Qondarma “erməni soyqırımı”: tarixi faktlar və həqiqətlər

Yeni Azərbaycan Partiyasının təşkilatçılığı ilə bu mövzuda dəyirmi masa keçirilib

Dünən “Park-İNN” otelində Yeni Azərbaycan Partiyasının (YAP) təşkilatçılığı ilə “Qondarma “erməni soyqırımı”: tarixi faktlar və həqiqətlər” mövzusunda dəyirmi masa keçirilib. Dəyirmi masada YAP İdarə Heyətinin və Siyasi Şurasının üzvləri, Milli Məclisin deputatları, siyasi partiyaların rəhbərləri, tarixçi alimlər iştirak ediblər.

Tədbirdə çıxış edən YAP Sədrinin müavini-İcra katibi, millət vəkili Əli Əhmədov bildirib ki, uydurma “soyqırımı” məsələsi ermənilərin yalan və saxtakarlıq üzərində qurulmuş siyasətinin tərkib hissəsidir. Onun sözlərinə görə, ən böyük tarixi yalan və iftiralardan biri “erməni soyqırımı” adlanır.

“Təəssüf ki, bu yalan 100 ilə yaxındır ki, yaşadılır. Kimlərsə onun yaşamasına maraqlı olduğuna görə, bir çox müxtəlif məkrli üsul və vasitələrdən istifadə etməkdən çəkinmirlər. Bu məkrli ideologiya, yalan meydana gələndən sonra yaşadığımız bölgədə dəfələrlə gərginliklər, qarşıdurmalar olub. Çünki bu yalanın kökündə insanlığa qarşı yönəlmiş ideologiya dayanır. Yəni insanlar, xalqlar arasında düşmənçilik toxumu səpmək kimi məkrli məfkurə bu ideologiyanın əsasını təşkil edir. Fikir versəniz, XX əsrin əvvəllərindən başlayaraq Sovet dönəmini istisna etməklə bütün dövrlərdə məhz erməni yalanları əsasında yaşadığımız bölgədə dəfələrlə qan tökülüb, düşmənçilik yaranıb, müharibələr baş verib. Təəssüf ki, bu günün özündə də belə “təşəbbüslər” baş alıb getməkdədir. Mən deyərdim ki, 20 faiz torpağımızın işğal olunması ilə nəticələnən Ermənistanın Azərbaycana qarşı təcavüzarlıq siyasətinin əsasında da uydurmalar üzərində qurulmuş “erməni soyqırımı” ideologiyası dayanır”, - deyə YAP Sədrinin müavini vurğulayıb.

Hər bir yalanın özünəməxsus sifəti olduğunı deyən Əli Əhmədov qeyd edib ki, uydurma “erməni soyqırımı”nın da ikrah doğuran sifəti var. Onun sözlərinə görə, bu bütünlüklə, iftira, uydurmalar və böhtanlar üzərində qurulmuş ideologiyadır: “Bu, həmçinin, xalqlar arasında düşmənçilik toxumu səpmək kimi çox ziyanlı bir məqsədi öz qarşısına qoyub və 100 ilə yaxın müddətdə bu məqsədə xidmət etməkdədir. Digər tərəfdən, bu ideologiyanın sifətini müəyyənləşdirən məqamlardan biri onun müharibələrə xidmət etməsindədir. Qeyd etdiyim kimi, XX əsrin əvvəllərindən başlamış bu ideologiya həmişə müharibə təbliğ edib, nəinki təbliğ edib, hətta müharibələrin başlamasına səbəb olub. Bu ideologiya, eyni zamanda, təcavüzkar ideologiyadır. Çünki onun məqsədi ayrı-ayrı xalqlara mənsub olan torpaqları ələ keçirməkdir. Heç şübhəsiz, Ermənistanın Azərbaycana qarşı təcavüz siyasətinin kökündə də bu ideologiyadan irəli gələn məqsədlər dayanır. Nəhayət, bu ideologiyanın sifətini müəyyənləşdirən çox ziyanlı məqamlardan biri onun Türkiyəyə və Azərbaycana, bu xalqlara qarşı çevrilməsidir. Anti-türk, anti-Azərbaycan mahiyyəti “erməni soyqırımı” uydurmasının kökündə dayanan məqamlardan biridir. Bu gün həmin ideologiya nə qədər ziyanlar verib, qanlar töküb, düşmənçilik toxumunu səpib. Hazırda da, ermənilər bu işlərini davam etdirirlər. Türkiyə və Azərbaycan vətəndaşlarının müqəddəs vəzifələrindən biri bu yalana qarşı mübarizə aparmaq, onu bütün dünyada ifşa etməkdən ibarətdir. Hesab edirəm ki, müqəddəs Qarabağ torpaqlarının işğaldan azad edilməsindən ibarət olan vəzifənin də həyata keçirilməsinin ən vacib istiqamətlərindən biri budur. Erməni yalanlarını bütünlüklə ifşa etmədən, Qarabağın azadlığı uğrunda apardığımız mübarizənin məqsədinə çatması da çətinliklərlə müşahidə olunacaq”.

