Qəbələ Beynəlxalq Musiqi Festivalı əsl musiqi bayramıdır

Heydər Əliyev Fondunun təşkilatçılığı ilə keçirilən festival Azərbaycan mədəniyyətini dünyaya tanıdır

Bu günlərdə Azərbaycanın ən gözəl məkanlarından olan Qəbələdə IV Beynəlxalq Musiqi Festivalı keçirilir. Avqustun 5-dək davam edəcək Qəbələ IV Beynəlxalq Musiqi Festivalında Azərbaycanla yanaşı, müxtəlif ölkələrdən görkəmli musiqiçilər, ifaçılar qonaq qismində iştirak edir. Heydər Əliyev Fondunun təşkilatçılığı ilə keçirilən festivalda Azərbaycanın görkəmli bəstəkarları, musiqi yaradıcıları ilə yanaşı, dünya şöhrətli xarici bəstəkarların da əsərləri ifa edilir. Festival çərçivəsində muğam, vokal, kamera musiqisi axşamları təşkil olunur. Festivalda Moskva Dövlət Filarmoniyasının bədii rəhbəri, Rusiyanın Xalq artisti, bəstəkar Aleksandr Çaykovskinin xüsusi olaraq Qəbələ IV Beynəlxalq Musiqi Festivalı üçün yazdığı “Xocalı” matəm musiqisi təqdim edilib. İlk dəfə təqdim olunan və peşəkarcasına ifa edilən bu musiqi əsəri tamaşaçıların böyük marağına səbəb olub.

Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın festival iştirakçılarına ünvanladığı təbrik məktubunda da deyildiyi kimi, Qəbələ IV Beynəlxalq Musiqi Festivalı unudulmaz mədəniyyət hadisəsinə çevriləcək: “İnanıram ki, hər il olduğu kimi, bir çox dünya şöhrətli musiqi xadimlərinin iştirakı ilə keçirilən builki festival da unudulmaz musiqi bayramına çevriləcək və musiqi mədəniyyəti tariximizdə mənalı səhifələrdən biri kimi qalacaqdır”.

Heydər Əliyev Fondu musiqi mədəniyyətimizin keşikçisidir

Ümumiyyətlə, Azərbaycan musiqisinin dünyada təbliği və ölkəmizin beynəlxalq mədəniyyət mərkəzinə çevrilməsi Heydər Əliyev Fondunun Prezidenti, UNESCO-nun və İSESCO-nun xoşməramlı səfiri, millət vəkili Mehriban xanım Əliyevanın fəaliyyətində əsas istiqamətlərdən birini təşkil edir. Azərbaycanın muğam və aşıq sənətinin UNESCO-nun Qeyri-maddi mədəni irs siyahısına daxil edilməsində böyük xidmətlər göstərən Heydər Əliyev Fondunun dəstəyi ilə keçirilən Qəbələ Beynəlxalq Musiqi Festivalı ölkə mədəniyyətinin tanıdılması istiqamətində görülən işlərin zirvəsini təşkil edir.

Heydər Əliyev Fondunun ən böyük layihələrindən olan Qəbələ Beynəlxalq Musiqi Festivalı 2009-cu ildən başlayaraq hər il yay aylarında keçirilir. Artıq ənənə halını alan festival beynəlxalq miqyasda böyük marağa səbəb olub. Dünyada keçirilən mədəniyyət tədbirləri arasında özünə yer tapan Qəbələ Beynəlxalq Musiqi Festivalı Azərbaycanı dünyanın mədəniyyət mərkəzlərindən birinə çevirib. Bu festival ölkəmizdə mədəniyyətə, musiqiyə, incəsənətə nə qədər böyük önəm verildiyini göstərir.

