərbaycan qüvvələrinin şirnikləşdirici vədlərinə aldanaraq səhv istiqamət götürən gənclərin düz yola gətirilməsi üçün çağırışlar etməyə imkan yaradır. Bu isə, həm də, onu deməyə əsas verir ki, YAP hər zaman ölkə gəncliyinin vətənpərvər ruhda inkişafına şərait yaradır.

Nadir AZƏRİ

Yeni Azərbaycan.- 2012.- 17 aprel.- S.5.