Əli Əhmədov deyib ki, bu problem ümumbəşəri mahiyyət daşıyır və türklərə, azərbaycanlılara qarşı qırğınlar törətmiş ermənilərin beynəlxalq müstəvidə ifşa olunması istiqamətində səylər gücləndirilməlidir.

Dəyirmi masada çıxış edən Ana Vətən Partiyasının sədri, millət vəkili Fəzail Ağamalı tədbirin əhəmiyyətini vurğulayıb. F.Ağamalı Azərbaycan və Türkiyə xalqlarının erməni yalanlarına qarşı mübarizədə hər zaman həmrəy olduğunu bildirib. Onun sözlərinə görə, Ulu öndərimizin dediyi kimi, bir millətin iki dövləti sarsılmaz birlik nəticəsində bütün çətinikləri dəf edəcək. “Bunun üçün siyasi iradə mövcuddur. Xocalı soyqırımının 20 illiyi ilə əlaqədar Bakıda möhtəşəm yürüşün keçirilməsi, eləcə də, İstanbulun Taksim meydanında keçirilən tədbir bu faktı təsdiq edir” - deyə millət vəkili vurğulayıb.

Ədalət Partiyasının sədri, millət vəkili İlyas İsmayılov da 1915-ci ildə ermənilərə qarşı soyqırımın törədilmədiyini deyib. Onun sözlərinə görə, tarix bunu təsdiq edir. Bu uydurmanın davam etməsində maraqlı qüvvələrin olduğunu deyən İ.İsmayılov bildirib ki, əsl soyqırımının ermənilər tərəfindən xalqımıza qarşı törədildiyi halda dünya ictimaiyyəti susur: “Bütün bunlar göstərir ki, məsələlərə yanaşmada siyasi maraqlar var. Ona görə də, bu gün Ermənistan dünyada təcavüzkar kimi tanınmır. Mənim fikrimcə, ATƏT Qarabağ probleminin həllinə nail olmayacaq. Çünki bu təşkilatın qərarlarının hüquqi qüvvəsi yoxdur, yalnız tövsiyə xarakteri daşıyır. Biz məsələnin BMT Təhlükəsizlik Şurasına çıxarılmasına çalışmalıyıq. Əgər bu təşkilat da obyektiv qərar verməsə, qəbul olunmuş qətnamələri yerinə yetirməsə, onda işğal olunmuş torpaqları özümüz azad etməliyik. Bunun üçün dövlətimizin gücü yetərlidir”.