Qəbələdə keçirilən musiqi festivalı Azərbaycan xalqının əsrlər boyu yaradıb günümüzədək yaşatdığı milli musiqimizin nadir incilərinin, eləcə də, Qara Qarayev, Üzeyir Hacıbəyov, Soltan Hacıbəyov, Fikrət Əmirov kimi milli musiqinin dünya musiqisi ilə sintezindən yaranan gözəl sənət nümunələrinin müəlliflərinin əsərlərinin dünyaya tanıdılmasında mühüm rola malikdir. Ölkəmiz barəsində informasiyaya malik olmayan, yaxud Azərbaycanı yalnız neft ölkəsi kimi tanıyan xarici ölkə vətəndaşları Qəbələdə olduqdan və festivalda iştirak etdikdən sonra Azərbaycan mədəniyyəti barədə tamamilə yeni və zəngin təəssüratlara sahib olurlar.

Azərbaycan mədəniyyətlərarası dialoqun mərkəzi kimi

Qəbələ Festivalı həm də Azərbaycanın mədəniyyətlərarası dialoqun təşkilindəki rolunun da dəfələrlə artması deməkdir. Bildiyimiz kimi, Azərbaycanın iqtisadi, siyasi, habelə informasiya-kommunikasiya texnologiyaları sahəsində Avropa ilə Asiyanı birləşdirən mühüm dəhliz olması beynəlxalq miqyasda qəbul olunur. Qəbələdə keçirilən musiqi festivalı isə ölkəmizin həm də mədəniyyətlərarası dialoqda önəmli körpü rolunu oynadığını sübuta yetirir. Festivalda iştirak etmək üçün ölkəmizə gələn qonaqların mənsub olduğu region və ölkələrin müxtəlifliyi də bu fikri təsdiq edir. Belə ki, Amerika və Avropa qitələrindən, Uzaq Şərq regionundan qatılan qonaqların təmsil etdikləri musiqi mədəniyyəti nümunələrinin bir arada, bir məkanda səslənməsi mədəniyyətlərarası dialoqun gerçəkləşməsinə xidmət edən mühüm mədəniyyət hadisəsidir. Təsadüfi deyil ki, festivalda iştirak etmək üçün ölkəmizə gələn qonaqlar da Qəbələ festivalının Qərblə Şərqi yaxınlaşdırdığını, mədəniyyətlərarası dialoqa töhfə verdiyini etiraf edirlər. Beləliklə, Azərbaycan bu gün mədəniyyət beşiyi olmaqla yanaşı, həm də dünya musiqisinə dəyər verən, onu zənginləşdirən bir diyar kimi tanınmaqdadır.

Qəbələ Festivalı və Azərbaycanın gözəlliyi xarici qonaqları heyran edib

Azərbaycanın zəngin mədəniyyəti, gözəl təbiəti Qəbələ Beynəlxalq Musiqi Festivalında iştirak edən xarici qonaqların yaddaşında silinməz iz qoyur, ölkəmizin müsbət imicini formalaşdırır. Festivala iştirakçı və tamaşaçı qismində qatılanların “AzərTAc”da əksini tapan müsahibələri bu möhtəşəm beynəlxalq musiqi tədbirinin və Qəbələnin gözəlliklərinin onlarda yaratdığı xoş təəssüratları ifadə edir.

Məsələn, Heydər Əliyev Fondunun təşkilatçılığı ilə keçirilən Qəbələ IV Beynəlxalq Musiqi Festivalının iştirakçısı, Rusiya Federasiyasının Xalq artisti, “Moskva virtuozları” kamera orkestrinin solisti və direktoru Qriqori Kovalevski Azərbaycana heyranlığını gizlətməyib: “Dostlarım Azərbaycan, onun gözəl paytaxtı haqqında mənə çox danışmışdılar. Qiyabi tanıdığım bu diyara sözün əsl mənasında heyran olmuşdum. Ona görə də, çoxdan idi ki, Azərbaycana gəlmək arzusundaydım. Bu arada Qəbələ IV Beynəlxalq Musiqi Festivalında iştirak etmək təklifini aldım və məmnuniyyətlə razılaşdım. Şübhəsiz, Bakı gözəl şəhərdir, lakin təbiətin qoynunda yerləşən Qəbələdə konsert vermək isə sözlə ifadə oluna bilməyən özgə bir hissdir”.