AMEA-nın Şərqşünaslıq İnstitutunun direktoru, millət vəkili Gövhər Baxşəliyeva isə 1915-ci il hadisələri ilə bağlı faktlara toxunub. Onun sözlərinə görə, ermənilər həmin hadisələr zamanı 1,5 milyon nəfərin öldürüldüyünü iddia etsə də, bunun heç bir əsası yoxdur: “Mürəkkəb bir vəziyyətdə Osmanlı dövləti Van gölünün ətrafından erməniləri başqa bir yerə köçürüb. Bu köçürmə reallaşdırılarkən müəyyən səbəblərdən ölüm halları baş verib. O zaman Van gölü ətrafında 150 min erməni yaşayırdı, bütövlükdə isə Türkiyədə yaşayan ermənilərin sayı 350 min nəfərə qədər olub. Belə olan halda, 1,5 milyon erməninin öldürülməsi haqda deyilənlər tamamilə yalandır”.

G.Baxşəliyeva ermənilərin azərbaycanlılara qarşı soyqırımı törətdiyini faktlarla əsaslandırıb. Bu məsələ haqda ciddi elmi araşdırmaların aparıldığını deyən millət vəkili Azərbaycan və Türkiyənin səylərini təqdir edib. Onun sözlərinə görə, Ermənistanın işğalçılıq siyasətindən əl çəkməsi üçün erməni xalqının ziyalıları da təşəbbüslər göstərməlidir: “Bəzi ziyalılar var ki, Ermənistanın işğalçılıq siyasətinə etiraz edirlər. Çünki mağara psixologiyası ilə sivil cəmiyyət qurmaq mümkün deyil. Ona görə də, sağlam məntiqli ziyalıların çox olması lazımdır ki, erməni cəmiyyətini sülhə hazırlasın”.

YAP İdarə Heyətinin üzvü, partiyanın Səbail rayon təşkilatının sədri Zahid Qaralov bütün dövrlərdə ermənilərin türklərə və azərbaycanlılara qarşı məkrli siyasət həyata keçirdiklərini bildirib. O sovetlər dönəmində “Osmanlı imperiyasının ermənilərə qarşı soyqırımı” adlı irihəcmli kitab nəşr olunduğunu xatırladıb. Z.Qaralovun sözlərinə görə, bu günün özündə də ermənilər təbliğat işlərində bu kitabdan istifadə edirlər. “Ermənilər uşaqdan böyüyə qədər türkə qarşı nifrət aşılayırlar. Hesab edirəm ki, tarixçi alimlər erməni iddialarına cavab vermək üçün səylərini gücləndirməlidirlər” - deyə, YAP İdarə Heyətinin üzvü qeyd edib.

AMEA-nın Tarix İnstitutunun direktor müavini Cəbi Bəhramov məsələ haqqında tarixi məlumatları tədbir iştirakçılarının diqqətinə çatdırıb. Onun sözlərinə görə, “erməni soyqırımı”nın nə elmi, nə tarixi, nə də hüquqi əsası yoxdur. C.Bəhramov deyib ki, əslində, ermənilər XIX əsrin sonlarından tutmuş XX əsr ərzində 2,5 milyon azərbaycanlını qətlə yetiriblər. Tarixçi alim ermənilərə bir sıra dövlətlərin dəstək verdiyini vurğulayıb.

Şimali Kipr Türk Cümhuriyyətinin ölkəmizdəki nümayəndəliyinin rəhbəri Zəki Qazioğlu isə bildirib ki, hər il 24 aprel tarixi ərəfəsində belə tədbirlər keçirilir: “Dünyada bəzi qüvvələr uydurma “erməni soyqırımı”nın gündəmdə olmasına çalışır. Şübhəsiz ki, burada siyasi maraqlar var. Hesab edirəm ki, dünyanın nüfuzlu tarixçi alimlərini bu prosesə cəlb etmək lazımdır. Onların imzasını almağa nail olmalıyıq ki, tarixdə “erməni soyqırımı” baş verməyib. Əgər bundan sonra hansısa dövlətlər bu məsələni gündəmə gətirəcəkcə, dostumuzun və düşmənimizin kim olduğunu biləcəyik”.

YAP Siyasi Şurasının üzvü, millət vəkili Məlahət İbrahimqızı isə çıxışında ermənilərin azərbaycanlılara qarşı soyqırımı törətdiyini bildirib. M.İbrahimqızı bu yaxınlarda Z.Balayanın ABŞ-dakı erməni saytlarındakı fikirlərinə toxunub. O, qondarma “soyqırımı”nın dünyada tanıdılması istiqamətində görülən işlərdən danışıb və hazırda bu işin çətinləşdiyini deyib. Millət vəkili bunu Türkiyənin və Azərbaycanın güclənməsi ilə əlaqələndirib. “Ümummilli məsələlərdə hər zaman bir yerdə olmalıyıq”, - deyən millət vəkili bildirib ki, bu problem Türkiyə ilə Azərbaycanın ortaq məsələsidir. “Artıq son illər görülən işlər nəticəsində “erməni soyqırımı”nın tanıdılması prosesi dayanıb. Əgər 10-15 il əvvəl hansısa dövlət bunu tanıyırdısa, indi belə hadisələr baş vermir. Təbii ki, burada Türkiyə və Azərbaycanın gördüyü işlər qiymətləndirilməlidir. Dövlətlərlə yanaşı xaricdəki diasporamızın fəaliyyətini xüsusi qeyd etmək lazımdır” - deyə, M.İbrahimqızı bildirib.

YAP İdarə Heyətinin üzvü Kərim Kərimov çıxış edərək uydurma “erməni soyqırımı”nın saxtakarlıq olduğunu, tarixi həqiqətləri əks etdirmədiyini vurğulayıb. O, bu çirkin oyundan qardaş Türkiyəyə qarşı təzyiq kimi istifadə olunduğu qeyd edib: “O zaman 1 milyonluq rus ordusunda 150 minə qədər erməni döyüşürdü. Həmin ermənilər minlərlə günahsız dinc türkləri qətlə yetiriblər. Hesab edirəm ki, erməni vəhşiliyini əks etdirən faktlar dərs vəsaitlərinə daxil edilməlidir”.

Tədbirdə çıxış edən Türkiyənin ölkəmizdəki fövqəladə və səlahiyyətli səfiri Hulusi Kılıc bu məsələdə göstərilən dəstəyə görə Azərbaycan dövlətinə təşəkkür edib. O qeyd edib ki, uydurma “erməni soyqırımı”nın dünyada ifşa olunması istiqamətində Azərbaycan Türkiyəyə çox ciddi dəstək verir. Səfirin sözlərinə görə, hər iki dövlətin birgə səyi ilə erməni yalanlarının ifşasında mühüm nəticələr əldə olunur. H.Kılıc deyib ki, “erməni soyqırımı” iddiaları yalandır, iftiradır, heç bir hüquqi əsası yoxdur.

Səfir xatırladıb ki, 2005-ci ildə Türkiyənin baş naziri Ermənistana arxivlərin açılmasını, tarixi faktları olduğu kimi qəbul etməyi təklif etmişdi: “Lakin ermənilər bunu qəbul etmədilər. Tarixçilər tarix, siyasətçilər siyasətlə məşğul olmalıdır. Biz sülh və sabitlik istəyirik. Bütün olanlar dünyanın gözü önündədir. Ermənilərin Azərbaycan torpaqlarındakı işğalı hələ bitməyib, lakin kimsə səsini çıxarmır və biz ikili standartların davam etdiyini görürük. Bütün bunlara qarşı mübarizəmizi daim aparacağıq. Prezident İlham Əliyevin dediyi kimi, bir millətin iki diasporu ola bilməz. Bu mənada diaspor təşkilatlarımız birgə fəaliyyətlərini gücləndirirlər”.

Nardar BAYRAMLI

Yeni Azərbaycan.- 2012.- 25 aprel.- S.4.