Qonaq əlavə edib ki, festivalın hələ çox gənc olmasına baxmayaraq, tamaşaçı auditoriyası burada klassik musiqiyə qulaq asmağa böyük həvəsin olduğunu göstərir. O, növbəti illərdə də bu musiqi tədbirində iştirakını səbrsizliklə gözləyəcəyini bildirib: “Hesab edirəm ki, tamaşaçılar ifamızdan razı qaldılar. Hər bir ifaçı çıxışı zamanı tamaşaçı ilə əlaqə yaratmağı bacarmalıdır. Bu, çox vacibdir. Belə gözəl təbiətin qoynunda təşkil edilən möhtəşəm festivala görə Heydər Əliyev Fonduna təşəkkür etmək lazımdır. Gözəl təşəbbüsdür”.

Festivalın konsertlərinə tamaşa edən Rumıniyanın ölkəmizdəki səfiri Daniel Çiobanu Qəbələnin qonaqpərvər insanlarına, gözəl təbiətinə heyran qaldığını söyləyib: “Bu, mənim Qəbələyə ilk gəlişimdir. Burada həqiqətən də festival ab-havası hökm sürür. Xoşbəxtəm ki, Qəbələ kimi gözəl bir məkandayam. Burada dünya musiqisi incilərindən ibarət gözəl konsert proqramını dinləyirəm. Məni buraya dəvət etdikləri üçün azərbaycanlı dostlarıma minnətdarlığımı bildirirəm. Ümidvaram ki, gələn illərdə də bu festivala tamaşa edəcəyəm”.

Səfir Azərbaycanı çox sevdiyini, Festivalın isə onda dərin təəssüratlar yaratdığını deyib: “Xüsusilə də, dinləyicilərin yüksək mədəniyyəti, klassik və milli musiqiyə eyni dərəcədə rəğbətlə yanaşmaları məni valeh etdi. Bu festivalı təşkil edənləri belə bir gözəl təşəbbüs münasibətilə təbrik edirəm. Qəbələ festivalında hər bir konsert çox möhtəşəm keçir. Belə festivalla hər bir ölkə fəxr edə bilər. Festivalın yüksək səviyyədə təşkilinə görə Azərbaycan dövlətinin başçısı İlham Əliyevə, eləcə də, Heydər Əliyev Fondunun prezidenti Mehriban xanım Əliyevaya dərin minnətdarlığımı bildirirəm”.

Dünya şöhrətli pianoçu Boris Berezovski Qəbələdə keçirilən mətbuat konfransında bildirib ki, gələcəkdə Qəbələ musiqi festivalı elə bir səviyyəyə çatacaq ki, dünyanın hər yerindən bura musiqiçilər və tamaşaçılar gələcəklər. Musiqiçi, həmçinin, vurğulayıb: “Mən səkkiz dildə təmiz danışan Dmitri Yablonski ilə 15 ildir ki, dostam. Onun dəvəti ilə hər il bu festivalda iştirak edirəm. Burada gözəl təbiət qoynunda klassik musiqini ifa etmək və onu dinləmək insana unudulmaz duyğular yaşadır. Festival iştirakçılarına qarşı tamaşaçılar tərəfindən isti münasibət vardır. Auditoriyanın musiqi duyumu, qonaqpərvərliyi çox yüksəkdir və musiqiçilər ürəkdən alqışlanır”.

Qonaq Qəbələ III Beynəlxalq Musiqi Festivalından dərin təəssüratla ayrıldığını və belə gözəl musiqi tədbirində yenidən iştirak etməkdən məmnun olduğunu dilə gətirib. Paytaxtdan xeyli uzaq bir yerdə bu qədər insanın klassik musiqiyə yüksək səviyyədə maraq göstərməsinin onu valeh etdiyini söyləyən Boris Berezovski Qəbələ torpağında dünya şöhrətli musiqiçilərin bir araya gəlmələrini mühüm hadisə kimi qiymətləndirib. B.Berezovski Qəbələdə olmaqdan sevinc duyduğunu, növbəti illərdə də bu festivalda iştirak etməkdən məmnun olacağını söyləyib.

“Yeni Rusiya” Dövlət Simfonik Orkestrinin bədii rəhbəri və baş dirijoru, “Moskva solistləri” kamera ansamblının qurucusu, “Qremmi” mükafatının sahibi Yuri Başmet yerli və xarici tamaşaçılardan razılığını ifadə edib: “Mən dinləyicilərimin gündən-günə artdığını hiss edirəm. Hər konsertdə yeni dostlar, klassik musiqini dərk edən dinləyicilər tapıram”.

Görkəmli musiqiçi Azərbaycan musiqisi barədə ilk dəfə dahi Rəşid Behbudov və Müslüm Maqomayev ilə tanışlığı zamanı məlumat əldə etdiyini bildirib. Y.Başmet hər dəfə Qəbələdə keçirilən beynəlxalq musiqi festivalına dəvət edilərkən xoş hisslər keçirdiyini və bu möhtəşəm tədbirdə həvəslə iştirak etdiyini söyləyib. O həmçinin əlavə edib: “Bu festivalda iştirakım mənim üçün həm karyera, həm də Azərbaycanı yaxından tanımaq baxımından vacibdir. Ümumiyyətlə, son bir ildə Azərbaycan çox dəyişmiş, paytaxtınız, həmçinin, Qəbələ gözəlləşmiş və daha da müasirləşmişdir. Buranın təbiəti, insanları çox xoşuma gəlir. Çoxlu dostlar qazanmışam. Gələn il də bu festivalda böyük məmnuniyyətlə iştirak edəcəyəm”.

“Yeni Rusiya” Dövlət Simfonik Orkestrinin dirijoru, dünya şöhrətli violonçel ifaçısı, festivalın bədii rəhbərlərindən biri Dmitri Yablonski Qəbələdə əsl musiqi bayramının yaşandığını söyləyib. O qeyd edib ki, Qəbələdə keçirilən ənənəvi beynəlxalq musiqi festivalı Azərbaycanın musiqi tarixində yenilikdir. D.Yablonski neçə illərdir ki, belə bir festivalın paytaxt və böyük şəhərlərdə deyil, sıx meşələrlə əhatə olunmuş kiçik əyalət şəhərində gözəl təbiətin qoynunda keçirilməsini arzu etdiyini bildirib: “Heydər Əliyev Fondunun köməyi ilə artıq dörd ildir ki, bu nailiyyəti əldə etmişik və festivalın daha da inkişaf etdirilməsi üçün yeni planlar üzərində işləyirik”.

Rusiyalı musiqiçi Qəbələdə bu festivalla paralel fəaliyyətə başlayan “Beltmann” piano fabrikinin də uğurlarından danışaraq bildirib ki, hazırda müəssisədə 140 nəfər işçi çalışır və orada ildə 1200 piano istehsal etmək mümkündür. “Gələn ildən fabrikdə royal istehsalına da başlanılacaqdır. Fabrikdə pianonun yığılması zamanı hər detalın incəliklərinə diqqət yetiririk. Sentyabrda Bakıda, Azərbaycan Milli Konservatoriyasının yaxınlığında “Beltmann” piano fabrikinin satış mağazası açılacaqdır. Gələn ildən orada royal da satılacaqdır” - deyə, o, bildirib.

D.Yablonski Qəbələdə caz festivalının keçirilməsini, kamera orkestri üçün zalın inşa edilməsini arzu etdiyini və Azərbaycan xalçaları ilə yaxından maraqlandığını da qeyd edib. O, bu festivalda “Moskva solistləri” kamera orkestrinin və tanınmış musiqiçilərin iştirakı ilə “Xocalı” matəm musiqisinin ifasını tarixi hadisə adlandırıb.

Hülya MƏMMƏDLİ

Yeni Azərbaycan.- 2012.- 4 avqust.- S.3